ბინების ფასი თბილისში 2026 წელს: რაიონების მიმოხილვა, ტენდენციები და საინვესტიციო პროგნოზი

2026 წლის მონაცემებით, ბინების ფასი თბილისში კვადრატულ მეტრზე საშუალოდ $1,100-დან $2,800-მდე მერყეობს. დედაქალაქის უძრავი ქონების ბაზარი დღეს სულ უფრო მეტად ორიენტირებულია გამჭვირვალე ფასწარმოქმნასა და გრძელვადიან საინვესტიციო ღირებულებაზე, რაც ადგილობრივ მყიდველებს, ემიგრანტებსა და ინვესტორებს ახალი რეალობის წინაშე აყენებს.

სწორი გადაწყვეტილების მისაღებად აუცილებელია ზუსტად ვიცოდეთ, როგორ ნაწილდება ბინების ფასი თბილისში კონკრეტული უბნების, მშენებლობის ეტაპებისა და პროექტების ხარისხის მიხედვით. ამიტომ, წინამდებარე სტატიაში მიმდინარე საფასო დინამიკას დეტალურად განვიხილავთ.

საინვესტიციო რუკა: ბინის ფასი თბილისში და 2026 წლის მოთხოვნადი ლოკაციები

უძრავი ქონების ბაზარი წლიდან წლამდე მკაფიო სტრუქტურულ ცვლილებებს განიცდის, რაც პირდაპირ აისახება იმაზე, თუ როგორ ფორმირდება ბინების ფასები თბილისში კონკრეტული გეოგრაფიული არეალების მიხედვით. ტრადიციული ცენტრალური უბნები, როგორიცაა, მაგალითად, ვაკე და საბურთალო, კვლავინდებურად ინარჩუნებენ მაღალ საფასო პოზიციებს. აქ, პრემიუმკლასის ახალაშენებულ პროექტებში, კვადრატული მეტრის ღირებულება ხშირად $2,200-დან იწყება და $3,800-საც კი აჭარბებს. თუმცა, მაღალი ფასისა და გადატვირთული ინფრასტრუქტურის გამო, საინვესტიციო ნაკადები თანდათან ახალი, უფრო პერსპექტიული მიმართულებებისკენ ინაცვლებს. მყიდველები, რომლებიც მიზნად ისახავენ კაპიტალის გონივრულად დაბანდებას, სულ უფრო ხშირად უვლიან გვერდს ხმაურიან ცენტრს და არჩევანს ისეთ ალტერნატივებზე აკეთებენ, სადაც ფასისა და ცხოვრების ხარისხის თანაფარდობა გაცილებით დაბალანსებულია.

ამ მხრივ, 2026 წლის უძრავი ქონების რუკაზე ყველაზე მზარდ და მოთხოვნად ზონად ლისის ტბის მიმდებარე ტერიტორია იკვეთება, რომელიც წარმატებით უწევს კონკურენციას ქალაქის ცენტრს. პირობითად, ბინის ფასი ,,ქრონომეტრში’’, ბიზნესკლასის საცხოვრებელ კომპლექსში, სხვა პრემიუმ ლოკაციებთან შედარებით გაცილებით კონკურენტუნარიანია და საინვესტიციო პოტენციალითა თუ ღირებულების ზრდის დინამიკით ხშირად უსწრებს კიდეც მათ.  აღსანიშნავია, რომ ინვესტორებისა და ემიგრანტებისთვის ლისის ტერიტორია განსაკუთრებით მიმზიდველი გახდა ეკოლოგიური უპირატესობის, სიმწვანისა და დაბალი განაშენიანების გამო. 

ბაზრის მიმდინარე ანალიზი აჩვენებს იმასაც, რომ თანამედროვე ბინების ფასი თბილისში უკვე აღარ იზომება მხოლოდ გეოგრაფიული ცენტრით, მომხმარებელი სულ უფრო ხშირად ანიჭებს უპირატესობას ისეთ გარემოს, სადაც კვადრატული მეტრის საწყისი ღირებულება ეტაპობრივი ზრდის მაღალ გარანტიას იძლევა.

ფასწარმოქმნის კულტურა და ბინების ფასი თბილისში: რა იცვლება მყიდველის ფსიქოლოგიასა და დეველოპერების მიდგომაში?

თბილისის უძრავი ქონების სექტორში დიდხანს დომინირებდა მიდგომა, სადაც მყიდველისთვის ყველაფერი ორ კრიტერიუმამდე დადიოდა – ლოკაციამდე და კვადრატულის საწყის ფასამდე. 2026 წელმა კი ეს მოცემულობა მკვეთრად შეცვალა და სრულიად ახალი ტენდენცია წამოწია წინ. დღეს ადგილობრივი მყიდველებიცა და ემიგრანტებიც ხვდებიან, რომ ზედაპირულად მომხიბვლელი, საეჭვოდ დაბალი საწყისი ფასის მიღმა ხშირად გაუმართავი ინფრასტრუქტურა, უხარისხო მასალები და ფარული ხარჯები იმალება. მომხმარებელმა დაიწყო ფიქრი გრძელვადიან პერსპექტივაზე – რა დაჯდება ბინის შენახვა, რამდენად ენერგოეფექტურია შენობა და როგორ იმოქმედებს პროექტის ეკოლოგიური გარემო ოჯახის ცხოვრების ხარისხზე. ამგვარმა ტრანსფორმაციამ აიძულა სამშენებლო სექტორი, უარი ეთქვა აგრესიულ, მხოლოდ დაბალ ფასზე ორიენტირებულ მარკეტინგზე და გადასულიყო გამჭვირვალე ფასწარმოქმნასა და რეალური ღირებულების შექმნაზე.

პოტენციური მყიდველის ამ მოთხოვნას კი დედაქალაქის ბაზარზე ადეკვატურად მხოლოდ ის დეველოპერები პასუხობენ, რომლებმაც ბიზნესის კეთების ფილოსოფია შეცვალეს. სწორედ ასეთია ,,ქრონომეტრი’’, რომლისთვისაც ფასწარმოქმნის კულტურა, პირველ რიგში, მომხმარებელთან გამჭვირვალე დიალოგს ნიშნავს. კომპანია არ ცდილობს მყიდველის მიზიდვას ილუზიებითა და არარეალური დაპირებებით. აქ თითოეული გადახდილი თეთრი მშენებლობის უმაღლეს ხარისხში, მდგრადობასა და პრემიუმკლასის მასალებში ჩანს. 

ფასი VS ხარისხი: რატომ არის „ქრონომეტრის’’ შეთავაზება ლისზე ყველაზე კონკურენტუნარიანი?

როდესაც მყიდველი საცხოვრებლად ლისის ტბის მზარდ და პერსპექტიულ ზონას განიხილავს, ბუნებრივად ისმის კითხვა: რაში გამოიხატება კონკრეტული პროექტის უპირატესობა, როცა ირგვლივ უამრავი შემოთავაზებაა?  რეალურად, მთავარი განმსაზღვრელი ფაქტორი აქ ფასისა და ხარისხის თანაფარდობაა და სწორედ ამ მოცემულობაშია „ქრონომეტრის’’ ბინები თბილისში ყველაზე კონკურენტუნარიანი. კომპანიამ მოახერხა ის, რაც ბაზარზე იშვიათობაა: მაშინ, როდესაც ბინების ფასი თბილისში მუდმივად იზრდება, ,,ქრონომეტრმა’’ ევროპულ  სტანდარტებთან შესაბამისი, ბიზნესკლასის საცხოვრებლის მშენებლობა ისეთ საფასო სეგმენტში შეინარჩუნა, რომელიც მაქსიმალურად მისაღებია როგორც ოჯახებისთვის, ისე ინვესტორებისთვის. ამ შემთხვევაში კომპანიის სტრატეგია ეფუძნება პრინციპს, რომ მყიდველმა მიიღოს ის მაქსიმალური ფიზიკური და ეკონომიკური სარგებელი, რაც გრძელვადიან პერსპექტივაში ბინის საბაზრო ღირებულებას სტაბილურად გაზრდის.

ეს ეკონომიკური უპირატესობა, პირველ რიგში, ბინების ჩაბარების სტანდარტით არის განპირობებული – ბინები თბილისში, ,,ქრონომეტრის’’ პროექტში, ბაზარზე უმაღლესი ხარისხის მწვანე კარკასის სახით არის წარმოდგენილი, რაც იმას ნიშნავს, რომ მომხმარებელი დაზღვეულია მოულოდნელი დანახარჯებისგან, ზოგავს დროს და რემონტის ეტაპზე გაცილებით ნაკლებ ფინანსურ რესურსს ხარჯავს. შესაბამისად, როდესაც კომპლექსურად აფასებ კომფორტს, მშენებლობის სიმყარესა და ეკოლოგიურ გარემოს, აშკარა ხდება, რომ ლისის ზონაში ეს შეთავაზება საუკეთესო გადაწყვეტილებაა მათთვის, ვისაც საკუთარი კაპიტალის დაცვა სურს.

როგორ ვიყიდოთ ბინა თბილისში 2026 წელს ბანკის გადასახადებისა და ზედმეტი პროცენტის გარეშე?

უძრავი ქონების შერჩევისას, ბინის ფასის გარდა, მყიდველისთვის ყველაზე კრიტიკულ ფაქტორს ფინანსების მობილიზება და გადახდის ფორმები წარმოადგენს. ტრადიციული საბანკო იპოთეკა კვლავინდებურად რჩება უძრავი ქონების შეძენის ყველაზე გავრცელებულ ინსტრუმენტად, თუმცა გრძელვადიანი ფინანსური ვალდებულებები და სტანდარტული ბიუროკრატიული პროცედურები ყველა მყიდველის საჭიროებას, ცხადია, ვერ ერგება. სწორედ ამიტომ, მათთვის, ვისაც მეტი ფინანსური მოქნილობა სურს,  დეველოპერების მიერ შემოთავაზებული შიდა განვადება საუკეთესო ალტერნატივაა. ეს მოდელი მყიდველს საშუალებას აძლევს, საკუთარი რესურსები ბევრად უფრო ოპტიმალურად გადაანაწილოს.

თუ თქვენი მიზანია, რომ მშენებარე ბინები თბილისში ზედმეტი ფინანსური წნეხის გარეშე შეიძინოთ, „ქრონომეტრის’’ მიერ შემუშავებული შიდა განვადების პირობები ზუსტად ამ საჭიროებას პასუხობს. კომპანია მომხმარებელს სთავაზობს უპროცენტო შიდა განვადებას 0%-იანი პირველადი შენატანით, რაც იმას ნიშნავს, რომ ბინის ღირებულება თანაბრად ნაწილდება მშენებლობის დასრულებამდე – ყოველგვარი დამატებითი ხარჯებისა თუ ფასნამატის გარეშე. 

საინვესტიციო თვალსაზრისით, მშენებარე ბინები განვადებით განსაკუთრებით მიმზიდველია ემიგრანტებისა და იმ ბიზნესის მფლობელებისთვის, რომელთაც შემოსავლების ოფიციალური საბანკო დასაბუთების გარეშე სურთ კაპიტალის უსაფრთხო გარემოში ინვესტირება.  „ქრონომეტრი’’ მაქსიმალურად ამარტივებს ამ პროცესს: მინიმალური ბიუროკრატია, ინდივიდუალურ გრაფიკზე მორგების შესაძლებლობა და სრული გამჭვირვალობა მყიდველს სტაბილურობის განცდას უქმნის. ეს მიდგომა ზუსტად პასუხობს მათ მოთხოვნებს, ვინც კაპიტალის დაბანდებასთან ერთად, ფინანსურ თავისუფლებასა და მოქნილობას ერთდროულად ეძებს.

ბინების ყიდვა ბათუმში – რატომ არის ძველი ბათუმი ყველაზე პერსპექტიული უბანი საინვესტიციოდ?

შავიზღვისპირეთის მარგალიტი, ბათუმი, წლებია ინარჩუნებს რეგიონში ერთ-ერთი ყველაზე დინამიკური და მიმზიდველი უძრავი ქონების ბაზრის სტატუსს. საერთაშორისო ინვესტორები, ადგილობრივი მყიდველები და უცხოეთში მცხოვრები ქართველები სულ უფრო ხშირად ინტერესდებიან ამ უნიკალური ლოკაციით. როდესაც საქმე ეხება ისეთ გადაწყვეტილებას, როგორიცაა ბინების ყიდვა ბათუმში, მყიდველთა უმრავლესობა აქტიურად აფასებს სხვადასხვა უბნებს, ფასებსა და გრძელვადიანი უკუგების პოტენციალს.

თუ კაპიტალის დაბანდება თქვენც ამ ზღვისპირა ქალაქში გსურთ და საუკეთესო ვარიანტს ეძებთ, არჩევანის გაკეთება რამდენიმე ალტერნატივას შორის მოგიწევთ: ახალი ბულვარი, გარეუბნები თუ ისტორიული ცენტრი? გამოცდილი ინვესტორები თანხმდებიან, რომ ძველი ბათუმი კვლავ რჩება ყველაზე ელიტურ და სტაბილურ ზონად, სადაც კვადრატული მეტრის ფასი დროთა განმავლობაში მხოლოდ იზრდება და რომ უძრავი ქონება ბათუმში, კერძოდ კი მის ისტორიულ ნაწილში, გამორჩეულ საინვესტიციო შესაძლებლობებს სთავაზობს მათ, ვისაც სტაბილური პასიური შემოსავლის მიღება როგორც სეზონური, ისე გრძელვადიანი იჯარიდან სურს. 

იცხოვრეთ ისტორიის ეპიცენტრში: ბინების ყიდვა ბათუმში და ძველი ქალაქის ვინტაჟური ესთეტიკა

ძველი ბათუმი მკვეთრად განსხვავდება ქალაქის ნებისმიერი სხვა ნაწილისგან – არა მხოლოდ არქიტექტურით, არამედ იმ უნიკალური ენერგიით, რომელსაც სხვადასხვა ეპოქისა და კულტურის ფენები საუკუნეების განმავლობაში ქმნიდნენ. ქვაფენილიანი ქუჩები, დახვეწილი ფასადები, მაღალჭერიანი შენობები და ზღვისპირა ბულვარის სიახლოვე ქმნის საცხოვრებელ გარემოს, რომელიც ერთდროულად ავთენტური, კომფორტული და ვიზუალურად განუმეორებელია. სწორედ ეს ვინტაჟური ესთეტიკა ხდება გადამწყვეტი ფაქტორი, როდესაც საერთაშორისო ინვესტორები ბინების ყიდვას ბათუმში განიხილავენ – ისინი ეძებენ არა უბრალოდ საცხოვრებელ ფართობს, არამედ განსაკუთრებულ ატმოსფეროსა და ისტორიას.

ამ ესთეტიკასთან ერთად, ძველი ბათუმის ღირებულება პრაქტიკული, ფინანსური პერსპექტივიდანაც აშკარაა. ამ ლოკაციაზე მდებარე პრემიუმკლასის ობიექტები მაღალი საინვესტიციო მიმზიდველობით გამოირჩევა – უძრავი ქონება ბათუმში, ისტორიულ ცენტრში, მაქსიმალურად ლიკვიდურია ნებისმიერი ეკონომიკური ციკლის დროს, ვინაიდან ძველ ქალაქში თავისუფალი მიწის ნაკვეთები პრაქტიკულად აღარ არსებობს, რაც იმას ნიშნავს, რომ აქ შეძენილი ქონების ღირებულება და საიჯარო ფასი დროთა განმავლობაში სტაბილურად იზრდება.

ვინ დგას პრესტიჟული პროექტების მიღმა? – Central Management Group-ის ხედვა

ისტორიულ ცენტრში არსებული მკაცრად შეზღუდული რესურსისა და დეფიციტური მიწოდების პირობებში, განსაკუთრებულ მნიშვნელობას იძენს ის, თუ ვინ მართავს და ავითარებს საინვესტიციო ობიექტებს. სწორედ ამ პრემიუმ სეგმენტში პოზიციონირებს Central MG (Central Management Group) – წამყვანი საინვესტიციო და მენეჯმენტ კომპანია, რომელიც სპეციალიზდება Tower Group-ისა და სხვა სტრატეგიული პარტნიორების უძრავი ქონების პროექტების განვითარებასა და ექსკლუზიურ გაყიდვებზე. კომპანია შეიქმნა მართვის, მარკეტინგისა და დეველოპმენტის წამყვანი სპეციალისტების გაერთიანებით, რომელთაც საერთო ამბიციური მიზანი ამოძრავებდა: საქართველოში მსხვილი საერთაშორისო ინვესტიციების მოზიდვა და ადგილობრივი ბაზრის გლობალურ დონეზე განვითარება. 

Central MG-ის სტრატეგია ეფუძნება მდგრადი განვითარების პრინციპებს, სადაც მთავარი აქცენტი პროექტების უმაღლეს ხარისხზე, ეკოლოგიურ სტანდარტებსა და სოციალურ პასუხისმგებლობაზე კეთდება. ციფრული პლატფორმების, ანალიტიკური მოდელებისა და ავტომატიზაციის ინოვაციური სისტემების დანერგვით, კომპანიამ სწრაფად დაიმკვიდრა ლიდერის პოზიცია ბაზარზე და ჩამოაყალიბა განვითარების ის მიმართულება, რომელიც დღეს კონკურენტებისთვისაც მთავარ ორიენტირად იქცა.

სწორედ ამ გრძელვადიანი ხედვისა და ინოვაციური მიდგომების საუკეთესო გამოხატულებაა კომპანიის პორტფოლიოში არსებული ექსკლუზიური პროექტი – Piazza Residence, რომელიც პირდაპირ პასუხობს ძველი ბათუმის მოყვარულთა და ვინტაჟური ესთეტიკის მაძიებელთა მოთხოვნებს. Central MG-მ ამ კომპლექსში შეძლო უნიკალური არქიტექტურული იდენტობის, სხვადასხვა კულტურის მრავალფეროვანი ატმოსფეროსა და თანამედროვე პრემიუმკლასის კომფორტის გაერთიანება. პროექტს განსაკუთრებულ და ექსკლუზიურ ხასიათს ანიჭებს 13-მეტრიანი მონუმენტური კოლონადები, ბუნებრივი ქვით მოპირკეთებული ფასადი და რაც მთავარია – ისტორიული მონუმენტი, რომელიც პირდაპირ არის ინტეგრირებული Piazza Residence-ის არქიტექტურაში. კომპლექსიდან გამოსვლისთანავე, მაცხოვრებლები თუ სტუმრები მომენტალურად ქალაქის ისტორიულ ქუჩებში, კულტურული ღირსშესანიშნაობებისა და მთავარი გასართობი სივრცეების ეპიცენტრში ხვდებიან, შავი ზღვის სანაპირომდე კი სულ რაღაც 10 წუთის ფეხით სავალი გზა აშორებთ. ეს არის პროექტი, რომელიც იდეალურია მათთვის, ვისაც სურს არა უბრალოდ კაპიტალის უსაფრთხოდ დაბანდება, არამედ გამორჩეული, შთამაგონებელი და კომფორტული საცხოვრებელი გარემოს შექმნა ზღვისპირა ქალაქის შუაგულში.

გრძელვადიანი საინვესტიციო მოდელები: პასიური შემოსავალი ისტორიულ ცენტრში

ბინების ყიდვა ბათუმში, ისტორიულ ცენტრში, პრაქტიკულად ნებისმიერი საინვესტიციო სტრატეგიის ფარგლებში ეფექტურად მუშაობს. მოკლევადიანი გაქირავება საერთაშორისო პლატფორმების საშუალებით განსაკუთრებით მომგებიანია აქტიურ საზაფხულო სეზონზე, როდესაც ტურისტული ნაკადი პიკს აღწევს. ამავდროულად, სეზონურობის მიუხედავად, ეს უბანი სტაბილურად ინარჩუნებს ბიზნესვიზიტორების, დიპლომატებისა და საქართველოში ხანგრძლივად მცხოვრები უცხოელი სპეციალისტების მაღალ მოთხოვნას, რაც ქონების მთელი წლის მანძილზე დატვირთულობას განაპირობებს.

ტურიზმის გლობალური განვითარება, ინფრასტრუქტურის გაუმჯობესება და საერთაშორისო ავიამიმოსვლის გაფართოება პირდაპირ აისახება საიჯარო ამონაგებსა და მოთხოვნაზე. ამ დინამიკაში ისტორიული ცენტრი ყოველთვის ლიდერობს, ვინაიდან ვინტაჟური არქიტექტურა და უბნის ავთენტური კონტექსტი ქმნის იმ უნიკალურ საცხოვრებელ გარემოს, რომლის ანალოგის შექმნა სხვა ლოკაციებზე შეუძლებელია.

სწორედ ამიტომ, Central MG-ის ექსკლუზიური პროექტი – Piazza Residence – განსაკუთრებულ ინტერესს იწვევს გამოცდილ ინვესტორებში. მათთვის, ვისთვისაც ბინების ყიდვა ბათუმში საინვესტიციო პრიორიტეტია და ვინც გადაწყვეტილებას ანალიტიკურ ფაქტორებზე დაყრდნობით იღებს. ეს უძრავი ქონება ბათუმში საუკეთესო შესაძლებლობაა კაპიტალის დასაცავად და მყარი პასიური შემოსავლის მისაღებად. 

პროექტის მიმდინარე პირობებისა და დეტალური ინფორმაციის გასაცნობად, ეწვიეთ Piazza Residence-ის ან Central MG-ის პროექტების გვერდს, ხოლო პერსონალური კონსულტაციისთვის შეგიძლიათ პირდაპირ კომპანიის გაყიდვების გუნდს დაუკავშირდეთ.

„სისხლით დაგიჭერო“ – გორში ნაცემი კაცის დედა პოლიციელების გეგმაზე

„აქეთ ემუქრებოდნენ პოლიციელები, სისხლით დაგიჭერთ, 7-წლიანზე გაუშვით ესენიო,“ – ამბობს ნინო ელიკაშვილი „ბათუმელებთან“. ის გორში, 27 მაისს პოლიციელებისგან ნაცემი ლაშა აბისონაშვილის დედაა.

  • 27 მაისს გორში პოლიციელებმა ჯგუფურად იძალადეს პაპუნა ლოცულაშვილსა და ლაშა აბისონაშვილზე. პოლიციელების ჯგუფური ძალადობის ამსახველი ვიდეო ადგილობრივმა მედიამ, „ქართლის ამბებმა“ გაავრცელა. პაპუნა ლოცულაშვილი კლინიკიდან დღეს, 28 მაისს გაწერეს – მას ნეკნები აქვს გატეხილი და ორგანოები დაჟეჟილი.

„ჩემი შვილის მდგომარეობაც რთულია, ფსიქოლოგიურად როგორ უნდა იყოს? ექსპერტიზა ჩაუტარდა, ლაშას დაზიანებები ეტყობა თავის არეში… ლაპარაკი არ სურს, ადვოკატსაც ვთხოვე დახმარება.

ესენი არიან სიკვდილს გადარჩენილი ბიჭები, რომ არა ჟურნალისტები, ვინ იცის, რა მოხდებოდა,“ – აღნიშნა ნინო ელიკაშვილმა.

დაზარალებულის დედის თქმით, გინების და ფიზიკური ძალადობის გარდა, რაც ვიდეოში მკაფიოდ ჩანს, პოლიციელები დაზარალებულებს მიმართეს: „სისხლით დაგიჭერთო“.

„სისხლით დავიჭერ“ – ასე დაემუქრა ჟურნალისტ მზია ამაღლობელს  ირაკლი დგებუაძე, ბათუმის პოლიციის ყოფილი უფროსი 2025 წლის 11 იანვარს. ამ დღეს გადაღებულ ვიდეოში ასევე ისმის, როგორ აგინებს ირაკლი დგებუაძე მზია ამაღლობელს.

"სისხლით დავიჭერ... ამას მოვუ**ნავ დედის მუ*ელს“- ბათუმის პოლიციის უფროსი აგინებს მზია ამაღლობელს

მზია ამაღლობელზე ძალადობისა და არაადამიანური მოპყრობის გამო დღემდე ირაკლი დგებუაძის პასუხი არ უგია.

მნიშვნელოვანია, რომ გორის ინციდენტის შემდეგ, მოძალადე პოლიციელების დაკავების ნაცვლად, ნაცემი მოქალაქე, პაპუნა ლოცულაშვილი დააკავეს „პოლიციელებისთვის წინააღმდეგობის გაწევის, მუქარის, ან ძალადობის მუხლით“ [სსკ-ის 353-ე მუხლი]. ეს ის მუხლია, რომლითაც მზია ამაღლობელს 2-წლიანი სასჯელი მიუსაჯეს.

___

ამ თემაზე:

6 პოლიციელი დააკავეს გორში მოქალაქის ცემის ფაქტზე – პროკურატურა

რა საგნებს ირჩევენ აბიტურიენტები ეროვნულ გამოცდებზე ყველაზე ხშირად

შეფასებისა და გამოცდების ეროვნულმა ცენტრმა 2026 წლის ერთიან ეროვნულ გამოცდებზე აბიტურიენტების არჩევითი საგნების სტატისტიკა გამოაქვეყნა.

ცენტრის ინფორმაციით, 2026 წლის ეროვნულ გამოცდებზე აბიტურიენტების მხრიდან ყველაზე მაღალი ინტერესი არჩევით საგნებს შორის ისტორიისა და მათემატიკის მიმართ დაფიქსირდა.

მოთხოვნად საგნებს შორის არის ასევე ბიოლოგია, ქიმია, სამოქალაქო განათლება, გეოგრაფია, ფიზიკა, ლიტერატურა და სახვითი და გამოყენებითი ხელოვნება.

სტატისტიკური მონაცემები შემდეგნაირად ნაწილდება:

  • ისტორია აირჩია 19 700-ზე მეტმა აბიტურიენტმა;
  • მათემატიკა აირჩია 15 400-ზე აბიტურიენტმა;
  • ბიოლოგია აირჩია 4 500-ზე მეტმა აბიტურიენტმა;
  • ქიმია აირჩია 2 500-ზე მეტმა აბიტურიენტმა;
  • სამოქალაქო განათლება აირჩია 2 500-ზე მეტმა აბიტურიენტმა;
  • გეოგრაფია აირჩია 2 500-ზე მეტმა აბიტურიენტმა;
  • ლიტერატურა აირჩია 1 700-ზე მეტმა აბიტურიენტმა;
  • ფიზიკა აირჩია 1 100-ზე მეტმა აბიტურიენტმა;
  • სახვითი და გამოყენებითი ხელოვნება აირჩია 280-ზე მეტმა აბიტურიენტმა.

ცენტრის შეფასებით, განსაკუთრებული მოთხოვნა ისტორიისა და მათემატიკის მიმართ წინა წლის მსგავსად კვლავ შენარჩუნებულია.

წელს, ეროვნულ გამოცდებზე 43 ათასზე მეტი აბიტურიენტი დარეგისტრირდა.

6 პოლიციელი დააკავეს გორში მოქალაქის ცემის ფაქტზე – პროკურატურა

პროკურატურის განცხადებით, სამსახურებრივი უფლებამოსილების ძალადობით გადამეტების ფაქტზე ექვსი პოლიციელი დააკავეს.

„შიდა ქართლისა და მცხეთა-მთიანეთის საოლქო პროკურატურის საგამოძიებო სამმართველოს მიერ, შინაგან საქმეთა სამინისტროს გენერალურ ინსპექციასთან კოორდინაციით ჩატარებული გამოძიებით დადგინდა, რომ 2026 წლის 27 მაისს, ქალაქ გორში, ბრალდებულებმა დაზარალებულის დაკავებისას, ძალადობით გადაამეტეს სამსახურებრივ უფლებამოსილებას.

განხორციელებული ძალადობის შედეგად, არსებითად დაირღვა დაზარალებულის უფლებები, ამასთან დაზიანდა მისი ჯანმრთელობა.

უმოკლეს ვადაში ჩატარებული გამოძიების შედეგად მოპოვებულ მტკიცებულებათა საფუძველზე, ბრალდებულები 28 მაისს დააკავეს.

მათ ბრალდება კანონით განსაზღვრულ ვადაში, სისხლის სამართლის კოდექსის 333-ე მუხლის მესამე ნაწილის „ბ“ ქვეპუნქტით (სამსახურებრივი უფლებამოსილების გადამეტება, ჩადენილი ძალადობით) წარედგინებათ, რაც სასჯელის სახედ და ზომად 5-დან 8 წლამდე თავისუფლების აღკვეთას ითვალისწინებს“- აცხადებს პროკურატურა.

გუშინ, 27 მაისს, გორში, კომბინატის დასახლებაში, პოლიციელებმა ჯგუფურად იძალადეს დაკავებულზე, პაპუნა ლოცულაშვილზე.

პოლიციელებისგან ძალადობის მსხვერპლი გახდა დაკავებულის მეგობარიც, ლაშა აბისონაშვილი, რომელიც, როგორც თავად ამბობს, სიტუაციის გასარკვევად და გასანეიტრალებლად მივიდა.

პოლიციელთა ძალადობის ამსახველი ვიდეო ადგილობრივმა მედიამ, „ქართლის ამბებმა“ გაავრცელა.

დღეს, 28 მაისს, ცნობილი გახდა, რომ გორში პოლიციელების მიერ ნაცემი ახალგაზრდა კლინიკიდან გაწერეს – მას ნეკნები აქვს გატეხილი და ორგანოები დაჟეჟილი.

ნახეთ ვიდეო: 

ახალი მონაცემები რუსეთის და უკრაინის სამხედრო დანაკარგებზე ომში – 28 მაისი

უკრაინის შეიარაღებული ძალების გენერალური შტაბის დღევანდელი მონაცემებით, ომის დაწყებიდან 2026 წლის 28 მაისამდე პერიოდში, რუსეთის არმიის საბრძოლო დანაკარგი არის:

  • ცოცხალი ძალა – დაახლოებით 1 360 110 ადამიანი [გასულ დღე-ღამეში +1 160. ამ მონაცემებში შედის როგორც დაღუპულები, ასევე დაჭრილები]
  • ტანკი – 11 956 ერთეული [+1]
  • ჯავშანტექნიკა – 24 625 ერთეული [+7]
  • საარტილერიო სისტემა – 42 832 ერთეული [+42]
  • MLRS – 1 806 ერთეული [+1]
  • საზენიტო საბრძოლო სისტემა – 1 397 ერთეული [+0]
  • თვითმფრინავი – 436 ერთეული [+0]
  • ვერტმფრენი – 353 ერთეული [+0]
  • უპილოტო საფრენი აპარატის ოპერატიულ-ტაქტიკური დონე – 314 902 ერთეული [+1 560]
  • სახმელეთო რობოტიზებული კომპლექსი – 1 492 ერთეული [+7]
  • გემი/ნავი – 33 ერთეული [+0]
  • წყალქვეშა ნავი – 2 ერთეული [+0]
  • მანქანები და საწვავის ავზები – 99 906 ერთეული [+261]
  • სპეცტექნიკა – 4 227 ერთეული [+3]
  • ფრთოსანი რაკეტა [ჩამოაგდეს] – 4 687 ერთეული [+0]

უკრაინის გენერალური შტაბის განცხადებით, საომარი მოქმედებების მაღალი ინტენსივობის გამო მონაცემები იცვლება.

უკრაინის სამხედრო დანაკარგებზე სტატისტიკური ინფორმაცია 2026 წლის 25 თებერვლის შემდეგ აღარ განუახლებია რუსეთს.

რუსეთის თავდაცვის სამინისტროს მიერ ტელეგრამ არხზე ბოლოს გავრცელებული მონაცემებით, ომის დაწყებიდან 2026 წლის 25 თებერვლამდე პერიოდში სულ განადგურებულია უკრაინის:

  • 670 თვითმფრინავი
  • 283 ვერტმფრენი
  • 117 299 უპილოტო საფრენი აპარატი
  • 651 საზენიტო სარაკეტო სისტემა
  • 27 873 ტანკი და სხვა ჯავშანტექნიკა
  • 1 674 მრავალჯერადი სარაკეტო გამშვები
  • 33 474 საველე არტილერია და ნაღმმტყორცნი
  • 55 252 სპეციალური სამხედრო მანქანა

ეს ის მონაცემებია, რომელსაც უკრაინა და რუსეთი ოფიციალურად ავრცელებენ, თუმცა ომის პირობებში შეუძლებელია ზუსტად გადამოწმება, რამდენად შეესაბამება მხარეების მიერ გავრცელებული ინფორმაცია დანაკარგების შესახებ რეალურ რიცხვებს.

ამასთან, აღნიშნულ მონაცემებთან ერთად რუსეთის თავდაცვა, უკრაინის და რუსეთის არმიის ცოცხალი ძალის საერთო დანაკარგების შესახებ სტატისტიკას არ აქვეყნებს. უკრაინის არმიის ცოცხალი ძალის დანაკარგების შესახებ მონაცემებს არ აქვეყნებს არც უკრაინა.

—

რუსეთი უკრაინაში 2022 წლის 24 თებერვალს გამთენიისას შეიჭრა და სრულმასშტაბიანი ომი დაიწყო.

ამ თემაზე:

„ეს ომი დაასრულებს რუსეთს, რომელიც უკვე იშლება“ – რუსი მწერალი
მთავარი ფოტო: უკრაინის გენშტაბი/facebook

ვის შეხვდება ადგილები ბათუმის ბულვარში – ქონების იჯარით გასხვისება დაწყებულია

ბათუმის ბულვარის ადმინისტრაციამ პლაჟზე კომერციული საქმიანობებისთვის გამოყოფილი ადგილები აუქციონზე გაიტანა. 800 კვ.მეტრიდან – 1500 კვ.მეტრამდე კომერციული ფართობები პლაჟზე ბათუმის ცენტრალურ ნაწილში, საპლაჟო ინფრასტრუქტურის განსათავსებლად უნდა გასხვისდეს. პირობა მხოლოდ შეზლონგების, ქოლგებისა და ნაგვის ურნების განთავსების შესაძლებლობას უშვებს და არ არის განკუთვნილი საკლუბო ან კაფეს ინფრასტრუქტურის მოსაწყობად.

ელექტრონული აუქციონი საპლაჟო ინფრასტრუქტურისთვის ადგილების გასასხვისებლად 22 მაისს გამოაცხადეს და 29 მაისს უნდა დასრულდეს.

ბათუმის ბულვარმა აუქციონზე უკვე გაიტანა და მაღალი კონკურენციის პირობებში გაასხვისა ე.წ. წიგნის ფორმის მცირე ზომის კომერციული ობიექტები, რომლებსაც ძირითადად სუვენირებით მოვაჭრეები იყენებენ.

წიგნის ფორმის ობიექტების საწყისი ფასი 2656 ლარი იყო, ხოლო ბიჯი 80 ლარი, უმეტეს შემთხვევაში კონკურენციის პირობებში 50-ზე მეტი ბიჯი დაიდო. თუმცა, იყო ისეთი შემთხვევებიც, როცა დადებული ბიჯების ოდენობამ 120-ს გადააჭარბა. საბოლოოდ, წიგნის ფორმის კომერციული ობიექტები ერთ შემთხვევაში 12 416 ლარად გაასხვისეს, 2 შემთხვევაში 10 000 ლარზე მეტად, სამ შემთხვევაში 5-7 ათას ლარად, ხოლო 12 შემთხვევაში დაახლოებით 3000 ლარად.

ბულვარის ადმინისტრაციამ წიგნის ფორმის კომერციული ობიექტები პირველ იანვრამდე გაასხვისა.

ბულვარის შესასვლელთან ადმინისტრაციამ, მაღალი კონკურენციის პირობებში, გაასხვისა ასევე მცირე ზომის კვების ობიექტი, საწყისი ფასი 30 094 ლარი იყო და 84 ბიჯით ქონება 105 043 ლარად გასხვისდა. ეს ქონებით სარგებლობის წლიური საფასურია და ხუთი წლის ვადით გასხვისდა.

ბათუმის ბულვარი

მოიჯარე ვალდებულია ხელშეკრულების გაფორმებიდან არაუმეტეს 30 კალენდარული დღეში აამოქმედოს სარგებლობაში გადაცემულ ქონებაზე საზოგადოებრივი დანიშნულების გართობისა და კვების ობიექტი. ეს ქონება 14 მაისს გაიცა იჯარით.

კორტების მიმდებარედ პლაჟზე, 12 257 ლარად გაასხვისეს ასევე მიწის ნაკვეთი ბულვარში სპორტულ-გამაჯანსაღებელი ფიტნეს სივრცის განსათავსებლად.

ბულვარში ე.წ. ეშმაკის ბორბალთან არსებული 77 კვ.მ. მიწის ნაკვეთზე განთავსებული 17.28 კვ.მეტრი საპირფარეშო  ერთ-ერთი ყველაზე მაღალკონკურენტული ობიექტი აღმოჩნდა – ქონების საწყისი ფასი 7800 ლარი იყო და 309 ბიჯით 80 106 ლარად გასხვისდა 3 წლის ვადით.

  • მიმდინარე აუქციონები

ანბანის კოშკთან, ბულვარის ადმინისტრაცია საპლაჟო ინფრასტრუქტურის განსათავსებლად 1491 კვ.მეტრ ტერიტორიას ასხვისებს. აუქციონი 22 მაისს გამოაცხადეს და 29 მაისს უნდა დასრულდეს.

ქონების საწყისი ფასი 53 766 ლარი, ბიჯი 1613  ლარია. ელექტრონული ვაჭრობისას საბოლოოდ დაფიქსირებული თანხა საიჯარო პერიოდის საფასურის სახით ჩაიწერება ხელშეკრულებაში, აუქციონში გამარჯვებულმა ეს თანხა [სარგებლობის საფასური] ხელშეკრულების გაფორმებამდე სრულად უნდა გადაიხადოს, სარგებლობის ვადა კი ხელშეკრულების დადებიდან პირველ ნოემბრამდე განსაზღვრეს.

აუქციონის პირობების მიხედვით, გამარჯვებული ვალდებულია აუქციონის დასრულებიდან 10 სამუშაო დღეში გააფორმოს შესაბამისი ხელშეკრულება სსიპ „ბათუმის ბულვართან“.

გარდა ამისა, აუქციონის პირობების მიხედვით, მოიჯარე ვალდებულია:

  • სახელშეკრულებო ვადაში უზრუნველყოს სარგებლობის უფლებით გადაცემული ქონების მოვლა-პატრონობა და ყოველდღიური დასუფთავება.
  •  სექტორზე განათავსოს ახალი და უხარვეზო საპლაჟე ინფრასტრუქტურა [შეზლონგი, ქოლგა, მცირე ზომის სანაგვე ყუთი], სადაც ერთი ერთეული შეზლონგის ღირებულება არ უნდა აღემატებოდეს 10 ლარს, ხოლო ერთი ერთეული ქოლგის ღირებულება არ უნდა აღემატებოდეს ხუთ ლარს.
  • სექტორზე განათავსოს საინფორმაციო ბანერი, სადაც მითითებული იქნება მომსახურების ფასები ქართულ და ინგლისურ ენაზე, ბანერის ვიზუალური მხარე უნდა შეთანხმდეს ბათუმის ბულვართან.
  • მოიჯარეს ეკრძალება იჯარის ხელშეკრულებით მიღებული უფლება-მოვალეობები გადასცეს მესამე პირს, სსიპ „ბათუმის ბულვარის“ წინასწარი თანხმობის გარეშე.
  • მოიჯარეს ეკრძალება სარგებლობის უფლებით გადაცემულ ქონებაზე ან/და მის მიმდებარედ კონსტრუქციებისა და სხვა სახის ობიექტების განთავსება, სსიპ „ბათუმის ბულვარის“ თანხმობის გარეშე.
  • მოიჯარე უფლებამოსილია დროებით სარგებლობაში გადაცემულ ტერიტორიაზე არაუმეტეს 5 კვ.მ.-ზე განათავსოს ზღვაზე სასეირნო დაფები [საბბორდები].

აუქციონზე თითქმის იდენტური პირობებით არის გატანილი ასევე, 1199 კვ.მეტრი მიწის ნაკვეთი პლაჟზე, სასტუმრო კემპინსკის მარჯვენა მხარეს – საწყისი ფასი 23 093 ლარია, ბიჯი 693 ლარი. კონსტანტინე გამსახურდიას ქუჩის გასწვრივ, მარჯვენა მხარეს პლაჟზე არსებული 496 კვ.მეტრი მიწის ნაკვეთი საწყისი ფასით 10 030 ლარად, ბიჯი 301 ლარი.

„ილია II-ის დროსაც სცადეს, მაგრამ არ გამოუვიდათ“ – რა მიზანი აქვს ივანიშვილს ეკლესიასთან დაკავშირებით

„თუ რაღაც არ იცის, მაშინ გვერდით უნდა ჰყავდეს ვინმე, რომელიც ეტყვის – თქვენო უწმინდესობავ, თქვენ განასახიერებთ საქართველოს ეკლესიას, საქართველოს ეკლესია კი, ტრადიციის მიხედვით, ფეხებში არ უვარდება მთავრობას“, – ამბობს თეოლოგი მირიან გამრეკელაშვილი „ბათუმელებთან“.

რატომ ახსენებს ასე ხშირად „ოცნების“ ხელისუფლება ტერმინებს – „სახელმწიფო რელიგია“, „ქრისტიანული სახელმწიფო“, რა მიზანი აქვს ივანიშვილს საქართველოს ეკლესიასთან დაკავშირებით და დაჰყვება თუ არა შიო მესამე ამ მიზნებს? – ამ თემაზე ვესაუბრეთ მირიან გამრეკელაშვილს.

  • „ქართულმა ოცნებამ“ დამოუკიდებლობის დღესასწაული რელიგიურ დღესასწაულად წარმოაჩინა. უფრო მეტი ილაპარაკეს რელიგიაზე, ვიდრე სახელმწიფოებრიობაზე. პარლამენტზე გამოაკრეს ბანერები – „საქართველო ქრისტიანული სახელმწიფო“, საპატრიარქოს ჩაურიცხეს 5 მილიონი „ქრისტიანობის სახელმწიფო რელიგიად გამოცხადების“ აღმნიშვნელი ღონისძიებებისთვის. ეს ყველაფერი აჩენს თუ არა საფრთხეს, რომ ივანიშვილმა შესაძლოა საქართველოს ეკლესიაც აქციოს ხელისუფლების დანამატად?

ყველამ ვიცით, რომ მოქმედმა მთავრობამ ერთხელ უკვე სცადა ამის გაკეთება, ჯერ კიდევ ილია მეორის სიცოცხლეში. თუმცა უნდა ითქვას, რომ მაშინ ეს იდეა არ იქნა მხარდაჭერილი და გაზიარებული სინოდის მიერ.

თანამედროვე მოცემულობა ცოტა სხვაა – პატრიარქი შიო მესამე გამოირჩევა ხელისუფლების მიმართ უფრო მეტი ლოიალობით. შესაბამისად, იმ შემთხვევაში, თუ მთავრობა კიდევ ერთხელ დააინიციირებს ამ წამოწყებას, მეტი შანსი ექნება. თუმცა მოცემულ მომენტში ამას არ გააკეთებენ, ამას შეიძლება ეცადონ მომავალი არჩევნების წინ.

მანამდე კი იქნება მცდელობა, რომ ეკლესია კიდევ უფრო მეტად დაუახლოვდეს სახელმწიფოს – უკვე სტრუქტურულადაც და ორგანულადაც, რასაც ვხედავთ კიდეც.

  • როგორც ვიცით, ილია მეორე წინააღმდეგი იყო მართლმადიდებლობის სახელმწიფო რელიგიად გამოცხადების, რადგან ის ხედავდა იმ საფრთხეებს, რაც მოჰყვება სახელმწიფოსა და ეკლესიის ამ ფორმით შეკავშირებას. როგორ ფიქრობთ, იმ სასულიერო პირების წინააღმდეგობას გატეხენ, ვინც მაშინ ილია მეორის პოზიციას იზიარებდა?

ილია მეორეს ჰქონდა ძალზე დიდი წონა ეკლესიაში. ფაქტობრივად, ის მართლმადიდებელი პაპი იყო და მისი პოზიცია იყო გადამწყვეტი ამ საკითხში – რასაც ქრისტიანობის სახელმწიფო რელიგიად გამოცხადება ჰქვია.

მას ამ საკითხზე ჰქონდა თავისი წარმოდგენები და მეც ბევრჯერ მომისმენია მასთან შეხვედრების დროს, რომ ეკლესიამ და სახელმწიფომ უნდა ითანამშრომლოს მჭიდროდ, მაგრამ სახელმწიფო რელიგიად გამოცხადებას არ მიესალმებოდა.

მას ჰქონდა ორი დიდი და მნიშვნელოვანი მიზეზი. პირველი არის ის, რომ ეს არ არის ქართული ტრადიცია. ის ტრადიცია, რაც აქვს ქართულ ეკლესიას სახელმწიფოსთან ურთიერთობაში, გულისხმობს მეგობრულ კონკურენციას. ეს კონცეფცია ჩამოყალიბდა მე-11 საუკუნეში და დღემდე ასე მოვიდა. ეს არის ჩვენი ეპისტემე, ჩვენი ტრადიცია.

ამის მიღმა კი არსებობს რუსული ტრადიცია, რომელიც სათავეს იღებს პეტრე პირველის დროიდან, როდესაც ეკლესია ოფიციალურად დაუქვემდებარა მან სახელმწიფოს და საერო პირი დაუნიშნა მმართველად.

  • ის მოდელი უნდათ, რაც რუსეთშია?

იმის შემდეგ, ფორმალურად რუსეთშიც გათავისუფლდა ეკლესია ამგვარი დამოკიდებულებისაგან, მაგრამ თავის თავს მაინც ისე წარმოიდგენს, როგორც სახელმწიფოს გაგრძელებას. მეტიც, მაგალითად, პატრიარქი სანქციებს ადებს მღვდლებს, რომლებიც მშვიდობაზე ქადაგებენ. მშვიდობა ხომ ქრისტიანულია, მაგრამ მაინც.

ვხედავთ, როგორი დამოკიდებულება არსებობს დღეს რუსეთში „მშვიდობის“ მიმართ, ხომ? საბავშვო ბაღებშიც კი სამხედრო ფორმებში ჰყავთ ბავშვები ჩაცმული და მორთული გეორგიევსკის ლენტებით – ამ თამაშში რუსული ეკლესია დიდი მონდომებით თანამონაწილეობს.

დააკავეს მღვდელი, რომელიც ოდესაზე სარაკეტო დარტყმების დროს პირდაპირ კოორდინატებს აწვდიდა რუსულ არტილერიას. მას ასე ესმის „საღვთო ომი“, ომი დასავლეთის წინააღმდეგ. ასეთი ტრადიცია საქართველოს არ აქვს.

მეორე მიზეზი, რის გამოც ილია მეორე არ იზიარებდა ეკლესიის და სახელმწიფოს ამ ფორმით დაახლოებას იყო ის, რომ თვითონაც საბჭოთა პერიოდში ცხოვრობდა და იცოდა, რომ სახელმწიფო „სიკეთეების“ უკან გარკვეულ ნეგატიური მოტივები დგას.

მირიან გამრეკელაშვილი.
  • ეს მოტივი შეიძლება იყოს გავლენის დათმობა ეკლესიის მხრიდან?

დიახ. ილია მეორეს ეს კარგად ესმოდა, რომ ეკლესიის დაგვირგვინება სახელმწიფო ეკლესიად არ იქნებოდა უანგარო, კეთილშობილური აქტი ხელისუფლების მხრიდან. ესმოდა, რომ ამის მიღმა იქნებოდა ერთგვარი დაჩაგვრა, ეკლესიის გადაყლაპვა და მისი სუვერენიტეტის საბოლოო ხელყოფა.

იმ შემთხვევაში, თუ ისევ იქნება [„ქართული ოცნების“ მხრიდან] ამის მცდელობა და მოხდება კენჭისყრა სინოდის დღეს არსებულ კონსტელაციაში, გადაჭრით ვერ ვიტყვით, რომ ამ გადაწყვეტილებას შეეწინააღმდეგებიან სინოდის წევრები.

ფაქტია, რომ ექვსი საეპისკოპოსო კათედრა ვაკანტურია. ამ ექვს საეპისკოპოსო კათედრაზე ახალი პატრიარქი დანიშნავს მისდამი ერთგულ ხალხს. ამასობაში, ეგრეთ წოდებული ძველი ეპისკოპოსები, რომლებიც უფრო მეტად თვითმყოფადები არიან და არ ერიდებოდნენ წინა პატრიარქის დროსაც საკუთარი აზრის გამოხატვას, ნელ-ნელა მიიწევენ საპენსიო ასაკისკენ.

მოქმედ პატრიარქს აქვს ხმის უმრავლესობა სინოდის შიგნით, მაგრამ დღეს რომ მოხდეს კენჭისყრა, ეს იდეა ვერ გავა.

  • თქვენ ახსენეთ მომდევნო არჩევნები – ორ წელზე მეტია იქამდე. ფიქრობთ, რომ ამ დროში შეიძლება გატეხონ ეკლესიის პოზიცია?   

ერთ წელიწადში შეიძლება, მაგრამ რა მოხდება მანამდე, ძნელი სათქმელია. მთავრობამ შიოს გაპატრიარქებას მხარდაჭერა გამოუცხადა ფინანსურადაც. მანამდე, სინოდის შიგნითაც მუსირებდა აზრი, რომ შიო მესამე ჯერ კიდევ მეუფეობის დროს აწარმოებდა მოლაპარაკებას ბიძინა ივანიშვილთან.

ეკლესიის შიგნით შეიქმნა წარმოდგენა, რომ თუ ის გახდებოდა პატრიარქი, მთავრობა რაღაც დათმობაზე წავიდოდა. რაც შეეხება გარეთ, დავინახეთ, რომ როგორც კი აღსაყდრდა, მთავრობამ გადასცა საპატრიარქოს მილიონები ერთგვარი საჩუქრის სახით. ამიტომ, საპარლამენტო არჩევნების წინ, კიდევ ერთხელ შეეცდებიან ამ თემის წამოწევას.

  • ივანიშვილის განწყობები ეკლესიის, საპატრიარქოს მიმართ თავიდანვე იყო ცნობილი. მან ხაზი გაუსვა იმასაც, რომ მატერიალისტია. ილია მეორის მიმართაც ალბათ არ ჰქონდა განსაკუთრებული დამოკიდებულება და გვახსოვს, უსაყვედურა კიდეც „სააკაშვილი ჩემზე მეტად გიყვარსო“. რამდენად შეიძლება მოსწონდეს მას დამოუკიდებელი და ავტორიტეტული ინსტიტუცია ეკლესიის სახით?

მატერიალისტი ვარო ივანიშვილმა რომ თქვა, ეს საკმაოდ გაბედული განაცხადი იყო მაშინ, მაგრამ პრინციპში იგულისხმა, რომ ათეისტია. შემდეგ, პოლიტტექნოლოგებმა ალბათ უთხრეს, რომ მისი დამოკიდებულება ძალიან პრაგმატულია, რადგან შემდეგ, აღარ ფიგურირებდა მის საუბრებში ეს თემა.

ცხადია, ივანიშვილს არ სურს მის პარალელურად ქვეყანაში არსებობდეს რაიმე ავტორიტეტული – იქნება ეს მედია, მწერლობა, ეკლესია თუ სხვა რამ. ამიტომ ეკლესიის მიმართ რელიგიური დამოკიდებულება კი არა აქვს, უბრალოდ სურს ეკლესია არ ფლობდეს სოციალურ ავტორიტეტს. მისი ერთგული კადრი უნდა მეთაურობდეს ეკლესიას, რომ შეძლოს ხალხის მობილიზება.

თუმცა პირდაპირ გეტყვით, რომ ეს მას გარანტიას არ აძლევს. ამიტომ ცდილობს, რომ ეკლესია როგორმე გამოფიტოს და მარწუხებში მოაქციოს. ამისთვის მან ბევრი იმუშავა.

  • პატრიარქი შიო ამის საფუძველს აძლევს?

არანაირი გარანტია არ არსებობს, მაგრამ, როგორც გითხარით, პატრიარქი არ აკეთებს ამას საკუთარი ნებით. უბრალოდ, ეკლესიაზე რამდენიმე სერიოზული შეტევა განხორციელდა – პირველი იყო ციანიდის სკანდალი და შემდეგ, სუსის კრებსები, რომელიც გამოიყენეს იმისთვის, რომ ეკლესიაში დესტრუქცია შეეტანათ.

  • შეუძლიათ ახალი პატრიარქიც დააშანტაჟონ?

შიოს კი არა, ნებისმიერი ადამიანის დაშანტაჟება შეიძლება. ხელთ შეიძლება არც არაფერი ჰქონდეთ, მაგრამ წარმოიდგინეთ ეკლესიის შიგნით ადამიანი, რომელსაც უწევს მორალური პიროვნების როლის მორგება, მაგალითი რომ იყოს სხვებისთვის. უხერხული ჭამის გადაღებაც კი შეიძლება მორალური დარტყმა იყოს მისთვის.

  • აღსაყდრების შემდეგ, ქადაგების წინ ნახსენები მისი ფრაზა – „აქ არის ბატონი ბიძინა?“ რაზე მიუთითებს, – იმაზე, რომ პატრიარქს მოსწონს ივანიშვილის ყურადღების ცენტრში ყოფნა? თქვენ რას ფიქრობთ მასზე?   

პატრიარქი შიო ფორმირებულია რუსეთში, სადაც სახელმწიფო რელიგიად ყოფნა ეკლესიისა და სტრუქტურულად თვითაღქმა არის ნორმალური ამბავი. შიოც სწავლობდა და ტრიალებდა იმ წრეში, ვინც დღეს განსაზღვრავს რუსეთის ეკლესიის კურსს და არა მარტო ეკლესიის კურსს, არამედ პოლიტიკურ ნარატივებს. კარგად იცნობს პუტინის ყოფილ მოძღვარ შევკუნოვს და მათთან კონტაქტში იყო მუდმივად, ღიადაც ულოცავდა იუბილეებს და ასე შემდეგ.

შეიძლება მას ჰქონდეს ეს ჩანაფიქრი გულში, რადგან მისი პირველი ქადაგებები არ არის გამსჭვალული ქრისტიანული გულმოწყალებისა და მისიონერული სულისკვეთებით. გარკვეულ პრობლემებს ებრძვის აკრძალვებით, ისევე როგორც რუსეთში. იგივე აბორტების თემაზე როცა თქვა, რომ სახელმწიფოს შეუძლია შეამციროს აბორტები აკრძალვებით.

  • თუმცა, პრაქტიკა აჩვენებს, რომ ეს ასე არ არის.

აქამდე ის აღარ მიდის. მას თითქოს არ სურს ამ საკითხის არსს ჩასწვდეს. ის მხოლოდ ჩამოთვლის რაღაც პრობლემატიკას და ამბობს, რომ ამის გადაჭრა შეიძლება, თუ სახელმწიფო კონკრეტულ აკრძალვებს განახორციელებს. ამიტომ არის ეს საშიში.

ის, რომ „სვეტიცხოვლობაზე“ იკითხა, „ბიძინა აქ არისო“, სხვათა შორის იყო შეცდომა. თუმცა დიდი პასუხისმგებლობა ენიჭება ასევე მის გუნდს, ვინც პასუხისმგებელი იყო ამ ცერემონიალზე.

ზოგადად, ეს პრაქტიკა, რომ პატრიარქი ჩამოდის ამბიონიდან და ეამბორება მთავრობის წარმომადგენლებს, ასე თვალშისაცემი არასდროს ყოფილა წინა პატრიარქის დროს. ის ტაძრის შესასვლელში ხვდებოდა ხოლმე მთავრობის წარმომადგენლებს და შემდეგ შედიოდნენ ტაძარში.

  • მან ხომ იცის, როგორ უნდა მოიქცეს ასეთ დროს?

შეიძლება არ იცის. შეიძლება მას მიაჩნია, რომ ჩვენი ისტორია არის სახელმწიფო ეკლესიად ყოფნა. პრობლემა იცით რა არის? შიო მესამეს მოსაზრებები ჩვენ არ ვიცით პრაქტიკულ საკითხებზე. როდესაც ქადაგებს, რაღაცნაირად საუბრობს, თითქოს ღვთის სათნო სიტყვებით, მაგრამ პრაქტიკული აზრის გამოტანა ძალიან ძნელია.

თუ რაღაც არ იცის, მაშინ გვერდით უნდა ჰყავდეს ვინმე, რომელიც ეტყვის, რომ თქვენო უწმინდესობავ, თქვენ განასახიერებთ საქართველოს ეკლესიას, საქართველოს ეკლესია კი, ტრადიციის მიხედვით, ფეხებში არ უვარდება მთავრობას.

ეს ძალიან ღრმა თეოლოგიური ამბავია. მაგალითად, წმინდა გიორგის ხატების ძალიან ბევრ ვარიაციას ვიცნობთ მსოფლიოში, მაგრამ ჩვენთან არსებობს ვარიაციები, როცა წმინდა გიორგი გმირავს მმართველს, იმპერატორს და აქ გარკვეული დაშიფრული იდეაა, რომ საერო ხელისუფლება რაღაც მომენტში შეიძლება აღმოჩნდეს ბოროტების მსახური, როგორც ეს იყო მაგალითად კოლონიზაციისა და შემდეგ გასაბჭოების პერიოდში.

მაგრამ მას შეიძლება სწორება აქვს სწორედ აი, ამ ბოლო რუსულ ტრადიციაზე. ეს ფრაზა – „ბიძინა აქ არის“, ძალიან ცუდად მოხვდა ბევრს ყურში, განსაკუთრებით ახალ თაობას და საკმაოდ შეირყა მისი იმიჯი. ადამიანებს გაუჩინა განცდა, რომ ის სამთავრობო პატრიარქია. საკითხი კი ასე მარტივად დგას – რა გადასარევი მთავრობაც არ უნდა გყავდეს, არავის სურს სამთავრობო ეკლესიის ხილვა.

  • ღონისძიებების სერია – „1700 წელი ქრისტიანობის სახელმწიფო რელიგიად გამოცხადება“, ბანერები – „საქართველო ქრისტიანული სახელმწიფო“ და ასე შემდეგ, ამ ჩანაფიქრს უკავშირდება?

კი ბატონო. მთავრობას ასეთი კონცეფცია დიდი ხანია აწვალებს და ავითარებს კიდეც, რომ მთავარია არ იყოს მნიშვნელოვანი საქართველოს სახელმწიფოებრიობა, ეროვნული დამოუკიდებლობის განცდა და ამის მიღმა ჩვენ შეგვიძლია გვჯეროდეს, რომ ვართ რაღაც ტიპის ეთნოსი, ისე როგორც ეს რუსეთის ფედერაციაშია, რომ ჩუვაშებს ან ხაკასებს შეიძლება ჰქონდეთ ეთნოსის განცდა, მაგრამ როგორც კი ისინი სტრუქტურულ-სახელმწიფოებრიობისკენ გადადგამენ ნაბიჯს, რუსეთი მაშინვე კლავს ამ ინიციატივას.

ჩემი აზრით, ეს არის პოლიტიკური ნარატივები, ანუ პოლიტ-ტექნოლოგების ჩანაფიქრი, რომ სახელმწიფოებრიობა ჩაანაცვლონ ეთნიკურ-რელიგიური წარმოდგენებით.

ეს გამოიხატება იმაშიც, რომ ძალიან დიდი დრო დაუთმეს მოქმედ პატრიარქთან მისალმებას [„ოცნების“]. პრემიერმაც და პრეზიდენტმაც და ახალარჩეულმა პატრიარქმაც ბევრი ისაუბრეს ილია მეორის ღვაწლზე, ვიდრე ამ ქვეყნის დამოუკიდებლობაზე.

შეიძლება ითქვას, რომ ისინი ცდილობენ რელიგიური ნარატივებით და თვითმყოფადობით ჩაანაცვლონ ეროვნული თვითმყოფადობა.

„მნიშვნელოვანი იყო, რამდენი ადამიანი გამოვიდოდა“ – რა აჩვენა 26 მაისის აქციამ ოპოზიციას

„შემდეგი ნაბიჯი უნდა იყოს პროტესტის გაფართოება“, – მიიჩნევენ ოპოზიციონერი პოლიტიკოსები. ზოგიერთი მათგანი არც მალავს, რომ არ ელოდა ამდენი ადამიანის რუსთაველზე გამოსვლას „ოცნების“ რეპრესიული ტალღის გაძლიერების შემდეგ.

რა აჩვენა 26 მაისის დემონსტრაციამ ოპოზიციური პოლიტიკური ძალებს და რა გეგმით აპირებს მოქმედებას ამჯერად? – ამ თემაზე ვესაუბრეთ რამდენიმე ოპოზიციონერ ლიდერს.

  • ლევან ცუცქირიძე: „ივანიშვილი დამარცხდება მოქალაქეების გაერთიანებით“ 

„თავისუფლების მოედნის“ ლიდერი, ლევან ცუცქირიძე 5 ფაქტორს ასახელებს, რაც მას 26 მაისის დემონსტრაციამ დაანახა: პირველია ის, რომ ქართველი ხალხი ივანიშვილის რეპრესიებით ვერ დააშინეს.

„ქართველი ხალხი მართლაც შეუდრეკელია. ამდენი დაშინების, რეპრესიის, ყველაფრის მიუხედავად, მაინც ბევრნი შევიკრიბეთ. ეგონათ, რომ გაგვაჩუმებდნენ, შეგვაშინებდნენ, მაგრამ ყველამ დაინახა, მგონი „იმედის“ მაყურებელმაც კი, რომ ეგ არ გამოუვიდათ.

მეორე, დავინახე ის, რასაც ჩვენ ისედაც ვხედავთ „საქართველოსთვის“ კამპანიაში, მაგრამ ამის დემონსტრაციაც იყო გუშინ, რომ ცვლილება უნდათ არა მარტო თბილისელებს, ან ბათუმელებს, არამედ ცვლილებები სურთ ყველგან. გუშინ აქციაზე შემხვდნენ მეგობრები, რომლებიც სპეციალურად ამ აქციისთვის ჩამოვიდნენ კახეთიდან, ჩამოვიდნენ აჭარიდან. ეს იყო ძალიან კარგი სიმპტომი ჩემთვის.

მესამე იყო ის, რომ პროტესტს ახალი ხალხი ემატება. ბევრად უფრო მეტი ახალგაზრდა და სტუდენტი ვნახე მსვლელობაზე, ვიდრე კარგა ხნის განმავლობაში მინახავს. ასევე, ის ადამიანები, ვინც კარგა ხანია საპროტესტო შეკრებებზე არ გამოჩენილან.

მეოთხე: ცვლილება უნდა ხალხს, მაგრამ ასევე უნდა სიახლე. ანუ პოლიტიკის განახლება – ახალი, სანდო ადამიანები. მოწოდება, რომ ანგარიშვალდებული დემოკრატიული მმართველობა გვინდა, აქამდე ისმოდა, როგორც ზედაპირული ლოზუნგი, ბოლო პერიოდში კი გადაიქცა შინაარსობრივ, პოლიტიკურ დაკვეთად. ეს გუშინაც ჩემთვის ნათელი იყო.

და ბოლოს იყო ის, რაც ძალიან გამახარა – სილაღე, სიმხნევე და გამარჯვებასთან სიახლოვის შეგრძნება. გუშინ ადამიანები მოვიდნენ განსაკუთრებულად მხნედ და ლაღი შემართებით. ჰაერში ტრიალებდა, რომ ჩვენ ამ სამართლიან ბრძოლაში შედეგს აუცილებლად მივაღწევთ. ეს იყო ჩემთვის ყველაზე მნიშვნელოვანი დაკვირვება,“ – ამბობს ლევან ცუცქირიძე „ბათუმელებთან“.

ლევან ცუცქირიძე

რუსთაველზე, დემონსტრაციაზე სიტყვით გამოსვლისას, ლევან ცუცქირიძემ მოქალაქეებს მოუწოდა, გახდნენ მათთვის სასურველი პოლიტიკური პარტიის წევრები. რატომ არ სურთ მოქალაქეებს გახდნენ ამა თუ იმ პოლიტიკური ძალის ნაწილი და აიღონ პასუხისმგებლობა, მათ შორის, წინააღმდეგობის სტრატეგიაზე?

„საზოგადოებამ და პოლიტიკურმა პარტიებმა შემხვედრი მიმართულებით დაიწყეს მოძრაობა. ჩვენ დავიწყეთ კამპანია „საქართველოსთვის“ და ხალხისკენ მოძრაობა უფრო ინტენსიურად. ხალხმაც დაინახა იმის საჭიროება, რომ თუ ჩვენ არ გავაძლიერებთ პოლიტიკურ პარტიებს, მაშინ ვერ გავიმარჯვებთ – დემოკრატიული მმართველობისთვის გვჭირდება დემოკრატიული პარტიები.

პარტიები ხომ საიდანღაც უნდა გამოიზარდონ, განვითარდნენ, გაძლიერდნენ? ეგ მოხდება მხოლოდ იმ შემთხვევაში, როცა ხალხი გახდება ამ პარტიების წევრი, სხვანაირად არ გამოდის.

ჩვენთან ბევრი ადამიანი რეგისტრირდება, როგორც მხარდამჭერი, როგორც წევრობის მსურველი და ამ ტენდენციის ზრდასაც ვხედავთ.

ერთგვარი გაუცხოება პოლიტიკურ პარტიებთან შედეგია მიზანმიმართული პროპაგანდის, რომელიც ამტკიცებს, რომ პოლიტიკა არის კორუფციის, ორპირობის, სიცრუის ადგილი. თითქოს წესიერი ხალხი პოლიტიკაში არ არის. ამით ხეირობს მხოლოდ მმართველი პარტია, რომელიც ამბობს, რომ თუ ერთიც ცუდია და მეორეც, რატომ უნდა ჩამანაცვლო? მეც ცუდი ვარ და დავრჩები.

პოლიტიკურმა კლასმაც ბევრი შეცდომა დაუშვა, რომლის გაანალიზებასაც დრო სჭირდება, ანუ ობიექტური და სუბიექტური მიზეზებია. მაგრამ ჩვენი საზოგადოება დღეს ბევრად უფრო მომწიფებულია იმისთვის, რომ დაინახოს და მოითხოვოს ანგარიშვალდებული პოლიტიკური პარტიები და ეგ ძალიან კარგია,“ – მიიჩნევს ლევან ცუცქირიძე.

რაც შეეხება ბრძოლის ახალ ეტაპს, „თავისუფლების მოედანი“ წინააღმდეგობის გაძლიერებას მოქალაქეების გაერთიანებაში ხედავს.

„ჩვენი ამოცანაა მაქსიმალურად ბევრ მოქალაქესთან მივიდეთ. მარტში ვიყავით იმერეთში, აპრილში ვიყავით აჭარაში, მალე კახეთში ვიქნებით. იქ გადაგვაქვს ჩვენი ოფისი, იქ ვცხოვრობთ, იქ ვმუშაობთ…

ივანიშვილს დავამარცხებთ მოქალაქეების კონსოლიდაციით, მოქალაქეების გაერთიანებით და პოლიტიკური წინააღმდეგობის გაძლიერებით. გაძლიერება ვერ მოხერხდება პოლიტიკური პარტიების იზოლაციაში მუშაობით, ეს უნდა მოხდეს მოქალაქეებთან ხელჩაკიდებით. ჩვენ ზუსტად ამას ვაკეთებთ. ნდობა უნდა გავაძლიეროთ. ეს ნდობა გახდება საფუძველი ჩვენი წარმატებისა.

ამ ბრძოლაში ბევრი მოქალაქის ჩართვა – იქნება ეს ქუჩაში გამოსვლა, პროტესტის სხვა ფორმები, პოლიტიკურ პარტიებთან თანამშრომლობა, სამოქალაქო ორგანიზაციებთან თანამშრომლობა – აუცილებლად მოგვიტანს იმას, რომ ვაიძულებთ ამ რეჟიმს უკან დახევას,“ – მიიჩნევს ლევან ცუცქირიძე.

  • ანა წითლიძე: „რეპრესიების მიუხედავად, არ ვწყვეტთ ბრძოლას თავისუფლებისთვის“ 

„მიუხედავად რეპრესიებისა, მიუხედავად დარბევებისა, მიუხედავად იმისა, რომ რეჟიმი სასტიკად უსწორდება საქართველოს მოქალაქეებს, მიუხედავად იმისა, რომ რეჟიმმა გამოამწყვდია საქართველოს მოქალაქეების საუკეთესო ნაწილი ციხეში – ეს იქნება ჟურნალისტი მზია ამაღლობელი, თუ პოლიტიკური ლიდერები, ფაქტობრივად, არ დარჩა არცერთი პროფესიის ადამიანი, რომელიც უკანონოდ არ არის ციხეში გამოკეტილი… და ამ ყველაფრის მიუხედავად არსად არ წასულა ბრაზი, პროტესტი, არსად არ წასულა მოქალაქეების მოტივაცია, რომ რუსული ოლიგარქიული რეჟიმი მოშორდეს ამ ქვეყანას და საქართველომ გააგრძელოს დემოკრატიული განვითარება, გახდეს ევროპული ოჯახის წევრი,“ – გვითხრა ანი წითლიძემ, „ერთიანი ნაციონალური მოძრაობის“ ერთ-ერთმა ლიდერმა.

ანა წითლიძე

ანი წითლიძე ხაზს უსვამს ასევე იმას, რომ ამ აქციაზე მოქალაქეებმა დაინახეს ერთმანეთი და ნახეს, რომ რეჟიმს უმრავლესობა ებრძვის:

„ჩვენ დავინახეთ ერთმანეთი… უმრავლესობა არის რეჟიმის წინააღმდეგ. საქართველოს მოქალაქეების უმრავლესობა ვართ ჩვენ, ვინც ვიბრძვით რეჟიმის წინააღმდეგ. ვანახეთ, მათ შორის, საერთაშორისო საზოგადოებას, რომ საქართველოს მოქალაქეები მიუხედავად რეპრესიებისა, არ ვწყვეტთ ბრძოლას თავისუფლებისთვის.

გუშინდელმა დღემ წინააღმდეგობის მოძრაობას შესძინა ახალი სუნთქვა. მას შემდეგ, რაც ოპოზიცია არ შევედით პარლამენტში, უარი ვთქვით მანდატებზე და ვთქვით, რომ ჩვენ არ ვითანამშრომლებდით ამ არალეგიტიმურ, კრიმინალურ ბანდასთან, რომელმაც ხელისუფლება მიიტაცა, ძალიან მნიშვნელოვანია, რომ ეს პროცესი, რაც ორი წლის განმავლობაში მიმდინარეობს, გაფართოვდეს და წინააღმდეგობის ფორმები შეიძინოს.

დარწმუნებული ვარ, რომ გუშინდელი დღე მეორე სუნთქვას გაუხსნის ამ წინააღმდეგობის მოძრაობას, რომელიც უკვე ორი წელია მიმდინარეობს თბილისში და საქართველოს სხვადასხვა ქალაქში,“ – ამბობს ანი წითლიძე.

რა უნდა იყოს შემდეგი ნაბიჯი? რა ხედვა აქვს ოპოზიციას წინააღმდეგობის გაძლიერებაზე? – ოპოზიციონერს საზოგადოების ნაწილის საყვედურზე ვკითხეთ: ივანიშვილმაც იცის, რომ მხარდამჭერი არ ჰყავს, მაგრამ ვერ დაამარცხებ, როცა ოპოზიციას არ აქვს გეგმა და არ არის ორგანიზებული?

„მესმის ეს იმედგაცრუებები. 14 წელი რეჟიმის წინააღმდეგ ბრძოლაში ცალკეული ადამიანისთვის ძალიან დიდი დროა, განსაკუთრებით იმ ადამიანებისთვის, ვინც ციხეშია უსამართლოდ.

მე თვითონ ვარ 14 წელია ამ ბრძოლაში და ჩემთვისაც ყოველი დღე არის პასუხისმგებლობა… კმაყოფილი ვიქნებით მხოლოდ მაშინ, როდესაც ეს რეჟიმი არ იქნება, მაგრამ უნდა გვესმოდეს კარგად, რომ 14 წლის განმავლობაში ქვეყანამ და ამ პროტესტმა ძალიან ბევრი ფაზა გაიარა, რასაც სუბიექტური და ობიექტური მიზეზები აქვს.

მაგალითად, 2018 წლამდე „ნაციონალური მოძრაობა“ მარტო იბრძოდა. როცა ვამბობდით, რომ ქოცები რუსები არიან, ბევრისთვის ეს წარმოუდგენელი იყო და ჩვენ რაღაცას ვაჭარბებდით… 2020 წლის შემდეგ და განსაკუთრებით რუსული კანონის მიღების შემდეგ მკაფიო გახდა საზოგადოების დიდი ნაწილისთვის, რომ „ოცნება“ რეალურად ევროკავშირში არანაირ ინტეგრაციას არ აპირებს.

14 წლის განმავლობაში ბევრი რამ გადაფასდა, მათ შორის საზოგადოებაში. ახლა საკონსტიტუციო სასამართლოშია სარჩელი პოლიტიკური პარტიების აკრძალვაზე, პოლიტიკური პარტიების ლიდერები არიან ციხეში, ასევე, ყოველგვარი დაფინანსების გარეშე ვართ პოლიტიკური პარტიები…

არ არსებობს ცალკე აღებული ოპოზიციური პარტია ან ცალკე აღებული სამოქალაქო სექტორი, რომელიც შეძლებს რეჟიმის დამარცხებას. ამას შევძლებთ ყველა ერთად. დღეს ზღვარი პოლიტიკურ პარტიებს, სამოქალაქო სექტორსა და ცალკეულ მოქალაქეებს შორის მოშლილია. დღეს არის ორი მხარე: რუსული ოლიგარქიული რეჟიმი და მეორე მხარეს ვართ ყველა.

მნიშვნელოვანია, რომ ობიექტური გამოწვევები გადაილახოს და მეორე სუნთქვა შეიძინოს წინააღმდეგობამ…დავამარცხებთ რეჟიმს ხალხმრავლობით, მრავალათასიანი აქციებით, უწყვეტი აქციებით,“ – აცხადებს „ბათუმელებთან“ ანი წითლიძე.

საუბრის ბოლოს ანი წითლიძეს ვკითხეთ: მოქალაქეები საყვედურობენ ოპოზიციას, რომ ბევრჯერ გამოვიდნენ ქუჩაში, მაგრამ ოპოზიცია დემონსტრაციებს მოუმზადებელი ხვდება.

„მოქალაქე ბევრჯერ უნდა გამოვიდეს. 14 წელი ძალიან ცოტაა ისტორიისთვის, მაგრამ ძალიან ბევრი კონკრეტული ადამიანებისთვის, მათ შორის, ჩემთვის. რამდენჯერაც დასჭირდება ამ ქვეყანას, იმდენჯერ უნდა გამოვიდნენ. რა ფორმითაც დასჭირდება ბრძოლა ჩვენს სახელმწიფოს, იმ ფორმით უნდა ვიბრძოლოთ მანამ, სანამ ოლიგარქიული რეჟიმი არ დასრულდება.

ვნახეთ, რომ ჩვენ შეგვიძლია წინააღმდეგობის გაწევა. ჩვენ ასევე უნდა ვანახოთ, რომ შეგვიძლია მრავალათასიანი წინააღმდეგობის გაწევა რეჟიმისთვის. ერთადერთი, რისიც ეშინია რეჟიმს და უკან იხევს – ეს უკანდახევა ვნახეთ რუსული კანონის დროს – არის ძალა.

ერთადერთი გზა არის წინააღმდეგობა. მესმის იმ ადამიანების, ვისაც უნდა, რომ დღესვე დასრულდეს რეჟიმი. ასევე ყველას ძალიან კარგად გვესმის, რომ რაც უფრო დიდ ხანს არის რეჟიმი, მით უფრო მძიმეა ეს ქვეყნისთვის – წლობით მოუწევს აინაზღაუროს ეს ყველაფერი. მაგრამ გამოსავალი ერთადერთია – ბრძოლა, წინააღმდეგობა და ერთიანობა.

არ აქვს მნიშვნელობა, რა პოლიტიკურ პოზიციებზე შეიძლება ვიყოთ სხვადასხვა ოპოზიციური პარტია. ოლიგარქიულ რეჟიმს რომ დავამარცხებთ, მერე ყველა ოპოზიციურ პარტიას შეუძლია ერთმანეთში არკვიოს, თავისუფალ და სამართლიან არჩევნებში, ვინ ვისზე მაგარია,“ – გვითხრა ანი წითლიძემ.

  • ზურაბ ჯაფარიძე: „მნიშვნელოვანი იყო რაოდენობა – რამდენი ადამიანი გამოვიდოდა“ 

„თავიდანვე მნიშვნელოვანი იყო რაოდენობა – რამდენი ადამიანი გამოვიდოდა. უკანასკნელი კვირების განმავლობაში ვნახეთ რეპრესიული კანონმდებლობის და რეპრესიული ზომების კასკადი, რომელსაც რეჟიმი მიმართავს. საინტერესო იყო, ამ ყველაფრის გათვალისწინებით, რამდენი ადამიანი გამოვიდოდა. ჩემთვის მნიშვნელოვანი იქნებოდა ასი კაციც რომ გამოსულიყო – გასაგები იქნებოდა, რომ ეს არის წერტილი, საიდანაც ყველაფერი დასაწყებია თავიდან.

მაგრამ საკმაოდ ბევრი ადამიანი გამოვიდა. არ ვიცი ზუსტი რაოდენობა, მაგრამ ბევრი ადამიანი იყო ნამდვილად.

გამოჩნდა, რომ ამ ქალაქში ცხოვრობს საკმაოდ ბევრი ადამიანი, რომლებიც მიუხედავად ამ ყველაფრისა, აგრძელებს ბრძოლას და არ გაჩერდებიან მანამ, სანამ ამ ბრძოლას არ მიიყვანენ ბოლომდე – გამარჯვებამდე,“ – ამბობს ზურაბ ჯაფარიძე.

ზურაბ ჯაფარიძე

ზურაბ ჯაფარიძის თქმით, შემდეგი ნაბიჯი უნდა იყოს პროტესტის გაფართოება.

„ჩვენ გვჯერა, რომ ეს რეჟიმი ჩამოიშლება, თუ მასზე იქნება ქუჩიდან წნეხი. ამიტომაც გვჭირდება ბევრი გაბრაზებული ადამიანი ქუჩაში, რომელიც ან ჩამოშლის რეჟიმს, ან რეჟიმს უკან დაახევინებს.

ალიანსს აქვს გამოქვეყნებული კონკრეტული პუნქტები, თუ რა არის გასაკეთებელი იმისათვის, რომ საარჩევნო პროცესს დაუბრუნდეს მოქალაქეების ნდობა, რომ მოქალაქეებმა მიიღონ საარჩევნო პროცესში მონაწილეობა და ჰქონდეთ იმის განცდა, რომ როდესაც მივლენ საარჩევნო ყუთთან, მართლა რაღაცას შეცვლის თავიანთი ხმა.

გამარჯვებამდე მიყვანის გზა გადის ძალების გაერთიანებამდე,“ – მიიჩნევს ზურაბ ჯაფარიძე.

რატომ ვერ ხერხდება ოპოზიციური ძალების გაერთიანება? ზურაბ ჯაფარიძესაც ვკითხეთ მოქალაქეების საყვედურზე: მოქალაქეებს აქვთ პროტესტი და ქუჩაში გამოდიან, მაგრამ ვერ ხერხდება პოლიტიკოსების მხრიდან პოლიტიკური ინიციატივის ხელში აღება.

„ჩვენ გაცხადებული გვაქვს, რომ ალიანსი არ არის ჩაკეტილი კლუბი, იგი ღიაა ნებისმიერი პოლიტიკური ძალისთვის, რომელიც ემთხვევა ხედვებში ჩვენს ხედვებს, რომელიც იზიარებს იგივე სტრატეგიას – როგორ მივიდეთ გამარჯვებამდე. ნებისმიერს შეუძლია თანასწორუფლებიანად შემოვიდეს ამ ალიანსში…

უკან დახევასა და რიგგარეშე არჩევნებში იგულისხმება ის, რომ არჩევნები უნდა იყოს მართლა არჩევნები, რომელსაც ექნება მოქალაქეების ნდობა. დღევანდელი მდგომარეობით ჩვენ გვაქვს გაცილებით გაუარესებული საარჩევნო გარემო, ვიდრე იყო 2024 წლის საპარლამენტო არჩევნებისთვის.

იყო კასკადი კანონმდებლობის, რომლებმაც ფაქტობრივად ის პროცესი, რომელსაც არჩევნები ჰქვია, გახადა ცირკი. არაფერი საერთო მას არჩევნებთან არ აქვს.

ეს ძალიან კარგად იციან მოქალაქეებმა და ეს გამოჩნდა, მათ შორის, 2025 წელს ე.წ. ადგილობრივი არჩევნების დროსაც, როცა მოქალაქეებმა არ მიიღეს მონაწილეობა არჩევნებში მარტივი მიზეზის გამო: ნდობა არ ჰქონდათ პროცესის – არ სჯეროდათ, რომ მათ მისვლას საარჩევნო ყუთთან და ხმის მიცემას რაიმე ცვლილების მოტანა შეეძლო.

ამ ნდობის დაბრუნებას სჭირდება იმ პუნქტების შესრულება, რომელიც ალიანსმა გამოაქვეყნა: დამკვირვებლები იყვნენ დაშვებული, ემიგრანტებს დაუბრუნდეთ ხმის მიცემის უფლება და ასე შემდეგ. მთელი წყებაა საკითხების. ამის შემდეგ შეიძლება ეს პროცესი მეტ-ნაკლებად მიუახლოვდეს თავისუფალ და სამართლიან არჩევნებს.

ამ გზით ვახევინებთ რეჟიმს უკან და შემდეგ არჩევნებით ვამარცხებთ, თუ არა და, მაშინ იმდენი უნდა გამოვიდეთ ქუჩაში, რომ რეჟიმმა უკან კი არ დაიხიოს, უბრალოდ ჩამოიშალოს და მაგის შემდეგ ჩატარდეს თავისუფალი და სამართლიანი არჩევნები,“ – ამბობს ზურაბ ჯაფარიძე.

რატომ არის დარწმუნებული „გირჩის“ ლიდერი, რომ ბევრი ხალხის ქუჩაში გამოსვლა ივანიშვილს რიგგარეშე არჩევნების ჩანიშვნას აიძულებს?

„არ არსებობს სხვა გზა. უნდა იყოს კომუნიკაცია ყველა პოლიტიკოსთან და ყველა პოლიტიკურ ჯგუფთან.

არიან სხვა პოლიტიკური ჯგუფები, რომლებიც ამბობენ – დაიხევს რეჟიმი უკან თუ არ დაიხევს, რა პირობებიც არ უნდა იყოს, ვაპირებთ, რომ მაინც მივიღოთ არჩევნებში მონაწილეობა. იგივე გამოცდილებას დავუბრუნდები, რაც 2025 წელს მოხდა – ვიღაცები შეიძლება ჩაერთონ ამ პროცესში, მაგრამ უბრალოდ მიიღებენ ცირკში მონაწილეობას, მოქალაქეების განაჩენი კი იქნება იგივე, რაც ვნახეთ 2025 წლის ე.წ. ადგილობრივი არჩევნების დროს – ხალხი არ მივა არჩევნებზე!“ – აღნიშნა ზურაბ ჯაფარიძემ „ბათუმელებთან“.

„მოქალაქეს დღეს პოლიციის უფრო ეშინია, ვიდრე კრიმინალის” – ლონდა თოლორაია

27 მაისს, გორში, პოლიციელებმა ჯგუფურად 28 წლის პაპუნა ლოცულაშვილი სცემეს. ახალგაზრდა კაცი, რომელიც საქართველოს ბანკის თანამშრომელია, შესვენებაზე იყო სამსახურიდან გასული და უკან, ბანკში ფეხით ბრუნდებოდა.

ფეხით მიმავალს პოლიციამ მანქანით ავარიული სიტუაცია შეუქმნა – კინაღამ დააჯახა, რასაც შელაპარაკება და კონფლიქტი მოჰყვა, რაც საბოლოოდ ახალგაზრდა კაცზე ფიზიკური ძალადობით დასრულდა – ეს ინფორმაცია ჟურნალისტებს პაპუნა ლოცულაშვილის მეგობარმა, ლაშა აბისონაშვილმა მიაწოდა, რომელიც პოლიციელებმა მეგობრის დახმარების გამო სცემეს.

პოლიციელთა ჯგუფის მიერ ორი ახალგაზრდა კაცის ცემის ამსახველი ვიდეო გამოცემა „ქართლის ამბებმა“ გაავრცელა.

ვიდეო კადრებს, სადაც ჩანს, როგორ სცემს ათამდე პოლიციელი ახალგაზრდებს, საზოგადოების მძაფრი რეაქცია მოჰყვა.

პროკურატურამ გამოძიება სსკ-ის 333-ე მუხლით დაიწყო, რაც სამსახურებრივი უფლებამოსილების გადამეტებას გულისხმობს ძალადობით და ისჯება ხუთიდან 8 წლამდე პატიმრობით.

დღის ბოლოს, პოლიციელების მიერ ნაცემი კაცის, პაპუნა ლოცულაშვილის ადვოკატმა, ლაშა ტყეშელაძემ გაავრცელა ინფორმაცია, რომ მისი დაცვის ქვეშ მყოფი სსკ-ს 353 მუხლით დააკავეს, რაც პოლიციელზე ძალადობას გულისხმობს.

საღამოს 21:30 საათისთვის, კი ასევე ადვოკატის საშუალებით გახდა ცნობილი, რომ დაკავებული პაპუნა ლოცულაშვილი, წინასწარი დაკავების იზოლატორიდან გაათავისუფლეს და ექსპერტიზაზე გადაიყვანეს.

რას ნიშნავს, როდესაც სისტემა მოქალაქეზე ძალადობს? – „ბათუმელებმა“ ინტერვიუ ჩაწერა ლონდა თოლორაიასთან, შსს-ს ყოფილ თანამშრომელთან, სახელმწიფო ინსპექტორის სამსახურის ყოფილ ხელმძღვანელთან. სწორედ ამ სამსახურს ევალებოდა მსგავსი ფაქტების გამოძიება, სანამ 2022 წელს პარლამენტი ამ სამსახურს გააუქმებდა.

ლონდა თოლორაია, ყოფილი სახელმწიფო ინსპექტორი
  • ქალბატონო ლონდა, დავიწყოთ ფაქტის შეფასებით, რას ნიშნავს, როცა პოლიცია ჯგუფურად ძალადობს მოქალაქეზე?

უპირველესად, თავი რომ დავანებოთ სამართლებრივ შეფასებას, ჩემთვის, როგორც მოქალაქისთვის და ჩემთვის, როგორც შინაგან საქმეთა სამინისტროს ყოფილი თანამშრომლისთვის, ეს ყველაფერი ძალიან სამწუხარო სანახავია.

მეორე, საერთოდ არანაირი მნიშვნელობა არა აქვს რა დააშავა ამ ადამიანმა, რაში ედებოდა ბრალი და ასე შემდეგ.

ფაქტია – ეს ადამიანი იყო დაკავებული. როდესაც პირი პოლიციის ეფექტური კონტროლის ქვეშაა და მისგან არანაირი საფრთხე აღარ მომდინარეობს, მასზე განხორციელებული ნებისმიერი ძალადობა, იქნება ეს სიტყვიერი შეურაცხყოფა, ფეხის დარტყმა და ასე შემდეგ, არის სისხლის სამართლის დანაშაული.

ამიტომ ვერაფერი იმას ვერ გაამართლებს, რაც ჩვენ ვნახეთ. ვერც ის გაამართლებს, რომ დაკავება იყო მიზანი – ჯერ ერთი, რომ 10 პოლიციელი თუ პირს ვერ აკავებს, ეს ცალკე პრობლემაა.

კადრებში ვერ ვხედავთ, რომ ეს პირი რაიმე დაუძლეველ ძალას ან რაიმე საფრთხეს წარმოადგენდეს. ამიტომ ცალსახად ამას უნდა მიენიჭოს სისხლის სამართლის კვალიფიკაცია. ვიცით, რომ გამოძიება პროკურატურამ უკვე დაიწყო და მე დარწმუნებული ვარ, ვინაიდან ეს ფაქტი გასაჯაროვდა და ამას აქვს ამხელა რეზონანსი, ამიტომ დევნას დაიწყებენ [ცემაში მონაწილე პოლიციელებისადმი] აუცილებლად.

  • ჩვენ რომ ისეთი ქვეყანა ვიყოთ, სადაც ადამიანის უფლებებს პატივს სცემენ, შესაბამისი უწყებებს როგორ უნდა მოქმედებდნენ ახლა? განვითარებულ სახელმწიფოებში, მსგავსი ფაქტის დროს, როგორ რეაგირებენ ინსტიტუციები?

პირველ რიგში აღვნიშნავ, რომ ასეთი ქცევების მიზეზი აუცილებლად უნდა ვეძებოთ წინარე ისტორიაში, რა ფაქტებიც ჩვენ გვქონდა მანამდე.

სამწუხაროდ, ჩვენ ვცხოვრობთ რეალობაში, როდესაც პოლიციელი, რომელიც ჩადის ძალადობას, არ ისჯება. ჩვენ ბევრნაირი ძალადობა გვინახავს. ძალადობა, რომელიც განხორციელდა ჩვენი თვალთახედვის არის მიღმა – პოლიციის მანქანაში, პოლიციის დაწესებულებაში და ასე შემდეგ.

ჩვენ ვნახეთ ძალადობის ფაქტები, რომელიც პირდაპირ ეთერში მოხდა, მაგრამ ასეთ ფაქტებზე ჩვენ დასჯილი პოლიციელი არ გვინახავს.

აი, აგერ ერთი წლის შემდეგ ისიც რაღაც სხვადასხვა ფაქტორების გამო დაისაჯნენ პოლიციელები რაღაცის გამო, თორემ ამის ნება რომ ყოფილიყო, წესით უფრო ადრე უნდა დასჯილიყვნენ.

ამიტომ ეს წინარე ისტორიები, ახალისებს პოლიციელს, რომ ასე დღისით-მზისით, ასეთი ფორმით ჩაიდინოს დანაშაული. ეს არის პრობლემა.

ახლა რას უნდა აკეთებდეს სახელმწიფო?

ზოგადად, უპირველეს ყოვლისა შინაგან საქმეთა სამინისტროს ინტერესში არის, რომ ასეთი პოლიციელები სისტემაში არ იყვნენ.

ასეთი პოლიციელების წინააღმდეგ ბრძოლა და მათგან სისტემის გაწმენდა, გასუფთავება, უხეშად რომ ვთქვათ, უნდა იყოს შინაგან საქმეთა სამინისტროს კომპეტენცია. რაც შეეხება რეაგირებას, რეაგირება არ არის შინაგან საქმეთა სამინისტროს კომპეტენცია ამ შემთხვევაში.

ამაზე რეაგირება – ეს არის პროკურატურის კომპეტენცია. ერთადერთი, რაც შინაგან საქმეთა სამინისტრომ უნდა გააკეთოს, და ეს ძალიან მნიშვნელოვანია, რომ გააკეთოს, ეს არის თანამშრომლობა პროკურატურასთან, რომ მიაწოდოს ყველა სახის მტკიცებულება, ინფორმაცია, რაც პროკურატურას ამ საქმის გამოსაძიებლად დასჭირდება.

ჩვენ გვაქვს ძალიან ცუდი გამოცდილება და პრაქტიკა ამ მიმართულებით. სამწუხაროდ, შინაგან საქმეთა სამინისტრო არასოდეს არ იყო დამხმარე დანაყოფი პოლიციელთა მიერ ჩადენილი დანაშაულების გამოძიებისთვის, პირიქით, იგი იყო ყოველთვის ხელისშემშლელი გამოძიებისთვის – იყო ასეთი ფაქტები. და ის, რომ მე ვამბობ, რომ ამ დანაშაულზე შედეგი დადგება და ვიღაცას დააკავებენ, იმიტომ კი არ დააკავებენ, რომ პოლიციელმა დანაშაული ჩაიდინა, იმიტომ დააკავებენ, რომ ვიღაცამ მოახერხა და ეს ვიდეო გადაიღო. ამ ვიდეოში ძალიან კარგად ჩანს ამ პოლიციელთა სახეები და მართლა უმძიმესი სანახავია.

როცა საზოგადოებაში ამხელა რეზონანსია და პირები იდენტიფიცირებულები არიან, აქ უკვე სახელმწიფოს ძალიან უჭირს ხელის დაფარება პოლიციელებზე.

ამიტომ ამ საქმეზე დადგება შედეგი. მაგრამ ისეთი საქმეები, რომელიც ჩვენი თვალით ვერ ვნახეთ, ისეთი საქმეები, რომელიც თვალს მოეფარა და იქვე იქნა ჩადენილი, ასეთ ფაქტებზე, სამწუხაროდ, არც ეფექტიანი რეაგირება ხდება, არც გამოძიების დაწყება შეიძლება არ მოხდეს და ზედმეტია ლაპარაკი იმაზე, რომ ვინმე მიეცეს პასუხისგებაში ამ ფაქტებზე.

  • ირაკლი კობახიძემაც გააკეთა განცხადება. სავარაუდოდ მართლა დასჯიან ვიღაცას. მაგრამ კადრებში ჩანს ათამდე პოლიციელი. როგორ ფიქრობთ, კადრში ვინც ჩანს, ყველა პირის პასუხისმგებლობის საკითხს დააყენებს პროკურატურა თუ აქედან გამოარჩევენ ვიღაცებს?

გამოძიების დაწყების შემდეგ მთავარი კითხვა არის ორი – პირველი, დაისჯება თუ არა ყველა? და მეორე, დაისჯებიან თუ არა იმ მუხლით და იმ სიმკაცრით, რა სიმკაცრითაც უნდა დაისაჯონ?

ერთი – შეიძლება იქ 10 პოლიციელი იყოს, მაგრამ ამ ათიდან ვინ რა ქმედებას ახორციელებდა, ამის მიხედვით უნდა დადგეს მათი პასუხისმგებლობის საკითხი. შეიძლება ათიდან ყველა არ ურტყამდა, შეიძლება ნაწილი იყო აქტიური მონაწილე ამ ყველაფრის, ნაწილი იყო პასიური მონაწილე და უბრალოდ უყურებდა ამ ყველაფერს.

არ ვიცი, მინდა მჯეროდეს, რომ ათი პოლიციელიდან შეიძლება ვინმე იყო კიდე ისეთი, რომელსაც არც ცემაში იღებდა მონაწილეობას და პირიქით, აპროტესტებდა ამ ძალადობას. ამიტომ, აქ გამოსაკვლევია ვის რა როლი ჰქონდა. ამიტომ ობიექტურადაც რომ იქნეს გამოძიება ჩატარებული, შეიძლება მართლა ათივე არ არის პასუხისგებაში მისაცემი.

აქ ვიდეოა კარგად სანახავი – ვინ რა როლს ასრულებს, ვინ რას აკეთებს, ვინ რას ამბობს – ესეც მნიშვნელოვანია. თუმცა მთავარია, რომ ვისაც რა როლი აქვს, ყველა ამ როლის შესაბამისად დაისაჯოს და მეორე – დაისაჯოს იმ მუხლით, რა მუხლითაც უნდა დაისაჯოს. ეს არის, ჩემი აზრით, არაჯეროვანი, არაადამიანური, დამამცირებელი მოპყრობა, რომლითაც ეს ადამიანები უნდა იქნენ პასუხისგებაში მიცემულები.

ვნახოთ, როგორ დაიწყება დევნა მათ მიმართ.

  • თავად ფაქტი, რაც დაზუსტდა, რაზე მეტყველებს? 28 წლის ახალგაზრდა, ბანკის თანამშრომელი, რომელიც შესვენებაზე იყო გამოსული, ფეხით ბრუნდებოდა სამსახურში. ამ დროს ამ ადამიანს პოლიციის მანქანამ შეუქმნა ავარიული სიტუაცია. ამას მოჰყვა კონფლიქტი, რომელშიც ათამდე პოლიციელი ჩაერთო. რას ჰყვება ეს ამბავი სისტემის შესახებ?

ზოგადად სისტემა დღეს გამოიყურება ძალიან ცუდად და პოლიცია აღიქმება არა როგორც დამცველი, შენი დამცველი დამნაშავისგან, არამედ თვითონ პოლიცია გადაიქცა საფრთხედ. ეს არის დღევანდელი მოცემულობა, რაც არის უმძიმესი და მე არცერთ შემთხვევაში ეს არც მომწონს, არც მიხარია, პირიქით, ძალიან – ეს არის ტრაგედია და ეს არის ძალიან გულსატკენი, იმიტომ, რომ მოქალაქესა და პოლიციას შორის სრულიად ჩამოშლილია ყველანაირი ნდობის ხიდი.

პოლიციას არა აქვს არანაირი ნდობა და პოლიციის რეპუტაცია არის ძალიან სავალალო მდგომარეობაში.

მოქალაქეს ქუჩაში ეშინია არა კრიმინალის, არამედ ეშინია პოლიციის – „უკანონოდ გამაჩეროს, უკანონოდ არ გამჩხრიკოს, უკანონოდ რამე არ აღმომიჩინოს, უკანონოდ არ მცემოს“ – რომელ პოლიციაზე შეიძლება ამის შემდეგ ლაპარაკი.

ნულიდან არის ასაშენებელი ყველანაირი ნდობა, რეპუტაცია, ყველა ინსტიტუტი მოშლილია, მაგრამ ყველაზე თვალსაჩინოდ მაინც ჩანს პოლიცია, იმიტომ, რომ ხშირად უწევთ მოქალაქეებს პოლიციასთან კომუნიკაცია და ეს კომუნიკაცია უკვე არის ნეგატიური, ათიდან, მგონი, ცხრა შემთხვევაში.

  • თქვენი აზრით, ვინ არის პასუხისმგებელი იმაზე, რაც პოლიციას დაემართა?

ამაზე პასუხისმგებელი არის აუცილებლად „ქართული ოცნება“. ამაზე პასუხისმგებელი არის პრემიერ-მინისტრი პირველ რიგში, რომელიც არის პოლიციის უფროსი, უხეშად რომ ვთქვათ, იმიტომ, რომ შინაგან საქმეთა სამინისტრო შედის მის დაქვემდებარებაში.

ამაზე პასუხისმგებელია პარლამენტი, რომელიც ზედამხედველობას უნდა ახორციელებდეს შინაგან საქმეთა სამინისტროზე.

ამაზე პასუხისმგებელი არის სასამართლო, რომელიც პოლიციის მიერ მიტანილ ქეისებს ისე ურტყამს ჩაქუჩს, საერთოდ არ არკვევს ვინ არის მართალი, ვინ არის მტყუანი და არის გადაწყვეტილებები, რომლებმაც პოლიცია კიდევ უფრო „წაახალისა“ და აი, ასეთი ქმედებებისაკენ უბიძგა.

რა თქმა უნდა, პასუხისმგებელია პროკურატურა, იმიტომ, რომ პროკურატურა არის პასუხისმგებელი ასეთი ფაქტების გამოძიებაზე.

ერთიანად ეს ყველაფერი არის ხელისუფლების პასუხისმგებლობის საკითხი. მხოლოდ ის არის პასუხისმგებელი იმაზე, რაც ხდება, რომ აღარაფერი ვთქვა იმ ცალკეული პოლიციელების პასუხისმგებლობაზე. ეს ადამიანები გასულები არიან სრულიად საკანონმდებლო ჩარჩოებიდან.

ამ ქვეყანას აუცილებლად სჭირდება დამოუკიდებელი, მართლა დამოუკიდებელი სამსახური, პოლიტიკურად ნეიტრალური სამსახური, რომელიც პოლიციელთა მიერ ჩადენილ დანაშაულებს გამოიძიებს ეფექტიანად და სამაგალითოდ დასჯის ყველას ისე, რომ არცერთ პოლიციელს აღარ წაუცდეს ხელი აი ამ ტიპის ქმედებაზე.

440 000 ლარი ავანსად გაცემულია, მაგრამ საბავშვო ბაღის მშენებლობა „ოცნების ქალაქში“ ჯერ არ დაწყებულა

ბათუმში, ფრიდონ ხალვაშის გამზირზე, #188-ში, „ოცნების ქალაქთან“ ახალი საბავშვო ბაღის მშენებლობა ბათუმის მერიამ 2024 წლის ბოლოს დაგეგმა და 2025 წლის ბიუჯეტში ჩასვა. გასული წლის ბოლოს ამ ბაღის ასაშენებლად ტენდერი გამოაცხადა, გამარჯვებული გამოავლინა და ავანსიც გასცა. 2026 წლის ბიუჯეტის პირველი კვარტლის შედეგების ანგარიშის მიხედვით კი, ამ დრომდე მშენებლობა არ დაწყებულა.

საქმე ისე მიდის, მერია ამ ბაღის მშენებლობის დაწყებას ვერც ბიუჯეტის მეორე კვარტლის შეჯამებამდე მოახერხებს.

2026 წლის ბიუჯეტის პროექტის წარდგენის შემდეგ, სწორედ ამ პროექტს – ფრიდონ ხალვაშის #188-ში დაგეგმილ მშენებლობას იშველიებდნენ მერიაში, როცა აცხადებდნენ, გვაბრალებენ თითქოს ბაღების მშენებლობას აღარ ვგეგმავთო. ამ ბაღს ასახელებდნენ საკრებულოს წევრებიც, როცა სხდომაზე მერიას იცავდნენ. მაშინ საკრებულოს წევრები ერთხმად ამბობდნენ – „ბაღებს არ აშენებენო და თურმე ბაღებს ვაშენებთ.“

2024 წლის ბოლოს დასამტკიცებლად მომზადებული 2025 წლის ბიუჯეტის პროექტის განმარტებით ბარათში მერია წერდა, რომ ბათუმში არსებული ბაღები მოთხოვნას ვერ პასუხობს:

„ქალაქის განვითარებასთან ერთად, მოთხოვნა სკოლამდელი აღზრდის დაწესებულებებზე დღითიდღე იზრდება. არსებული მუნიციპალური საბავშვო ბაღები რთულად უმკლავდებიან მოთხოვნის სრულად დაკმაყოფილებას, რაც ქმნის ახალი ბაღების მშენებლობის აუცილებლობას.

გარდა ამისა, სააღმზრდელო პროცესის ხარისხიანად მიწოდება მატერიალურ-ტექნიკური ბაზის მუდმივ განახლებასა და აღმზრდელთა პერმანენტულ პროფესიულ გადამზადებას მოითხოვს.

არსებული სიტუაციის ანალიზიდან და მოქალაქეთა საჭიროებებიდან გამომდინარე ბათუმის მუნიციპალიტეტისთვის პრიორიტეტულია სახელმწიფო სტანდარტების შესაბამისი, საყოველთაოდ და თანაბრად ხელმისაწვდომი, ინკლუზიური სკოლამდელი აღზრდისა და განათლების მომსახურების მიწოდების უზრუნველყოფა მოსახლეობისთვის“.

2025 წლის ნოემბერში, ბათუმის მერიამ, ფრიდონ ხალვაშის გამზირზე, #188-ში, ახალი საბავშვო ბაღის მშენებლობაზე ტენდერი გამოაცხადა. საწყისი ღირებულება 6 მილიონ 630 952 ლარი იყო.

გამარჯვება შპს „დს კონსტრაქშენს“ დარჩა. კომპანიამ სამუშაოს შესრულება 6 მილიონ 321 599 ლარად შესთავაზა მერიას. სახელმწიფო შესყიდვების სააგენტოს ვებგვერდზე გამოქვეყნებული ინფორმაციით, მიმწოდებელ კომპანიას ჩაერიცხა ავანსი – 440 000 ლარი. 

2026 წლის საბიუჯეტო წლის პირველი კვარტლის შეჯამების ანგარიშში მერია საკრებულოს სწერს, რომ ამ ბაღის მშენებლობა ჯერ კიდევ არ დაწყებულა და მიზეზი საბავშვო ბაღის მშენებლობისთვის მონიშნულ ტერიტორიაზე საცხოვრებელი ბარაკების არსებობაა.

„ზემოაღნიშნულ ღონისძიებასთან დაკავშირებით განგიმარტავთ, რომ მოქალაქეების მიერ საპროექტო ტერიტორიაზე განთავსებულია ბარაკის ტიპის შენობა-ნაგებობები.

აჭარის ავტონომიური რესპუბლიკის ჯანმრთელობის და სოციალური დაცვის სამინისტროს მიერ მიმდინარეობს მოქალაქეების ქირით გაყვანის პროცედურები.

აღნიშნული პროცედურების დასრულების შემდეგ ელექტრონულ ტენდერში გამარჯვებული კომპანია დაიწყებს საბავშვო ბაღის მშენებლობის სამუშაოების წარმოებას. ზემოაღნიშნული გარემოებების გათვალისწინებით ვერ განხორციელდა კვარტალური გეგმით გათვალისწინებული ასიგნების ათვისება. პროექტი მრავალწლიანია [2025-2026 წწ.]“, – წერს მერია საკრებულოს.

საინტერესოა, როდის გაიგო მერიამ, რომ ტერიტორიაზე, სადაც ორსართულიანი ბაღის მშენებლობა დაგეგმა, ბარაკული ტიპის დასახლებაში ოჯახები ცხოვრობენ? როცა დაგეგმა, როცა ტენდერი გამოაცხადა, თუ მაშინ, როცა ავანსი გასცა? – პასუხი არ გვაქვს, ეს ინფორმაცია არც ბიუჯეტის ანგარიშშია და არც შესყიდვებთან დაკავშირებულ დოკუმენტებში. ზოგადად, ბათუმის მერია, განსაკუთრებით ბოლო პერიოდში, თავს არ იწუხებს მედიის კითხვებზე პასუხის გასაცემად.

მერიაში ანგარიშვალდებულების ჩაბარებად ალბათ საკმარისი ჰგონიათ იმის გამოქვეყნება, სად მივიდა მერი, ვის შეხვდა და ვინ დააჯილდოვა. როგორ ხარჯავს ბიუჯეტს და როგორ განკარგავს მუნიციპალურ ქონებას – ამ კითხვებს მერია, როგორც წესი, არ პასუხობს.

2026 წლის ბიუჯეტში, ბათუმის მერიამ ბაღის მშენებლობისთვის თანხა არ გამოყო. ბაღების მისაწვდომობა კი ისევ ერთ-ერთ მწვავე პრობლემად რჩება, საბავშვო ბაღში ადგილის გათავისუფლებას ელოდება ასობით დარეგისტრირებული ბავშვი, ხშირად ბავშვები ისე ხდებიან სასკოლო ასაკის, რომ ბაღში შესვლას ვერც ახერხებენ. კერძო ბაღის საფასური თვეში საშუალოდ 450 ლარიდან იწყება და მოქალაქეების დიდი ნაწილისთვის ეს ძალიან მაღალი გადასახადია.

ამ ფონზე, 2026 წლის მარტში, გენერალურმა პროკურატურამ გაავრცელა ინფორმაცია, რომ სხვადასხვა მუნიციპალიტეტში 1550 ბავშვზე გათვლილი 16 საბავშვო ბაღის მშენებლობისთვის გამოყოფილი დიდი ოდენობით თანხის სამსახურებრივი მდგომარეობის გამოყენებით მითვისების, ორგანიზებული ჯგუფის მიერ უკანონო შემოსავლის ლეგალიზაციის, სამსახურებრივი გულგრილობისა და ყალბი დოკუმენტის დამზადება-გამოყენების ფაქტებზე 9 პირის მიმართ სისხლის სამართლებრივი დევნა დაიწყო, მათ შორის 4 პირი დაკავებულია.

___________

მთავარ ფოტოზე: პროექტის რენდერი

ბათუმში რამდენიმე ქუჩაზე მოძრაობა იზღუდება 16 დღით

ბათუმის მერიის ინფორმაციით, 28 მაისიდან 12 ივნისამდე, ბათუმში, სატრანსპორტო მოძრაობა შეიზღუდება რამდენიმე ქუჩაზე.

კერძოდ, მერიის ინფორმაციით, გადაადგილება შეიზღუდება მურად ხინიკაძის ქუჩაზე – ალექსანდრე გრიბოედოვის ქუჩიდან ლერმონტოვის ქუჩამდე მონაკვეთში და ლერმონტოვის ქუჩაზე – ზურაბ გორგილაძის ქუჩიდან ცენტრალური პარკის შესასვლელამდე.

მერიის ინფორმაციით, მოძრაობის შეზღუდვა უკავშირდება ქვაფენილიანი ქუჩების რეაბილიტაციის მიმდინარე პროექტს.

15 მილიონი სამ თვეში – სათამაშო ბიზნესის მოსაკრებელი ბათუმის ბიუჯეტის მზარდი შემოსავლის წყაროა

ბათუმის 2026 წლის ბიუჯეტის პირველი კვარტლის ანგარიშის მიხედვით, სათამაშო  ბიზნესის მოსაკრებლის სახით მერიამ, 3 თვეში, 15 მილიონ 342 000 ლარი ამოიღო.

მათ შორის: სათამაშო აპარატებიდან – 7 მილიონ 735 4 ათასი ლარი. წამახალისებელი გათამაშებიდან – 179 900 ლარი. სხვა არაკლასიფიცირებული სათამაშო ბიზნესის მოსაკრებლის სახით კი, კლუბის და სამორინეს მაგიდიდან ბიუჯეტში 7 მილიონ 426 700 ლარი შევიდა.

სათამაშო ბიზნესის მოსაკრებელი ბათუმის ბიუჯეტისთვის ერთ-ერთი მნიშვნელოვანი შემოსავლის წყაროა. შესაბამისად, ბიუჯეტის დაგეგმვისას ზრდის მერია პროგნოზს „სხვა შემოსავლების“ გრაფაში, რომლის ნაწილიც სწორედ ამ ბიზნესიდან მიღებული შემოსავლით იზრდება.

ბათუმის 2025 წლის ბიუჯეტის შესრულების ანგარიშის მიხედვით, ქალაქის ბიუჯეტში ამ წელს სათამაშო ბიზნესიდან 73 მილიონ 934 ათას 100 ლარი შევიდა. ეს 5,9 მილიონი ლარით მეტია, ვიდრე მერიას ჰქონდა დაგეგმილი [გეგმა 68 მილიონი ლარი იყო].

სახელმწიფო ხაზინის ანგარიშის მიხედვით კი, ქვეყნის მასშტაბით სათამაშო ბიზნესის მოსაკრებელმა 2026 წლის პირველ კვარტალში ქვეყნის მასშტაბით 30 მილიონ 780 328 ლარი შეადგინა.

ბოლო 11 წლის მონაცემების მიხედვით, ბათუმის ბიუჯეტის შემოსულობებში სათამაშო ბიზნესის მოსაკრებლის კუთხით კლება მხოლოდ 2020 წელს დაფიქსირდა, 2021 წლიდან კი ციფრები ისევ მზარდია და ყოველ წელს რამდენიმე ათეულ მილიონ ლარს აღწევს.

 

სათამაშო ბიზნესის მოსაკრებელი ბიუჯეტში სხვა შემოსავლების ნაწილშია ასახული. პირველ კვარტალში ბათუმის ბიუჯეტის „სხვა შემოსავლების“ ნაწილში 28 მილიონ 713 900 ლარი შევიდა, პროგნოზი 25 მილიონ 750 000 ლარი იყო.

სხვა შემოსავლების წილი ადგილობრივი ბიუჯეტის მთლიან შემოსულობებში 32.5%-ია.

საერთო ჯამში, ბათუმის მუნიციპალიტეტის 2026 წლის 3 თვის ბიუჯეტის ფაქტობრივმა შემოსულობებმა 88 მილიონ 296 500 ლარი შეადგინა.

შემოსულობებიდან 22 მილიონ 559 000 ლარი გადასახადების სახით მიღებულ შემოსავლებზე მოდის, ანუ შემოსულობების – 25.5%. 36 მილიონ 505 800 ლარი გრანტები და ფინანსური დახმარებაა. 28 მილიონ 713 000 ლარი კი არასაგადასახადო შემოსავლები.

ინვესტორები აჭარაში ქონების შეძენით აღარ ინტერესდებიან

 

„ეს ომი დაასრულებს რუსეთს, რომელიც უკვე იშლება“ – რუსი მწერალი

ემიგრაციაში მყოფმა რუსმა მწერალმა და პუბლიცისტმა, დიმიტრი ბიკოვმა გერმანულ გამოცემა „დოიჩე ველესთან“ თქვა, რომ რუსეთს მოელის დაშლა და არა რევოლუცია.

„მას ეს არ დაუმსახურებია. მას რევოლუცია არ ექნება. მას ქვეყანა ხელიდან გაუსხლტება, როგორც დამპალი ქსოვილი. ჩვენ უკვე მივაღწიეთ ამას, რადგან ქვეყნის მმართველობა ყველა თვალსაზრისით სრულიად არადამაკმაყოფილებელია“.

მან ასევე თქვა, რომ რუსეთში უკრაინასთან ომს მხარდაჭერა არ აქვს:

„ამ ომის მოტივაცია და მხარდაჭერა საზოგადოებაში ნულის ტოლია – ჩვენ ამას ვხედავთ. რამდენიმე ხმამაღალი განცხადება გაკეთდა… მაგრამ ეს ყველაფერი სუფთა კარიერიზმია. ჩვენ ამას მეომრების წინა რიგებში ვერ ვხედავთ. ხალხს ეს ომი არ სურს. იგივე მოხდება, რაც 1904 წელს მოხდა, რაც 1914 წელს მოხდა: ომი დაასრულებს იმპერიას, რომელიც უკვე იშლება“.

ბიკოვმა ინტერვიუში ასევე ისაუბრა ზელენსკიზე. იგი მიიჩნევს, რომ ზელენსკისთან მოლაპარაკებისთვის დიდი პოლიტიკური ნიჭია საჭირო:

„ის [პუტინი] არასდროს დაელაპარაკება ზელენსკის: კგბ-ეს კაპიტანი აგებს კავეენ-ის კაპიტანთან.

…ზელენსკის რომ ელაპარაკოთ, ზელენსკის გამოცდილება გჭირდებათ – ორმაგი.

პირველ რიგში, თქვენც უნდა გაუძლოთ ასეთ წინააღმდეგობას, როგორსაც მან გაუძლო. და მეორეც, თქვენ უნდა გქონდეთ ზელენსკის პოლიტიკური ნიჭი და უბრალოდ, საუბრის ისეთივე ნიჭი.

…აი, ამბობენ, რომ მას გაქცევა სურდა. შესაძლოა სურდა კიდეც, მაგრამ არ გაიქცა. და მან წარმოთქვა ფრაზა, რომელიც მსოფლიო ისტორიაში შევა: „მე იარაღი მჭირდება და არა ტაქსი“.

მან თქვა: „ჩვენ გაძლევთ აღლუმის უფლებას“.

მან უკრაინას რამდენიმე ფორმულა მისცა, რომლებიც უკრაინული ენის ნაწილად იქცა. ისევე, როგორც ერთ-ერთმა მეზღვაურმა თქვა შესანიშნავი ფორმულა: „რუსკი კარაბლ იდი ნა***ი

ასე რომ, უკრაინას შეუძლია მონაწილეობა მიიღოს ამ მოლაპარაკებებში, თუ უკრაინის დონის პოლიტიკოსი მოიძებნება. მე დღეს მსოფლიოში ასეთ პოლიტიკოსს ვერ ვხედავ.

… ვალერა პრიმოსტმა, დიდმა უკრაინელმა მწერალმა და ჟურნალისტმა, მითხრა: „ზელენსკი არ გაიქცა, რადგან არც ერთი მსახიობი არ დატოვებს სცენას, როდესაც მას 10 მილიარდი ადამიანი უყურებს“. და ის არ გაიქცა. მან სიმამაცის როლი შეასრულა და გახდა – როგორც დიდ ფილმშია – „გენერალ დელა როვერაში“ [იტალიელი რეჟისორის, რობერტო როსელინის ფილმი] – თამაშობდა და სწამდა. და გახდა სწორედ ის, რასაც თამაშობდა.

…ზელენსკის არჩევა ბრწყინვალე იყო უკრაინელი ერისთვის. მიპოვეთ მსოფლიოში ადამიანი, რომელსაც შეუძლია ასეთი კალიბრის ერთი სააღდგომო მიმართვის ჩაწერაც კი. ზელენსკის სააღდგომო მიმართვამ ბავშვივით ამატირა, მიუხედავად იმისა, რომ საკმაოდ გამოცდილი მაყურებელი ვარ“, – უთხრა ბიკოვმა „დოიჩე ველეს“.

ამავე თემაზე: 

ინტერვიუ დმიტრი ბიკოვთან – რუსეთი დაინფიცირდა თავისი განსაკუთრებულობის იდეით

„ფაშინიანი ამბობს, რომ ფასების ზრდა არ აშინებს, რადგან სომხეთი გამდიდრდება“ – რუსული პროპაგანდისტული მედია

„სომხეთის ხელისუფლება არ არის შეშფოთებული სასაქონლო ფასების ზრდით, თუ რუსეთთან ურთიერთობები გაუარესდება, რადგან ისინი გამდიდრებას ელიან ქვეყნის „მსოფლიოს გზაჯვარედინად“ გადაქცევით“, – წერს რუსული პროპაგანდისტული სააგენტო „ტასი“.

სააგენტოს ცნობით, სომხეთის პრემიერ-მინისტრმა ნიკოლ ფაშინიანმა ქალაქ გარნიში გამართულ საარჩევნო მიტინგზე განაცხადა ამის შესახებ.

„მაგალითად, არალოგიკურია სომხეთის მაღალი ფასებით დაშინება, რადგან მაღალი ფასების მუქარას პასუხი აქვს: ჩვენ გაცილებით მეტი ფული გვექნება, იმდენად, რომ ის ძვირი არ მოგეჩვენებათ. დღეს სომხეთი „მსოფლიოს გზაჯვარედინად“ იქცევა – ეს ნიშნავს, რომ სომხეთი მილიარდების და ტრილიონების ქვეყანა გახდება“, – მოჰყავს „ტასს“ ფაშინიანის ციტატა.

მოახლოებული არჩევნები სომხეთის რესპუბლიკაში რუსული პროპაგანდისტული მედიის განსაკუთრებული ყურადღების და კრიტიკის ქვეშაა. პროპაგანდისტულმა „კომერსანტმა“ გაავრცელა ინფორმაცია, რომ რუსეთმა სომხეთი გააფრთხილა გაზის, ნავთობპროდუქტების და დაუმუშავებელი ბრილიანტების მიწოდების შეთანხმების შესაძლო შეჩერების ან შეწყვეტის შესახებ, თუ ქვეყანა გააგრძელებს ევროკავშირში გაწევრიანების პროცესს.

სომხეთსა და რუსეთს შორის 2013 წელს ხელმოწერილი შეთანხმების თანახმად, რუსეთი სომხეთს გაზს, ნავთობპროდუქტებს და დაუმუშავებელ ბრილიანტს ექსპორტის გადასახადის გარეშე და შიდა მოხმარებისთვის შეღავათიანი პირობებით ამარაგებს.

ამავე დროს, სომხური მედია, სომხეთის ტერიტორიული ადმინისტრირებისა და ინფრასტრუქტურის სამინისტროზე დაყრდნობით წერს, რომ ოფიციალურ ერევანს ამ საკითხთან დაკავშირებით არანაირი წერილი ან შეტყობინება არ მიღია.

სომხეთში საპარლამენტო არჩევნები 7 ივნისს გაიმართება. ბოლო კვლევის შედეგების მიხედვით, არჩევნების წინ ყველაზე მაღალი ნდობით სარგებლობს ნიკოლ ფაშინიანი.

პოლიციელებმა გორში დაკავებულ პირებზე ჯგუფურად იძალადეს – პროკურატურამ გამოძიება დაიწყო

პროკურატურამ გამოძიება დაიწყო გორში დაკავებულ პირებზე პოლიციელების მიერ ჯგუფურად ძალადობის საქმეზე.

დღეს, 27 მაისს, გორში, პოლიციელებმა დაკავებულ ორ პირზე ჯგუფურად იძალადეს. ინტერნეტსივრცეში ძალადობის ამსახველი ვიდეო კადრების გავრცელების შემდეგ, პროკურატურამ განცხადება გააკეთა და თქვა, რომ გამოძიება დაიწყო.

„პროკურატურამ გორში მომხდარი,  პოლიციელების მხრიდან ძალადობით უფლებამოსილების სავარაუდო გადამეტების ფაქტზე სისხლის სამართლის კოდექსის 333-ე მუხლის მესამე ნაწილის „ბ“ ქვეპუნქტით გამოძიება დაიწყო. ამ ეტაპზე მიმდინარეობს გადაუდებელი საგამოძიებო და  საპროცესო მოქმედებები,“ – ნათქვამია პროკურატურის განცხადებაში.

სსკ-ის 333-ე მუხლი, რომლითაც პროკურატურამ გამოძიება დაიწყო, გულისხმობს სამსახურებრივი უფლებამოსილების გადამეტებას, ძალადობით და ისჯება ხუთიდან რვა წლამდე პატიმრობით.

გორში, ე.წ. კომბინატის დასახლებაში პოლიციელების მიერ ორ დაკავებულზე ჯგუფურად ძალადობის ამსახველი ვიდეოკადრები ადგილობრივმა მედიამ, „ქართლის ამბებმა“ გაავრცელა.

ვინ აიღებს 12 თვეში 15 თვის ხელფასს – გამჭვირვალობის კვლევა

„ქართული ოცნების“ მთავრობა ახალ საკანონმდებლო ცვლილებას იღებს, რომლის მიხედვითაც მინისტრების, მერების და სახელმწიფო რწმუნებულების მოადგილეებს კანონით შეეძლებათ 12 თვეში ამ თვეების სახელფასო სარგოს გარდა, დამატებით პრემიის სახით, 3,5 თვის ხელფასი მიიღონ.

„ქართული ოცნება“ 2017 წლიდან გაუქმებულ კორუფციულ სქემას აბრუნებს“ – წერს ახალ კვლევაში „საერთაშორისო გამჭვირვალობა – საქართველო“.

პარლამენტი განიხილავს „ქართული ოცნების“ მთავრობის ინიციატივას მინისტრების, მერების და რწმუნებულების მოადგილეებისთვის სახელფასო დანამატისა და ჯილდოს დანიშვნის შესახებ. კერძოდ, ცვლილება შედის „საჯარო დაწესებულებაში შრომის ანაზღაურების შესახებ“ საქართველოს კანონში.

კანონპროექტის ავტორების მთავარი არგუმენტი ამ თანამდებობის პირების დაბალი ანაზღაურებაა.

„კანონპროექტით გათვალისწინებულ თანამდებობებზე ანაზღაურება ბოლო 4 წლის განმავლობაში 46%-ით გაიზარდა, მაგალითად, თბილისის მერის მოადგილის სარგო 6 765 ლარიდან 9 840 ლარამდე გაიზარდა

ამავე პერიოდში 70 წლამდე მოქალაქეების პენსია უფრო ნელი ტემპით, მხოლოდ 42%-ით გაიზარდა [260 ლარიდან 370 ლარამდე]

ჯილდო-დანამატის სრულად ათვისების შემთხვევაში კანონპროექტით გათვალისწინებულ თანამდებობის პირებს წელიწადში 3,5 თვის ხელფასის შესაბამისი თანხა დაემატებათ, რაც თბილისის მერის მოადგილის შემთხვევაში ანაზღაურების 9 840 ლარიდან 12 792 ლარამდე ზრდას ნიშნავს.

ჯილდო-დანამატის გაცემის შესახებ გადაწყვეტილებას უშუალო უფროსი იღებს ერთპიროვნულად, რაიმე სახის კრიტერიუმების, ფორმალური შეფასების და წესების გარეშე, საკუთარი სუბიექტური შეხედულებით.

ბოლო ხელმისაწვდომი მონაცემების თანახმად [2024] საჯარო სექტორში საშუალო თვიური ხელფასი 1 680 ლარია.

მიუხედავად იმისა, რომ კანონპროექტით გათვალისწინებულ თანამდებობებზე ანაზღაურება განუხრელად იზრდება, კანონპროექტით შეიქმნება ანაზღაურების ალტერნატიული მატების გზები, რომელიც არის გაუმჭვირვალე, უკონტროლო და აჩენს კორუფციის ახალ არხებს,“ – წერს კვლევაში საერთაშორისო გამჭვირვალობა საქართველო.

TI  წერს, რომ კანონპროექტით კანონის ორი მუხლი იცვლება:

სახელფასო დანამატი – მოქმედი რედაქცია მკაცრად კრძალავს დანამატის გაცემას ყველა სახელმწიფო-პოლიტიკური და პოლიტიკური თანამდებობის პირზე. კანონპროექტი ზოგად აკრძალვას ინარჩუნებს, თუმცა გამონაკლისს უშვებს მინისტრების, აფხაზეთისა და აჭარის მთავრობათა წევრების, სახელმწიფო რწმუნებულისა და მერის მოადგილეებისთვის – ანუ პოლიტიკურ თანამდებობებზე დანამატის ინსტიტუტი ფაქტობრივად ბრუნდება.

ფულადი ჯილდო – ანალოგიური ცვლილებაა ჯილდოს კუთხით. იმავე თანამდებობის პირები შეძლებენ მიიღონ პრემია „ფუნქციის სანიმუშოდ შესრულებისთვის“, „ხანგრძლივი და კეთილსინდისიერი სამსახურისთვის“ ან „განსაკუთრებული სირთულის დავალების შესრულებისთვის“.

  • ვის და რა თანხებს შეეხება ცვლილება

„კანონპროექტი ფაქტობრივად აღადგენს მდგომარეობას, როდესაც პოლიტიკურ ხელისუფლებას ჰქონდა უფლება საკუთარი დანიშნული მოადგილეებისთვის გაეცა დანამატები და პრემიები.

შემოთავაზებული ცვლილება, საერთაშორისო პრაქტიკის შერჩევითი და არსით არასწორი წაკითხვის გარდა, ეწინააღმდეგება იმ პრინციპებს, რომელზეც თავად განმარტებით ბარათში მოყვანილი მაგალითები მიუთითებს და ქმნის კორუფციის ახალ საფრთხეებს იქ, სადაც ეს რისკი 2017 წლიდან უკვე შემცირებული იყო,” – წერს საერთაშორისო გამჭვირვალობა საქართველო კვლევაში.

2026 წლის ბიუჯეტის შესახებ კანონით საბაზო თანამდებობრივი სარგო 1 600 ლარს შეადგენს.

კანონით დადგენილ კოეფიციენტებზე გადამრავლებით, კანონპროექტით განსაზღვრული თანამდებობების სარგო ასე გამოიყურება:

„კანონის მიხედვით, ერთჯერადი დანამატი არ უნდა აღემატებოდეს თანამდებობრივი სარგოს ერთი თვის ოდენობას, ხოლო წლის განმავლობაში დანამატი არ უნდა აღემატებოდეს სარგოს 20%-ს, ჯილდო – 10%-ს.

სხვაგვარად რომ ვთქვათ, ცვლილების ამოქმედების შემდეგ მინისტრის ან თბილისის მერის მოადგილემ ხელფასის გარდა შესაძლოა ერთბაშად მიიღოს დანამატად მთლიანი თვის სარგოს ოდენობის თანხა, ხოლო წლის განმავლობაში ჯილდო-დანამატის ჯამური ოდენობა მის 3,5 თვის სარგოს გაუტოლდეს.

მაგალითად, მინისტრის მოადგილემ რომელსაც 11 600 ლარი აქვს დარიცხული ხელფასი, შესაძლოა დამატებით თვეში 3 480 ლარი მიიღოს ჯილდოსა და დანამატის სახით.

ამას ემატება კანონის ჩანაწერი, რომელიც „განსაკუთრებულ შემთხვევაში“ მთავრობას უფლებას აძლევს, კანონისმიერი ზღვრის გაუთვალისწინებლად [10%-იანი ზღვრის მიღმა] მიანიჭოს ერთჯერადი ჯილდო, ამ დათქმას კანონპროექტი არ ცვლის, თანამდებობის პირთა წრის გაფართოებით კი მისი გამოყენების არეალი ფართოვდება,.“ – ნათქვამია კვლევაში.

 

აიღე „სელფის“ ახალი ნომერი ბათუმში და მიიღე 1 კვირიანი ულიმიტო სრულიად უფასოდ

📍 7 ივნისის ჩათვლით აიღე ახალი ნომერი და მიიღე 1 კვირიანი ულიმიტო სრულიად უფასოდ 🎁
ეწვიე სელფის მაღაზიას ბათუმში და ისარგებლე:
• ულიმიტო ინტერნეტით
• ულიმიტო ზარებით
• ულიმიტო SMS-ებით

📌 ბათუმი, გორგილაძის ქ. 40
https://go.cellfie.ge/adjara_branch_1
📌ბათუმი, ბაგრატიონისქ. 155
https://go.cellfie.ge/adjara_branch_2
📌ბათუმი, ორბი
https://go.cellfie.ge/adjara_branch_3
📌ბათუმი, გრანდმოლი, შერიფ ხიმშიაშვილი 29
https://go.cellfie.ge/adjara_branch_4

👉 აიღე ახალი ნომერი – Cellfie

ქობულეთის შემოვლითი გზა სატვირთო ავტომანქანებისთვისაც გაიხსნა

საავტომობილო გზების დეპარტამენტის ინფორმაციით, ქობულეთის შემოვლით გზაზე სატვირთო ავტომანქანების მოძრაობა დღეს, 27 მაისს აღდგა.

„საერთაშორისო მნიშვნელობის სენაკი-ფოთი (ასაქცევი)-სარფის საავტომობილო გზის 85-ე კმ-ზე, არსებული სახიდე გადასასვლელის სადეფორმაციო ნაკერების აღდგენის სამუშაოები დასრულდა და ამავე გზის 72-ე და 89-ე კმ-ებზე მისაბმელიანი და ნახევრადმისაბმელიანი ავტოტარნსპორტის მოძრაობა დათქმულ ვადაზე ადრე აღდგა“ – წერს საქართველოს საავტომობილო გზების დეპარტამენტი.

ამავე დეპარტამენტის იმფორმაციით ქობულეთის შემოვლით გზაზე მსუბუქი ავტოტრანსპორტის მოძრაობა 2026 წლის 26 მაისის დღის 14:00 სთ-დან აღდგა, ხოლო სატვირთო, მისაბმელიანი და ნახევრადმისაბმელიანი ავტოტრანსპორტის მოძრაობა 28 მაისიდან უნდა აღდგენილიყო.

სახიდე გადასასვლელის სადეფორმაციო ნაკერების შეცვლის სამუშაოების გამო ქობულეთის შემოვლითი გზა ქობულეთისა და ჩაქვის სატრანსპორტო კვანძებს შორის მონაკვეთში 14 მაისიდან 27 მაისის ჩათვლით ჩაიკეტა, თუმცა, მოძრაობა ვადაზე ადრე აღადგინეს.

22 მაისს სახიდე გადასასვლელზე, სადაც სადეფორმაციო ნაკერები შეცვალეს, სამონტაჟო სამუშაოები დასრულებული იყო და მხოლოდ ბეტონის ჩასხმა იყო დარჩენილი.

ამ თემაზე ვრცლად:

„დასრულდება ავტობანის მშენებლობა“ – „ოცნების“ შეუსრულებელი საარჩევნო დაპირება

 

საბავშვო ბაღის აღმზრდელს ბავშვზე ძალადობის მუხლით ბრალი წარუდგინეს

პროკურატურის ინფორმაციით, არასრულწლოვანების საქმეთა სამმართველომ მცირეწლოვნის მიმართ ჩადენილი ძალადობის ფაქტზე ერთ პირს ბრალდება წარუდგინა.

„გამოძიებით დადგინდა, რომ თბილისში მდებარე ერთ-ერთ კერძო საბავშვო ბაღში, აღმზრდელმა მცირეწლოვნის მიმართ ძალადობა განახორციელა, რა დროსაც დაზარალებულმა დაზიანებები მიიღო.

დაკავებულს ბრალდება საქართველოს სისხლის სამართლის კოდექსის 126-ე მუხლის 1 პრიმა ნაწილის „ა“ ქვეპუნქტით (ცემა ან სხვაგვარი ძალადობა, ჩადენილი არასრულწლოვანის მიმართ) წარედგინა, რაც სასჯელის სახედ და ზომად ორ წლამდე თავისუფლების აღკვეთას ითვალისწინებს“.

მათივე ინფორმაციით, პროკურატურა ბრალდებულისთვის აღკვეთის ღონისძიების სახით პატიმრობის შეფარდების შუამდგომლობით სასამართლოს კანონით დადგენილ ვადაში მიმართავს.

 

დღეს მუსლიმები ყურბან-ბაირამს აღნიშნავენ – რას პასუხობს პატარაძე შეკითხვას მეჩეთზე

დღეს, 27 მაისს, მუსლიმები ყურბან-ბაირამს აღნიშნავენ.

ყურბან-ბაირამი რამაზან-ბაირამიდან 70-ე დღეს აღინიშნება და ერთ-ერთი ყველაზე დიდი დღესასწაულია ისლამში.

მუსლიმები ამ დღესასწაულზე ღმერთს მსხვერპლს სწირავენ და ჰალვას ამზადებენ. ტრადიციისამებრ, გადიან წინაპრების საფლავებზეც.

ყურბან-ბაირამის ლოცვა ბათუმის ორივე მეჩეთში 6:25 წუთზე შესრულდა.

ბათუმის ორთა ჯამეში მისული იყო აჭარის მთავრობის თავმჯდომარე ზურაბ პატარაძე. რვა წლის შემდეგ აჭარაში დაბრუნებულ ზურაბ პატარაძეს ზუსტად იგივე სიტუაცია დახვდა რაც რვა წლის წინ იყო – მუსლიმებმა ისევ ღია ცის ქვეშ შეასრულეს სადღესასწაულო ლოცვა.

ზურაბ პატარაძე და აჭარის მთავრობის სხვა წევრები შედიან ბათუმის ორთა ჯამეში ბაირამის ლოცვის შემდეგ

რამდენად სამართლიანია, რომ მუსლიმ მოქალაქეებს ისევ ქუჩაში უწევთ ლოცვა? – ჰკითხა “ბათუმელებმა” ზურაბ პატარაძეს.

„ჩვენი მოქალაქეების უფლებების დაცვა არის ჩვენთვის უმთავრესი პრიორიტეტი. იცით რომ მეჩეთის საკითხი არის განხილვაზე სასამართლოში, ჩვენ, რა თქმა უნდა, დაველოდებით სასამართლო გადაწყვეტილებას და მხოლოდ ამის შემდეგ მივიღებთ შესაბამის გადაწყვეტილებას,” – თქვა ზურაბ პატარაძემ „ბათუმელების“ კითხვის პასუხად.

  • ბათუმში მეჩეთის მშენებლობის მცდელობის ქრონოლოგია 

2012 წლის ოქტომბრის არჩევნებამდე ბიძინა ივანიშვილმა, მაშინდელი ხელისუფლების მთავარმა ოპოზიციონერმა თქვა, რომ ბათუმში მეჩეთის მშენებლობას თავად დააფინანსებდა.

2013 წლის თებერვალში ბიძინა ივანიშვილმა უკვე პრემიერის რანგში დაადასტურა, რომ „მეჩეთისთვის ადგილს ეძებს აჭარის მაშინდელი  მთავრობის მეთაური ხაბაძე“.

2013 წლის მარტში, თემაზე კომენტირებისას, აჭარის მთავრობის მაშინდელმა თავმჯდომარემ არჩილ ხაბაძემ დააზუსტა: “ჩვენ თავიდანვე დავაფიქსირეთ, რომ მეჩეთის მშენებლობა მოხდება ქართული ფულით“.

2016 წელს, მუსლიმებმა გენერალ აბაშიძის #49-ში 2 500 კვადრატული მეტრი მიწა კერძო პირისგან იყიდეს და მერიას ახალი მეჩეთის პროექტი წარუდგინეს დასამტკიცებლად. მერიამ მუსლიმებს მეჩეთის პროექტზე უარი უთხრა.

2017 წლის ივნისში, მუსლიმების სახელით მეჩეთის მშენებლობაზე ნებართვის მოპოვების მიზნით, სასამართლოს ორმა არასამთავრობო ორგანიზაციამ,  -„ტოლერანტობისა და მრავალფეროვნების ინსტიტუტმა“ (TDI)  და ადამიანის უფლებებისა სწავლებისა და მონიტორინგის ცენტრმა“ (EMC) მიმართა.

2018 წლის 28 მარტს, ბათუმის მერიას სახალხო დამცველმაც მიმართა და მუსლიმებისთვის უარის დოკუმენტის ბათილად ცნობა მოითხოვა.

2019 წლის 30 სექტემბერს, ბათუმის საქალაქო სასამართლომ, დისკრიმინაციად მიიჩნია მუსლიმი თემის მიმართ ბათუმის მერიის დამოკიდებულება „ბათუმის ახალი მეჩეთის საქმეზე“. ბათუმის მერიას დისკრიმინაცია მეჩეთის აშენების საქმეზე სააპელაციო სასამართლომაც დაუდგინა.

საქმე განიხილა უზენაესმა სასამართლომაც და 2023 წელს „ბათუმის ახალი მეჩეთის საქმე“ ქუთაისის სააპელაციო სასამართლოს ხელახლა განსახილველად დაუბრუნა.

ამავე თემაზე:

ბრძოლა მეჩეთისთვის და მეჩეთის წინააღმდეგ

 

ამ კომპანიების საქმიანობის არეალი არ იყო საქართველო – საგამოძიებო დასანქცირებულ კომპანიებზე

დიდი ბრიტანეთის მიერ დასანქცირებულ კომპანიებთან დაკავშირებით, ფინანსთა სამინისტროს საგამოძიებო სამსახური განცხადებას ავრცელებს, სადაც ამბობს, რომ კომპანიები: შპს ეიაიფორი, შპს არვიქსი და შპს რაპირა გრუპი, არ საქმიანობენ „საქართველოს არეალში“.

აღნიშნული კომპანიები დიდმა ბრიტანეთმა იმის გამო დაასანქცირა, რომ რუსეთს ეხმარებოდნენ სანქციებისთვის გვერდის ავლაში.

„ფინანსთა სამინისტროს საგამოძიებო სამსახურში დაწყებულია და მიმდინარეობს გამოძიება, რასთან დაკავშირებითაც უკვე მიღწეულია კონკრეტული სამართლებრივი შედეგები. დასანქცირებული კომპანიებიდან არცერთის საქმიანობის არეალი არ იყო საქართველო.

შპს „ეიაიფორი“ და შპს „არვიქს“ ფიქტიურად, გარკვეული ანაზღაურების სანაცვლოდ დარეგისტრირდნენ სხვა პირების სახელზე, რეალურად კი ოპერირებდნენ რუსეთში, მოსკოვში და საქართველოში აქტივები ან ოფისები არ გააჩნდათ.

აღნიშნულ სისხლის სამართლის საქმეზე, 2026 წლის 28 აპრილის სასამართლო განაჩენით, სამ ბრალდებულს სასჯელის სახედ განესაზღვრა ჯარიმა 30 000 ლარის ოდენობით და პირობითი მსჯავრი, ხოლო დანაშაულის ორგანიზატორ დავით ჯინჭარაძეს მიესაჯა თავისუფლების აღკვეთა 9 წლისა და 6 თვის ვადით.

რაც შეეხება შპს „რაპირა გრუპის“ უკანონო საქმიანობას, დადგენილია, რომ დიდი ბრიტანეთის მოქალაქის მიერ მინდობილობით დარეგისტრირებული კომპანია, ვებგვერდ „rapira.net“-ის საშუალებით, ექსკლუზიურად ემსახურებოდა მხოლოდ რუსეთის მოქალაქეებს და მისი დომენიც რუსულ რეგისტრატორთან არის გაფორმებული. კომპანიას არანაირი ბრუნვა საბანკო ანგარიშებზე, აქტივები ან ოფისები საქართველოს ტერიტორიაზე არ უფიქსირდება და მისი რეგისტრაცია მხოლოდ ფორმალურ ხასიათს ატარებდა“- აცხადებს საგამოძიებო სამსახური.

ბრიტანეთის მთავრობის ინფორმაციით, გამოავლინეს კრემლის მიერ მხარდაჭერილი ქსელი, რომელიც ყირგიზეთის გავლით თანხებს რუსეთის ეკონომიკაში უშვებს, რასაც ეს უკანასკნელი უკრაინაში მიმდინარე ომისთვის იყენებს. კომპანიების გარდა სანქციები ეხება ფიზიკურ პირებსაც.

დასანქცირებულ კომპანიებთან დაკავშირებით, დღეს, 27 მაისს, კომენტარი გააკეთა პარლამენტის ყოფილმა წევრმა და ეკონომისტმა რომან გოცირიძემ.

მისი შეფასებით, დასანქცირებულ კომპანიებზე პასუხისმგებლობა „ქართული ოცნების“ მთავრობას ეკისრება.

„ბრიტანეთის მიერ სამი ქართული კომპანიის დასანქცირება ძლიერი დარტყმაა ქვეყნის იმიჯისათვის, მისი საინვესტიციო რეპუტაციისათვის, რადგან ეს კომპანიები კრიპტოვალუტის მეშვეობით პირდაპირ უწევდნენ მრავალმილიარდიან დახმარებას რუსეთს და დასანქცირების დასაბუთებაში პირდაპირ არის მითითებული, რომ რუსეთის მთავრობის სტრატეგიულ ინტერესებს ემსახურებოდნენ.

რას ნიშნავს ეს? – ამ კომპანიების მეშვეობით რუსეთი იარაღს და უამრავ სხვა საჭირო მასალას, მათ შორის ფინანსურ ტრანზაქციებს იყენებდა უკრაინაში ადამიანების დასახოცად. და როგორც ჩანს, ეს პირდაპირ რუსეთის FSB-ს მიერ კონტროლირებადი სტრუქტურაა.

მილიარდობით ფული ტრიალებს, რომელიც ქაღალდზე საქართველოს ეკონომიკას ზრდის. უყვართ [„ოცნებას] ხოლმე ტრაბახი, რომ ეკონომიკა გაიზარდა, მშპ გაიზარდა. ამ მილიარდებიდან რამე დარჩა საქართველოში? რომელიმე ოჯახში შევიდა? როდესაც ამბობენ, რომ „ვაკეთოთ ფული“, „ომის ფაქტორი გამოვიყენოთ“, – არავინ ხეირობს უკრაინელი ადამიანების სისხლით. „ქართული ოცნების“ მმართველი კლანი, უკრაინელების სისხლის ფასად მდიდრდება“- ამბობს რომან გოცირიძე.

მისი თქმით, პასუხისმგებლობა ეკისრება საქართველოს ეროვნულ ბანკს და „ოცნების“ მთავრობას.

„სად იყო მთავრობა? სად იყო ეროვნული ბანკი? ეხლა რაღაც აბდაუბდა განცხადებას აკეთებენ და ისეთი შთაბეჭდილება უნდა შექმნან, თითქოსდა ბრიტანეთს მათ მიაწოდეს ინფორმაცია და როდის მიაწოდეს, სანქციები, რომ გამოქვეყნდა და დააზიანა ქვეყნის რეპუტაცია?

ყველა ქოლ-ცენტრის უკან დგას „ქართული ოცნების“ ხელისუფლებისა და ბიზნესის წარმომადგენელი. ვერცერთი ქოლცენტრი ვერ იმუშავებს ხელისუფლების უშუალო მფარველობის გარეშე. ასეთი სავალალო სურათი გვაქვს დღეს, სამწუხაროდ“- ამბობს რომან გოცირიძე.

________________

ამ თემაზე:

ლონდონმა საქართველოში რეგისტრირებული 3 შპს დაასანქცირა

რუსეთის და უკრაინის სამხედრო დანაკარგები ომში – 27 მაისი

უკრაინის შეიარაღებული ძალების გენერალური შტაბის დღევანდელი მონაცემებით, ომის დაწყებიდან 2026 წლის 27 მაისამდე პერიოდში, რუსეთის არმიის საბრძოლო დანაკარგი არის:
  • ცოცხალი ძალა – დაახლოებით 1 358 950 ადამიანი [გასულ დღე-ღამეში +1 000. ამ მონაცემებში შედის როგორც დაღუპულები, ასევე დაჭრილები]
  • ტანკი – 11 955 ერთეული [+1]
  • ჯავშანტექნიკა – 24 618 ერთეული [+3]
  • საარტილერიო სისტემა – 42 790 ერთეული [+39]
  • MLRS – 1 805 ერთეული [+1]
  • საზენიტო საბრძოლო სისტემა – 1 397 ერთეული [+0]
  • თვითმფრინავი – 436 ერთეული [+0]
  • ვერტმფრენი – 353 ერთეული [+0]
  • უპილოტო საფრენი აპარატის ოპერატიულ-ტაქტიკური დონე – 313 342 ერთეული [+1 307]
  • სახმელეთო რობოტიზებული კომპლექსი – 1 485 ერთეული [+10]
  • გემი/ნავი – 33 ერთეული [+0]
  • წყალქვეშა ნავი – 2 ერთეული [+0]
  • მანქანები და საწვავის ავზები – 99 645 ერთეული [+271]
  • სპეცტექნიკა – 4 224 ერთეული [+3]
  • ფრთოსანი რაკეტა [ჩამოაგდეს] – 4 687 ერთეული [+0]

უკრაინის გენერალური შტაბის განცხადებით, საომარი მოქმედებების მაღალი ინტენსივობის გამო მონაცემები იცვლება.

უკრაინის სამხედრო დანაკარგებზე სტატისტიკური ინფორმაცია 2026 წლის 25 თებერვლის შემდეგ აღარ განუახლებია რუსეთს.

რუსეთის თავდაცვის სამინისტროს მიერ ტელეგრამ არხზე ბოლოს გავრცელებული მონაცემებით, ომის დაწყებიდან 2026 წლის 25 თებერვლამდე პერიოდში სულ განადგურებულია უკრაინის:

  • 670 თვითმფრინავი
  • 283 ვერტმფრენი
  • 117 299 უპილოტო საფრენი აპარატი
  • 651 საზენიტო სარაკეტო სისტემა
  • 27 873 ტანკი და სხვა ჯავშანტექნიკა
  • 1 674 მრავალჯერადი სარაკეტო გამშვები
  • 33 474 საველე არტილერია და ნაღმმტყორცნი
  • 55 252 სპეციალური სამხედრო მანქანა

ეს ის მონაცემებია, რომელსაც უკრაინა და რუსეთი ოფიციალურად ავრცელებენ, თუმცა ომის პირობებში შეუძლებელია ზუსტად გადამოწმება, რამდენად შეესაბამება მხარეების მიერ გავრცელებული ინფორმაცია დანაკარგების შესახებ რეალურ რიცხვებს.

ამასთან, აღნიშნულ მონაცემებთან ერთად რუსეთის თავდაცვა, უკრაინის და რუსეთის არმიის ცოცხალი ძალის საერთო დანაკარგების შესახებ სტატისტიკას არ აქვეყნებს. უკრაინის არმიის ცოცხალი ძალის დანაკარგების შესახებ მონაცემებს არ აქვეყნებს არც უკრაინა.

—

რუსეთი უკრაინაში 2022 წლის 24 თებერვალს გამთენიისას შეიჭრა და სრულმასშტაბიანი ომი დაიწყო.

ამ თემაზე:

„რუსეთის საგაზაფხულო კამპანია უკრაინაში ისე დასრულდა, არც კი დაწყებულა“ – ინტერვიუ გენერალთან

 

მთავარი ფოტო: უკრაინის გენშტაბი/facebook

„ძალაუფლებას თუ შეინარჩუნებენ, გადავლენ უფრო მასშტაბურ ბოროტებაზე“ – ინტერვიუ

„ეს რეალობა უკვე დადგა: ჩვენ ვართ ფეოდალურ, ტოტალიტარულ, კოლონიური გამოცდილებების ნარევი ჰიბრიდის მმართველობის ქვეშ, თანაც მტრულად განწყობილი და ისტორიული მჩაგვრელის, უცხო სახელმწიფოს, რუსეთის გარანტიით,“ – გვესაუბრება ისტორიკოსი ირაკლი ხვადაგიანი. მას 26 მაისს „ოცნების“ პრეზიდენტის და პრემიერ-მინისტრის გზავნილებზე ვესაუბრეთ: დამოუკიდებლობის დღეს ოკუპაციასა და დაკარგულ ტერიტორიებზე, ასევე, სხვა ეროვნულ ინტერესებზე „ოცნების“ ხელისუფლებას არაფერი უთქვამს.

„ერთადერთი, რაც ახალი იყო დღევანდელ გამოსვლაში, იყო ის, რაც ახასიათებს რეჟიმებს: როდესაც მათ ლეგიტიმაცია არ აქვთ და, ფაქტობრივად, საზოგადოების შიგნით რეალური დასაყრდენი აღარ არსებობს, ამ დროს მათ სჭირდებათ საყოველთაო სტატუსის, რესურსის მქონე ღირებულება ან ინსტიტუტი, რომელსაც ისინი ამოეფარებიან და მის ინსტრუმენტალიზაციას დაიწყებენ, მასზე პარაზიტირებას, რომ თვითონ სახე გაიკეთილშობილონ.

ლოზუნგი „საქართველო ქრისტიანული სახელმწიფო“ – ეს დამახასიათებელი მანერაა რუსული გავლენის ქვეშ მყოფი რეჟიმებისთვის… მსგავსი მიდგომა ფუნდამენტურად უპირისპირდება თანამედროვე სახელმწიფოს – იმ სახელმწიფოს, რომელიც 1918 წლის 26 მაისს დაფუძნდა და 1991 წლის 9 აპრილს აღდგა. ეს არის დემოკრატიული რესპუბლიკა, რომლის კონსტიტუციაშიც ხაზგასმით აღნიშნულია – თანასწორობა ყველა იდეის, მათ შორის, რელიგიისა, გამონაკლისის გარეშე,“ – ამბობს ირაკლი ხვადაგიანი.

„ბათუმელებმა“ ისტორიკოს, SOVLAB-ის მკვლევართან, ირაკლი ხვადაგიანთან ინტერვიუ ჩაწერა.

  • „ოცნების“ პრეზიდენტს, ასევე პრემიერ-მინისტრს არ უხსენებიათ 26 მაისის სიტყვაში დაკარგული ტერიტორიები, ევროპული მომავალი, ოკუპაცია, მათი მთავარი გზავნილი იყო ის, რომ „საქართველო ქრისტიანული სახელმწიფოა“. თქვენთვის რა იყო მნიშვნელოვანი „ოცნების“ დღევანდელ გზავნილებში? 

ფუნდამენტურად ახალი და მოულოდნელი არაფერი არ იყო მათ რიტორიკაში.

ილაპარაკო ყველაფერზე, გამოგონილ საფრთხეებზე, გამოგონილ გამოწვევებზე და რეალურ შინაარსს აუარო გვერდი – ეს არის მუდმივი ხაზი, რასაც მიჰყვება რუსული პროპაგანდა და ცხადია, მათი სატელიტები ყველგან. ამის კლასიკური მაგალითებია, როგორც ოკუპაციის დღე – 25 თებერვალი, ისე დამოუკიდებლობის გამოცხადების დღე – 26 მაისი.

მთავარი მომენტია, რაღაცნაირად ორიენტირები შებრუნდეს: საფრთხედ, გამოწვევად უნდა გამოჩნდეს რაღაც შეთქმულებები, საერთაშორისო, მტრული ძალები, კორპორაციები. ეს, ცხადია, რუსული პროპაგანდის ტრადიციით, ყოველთვის იფუთება ისე, რომ თითქოს საფრთხე მოდის დასავლეთიდან.

რა თქმა უნდა, არაფერი არ უნდა იყოს ნათქვამი რუსულ იმპერიალიზმზე, წარსულსა და თანამედროვეობაში აგრესიულ ომებზე, გენოციდებზე, ტოტალიტარულ ტერორზე, კოლონიზაციაზე, იდენტობის წაშლაზე, შეზღუდვაზე.

ერთადერთი, რაც ახალი იყო დღევანდელ გამოსვლაში, იყო ის, რაც ახასიათებს რეჟიმებს: როდესაც ლეგიტიმაცია არ აქვთ და, ფაქტობრივად, საზოგადოების შიგნით რეალური დასაყრდენი აღარ არსებობს, ამ დროს მათ სჭირდებათ საყოველთაო სტატუსის, რესურსის მქონე ღირებულება ან ინსტიტუტი, რომელსაც ამოეფარებიან და მის ინსტრუმენტალიზაციას დაიწყებენ, მასზე პარაზიტირებას, რომ სახე გაიკეთილშობილონ.

ცხადია, ცივილიზაციურად ძალიან საინტერესო და მნიშვნელოვანია, როდიდან აითვლება ქრისტიანობის გავრცელება საქართველოში, მაგრამ ამაზე ისტორიული კონსენსუსი არ არსებობს. ეს საუკუნის და ათასწლეულების დონეზე ანგარიშდება.

ამას რომ თავი დავანებოთ, ამ მნიშვნელოვანი ისტორიული, ცივილიზაციური და კულტურული იდენტობის შემადგენელი ელემენტის ხელოვნურად შემოყვანა თანამედროვე დემოკრატიული, ცივილიზებული, სეკულარული, რესპუბლიკის დაფუძნების დღის გზავნილის გადასაფარად, ცხადია, გვაჩვენებს, რა ტიპის მანიპულაციასთან გვაქვს საქმე.

ამავდროულად, ნებისმიერი ჯანსაღი რელიგიური ორგანიზაციისთვის, ინსტიტუტისთვის, ეკლესიისთვის, ასეთი თამაში სახიფათოა ხელისუფლებასთან.

როდესაც ხელისუფლება თავისი რეპუტაციის გასაკეთილშობილებლად იწყებს ეკლესიის და რელიგიის ინსტრუმენტალიზაციას, მასაც აზიანებს, ცხადია.

თუკი ეს პროცესი ღრმად წავა და დიდი ხანია ეს ჩვენს ქვეყანაში უკვე ღრმად არის წასული, ორთავეს ძალიან ცუდი პერსპექტივა შეიძლება შეექმნას.

ირაკლი ხვადაგიანი

ამ ისტორიულ მანიპულაციას და პარაზიტირებას რომ თავი დავანებოთ, თვითონ ლოზუნგი „საქართველო ქრისტიანული სახელმწიფო“ – ეს დამახასიათებელი მანერაა რუსული გავლენის ქვეშ მყოფი რეჟიმებისთვის. მათ მემკვიდრეობით აქვთ მიღებული საბჭოურ-რუსული დამკვიდრებული კლიშე, რომელიც ერს და ხალხს უყურებს, როგორც ეთნოგრაფიულ, ფოლკლორულ ერთობას და არა თანამედროვე, ცივილიზებულ საზოგადოებას. მას, რა თქმა უნდა, კულტურული, რელიგიური და სხვა იდენტობის განმსაზღვრელ ელემენტები აქვს, მაგრამ ეს არის ბუნებრივად და არ არის რომელიმე ერთზე პრივილეგირებული.

მსგავსი მიდგომა ფუნდამენტურად უპირისპირდება თანამედროვე სახელმწიფოს – იმ სახელმწიფოს, რომელიც 1918 წლის 26 მაისს დაფუძნდა და 1991 წლის 9 აპრილს აღდგა. ეს არის დემოკრატიული რესპუბლიკა, რომლის კონსტიტუციაშიც ხაზგასმით წერია – თანასწორობა ყველა იდეის, მათ შორის, რელიგიისა, გამონაკლისის გარეშე.

კონკორდატიც არ გულისხმობს იმას, რომ მრავალეთნიკური, მრავალკულტურული და მრავალრელიგიური საქართველოს საზოგადოება, ქართველი ერი პოლიტიკური თვალსაზრისით გამოცხადდეს ექსკლუზიურად, რომ არის ან მუსლიმური, ან ქრისტიანული, ან მაზდეანური და ასე შემდეგ.

  • უქმნის ეს საფრთხეს დამოუკიდებლობას, როცა დამოუკიდებლობის დღეს ხელისუფლება ძირითადად ლაპარაკობს რელიგიაზე და არა დამოუკიდებლობის დღეს არსებულ საფრთხეებზე?

პირველ რიგში, ეს არის არასამართლიანი დამოკიდებულება სხვა რელიგიების მიმართ, ჩვენი მოქალაქეების, რომლებიც ათეული საუკუნეების განმავლობაში იყვნენ ქართული სამეფო-სამთავროების შემადგენლობაში, თანამედროვე რესპუბლიკის მოქალაქეები, მთელი თაობები, რომლებიც არიან მუსლიმები, ან ქართველი ებრაელები.

ნაცვლად იმისა, რომ სამოქალაქო ხელისუფლება ისევე, როგორც ნებისმიერი ცალკე აღებული კონფესია, მოწოდებული იყოს დიალოგსა და თანამშრომლობაზე, ერთიანობაზე, სოლიდარობასა და სიკეთეზე, განხეთქილებას აღრმავებს.

ერთი რელიგიის ვიწრო ხედვაში რომ ჩავრჩეთ, რიტორიკას და საქმეებს შორის, რელიგიის მიერ შემოტანილ ღირებულებებს შორის არის სრული აცდენა. რელიგია არის სამართლიანობაზე, სიკეთეზე, სიყვარულზე, ურთიერთგაგებაზე ორიენტირებული ფილოსოფია. ამ დროს ჩინოვნიკები, რომლებსაც მიტაცებული აქვთ ხელისუფლება, თავიანთი მოქალაქეების ორგანიზებულ წამებაში და ჩაგვრაში არიან ყელამდე ჩაფლული და დახელოვნებული, მათ შორის, ქრისტიანი მართლმადიდებელი ეკლესიის მრევლის.

ამ მრევლის არაერთი წევრია დღეს გამოკეტილი ციხეში სრულიად უსამართლოდ.

ძალიან მკაფიოა, რამხელა თვალთმაქცობასა და უტიფრობასთან გვაქვს საქმე, როდესაც ასეთი მანიპულაცია ხდება რელიგიური თემით და ამით იფარება ისეთი კატასტროფული გამოწვევა, როგორიც არის ოკუპაცია, დემოგრაფია, ქვეყნის დაცლა…

  • ირაკლი კობახიძე დღეს ამბობდა: „საქართველო არის დამოუკიდებელი და სუვერენული, როგორც არასდროს“. რეალურად რა არის დღეს დამოუკიდებლობის ყველაზე დიდი გამოწვევა? 

ადეკვატური შეფასება იქნებოდა ის, რომ ეს არის კლასიკური, ტოტალიტარული ტყუილი. ამის გარეშე მათ არსებობა არ შეუძლიათ. საკმარისია მათ მოაშორო გაძლიერებული კორდონები, სპეცრაზმები, სახელმწიფო დაცვა, პოლიცია, მათივე დამსჯელი დაჯგუფებები, ვნახავთ, რომ არ შეუძლიათ საკუთარი ქვეყნის მოქალაქეებთან თავისუფლად ურთიერთობა, საჯარო ადგილებში გამოჩენა.

ძალიან კარგად იციან, რომ აბსოლუტური უმრავლესობისთვის ისინი არიან ორგანულად მიუღებელი თავიანთი ნამოქმედარის გამო, ზუსტად ამ რიტორიკის გამო. ეს არის თვალში ნაცრის შეყრა, ადამიანების დაცინვა, რომლებიც იტანჯებიან მათი ბოროტი გადაწყვეტილებების შედეგად.

ასე საბჭოთა რეჟიმი ამტკიცებდა, რომ თითქოს ის იყო ყველაზე ჰუმანური, დემოკრატიული,  თავისუფალი, ყველაზე სამართლიანი არჩევნებიც იქ ტარდებოდა და ყველაზე მდიდარი, უზრუნველყოფილი მოქალაქეები იქ ცხოვრობდნენ, ამ დროს კანიბალიზმამდე მიდიოდა ეკონომიკური კოლაფსის გამო ადამიანების უზარმაზარი მასები.

ამ ტოტალურ ტყუილში იძულებით მცხოვრები, ამ გამოცდილების მქონე თაობები უკვე მიჩვეული იყვნენ, რომ რასაც ოფიციალური წყაროები უტიფრად ამტკიცებდნენ, სინამდვილე 180 გრადუსით საპირისპირო იყო, მაგალითად, თუ ამტკიცებდნენ, რომ კეთილდღეობა იყო, სინამდვილეში იყო სიღატაკე და საშინელი ეკონომიკური კოლაფსი.

იგივე შეიძლება ითქვას დღევანდელ რიტორიკაზეც.

დამოუკიდებლობის ყველაზე დიდი საფრთხე არის ის, რაც არის მისი საპირისპირო – მონობა, დამოუკიდებლობის არქონა. ეს სახელმწიფოს შემთხვევაში გამოიხატება იმაში, რომ არ არსებობს მართვის სამართლიანი გარემო, არ არსებობს კანონიერი წარმომადგენლობითობა, რომელიც ასევე სამართლიან წესებს და კონკურენციას ეფუძნება — თავისუფალ და სამართლიან არჩევნებს.

მნიშვნელოვანია სასამართლო და ქონებრივი, ეკონომიკური თავისუფლება, სადაც ადამიანს აქვს ხელშეუხებლობა – გონიერებით და შრომით დოვლათი შექმნას. როდესაც ეს ყველაფერი მოშლილია, შეგვიძლია ვთქვათ, რომ საუბარი  დამოუკიდებლობაზე და თეორიულ საფრთხეებზე უკვე გავლილია.

ეს რეალობა უკვე დადგა: ჩვენ უკვე ვართ გაუქმებული ქვეყანა და ვართ ფეოდალურ, ტოტალიტარულ, კოლონიური გამოცდილებების ნარევი ჰიბრიდის მმართველობის ქვეშ, თანაც მტრულად განწყობილი და ისტორიული მჩაგვრელის, უცხო სახელმწიფოს, რუსეთის გარანტიით.

ამის შემდეგ არსებობს საფრთხის მომდევნო ფაზა: თუ ამ ტიპის ძალაუფლების შენარჩუნებას შეძლებენ, მერე გადადიან უფრო მასშტაბურ ბოროტებაზე – ეს არის პირდაპირი განადგურება, მოსპობა მოწინააღმდეგეების, ადამიანების მთელი ჯგუფების, სოციალური ფენების. ეს ადრეც გაუკეთებიათ და ახლაც შეიძლება ამის საფრთხე იყოს. მათ ეს სურთ აშკარად, არც მალავენ ამას, მაგრამ ამ ეტაპზე რესურსი არ ჰყოფნით.

ერთ-ერთი პოზიტიური და ოპტიმისტური ხედვა მომავლის არის, რომ ეს საფრთხეები დამდგარია, უფრო მასშტაბური საფრთხეებიც მოახლოებულია, მაგრამ ჩვენს საზოგადოებას აქვს წინააღმდეგობის რესურსი.

ასევე, თავისუფალ სამყაროს შეუძლია, დახმარების ხელი გამოგვიწოდოს ამ ბრძოლაში და შევძლოთ შევაჩეროთ ამ საფრთხეების მოახლოება.

  • რა შემთხვევაშია ეს შესაძლებელი? რა დაგვანახა ამ კუთხით დამოუკიდებელი საქართველოს გამოცდილებამ, როგორც პირველმა რესპუბლიკამ, ისე 9 აპრილის შემდეგმა პერიოდმა? 

გადარჩენის, დამოუკიდებლობის რეალურად დაბრუნების და გაღრმავების გზა არის ძლიერი საზოგადოების, ძლიერი პოლიტიკური პარტიების ქონა ან არსებულის, რა თქმა უნდა, გაძლიერება, შემდეგ კი, შემობრუნების წერტილის პოვნა.

დღეს ამ სამყაროში ყველაფერი დაფუძნებულია ადამიანების სოლიდარობაზე, აზრის, იდეის, ღირებულების გარშემო გაერთიანებაზე, რესურსების მობილიზებაზე. მნიშვნელოვანია მკაფიო ხედვით და სტრატეგიით მოძრაობა.

ყველა მოქალაქე, ვისაც ესმის ამ საფრთხეების მასშტაბი და იცის, რა არის სამართლიანი, რა არის სწორი, უნდა დაუკავშირდეს ერთმანეთს, იპოვოს, გაერთიანდეს პროფესიული ნიშნით, ტერიტორიული ნიშნით, რაღაც საერთო ჰობის გარშემოც კი, ყველგან, ყველა სივრცეში, ყველა სფეროში. ეს გაერთიანება უნდა შედგეს ფუნდამენტური ღირებულების გარშემო, როგორიც არის დემოკრატია, თავისუფლება, კეთილდღეობა, ევროპული გარემო და სტაბილურობა.

ამ შემთხვევაში ძალიან გაუჭირდება თუნდაც მათზე გაცილებით ძლიერ სისტემას, მასშტაბური და ორგანიზებული წინააღმდეგობა გატეხოს ან შეაჩეროს, მისგან დაიცვას თავი. ამის რესურსი ნამდვილად არის ჩვენს საზოგადოებაში.

ვნახეთ, რომ რამდენიმე დღის განმავლობაში ფაქტობრივად ყველა მოქალაქემ სიმბოლური თუ მნიშვნელოვანი რესურსი გაიღო სასიკვდილო საფრთხის წინაშე მყოფი ბავშვების დასაცავად. ეს ნიშნავს, რომ ეს საზოგადოება არის ჩამოყალიბებული, ამ პოტენციალის მქონეა და ეს დაბრკოლება არის გადასალახი.

დასამარცხებელია რეჟიმი, რომელსაც მიტაცებული აქვს სახელმწიფო სტრუქტურები. ამ რეჟიმისგან გათავისუფლების შემდეგ ეს იქნება ძალიან ძლიერი და დიდი პოტენციის მქონე ქვეყანა.

  • ზოგს მიაჩნია, რომ საქართველოში არ გამოვა დიქტატურა, რადგან იგივე პირველ კონსტიტუციაში გაიწერა დემოკრატიული, ევროპული ღირებულებები. არის ეს მშვიდად ყოფნის საფუძველი? 

ცხადია, წარსულს ეს ძალა აქვს და ეს ჩვენი რესურსის ნაწილად შეგვიძლია ჩავთვალოთ, როგორც მეხსიერება – ერთგვარი კულტურული კოდი, ვიცით, რომ შეგვეძლო ამის გაკეთება, გაგვიკეთებია კიდეც ამ იდეაზე, ამ სიმბოლოებზე.

აღსანიშნავია, რომ დამოუკიდებელი რესპუბლიკა დაეფუძნა ათწლეულების განმავლობაში მანამდე აწყობილ და განვითარებულ დიდ ტალღებს სოლიდარობის, თვითმოქმედების, სამოქალაქო საზოგადოებას, რასაც დღეს ვეძახით და ძლიერ პოლიტიკურ პარტიებს.

ეს არის წარსულიდან რისი გამოყენება შეგვიძლია, რითაც უნდა გავძლიერდეთ დღევანდელ ბრძოლაში… ამ ქვეყნის დამოუკიდებლობისა და გაძლიერებისთვის მებრძოლი ადამიანების არსებობა ძალიან მნიშვნელოვანია დღევანდელობისთვის.

დიუშენის მქონე ბავშვების მშობლებს არ მისცეს სამთავრობო ღონისძიებაზე შესვლის უფლება

დღეს, 26 მაისს, თბილისში, დიუშენის კუნთოვანი დისტროფიის მქონე ბავშვების მშობლებს საქართველოს დამოუკიდებლობის აღსანიშნავ ღონისძიებაზე შესვლის და გადაადგილების უფლება არ მისცეს, არც ბანერით და არც ბანერის გარეშე.

„ბანერზე ეწერა – „წამალი ბავშვებს“ – მეტი არაფერი და ბანერი არ შეგვატანინეს 26 მაისის დამოუკიდებლობის აქციაზე“- ამბობენ დიუშენის დაავადების მქონე ბავშვების მშობლები.

„ვერ შეხვალთ, ღონისძიება მიმდინარეობს“ – უთხრა მშობლებს პოლიციამ და მათ გადაადგილების საშუალებას არ მისცა.

„რომელი კანონით, მითხარით, რომელი კანონით არ შეგვატანინეთ ჩემი ბავშვის ბანერი?“ „შვილი რომ მიკვდება, ღონისძიება მიმდინარეობს?“, „ბავშვები გვეღუპება“ – ამბობდნენ ბავშვების მშობლები.

„100 მშობელს ებრძვით, 100 ბავშვს კლავენ, ყველა გამოვალთ“- ამბობდნენ მოქალაქეები, რომლებიც სოლიდარობას უცხადებენ მშობლების ბრძოლას.

„გვინდოდა შევერთებოდით დამოუკიდებლობის აღნიშვნის დღეს და გაგვეშალა ჩვენი ბანერი. იმიტომ, რომ ბავშვების გარეშე არ არსებობს არც მომავალი, არც დამოუკიდებლობა და არც დამოუკიდებელი საქართველო. თუ ბავშვები არ გვეყოლება, მაშინ რისთვის გვჭირდება დამოუკიდებლობა და საერთოდ, ქვეყანა რისთვის გვინდა“- უთხრა ჟურნალისტებს კახა წიქარიშვილმა, ერთ-ერთი ბავშის მშობელმა.

მშობლები პოლიციამ არც მეტრო „თავისუფლების“ მხრიდან შეუშვა 26 მაისის ღონისძიებაზე, სადაც „ქართული ოცნების“ ხელისუფლება იმყოფებოდა.

„არც ბანერით შეგვიშვეს და არც უბანეროდ. გამოდის, რომ ქართველმა ხალხმა დამოუკიდებლობის დღე უნდა იზეიმოს მშობლების გარეშე, რომლებიც იბრძვიან თავიანთი შვილების გადასარჩენად“ – ამბობს კახა წიქარიშვილი.

დიუშენის დაავადების მქონე ბავშვების მშობლები თბილისში ერთ თვეზე მეტია ქუჩაში დგანან, 24-საათიან უწყვეტ აქციას მართავენ და წამალს ითხოვენ შვილების სიცოცხლის გადასარჩენად.

ილიაუნის სტუდენტებმა მარათონი გამართეს მათ დასახმარებლად, სადაც რამდენიმე დღეში 1.5 მილიონზე მეტი ლარი შეუგროვეს ბავშვებს.

ნახეთ ვიდეო:

რუსეთში იმ პირების ქონებას დააყადაღებენ, ვინც ქვეყნის ინტერესების საწინააღმდეგო ქმედებაშია „ბრალდებული“

რუსეთის სახელმწიფო დუმის დეპუტატებმა მეორე და მესამე მოსმენით მიიღეს კანონპროექტი, რაც რუსეთის ხელისუფლებას საშუალებას მისცემს ადმინისტრაციული წესით დასაჯოს ის პირები, რომლებმაც ქვეყანა უკვე დატოვეს, მაგრამ „რუსეთის ფედერაციის ინტერესების“ საწინააღმდეგო ქმედებაში არიან „ეჭვმიტანილები“.

ამის შესახებ რუსული დევნილი მედია წერს.

მედიის თანახმად, ერთ-ერთი მუხლი იმ ადამიანების დასჯას ითვალისწინებს, ვინც „ხელისუფლებისა და საზოგადოების უპატივცემულობა“ გამოხატა. კიდევ ერთი მუხლის საფუძველზე ქონებას დაუყადაღებენ იმ ადამიანებს, „ვინც წააქეზებს სიძულვილს, სანქციების შემოღებისკენ მოუწოდებს“ ან „არმიის დისკრედიტაციას“ მოახდენს.

ქონებას დაუყადაღებენ მათაც, ვისაც „ყალბი ინფორმაციის“ გავრცელებას და მედიის თავისუფლების ბოროტად გამოყენებაში წაუყენებენ ბრალს“.

ჩამონათვალი ამით არ სრულდება და ძალიან ბევრ „დანაშაულს“ ეხება.

კანონის თანახმად, თუ დანაშაული ჩადენილია საზღვარგარეთ, მაგრამ ზემოთ ჩამოთვლილი მუხლების ჩამონათვალში ხვდება, ეს წარმოადგენს საქმის წარმოების დაწყების ოფიციალურ საფუძველს.

რა ღირს მატარებლით მგზავრობა თბილისსა და ბაქოს შორის – ნახეთ განრიგი და დრო

26 მაისიდან თბილისსა და ბაქოს შორის სამგზავრო მატარებელმა მიმოსვლა განაახლა.

„საქართველოს რკინიგზაში“ აცხადებენ, რომ ფასები დინამიურია და მხოლოდ ერთი მიმართულებით 135 ლარიდან 370 ლარამდე მერყეობს. 

„ბილეთის ფასის კონკრეტული ოდენობა ფიქსირდება შეძენის მომენტში. ბილეთები იყიდება სალაროებში, სადაც ემატება საკომისიო 7 ლარი. ბილეთების შეძენა შესაძლებელი იქნება ასევე ონლაინ [tkt.ge-ზე].“ – გვითხრეს „საქართველოს რკინიგზაში“.

„საქართველოს რკინიგზის“ ინფორმაციით, რეისები სრულდება ყოველდღიურად. თბილისიდან მატარებელი გადის 21:00 საათზე და ბაქოში ჩადის 06:25 საათზე; ბაქოდან კი მატარებელი გამოდის 23:10 საათზე და თბილისში ჩამოდის 08:40 საათზე. 

აზერბაიჯანის რკინიგზის განცხადების თანახმად, ბაქო-თბილისი-ბაქოს მარშრუტზე აზერბაიჯანში გაჩერებები დაგეგმილია ბაქოს რკინიგზის სადგურზე, ბილაჯარიში, ევლახში, განჯაში, აღსტაფასა და ბოიუკ კესიკის სადგურებზე, ხოლო საქართველოში ორი გაჩერებაა – გარდაბნის სადგური და თბილისის რკინიგზის სადგური.

თბილისსა და ბაქოს შორის სარკინიგზო მიმოსვლის აღდგენის შესახებ ინფორმაცია ქართულმა მხარემ 18 მაისს გაავრცელა.

საქართველოსა და აზერბაიჯანს შორის სარკინიგზო მიმოსვლა, ჯერ კიდევ 2025 წლის მაისში უნდა აღდგენილიყო ოფიციალური შეთანხმებით. აზერბაიჯანს კოვიდპანდემიის გავრცელების საბაბით სახმელეთო საზღვრები 2020 წლის შემდეგ ჩაკეტილი აქვს.

ამ თემაზე: თბილისსა და ბაქოს შორის სარკინიგზო მიმოსვლა 26 მაისიდან აღდგება – ქართული მხარე

„პროპაგანდას არ აქვს მორალი“ – ივანიშვილი ფოტოზე ზვიად გამსახურდიასთან და მერაბ კოსტავასთან ერთად

„პროპაგანდას არ აქვს მორალი, ამიტომ ჩვენი ანტიდოტი არის სიმართლე. ჩვენ მოვყვეთ ნამდვილი ამბავი, ისენი მოყვებიან ტყუილებს. მერე ვნახოთ, რომელს ექნება უფრო დიდი ძალა. ისტორიულად, უფრო მეტი ძალა ყოველთვის აქვს სიმართლეს“- ამბობს მწერალი და დრამატურგი ლაშა ბუღაძე „ბათუმელებთან“.

დღეს, 26 მაისს, „ქართული ოცნების“ პროპაგანდისტულმა მედიამ, საქართველოს თავისუფლებისთვის მებრძოლი გმირები – მერაბ კოსტავა და ზვიად გამსახურდია, ბიძინა ივანიშვილთან ერთად გამოსახა 26 მაისის ქარდზე.

რა მიზანი აქვს „ოცნებას“, როცა საბჭოთა იმპერიის წინააღმდეგ მებრძოლ ადამიანებს ივანიშვილთან ერთად გამოსახავს ფოტოზე? – ამ თემაზე ესაუბრა „ბათუმელები“ ლაშა ბუღაძეს.

„აქ ისტორიაზე არ არის ლაპარაკი, ეს არის პროპაგანდა და მე ვფიქრობ, რომ არ არის სწორი არც ამ ქარდზე აქცენტის გაკეთება და მითუმეტეს, ამ ქარდის გადმოტანა სოციალურ ქსელებში, რადგან მათი მიზანი ეს არის. ადამიანები ხშირად აზრს არ ატანენ ხოლმე ამას, თუმცა შემდეგ, ეს როგორც ვიზუალური ხატი იბეჭდება მათ მეხსიერებაში და მიუხედავად იმისა, ჩვენ როგორ ვაფასებთ ამას, მაინც ხდება ხოლმე ჩვენი აღქმების ნაწილი. მათი მიზანია, რომ ეს ადამიანების თავში ჩაიბეჭდოს“- ამბობს ლაშა ბუღაძე.

მიუხედავად იმისა, რომ ეს ხშირად იწვევს სარკაზმს და, შესაძლოა, ბრაზსაც? – ვკითხეთ მას. ლაშა ბუღაძის შეფასებით, ამას უკვე არანაირი მნიშვნელობა აღარ აქვს პროპაგანდისთვის.

ლაშა ბუღაძე

„პროპაგანდამ შექმნა იმიჯი, ჩვენ კიდევ, ამ წლების განმავლობაში ვეღარ ვისწავლეთ ის, რომ არ უნდა ავყვეთ ამათ პროპაგანდისტულ ხრიკებს. ეს კიდევ ცალკე ღრმა პრობლემაა ჩვენი, რომელზედაც დისკუსიები მართლა საჭიროა.

ერთხელ და სამუდამოდ კარგად უნდა გავიაზროთ, რომ პროპაგანდას არ აქვს არანაირი ინტელექტუალური ამბიცია. ეს არ არის ღრმა მეცნიერება. პროპაგანდა არის ბრტყელი, ზედაპირული და მისი მიზანი არის მარტივი: აი ეს იმიჯი, ეს ხატი, უნდა ჩაიბეჭდოს ადამიანის აზროვნებაში. ეს ჩაბეჭდილი ხატი რაც უფრო გავრცელდება და რაც უფრო მეტად ციტირდება, მით უფრო კმაყოფილი დარჩება პროპაგანდისტი, რომელიც ამ ქარდს ავრცელებს.

რთულია ადამიანებს მოსთხოვო, რომ არ აღშფოთდნენ ამაზე იმიტომ, რომ კრეტინიზმია თავისთავად და ბუნებრივია, დაცინვის, აღშფოთების და დაგმობის სურვილს იწვევს, მაგრამ ეს არ აინტერესებს პროპაგანდას.

პროპაგანდას აინტერესებს ჩვენს მეხსიერებაში ჩარჩეს ეს ხატი. დარწმუნებულები იყავით, რომ ძალიან ბევრი ადამიანისათვის ეს გარკვეული მოდელი ძალიან ჩვეულებრივად იქნება აღქმული. ასეთი ხალხი შეიძლება უმრავლესობა არ არის საქართველოში, მაგრამ საკმარისია იმისათვის, რომ პროპაგანდამ გარკვეულ წრეში ან სოციუმში მიაღწიოს თავის მიზანს.

ზოგადად რომ ვთქვათ, პროპაგანდა ცხადია ცდილობს ისტორიის გაყალბებას. პარლამენტის ფასადზე ვნახეთ ხომ რა არის – 1700 წელი გაქრისტიანებიდან, ეს ბილბორდია და ილია მეორის პორტრეტია გამოფენილი. ერთი დროშაც არ არის ევროკავშირის და უბრალოდ ისტორიული უსამართლობა და უმსგავსობაა, საბჭოთა პროპაგანდის ტრადიციებში, რომ 26 მაისს არ არის ნახსენები საქართველოს პირველი რესპუბლიკა.

26 მაისს ჩვენ ვზეიმობთ 1918 წლის 26 მაისიდან, როცა დამფუძნებელმა კრებამ გამოაცხადა საქართველოს დამოუკიდებლობა.

ვთქვათ, ნოე ჟორდანიას არ ახსენებენ, მაგრამ, როგორ შეიძლება არ ახსენო ზვიად გამსახურდია, მერაბ კოსტავა, რომელიც საერთოდ 26 მაისს არის დაბადებული. 1700 წელია ხსენებული ქრისტიანობის, ხომ?! გასაგებია, რომ ილია მეორე ახლახანს გარდაიცვალა, მაგრამ ქრისტიანობა უკავშირდება წმინდა ნინოსაც, ქალს.

ანუ, აღარც წმინდა ნინო, აღარც პირველი რესპუბლიკა, აღარც ზვიად გამსახურდია… მარტო არის ივანიშვილი და მათი რაღაც სუროგატული ირანიზაცია, სადაც მარტო მღვდლები, თავიანთი პატრიარქი შიო მესამე და „ქართული ოცნებაა“, ეს უნდათ, რომ ჩაებეჭდოთ ადამიანებს გონებაში და ეს ძალიან სახიფათოა.

საჭიროა გარკვეული იმუნიტეტი და უნდა ვიცოდეთ, როგორ უნდა ვრეაგირებდეთ ასეთ პროპაგანდაზე, რომ უნებლიედ არ დავეხმაროთ ამის გავრცელებაში. ბუნებრივია, ამას სჭირდება ისევ და ისევ დაუღალავად საუბარი რეალურ, ნამდვილ ისტორიაზე. აუცილებლად უნდა მოვახერხოთ ის, რომ საზოგადოების ძალიან ფართო წრეებში იყოს მიტანილი ნამდვილი ამბავი, ნამდვილი ისტორია და არა ეს ტყუილი“- ამბობს ლაშა ბუღაძე.

მისი თქმით, ივანიშვილი და „ქართული ოცნება“ არის აგრესიული უმცირესობა, რომელთაც რეპრესიული, პოლიციური მექანიზმებით და ფულით მძევლად ჰყავთ აყვანილი საქართველოს უმრავლესობა.

„ამიტომ, ჩვენ ვილაპარაკოთ ჭეშმარიტ 26 მაისზე, რომელიც დაიბადა 1918 წელს და მისი აღდგენა მოხდა ეროვნული მოძრაობით 80-იან წლებში და რომ არ ყოფილიყო გერმანია, არ იქნებოდა 1918 წლის 26 მაისი.

გერმანია და გერმანიის ელჩი ფიშერი დღეს მტრად ჰყავს გამოცხადებული „ქართულ ოცნებას“. სინამდვილეში გერმანია იყო ჩვენი პირველი ზურგი დამოუკიდებლობის სხვა ქვეყნებთან ერთად.

ასევე, 90-იანი წლებიდან, უბრალოდ შიმშილისგან და სრული კატასტროფისგან გადაარჩინეს საქართველო. ჩვენ ვილაპარაკოთ ნამდვილი ამბავი მერაბ კოსტავაზე, გამსახურდიაზე, ჟორდანიაზე და ამათ იბოდონ რაც უნდათ. ჩვენ ნუ დავეხმარებით მათ ბოდვების გავრცელებაში.

ჩვენ დავდოთ ჩვენი ქარდები და როგორც ლევილში შეინახეს ემიგრანტებმა მთელი 70 წლის განმავლობაში 26 მაისის და დამოუკიდებლობის მეხსიერება საბჭოთა ოკუპაციის პირობებში, ასე შევინახოთ ჩვენც. ყველამ – ჟურნალისტებმა, მწერლებმა, მსახიობებმა, პედაგოგებმა უნდა შევინარჩუნოთ დამოუკიდებლობის იდეა და დავიცვათ ფალსიფიკაციისგან“ – ამბობს ლაშა ბუღაძე.

მისი შეფასებით, პროპაგანდა ცდილობს ქრისტიანობასთან დააკავშიროს ივანიშვილი.

„კობახიძემ კი რუსი გავრილოვი ჩამოიყვანა და ჩასვა პარლამენტის სავარძელში, მაგრამ პროპაგანდას არ აქვს მორალი, ამიტომ ჩვენი ანტიდოტი არის სიმართლე. ჩვენ მოვყვეთ ნამდვილი ამბავი, ესენი მოჰყვებიან ტყუილებს. მერე ვნახოთ, რომელს ექნება უფრო დიდი ძალა. ისტორიულად, უფრო მეტი ძალა ყოველთვის აქვს სიმართლეს“- ამბობს ლაშა ბუღაძე.

„რუსეთის საგაზაფხულო კამპანია უკრაინაში ისე დასრულდა, არც კი დაწყებულა“ – ინტერვიუ გენერალთან

„უკრაინელების დარტყმების შედეგად ცენტრალურ რუსეთში განლაგებული ნავთობგადამამუშავებელი ქარხნების და საწარმოების 80% გაჩერებულია,“ – ამბობს გენერალ-მაიორი ვახტანგ კაპანაძე და დასძენს, მსგავსი საწარმოების დიდი ნაწილი ურალს აქეთაა 3 ათასი კილომეტრის ფარგლებში, უკრაინას კი უკვე შეუძლია 2 ათას კილომეტრამდე მანძილზე დაარტყას რუსეთში სამიზნეებსო.

გენერლის დაკვირვებით, რუსებს ფრონტის ხაზზე მნიშვნელოვანი წინსვლა არ აქვთ, თუმცა ამ ტემპით რუსეთს შეუძლია კიდევ რამდენიმე წელი იომოს.

ამასობაში, მისივე თქმით, მძიმე მდგომარეობაში აღმოჩნდა რუსების სამხედრო დაჯგუფება ყირიმში:

„ძალიან დიდი დაჯგუფებაა ყირიმში და მას მნიშვნელოვანი მომარაგება სჭირდება: საწვავი, საბრძოლო მასალები, საკვები და ასე შემდეგ. რუსეთის ხელმძღვანელი პირებს, თუკი ვინმე ჰყავთ იქ, გამოჰყავთ საკუთარი ოჯახები ყირიმიდან… მომარაგება უფრო და უფრო რთულდება. ბოლო მონაცემებით, უკრაინელებმა დაარტყეს ჯანკოის საწვავისა და საბრძოლო მასალის შემნახველ საწყობებს. იქ ახლაც სერიოზული ხანძარია. მუდმივად ხდება მელიტოპოლ-ჯანკოის მაგისტრალზე დარტყმები… ახლა რომ ნახოთ, გზა არის მოფენილი დამწვარი ცისტერნებით და სატვირთო მანქანებით,“ – გვიყვება გადამდგარი გენერალ-მაიორი.

„ბათუმელებმა“ ვახტანგ კაპანაძესთან ინტერვიუ ჩაწერა. ის სამხედრო მეცნიერებათა დოქტორია და საქართველოს გენერალური შტაბის უფროსი ორჯერ იყო. ვახტანგ კაპანაძე საზოგადოებრივი ინიციატივის „ჯერ საქართველოს“ თანადამფუძნებელია.

  • ბატონო ვახტანგ, რა იცვლება უკრაინის ფრონტის ხაზზე? ახერხებს რუსეთი ე.წ. ზაფხულის კამპანიის წამოწყებას და დონბასზე გასვლას? 

რაც დროს გადის, უფრო და უფრო მცირდება რუსეთისთვის ეს შესაძლებლობა.

ფაქტია, რომ დიდი ცვლილებები კვლავ არ არის. სწორედ ამის მიზეზია ის, რომ მიდის ეს უმოწყალო დაბომბვები.

წარმოიდგინეთ, საბოლოოდ ორი წლის ომის შემდეგ დაუქვემდებარეს რუსებმა კონტროლს პოკროვსკი. სამაგიეროდ, პატარ-პატარა სოფლები დაკარგეს. რუსებს ნაბიჯ-ნაბიჯ წინსვლა აქვთ, თუმცა უკვე ანეკდოტის ფაზაში გადავიდა, მაგალითად, „მალა ტოკმაჩკა“ – ერთი ბეწო დასახლებული პუნქტი, რომელსაც რუსები უტევენ 1500-ზე მეტი დღეა. ისტორიას რომ გადავხედოთ, „გიბრალტარის ალყა“ გრძელდებოდა 1320 დღე, „კართაგენის ალყა“ – 1100 დღე, „ლენინგრადის  ბლოკადა“ – 872 დღე. ჩვენ ვლაპარაკობთ ერთ სოფელზე, რომელსაც ამდენი დღეა იღებენ…. რომ აღარ ვახსენოთ თვითონ კუპიანსკის აღება – იმდენჯერ ახსენეს უკვე მისი აღება რუსებმა, თავად აღარ სჯერათ.

ასე რომ, რუსეთის საგაზაფხულო კამპანია ისე დასრულდა, არც კი დაწყებულა.

არაფერი განსაკუთრებული არ მომხდარა. მნიშვნელოვანი ცვლილებები, ან მასიური შეტევები რაღაც კონკრეტული მიმართულებით არ ყოფილა. რუსები ისევ ისე მონოტონურად იქცევიან, იგივე ტაქტიკით, იგივე ხორცის საკეპი მანქანით გრძელდება რუსების მოქმედებები. აბსოლუტურად არაფერი არ შეცვლილა. ვერ ვიტყვით, რომ შეტევები არ არის, მაგრამ ამ შეტევებს აღარ აქვს სიმძაფრე.

  • აქვს რესურსი რუსეთს გააქტიურებისთვის? 

თქვენთან წინა ინტერვიუში აღვნიშნე სამი ასპექტი, რაც შეიძლება გაააქტიუროს რუსეთმა: ბირთვული იარაღი, საყოველთაო მობილიზაცია და ბელარუსი.

ალბათ იქნება მცდელობა, რომ ბოლოს და ბოლოს ბელარუსი ჩაითრიონ ამ ომში. ბელარუსს არც ძალები აქვს და არც საშუალებები მნიშვნელოვანი, რომ მნიშვნელოვანი როლი შეასრულონ, მაგრამ რუსეთს შეუძლია ბელარუსის ტერიტორიის გამოყენება. არსებობს ინფორმაცია, რომ თითქოს რუსები 100 ათას მობილიზებულს ამზადებენ ჩრდილოეთის მიმართულებაზე შეტევის დასაწყებად. ძნელია რუსების სამხედრო ხელმძღვანელობის თავში ჩახედვა, მაგრამ ყველაზე მოსალოდნელი შეიძლება იყოს ჩერნიგოვის მიმართულებაზე 15-20-კილომეტრიანი ბუფერული ზონის შექმნა. ამის მცდელობა სუმის მიმართულებაზეც ჰქონდათ რუსებს, მაგრამ დიდ წარმატებას ვერ მიაღწიეს.

შესაძლებელია, რომ რუსებმა ამ გზით დაქსაქსონ უკრაინის ძალები, ასევე კიევის მიმართულებაზე საფრთხის იმიტირებით უკრაინელებს გარკვეული ძალები გადაასროლინონ  დონბასიდან ჩრდილოეთის მიმართულებაზე. ის, რომ შემოდგომისთვის დნეპრისპირეთი აღებული იქნება, ამის ძალიან არ მჯერა.

აკრობატულ დიპლომატიას ახორციელებს ლუკაშენკო: არ აწყობს ომში ჩართვა. ბოლო პერიოდში ლუკაშენკო ცდილობს დასავლეთთან ურთიერთობების გამოკეთებას, პროცესები დათბობასავით წავიდა. ამავე დროს, პუტინსაც აწონებს თავს და აცხადებს, რომ ბელარუსია ყოველთვის დაეხმარება რუსეთს. ერთობლივად ჩაატარეს ბირთვული შეიარაღების მზადყოფნის სწავლებები. ასევე, სწრაფი რეაგირების ძალები ბელარუსში გადაყვანილია უმაღლეს სამხედრო მდგომარეობაზე. ერთის მხრივ, რუსებს ბელარუსები ეუბნებიან, თქვენს გვერდით ვართო, მაგრამ აშკარად ეს არ აწყობს ბელარუსს. განაცხადა კიდეც ლუკაშენკომ, ჩვენ მხოლოდ მაშინ ჩავერთვებით დაპირისპირებაში, თუ უშუალოდ ბელარუსზე მოხდება თავდასხმაო.

რა თქმა უნდა, უკრაინასაც არ აწყობს ბელარუსზე თავდასხმა, თუმცა შესაძლებელია რუსეთმა ბელარუსიდან თავად გამოიწვიოს პროვოკაცია.

  • მოსალოდნელია რუსეთის თავდასხმა ნატოს წევრ რომელიმე ქვეყანაზე? წინა დღეებში იყო, მაგალითად, ლატვიის შემთხვევა, სადაც რამდენიმე დრონი ჩამოვარდა. 

ეს დრონი არ არის გარკვეული, საიდან ჩამოვარდა… არ არის გამორიცხული სულაც ელექტრონული ბრძოლის საშუალებების ზემოქმედებით მართვადაკარგული უკრაინული დრონიც კი იყოს. რთულია, რუსებზე რაღაც გადაჭრით თქვა, მაგრამ ეჭვი მეპარება რუსეთმა თავისი შესაძლებლობებიდან გამომდინარე მნიშვნელოვანი სამხედრო მოქმედება განახორციელონ ბალტიისპირეთის მიმართულებაზე.

ეს არ გამორიცხავს გარკვეულწილად ჰიბრიდულ მოქმედებას, პროვოკაციას, სპეცოპერაციას, დივერსიულ მოქმედებას. შეეცდება რუსეთი, რაღაცნაირად არიოს იქ ვითარება, მაგრამ ის, რომ რაღაც მასშტაბური სამხედრო მოქმედება ჩაატაროს, ამისთვის მას არც ძალა შესწევს და არც რესურსი.

ეს კი არა, ძალიან მძიმე მდგომარეობაში შეიძლება აღმოჩნდეს უახლოეს მომავალში რუსეთის ყირიმის დაჯგუფება, ვინაიდან მისი მომარაგება უფრო და უფრო რთულდება. ბოლო მონაცემებით, უკრაინელებმა დაარტყეს ჯანკოის საწვავისა და საბრძოლო მასალის შემნახველ საწყობებს. იქ ახლაც სერიოზული ხანძარია. მუდმივად ხდება მელიტოპოლ-ჯანკოის მაგისტრალზე დარტყმები. ეს არის სახმელეთო დამაკავშირებელი ყირიმთან, ანუ მე-14 ტრასა, სადაც, ფაქტობრივად, ყველა დიდი მანქანა გადაადგილდება.

უკრაინამ აღმოაჩინა, რომ რუსებს სამოქალაქო, მაგრამ დიდი სატვირთო მანქანებით გადაჰქონდათ აღჭურვილობა და საბრძოლო დანიშნულების მასალები. ამიტომაც, ნებისმიერი დიდი მანქანას ხდება დარტყმის ობიექტი. ახლა რომ ნახოთ, გზა არის მოფენილი დამწვარი ცისტერნებით და სატვირთო მანქანებით. ამ მხარის გუბერნატორმა მხოლოდ საგანგებო დანიშნულების ტვირთების გადაზიდვის ნებართვა გასცა და მაქსიმალურად შეაჩერა სხვა მოძრაობები.

  • რა გამოსავალი რჩება რუსებს ყირიმში? 

შეკითხვაა დღეს არა ის: აფეთქდება თუ არა ხიდი, არამედ როდის აფეთქდება ხიდი? ეს მოხდება გამომდინარე უკრაინელების საჭიროებიდან. დღეს ეს ხიდი დარტყმის ქვეშაა. ამიტომაც, იყენებენ რუსები სახმელეთო გზას, რომელიც მოწყვლადია. ჩონგარის საკონტროლო-გამშვები პუნქტი, მაგალითად, საერთოდ დაიხურა.

ძალიან დიდი დაჯგუფებაა ყირიმში და მას მნიშვნელოვანი მომარაგება სჭირდება: საწვავი, საბრძოლო მასალები, საკვები და ასე შემდეგ. რუსეთის ხელმძღვანელ პირებს, თუკი ვინმე ჰყავთ იქ, გამოჰყავთ საკუთარი ოჯახები ყირიმიდან – ეს ტენდენციაც კი შეიმჩნევა.

  • რა რესურსი დარჩა რუსებს ომის გასაგრძელებლად? The Economist წერს სადაზვერვო უწყებებზე დაყრდნობით, რომ რუსი სამხედროების საერთო დანაკარგები დაჭრილების ჩათვლით 1.1 – 1.5 მლნ-ს აღწევს, ხოლო „ომის შემსწავლელი ინსტიტუტის“ მონაცემებით, წელს რუსებმა უკრაინაში მხოლოდ 220 კვ. კმ დაიკავეს, რაც არის უკრაინის ტერიტორიის 0.04 %.

რუსეთს იმის რესურსები გააჩნია, რომ ამ ტემპით და ამ აქტიურობით, რაც ახლაა, კიდევ რამდენიმე წელი გააგრძელოს დაპირისპირებები. რუსეთს ჯერ კიდევ იმის ფული და რესურსი, რომ ძალების მობილიზება მოახდინოს. არა მგონია, რომ პუტინმა ამ ეტაპზე საყოველთაო მობილიზაცია გამოაცხადოს.

ფაქტია ის, რომ მნიშვნელოვანი დანაკარგი აქვს რუსეთს, მაგალითად, უკრაინელების დარტყმების შედეგად ცენტრალურ რუსეთში განლაგებული ნავთობგადამამუშავებელი ქარხნების და საწარმოების 80% გაჩერებულია, ან ამ საწარმოებმა შეამცირეს თავიანთი წარმოება. მსგავსი საწარმოების 70% ურალს აქეთაა სადღაც 3000-დან 4000 კილომეტრის ფარგლებში. დღესდღეობით უკრაინას სწვდება ამ სამიზნეებს, თითქმის 2000 კილომეტრამდე უკვე აქვს შესაძლებლობა, რომ განახორციელოს დარტყმები.

არ უნდა დაგვავიწყდეს, რომ უკრაინამ უკვე საკუთარი იარაღის წარმოება დაიწყო. უკვე ოფიციალურად გამოაცხადეს, რომ უკრაინელებმა შექმნეს ბალისტიკური რაკეტა. გარკვეული ტექნოლოგიური კომპონენტები, რა თქმა უნდა, დასავლეთის დახმარებითაა, მაგრამ უკრაინაშია აწყობილი.

ასევე, 18-თვიანი მუშაობის შემდეგ უკრაინელებმა შექმნეს კორექტირებადი საავიაციო ბომბი, რომელსაც 250 კილოგრამის გადატანა შეუძლია. მსგავს ბომბებს აწვდიდა უკრაინას ამერიკა, ასევე ბრიტანეთი, რომელიც შეიძლება გაეშვათ F-16-ებიდან და სხვა საჰაერო საშუალებებიდან. მნიშვნელოვანი აქ ისაა, რომ აქ უკვე მიზნის შერჩევაში აღარ სჭირდება ნებართვა უკრაინას პარტნიორისგან. აღნიშნული აშკარად აჩვენებს იმას, რომ ძალიან გაფართოვდა დარტყმების შესაძლებლობები უკრაინელების მხრიდან.

  • ჩინეთზე მინდა გკითხოთ, სადაც ბოლო დღეებში ჩავიდა ტრამპი და შემდეგ პუტინი. რა როლს იძენს ჩინეთი ამ კონფლიქტში? 

ვერც ტრამპმა და ვერც პუტინმა მნიშვნელოვანი ვერაფერი ვერ წამოიღო ჩინეთიდან. ფაქტობრივად, ტრამპმა გაყიდა 200 ერთეული „ბოინგი“, ხოლო პუტინმა რაღაც სტრატეგიული თანამშრომლობის დოკუმენტზე მოაწერა ხელი. ასეთი დოკუმენტი უამრავია ხელმოწერილი ერთმანეთის მიყოლებით რუსეთსა და ჩინეთს შორის. ნიშანდობლივია რუსეთის წარუმატებლობის გამოხატვა – პუტინის გაბოროტება აისახება მშვიდობიანი ქალაქების დაბომბვებში.

რუსეთის წარუმატებლობა ჩინეთში გარკვეულწილად ასევე აისახება ამ გამწარებულ დარტყმებში.

54 ფრთოსანი რაკეტა იყო გაშვებული დასახლებულ პუნქტებზე, 30 „ისკანდერი“, ორი თუ სამი „კინჟალი“, რომელიც თვითმფრინავებიდან გაუშვეს, სამი „ცირკონი“, ანუ ჰიპერბგერითი ფრთოსანი რაკეტა. ამან აჩვენა ორი მნიშვნელოვანი რამ: უკრაინელებს ამჟამად აქვთ ჰაერსაწინააღმდეგო საშუალებების დეფიციტი. ეს ძირითადად „პატრიოტის“ რაკეტებს ეხება. რაკეტსაწინააღმდეგო თავდაცვა უჭირს ახლა უკრაინას. მეორე გამოჩნდა ის, რომ რუსების „ორეშნიკი“ აღმოჩნდა უბრალოდ შემაშინებელი „ჯართი“. ამით რუსებმა აჩვენეს ევროპას, რომ აი, „ორეშნიკს“ ვიყენებთ. ამ დროს ჩამოვარდა „ორეშნიკი“ ბელაია ცერკოვში და დააზიანა ავტომანქანის ფარეხის კოოპერატივი. არის ინფორმაცია, რომ მეორეც იქნა გაშვებული, რომელიც საერთოდ დონეცკში, ოკუპირებულ ტერიტორიაზე ჩამოვარდა.

წარმოიდგინეთ, 50-მილიონიანი რაკეტაა. გამოდის, რომ ვერ მართეს, ან არ იმართება, არაზუსტია, ტექნიკურად გაუმართავია, ერთი ჩამოვარდა ასეთ დანიშნულებაზე ადრე და მეორემ საერთოდ „უზუსტესი“ 80 კმ-იანი აცილებით დააზიანა კერძო მანქანების ფარეხები!

  • უკრაინელებს რატომ შეექმნათ ეს დეფიციტი, რამე შეიცვალა დასავლეთიდან სამხედრო აღჭურვილობის მიწოდებით კუთხით? 

აშშ-მ ძალიან ბევრი „პატრიოტის“ რაკეტა გადააგზავნა ახლო აღმოსავლეთში. დეტალებზე, ცხადია, არ მაქვს ინფორმაცია და ეს არც გაცხადდება იოლად, მაგრამ გამოჩნდა, რომ ამ კუთხით დეფიციტი აქვს უკრაინას.

  • ბოლოს ირანზე რომ გვითხრათ: მოლაპარაკებებით მხარეები ვერ გავიდნენ შედეგზე. ელოდებით ომის განახლებას? 

ჩემი აზრით, დიდი ალბათობით განახლდება საჰაერო დარტყმები, შეეცდებიან ისევ საჰაერო ზემოქმედებით აიძულონ ირანს მოლაპარაკება. ირანი აღმოსავლურ დიპლომატიას იყენებს, წელავს ამ მოლაპარაკებებს. ისიც კი გაჟღერდა, რომ ირანის წინადადებები პაკისტანის მიერ არ იქნა სწორად მიწოდებული ამერიკელებისთვისო. არაფრის დათმობაზე ირანი არ წამოსულა და არც აპირებს ამას.

უკვე პრესტიჟის საქმეა ეს ომი აშშ-თვის. ძალიან სასაცილო მდგომარეობაში აღმოჩნდა ტრამპი. ამიტომაც მაქვს დიდი ეჭვი, რომ განახლდება საჰაერო ზემოქმედების ფაქტორი.

„ჩვენ ვრჩებით. ისევ თქვენი ხმა ვართ და თქვენ – ისევ ჩვენი ძალა“ – ეთერ თურაძე

ავტორი: ეთერ თურაძე, „ბათუმელების“ მთავარი რედაქტორი

______________________________________________________

დაუჭირეთ მხარი „ბათუმელებსა“ და „ნეტგაზეთს“ აქ. 

ხულოში ახალგაზრდა ქალს ჩაგრავდა მთავრობა, რასაც ადგილობრივი საზოგადოება თვალს არიდებდა. ამ ქალის შესახებ ქვეყანას შევატყობინეთ. მისი ცხოვრება შეიცვალა.

ბათუმში ობოლ ბავშვებს ვერ ხედავდა სახელმწიფო. ისინი ვაჩვენეთ საზოგადოებას. მათი ცხოვრებაც შეიცვალა.

ზუგდიდში შშმ კაცს და დაუძლურებულ ქალს აბუჩად იგდებდა ის, ვისაც მათი დაცვა ევალებოდა. ისინი საკუთარ ტკივილთან მარტო არ დავტოვეთ – მათი ამბავი მთელ ქვეყანას შევატყობინეთ და მათი ცხოვრებაც შეიცვალა.

ამ ისტორიებს 25 წელია გიყვებით. იმ ადამიანების შესახებ გიამბობთ, ვისაც არ აქვს ძალაუფლება და გავლენა. ვისი ხმაც ყველაზე სუსტად ისმის.

ამ წლების განმავლობაში სახელმწიფო ინსტიტუტების მოშლაზეც ბევრჯერ გითხარით და იმაზეც, როგორ იქცა კორუფცია ყოველდღიურობად, როგორ ეჯიბრებიან მთავრობის წევრები თუ რიგითი მოხელეები ერთმანეთს ხალხის დოვლათის მითვისებაში.

როგორ იცვლება სამშობლო ფუფუნებაზე.

კიდევ რაზე გიამბობდით? – ციხეებზე. ადგილებზე, რომელთა კედლებს მიღმა ათასობით ჩუმი ტრაგედია იმალება… დღეს საქართველო ერთ-ერთი ლიდერია ევროპაში პატიმრების რაოდენობით. და ეს მხოლოდ სტატისტიკა არ არის. ეს არის ადამიანების სიცოცხლე, რომელიც სიჩუმეში იკარგება.

რუსთავის ციხეშია გამოკეტილი მზია ამაღლობელი – ქალი, რომელმაც გაბედა და უსამართლობას გააწნა სილა. მანამდე კი, 23 წლის განმავლობაში, საკუთარი ჯანმრთელობის ფასად შექმნა ისეთი მედია, როგორიცაა „ნეტგაზეთი“ და „ბათუმელები“.

დღეს ჩვენი გამოცემების დაბადების დღეა – 25 წელი შეგვისრულდა. იუბილეს მზიას გარეშე აღვნიშნავთ –  მალე 17 თვე გახდება, რაც ის „ოცნებამ“ უკანონოდ გამოკეტა ციხეში. არც ეს გვაკმარა, მიიღო კანონები, რითაც საზღვრების დადგენა გადაგვიწყვიტა – ან ვიყოთ „მისი ხმა“, ან დავდუმდეთ.

ამის მიუხედავად, ჩვენ ისევ ვრჩებით. ისევ თქვენი ხმა ვართ.

და თქვენ – ისევ ჩვენი ძალა.

ჩვენი რწმენით, ხმა არ უნდა დადუმდეს, თუ სიჩუმე დაისადგურებს, სწორედ მაშინ გაიმარჯვებს უსამართლობა.

ჩვენ ერთმანეთი გვჭირდება.

ამიტომაც დაგვიდექით გვერდით, თუნდაც 1 ლარით. ეს თქვენთვის იქნება ძალიან მცირე, თითქმის შეუმჩნეველი წვლილი, მაგრამ ჩვენ მოგვცემს ძალას გავაგრძელოთ საქმე, რომელიც ყველას ერთად გადაგვარჩენს. გადაარჩენს ჩვენს სამშობლოს.

ფინანსურ მხარდაჭერაზე მეტად კი იმის ცოდნაა მნიშვნელოვანი, რომ მარტო არ ვართ და ჯერ კიდევ ვჭირდებით ადამიანებს, რომ საქართველოში ჯერ კიდევ არსებობს საზოგადოება, რომელსაც სჯერა ჰუმანიზმის და სიმართლის – მართალი სიტყვის ძალის.

_______________________________________

 

გადაარჩინე „ბათუმელები“ და „ნეტგაზეთი“ თვეში 1 ლარიდან – მხარდაჭერის კამპანია

2026 წლის 26 მაისს, ჩვენი გამოცემა, „ბათუმელები“, რომელიც ორ ონლაინ მედიას, „ბათუმელებსა“ და „ნეტგაზეთს“ აერთიანებს, 25 წლის გახდა.

გაზეთ „ბათუმელების“ პირველი ნომერი 2001 წლის 26 მაისს, საქართველოს დამოუკიდებლობის დღეს გამოვიდა.

დაარსებიდან 25 წლის შემდეგ ვიწყებთ კამპანიას „ბათუმელებისა“ და „ნეტგაზეთის“ გადასარჩენად.

დღეიდან ჩვენს ვებგვერდებზე ნახავთ მხარდაჭერის ღილაკს, რომლის საშუალებითაც შეგიძლიათ მხარი დაგვიჭიროთ თვეში 1, 5 ან 10 ლარით, ერთი წლის განმავლობაში.

მკითხველის მხარდაჭერა მოგვცემს მუშაობის გაგრძელების საშუალებას.

დაარსებიდან დღემდე „ბათუმელები“ და „ნეტგაზეთი“ არ ყოფილა არც ერთი პოლიტიკური ან ბიზნეს ჯგუფის საკუთრება, ჩვენ ყოველთვის ვეკუთვნოდით საზოგადოებას და რეპრესიული კანონმდებლობის პირობებში, ჩვენი გადარჩენის ერთადერთი გზა სწორედ საზოგადოების მხარდაჭერაა.

უფრო მეტ ინფორმაციას შეგიძლიათ გაეცნოთ ჩვენი მხარდაჭერის პლატფორმაზე.  

მარკო რუბიო დამოუკიდებლობის დღეს ულოცავს ქართველ ხალხს

აშშ-ის სახელმწიფო მდივანი, მარკო რუბიო, ქართველ ხალხს დამოუკიდებლობის დღეს ულოცავს.

„ამერიკის შეერთებული შტატების სახელით, საქართველოს ხალხს გილოცავთ თქვენს ეროვნულ დღესასწაულს.

ეს წელი ახალ შესაძლებლობებს იძლევა ამერიკელ და ქართველ ხალხებს შორის მეგობრული კავშირების კიდევ უფრო გასაღრმავებლად და ჩვენი ორი ქვეყნის უსაფრთხოებისა და კეთილდღეობის ხელშესაწყობად.

შეერთებული შტატები კვლავაც მტკიცედ უჭერს მხარს საქართველოს სუვერენიტეტსა და ტერიტორიულ მთლიანობას მის საერთაშორისოდ აღიარებულ საზღვრებში. ჩვენ ქართველი ხალხის გვერდით ვდგავართ მათი მდგრადი უსაფრთხოების, თავისუფლებისა და დამოუკიდებლობისკენ სწრაფვაში. ამერიკის შეერთებული შტატები ერთგულია პარტნიორობისა, რომელიც შეესაბამება საქართველოს მისწრაფებებს უსაფრთხო და წარმატებული მომავლისკენ“ – წერია განცხადებაში, რომელიც აშშ-ის სახელმწიფო დეპარტამენტის ვებგვერდზე გამოქვეყნდა.

ფოტო: ევროპის პრესფოტო სააგენტო. EPA/JOHAN NILSSON

“გილოცავთ საქართველოს დამოუკიდებლობის დღეს” – ევროკავშირი წარმომადგენლობა და წევრი ქვეყნების საელჩოები

საქართველოს დამოუკიდებლობის დღესთან დაკავშირებით, ევროკავშირის წარმომადგენლობა და წევრი ქვეყნების საელჩოები ერთობლივ განცხადებას ავრცელებენ.

„ევროკავშირი და მისი წევრი ქვეყნები გულითადად ულოცავენ საქართველოს დამოუკიდებლობის დღეს!

საქართველომ დამოუკიდებლობა 1918 წლის 26 მაისს გამოაცხადა, რითაც დაადასტურა სუვერენული და დემოკრატიული სახელმწიფოებრიობის შესახებ საკუთარი ხედვა. დამოუკიდებლობის შესახებ დეკლარაციის სულისკვეთება დღეს საქართველოს საზოგადოებაში ღრმა გამოძახილს ჰპოვებს.

საქართველოს ისტორიაში ვხედავთ ევროპასთან უფრო მჭიდრო კავშირებისკენ მუდმივ სწრაფვას. ბოლო სამი ათწლეულის განმავლობაში, ევროკავშირი და მისი წევრი სახელმწიფოები გვერდში უდგანან საქართველოს და საიმედო, გრძელვადიან პარტნიორებად რჩებიან.

პროგრესი დემოკრატიული რეფორმების, კანონის უზენაესობისა და ფუნდამენტური თავისუფლებების დაცვის მიმართულებით კვლავაც არსებითია ევროპულ გზაზე წინსვლისთვის.

ამ მნიშვნელოვან დღეს, კვლავ ვადასტურებთ ევროკავშირის ურყევ მხარდაჭერას საქართველოს დამოუკიდებლობის, სუვერენიტეტისა და ტერიტორიული მთლიანობის მიმართ მის საერთაშორისოდ აღიარებულ საზღვრებში“,- ნათქვამია განცხადებაში.

„დინამო ბათუმის“ მატჩზე დიუშენის მქონე ბავშვების მხარდამჭერი ბანერის ჩამოხსნა სცადეს – ფანკლუბი

„დინამო ბათუმის“ ცნობილი ფანკლუბი, Black Sea Pirates-ს, აცხადებს, რომ 25 მაისს გამართულ საიუბილეო მატჩზე, რომელზეც „დინამო ბათუმი“ „რუსთავს“ ხვდებოდა, სცადეს სტადიონზე განთავსებული ბანერის ჩამოხსნა, რომელიც დიუშენის კუნთოვანი დისტროფიის მქონე ბავშვების სოლიდარობის ნიშნად იყო გამოფენილი.

საუბარია ბანერზე წარწერით – „ბავშვებს ვჭირდებით“.

„სტადიონზე განთავსებული ბანერები ეძღვნებოდა როგორც საიუბილეო, მეასე მატჩს, საქართველოს დამოუკიდებლობის დღეს, ასევე დიუშენის სინდრომის მქონე ბავშვებს — ბავშვებს, რომლებსაც ჩვენი მხარდაჭერა და თანადგომა ყველაზე მეტად სჭირდებათ.

მატჩის დაწყებისთანავე მოხდა დაუჯერებელი ფაქტი — ვიღაცისთვის მიუღებელი აღმოჩნდა საქველმოქმედო ბანერი და მისი ჩამოხსნის მცდელობა განხორციელდა. იმ მომენტში ეს იყო არა უბრალოდ ბანერი, არამედ სოლიდარობის სიმბოლო.

რთულია სიტყვებით აღწერო ის განცდა, როცა ხედავ მსგავს დამოკიდებულებას იქ, სადაც ერთიანობა და ღირსება უნდა სუფევდეს. განსაკუთრებით მაშინ, როცა საქმე ბავშვებს ეხება.

ჩვენ, გულშემატკივრებმა, დროულად ვიმოქმედეთ და ბანერი კვლავ თავის ადგილას დავაბრუნეთ. ეს იყო მცირე, მაგრამ მნიშვნელოვანი ნაბიჯი — იმისთვის, რომ ხმა არ ჩაეხშოთ მათ, ვისაც ყველაზე მეტად სჭირდება მხარდაჭერა.
ამასთანავე, ჩვენი მხრიდან გაკეთდა მცირედი ფინანსური შემოწირულობა შესაბამის ფონდში — როგორც კიდევ ერთი ნაბიჯი ამ ბავშვების გვერდში დგომისთვის.

გვჯერა, რომ ფეხბურთი მხოლოდ თამაში არ არის. ის არის ემოცია, ერთიანობა და ადამიანობა. და სწორედ ეს უნდა იმარჯვებდეს ყოველთვის“ – წერს „დინამო ბათუმის“ ფანკლუბი, Black Sea Pirates-ს ფეისბუქზე.

______________

ფოტო: Black Sea Pirates/facebook

ახალი მონაცემები რუსეთის და უკრაინის სამხედრო დანაკარგებზე ომში – 26 მაისი

უკრაინის შეიარაღებული ძალების გენერალური შტაბის დღევანდელი მონაცემებით, ომის დაწყებიდან 2026 წლის 26 მაისამდე პერიოდში, რუსეთის არმიის საბრძოლო დანაკარგი არის:

  • ცოცხალი ძალა – დაახლოებით 1 357 950 ადამიანი [გასულ დღე-ღამეში +1 010. ამ მონაცემებში შედის როგორც დაღუპულები, ასევე დაჭრილები]
  • ტანკი – 11 954 ერთეული [+1]
  • ჯავშანტექნიკა – 24 615 ერთეული [+7]
  • საარტილერიო სისტემა – 42 751 ერთეული [+64]
  • MLRS – 1 804 ერთეული [+2]
  • საზენიტო საბრძოლო სისტემა – 1 397 ერთეული [+1]
  • თვითმფრინავი – 436 ერთეული [+0]
  • ვერტმფრენი – 353 ერთეული [+0]
  • უპილოტო საფრენი აპარატის ოპერატიულ-ტაქტიკური დონე – 312 035 ერთეული [+1 790]
  • სახმელეთო რობოტიზებული კომპლექსი – 1 475 ერთეული [+10]
  • გემი/ნავი – 33 ერთეული [+0]
  • წყალქვეშა ნავი – 2 ერთეული [+0]
  • მანქანები და საწვავის ავზები – 99 374 ერთეული [+374]
  • სპეცტექნიკა – 4 221 ერთეული [+3]
  • ფრთოსანი რაკეტა [ჩამოაგდეს] – 4 687 ერთეული [+0]

უკრაინის გენერალური შტაბის განცხადებით, საომარი მოქმედებების მაღალი ინტენსივობის გამო მონაცემები იცვლება.

უკრაინის სამხედრო დანაკარგებზე სტატისტიკური ინფორმაცია 2026 წლის 25 თებერვლის შემდეგ აღარ განუახლებია რუსეთს.

რუსეთის თავდაცვის სამინისტროს მიერ ტელეგრამ არხზე ბოლოს გავრცელებული მონაცემებით, ომის დაწყებიდან 2026 წლის 25 თებერვლამდე პერიოდში სულ განადგურებულია უკრაინის:

  • 670 თვითმფრინავი
  • 283 ვერტმფრენი
  • 117 299 უპილოტო საფრენი აპარატი
  • 651 საზენიტო სარაკეტო სისტემა
  • 27 873 ტანკი და სხვა ჯავშანტექნიკა
  • 1 674 მრავალჯერადი სარაკეტო გამშვები
  • 33 474 საველე არტილერია და ნაღმმტყორცნი
  • 55 252 სპეციალური სამხედრო მანქანა

ეს ის მონაცემებია, რომელსაც უკრაინა და რუსეთი ოფიციალურად ავრცელებენ, თუმცა ომის პირობებში შეუძლებელია ზუსტად გადამოწმება, რამდენად შეესაბამება მხარეების მიერ გავრცელებული ინფორმაცია დანაკარგების შესახებ რეალურ რიცხვებს.

ამასთან, აღნიშნულ მონაცემებთან ერთად რუსეთის თავდაცვა, უკრაინის და რუსეთის არმიის ცოცხალი ძალის საერთო დანაკარგების შესახებ სტატისტიკას არ აქვეყნებს. უკრაინის არმიის ცოცხალი ძალის დანაკარგების შესახებ მონაცემებს არ აქვეყნებს არც უკრაინა.

—

რუსეთი უკრაინაში 2022 წლის 24 თებერვალს გამთენიისას შეიჭრა და სრულმასშტაბიანი ომი დაიწყო.

ამ თემაზე:

  • უკრაინის პრეზიდენტმა, ვოლოდიმირ ზელენსკიმ რუსული ძალების მიერ უკრაინაში 24 მაისის ღამით განხორციელებულ მასშტაბურ თავდასხმაზე ისაუბრა და განაცხადა, რომ სულ მცირე 83 ადამიანი დაშავდა.

„მარიუპოლმა და აზოვსტალმა მასწავლა – სიკვდილი ყველაზე საშინელი რამ არ არის“ – ვოლინა

რუსეთი ბელარუსის მონაწილეობით ბირთვულ წვრთნებს ატარებს

უკრაინის თავდაცვის მინისტრი ამბობს, რომ უკრაინამ პირველი მართვადი საჰაერო ბომბი შექმნა

YouTube video player

 

მთავარი ფოტო: უკრაინის გენშტაბი/facebook

ბათუმის მერია წელსაც ვერ იწყებს რაგბის სტადიონის ორი წლის წინ დაანონსებულ პროექტს

2 წლის წინ ბათუმის მერია სპორტსმენებს რაგბის რაგბის სტადიონის განახლებას, 2 ახალი სტადიონის მოწყობასა და დამხმარე ინფრასტრუქტურის მშენებლობას დაჰპირდა, თუმცა დღემდე არ დაუწყია.

ახლა კი მერია საკრებულოს სწერს, რომ პროექტი ბიუჯეტიდან უნდა ამოიღოს და მუნიციპალური განვითარების ფონდს გადასცეს. წერს იმასაც, რომ პროექტი ხარვეზიანი და შესაცვლელია, ეს კი იმას ნიშნავს, რომ მისი განხორციელება დროში კიდევ გაიწელება.

პირველი ტენდერი შესაბამისი სამუშაოების შესყიდვის მიზნით მერიამ 2024 წელს, აპრილში  გამოცხადა, საწყისი თანხით – 21 მილიონ 157 100 ლარი. თუმცა უშედეგოდ, ტენდერი იმის გამო ჩაიშალა, რომ მასში მონაწილეობა არავინ მიიღო. ჩაიშალა 2024 წლის აგვისტოში გამოცხადებული განმეორებითი ტენდერიც.

სტადიონი ბათუმში ლეონიძისა და გენერალ ასლან აბაშიძის ქუჩების კვეთაში მდებარეობს.

საპროექტო ტერიტორია

როგორც საკრებულოს განუმარტეს, მეორე შემთხვევაში საპროექტო-სახარჯთაღრიცხვო დოკუმენტაციის დამატებით შესწავლის შედეგად გამოავლინეს უზუსტობები, რის გამოც კომისიამ მისი შეწყვეტის გადაწყვეტილება მიიღო, თუმცა შესაბამისი ოქმი შესყიდვების პორტალზე ატვირთული არ არის.

„არსებული ვითარების გათვალისწინებით და აღნიშნული ღონისძიების სპეციფიკიდან გამომდინარე, სამმართველო გეგმავს არსებული საპროექტო-სახარჯთაღრიცხვო დოკუმენტაცია გადასცეს საქართველოს მუნიციპალური განვითარების ფონდს, შესაბამისად ღონისძიება ამოღებულ იქნება მიმდინარე წლის ბათუმის მუნიციპალიტეტის ბიუჯეტიდან. ასიგნება პირველ კვარტალში არ არის გათვალისწინებული“ – წერს მერია საკრებულოს. 

ეს ნიშნავს იმას, რომ მერიამ პროექტში ხარვეზები 2024 წელს აღმოაჩინა, ტენდერებიც 2024 წელს ჩაიშალა, თუმცა 2026 წელსაც იმავე ამბავს უყვება საკრებულოს თავის გასამართლებლად.

ბათუმს სარაგბო სტადიონი აქვს 2016 წლიდან. ამ  სტადიონის მშენებლობა დაახლოებით 3 წელი გრძელდებოდა. მშენებლობაზე 7 მილიონზე მეტი ლარი დაიხარჯა, აქედან 3,5 მილიონი ლარი – ბათუმის ბიუჯეტიდან.

ბათუმის მერიამ ბიუჯეტიდან ამოიღო კიდევ ერთი პროექტის, არდაგანის ტბის მიდებარე ტერიტორიის განახლების დაფინანსება. პროექტისთვის 2 მილიონი ლარი იყო გათვალისწინებული. რეაბილიტაციის პროექტი მოიცავდა ასევე საფეხმავლო ბილიკებისა და გარე განათების მოწყობას.

არდაგანის ტბა

ბათუმის მერიის ინფორმაციით, რომელიც მერიამ საკრებულოს ბიუჯეტის პირველი კვარტლის ანგარიშთან ერთად წარუდგინა, აუცილებელია პროექტის განახლება, მათ შორის „საპროექტო-სახარჯთაღრიცხვო დოკუმენტაციის გადაფასება“.

„აღნიშნულ ღონისძიებასთან დაკავშირებით განგიმარტავთ, რომ ვინაიდან არდაგანის ტბის ირგვლივ არსებული ინფრასტრუქტურა  საჭიროებს განახლებას, აუცილებელია არსებული საპროექტო-სახარჯთაღრიცხვო დოკუმენტაციის გადაფასება, შესაბამისი ცვლილებების შეტანა ან ახლის მომზადება“ – წერს მერია საკრებულოს.

მერიამ საკრებულოს ასევე აცნობა, რომ ამ საქმეს მუნიციპალური განვითარების ფონდს გადააბარებს:

„არსებული ვითარების გათვალისწინებით, სამმართველო გეგმავს აღნიშნული ღონისძიების არსებული საპროექტო-სახარჯთაღრიცხვო დოკუმენტაცია გადასცეს საქართველოს მუნიციპალური განვითარების ფონდს, შესაბამისად ღონისძიება ამოღებული იქნება მიმდინარე წლის ქალაქ ბათუმის მუნიციპალიტეტის ბიუჯეტიდან“.

მერიის ინფორმაციით, პროექტი ორწლიანია და 2026-2027 წლებში უნდა განხორციელდეს.

არდაგანის ტბის მიმდებარე ტერიტორიასთან ახლოს მუნიციპალური განვითარების ფონდმა კიდევ ერთი მაღალბიუჯეტიანი პროექტი განახორციელა, რომელიც მისი გახსნიდან მალევე გამოვიდა მწყობრიდან, დახარჯულია 25 მილიონი ლარი. საუბარია გმირთა ხეივანზე.

ძველი ბათუმის რეაბილიტაციის პროექტზე კი 200 მილიონი ლარი იხარჯება და სამუშაოები ჯერ კიდევ მიმდინარეობს. ორივე შემთხვევაში მიმწოდებელი კომპანია შპს „საბა კონსტრაქშენია“.

ამავე თემაზე: 

გასულ წელს გმირთა ხეივანზე 25 მილიონი დაიხარჯა, წელს რეაბილიტაცია დასჭირდა
Exit mobile version