13 ოქტომბერს შავ ზღვაში, ბულგარეთის ტერიტორიულ წყლებში, კრაპეცის სანაპიროდან 17 მილის დაშორებით, დრონის დარტყმის შედეგად ჩაიძირა სავაჭრო გემი HS Dignity-ი.
გემის ეკიპაჟის 11 წევრი დაკარგულად ითვლება. მაშველებმა 5 მეზღვაურის გადარჩენა შეძლეს. ბულგარული მედიის ცნობით, გემი ძალიან სწრაფად ჩაიძირა, რაც, შესაძლოა, ძლიერ დარტყმაზე მიუთითებდეს.
ასევე დღეს, 13 ოქტომბერს, ბულგარეთის სანაპიროზე დრონები დაესხა თავს მალტის დროშის ქვეშ მცურავ, უკრაინელი მფლობელის გემ „Chelsea 3“-ს. საზღვაო მაშველებმა შეძლეს გემის ეკიპაჟის გადარჩენა. მედიის ცნობით, ეკიპაჟის წევრები უკრაინის და აზერბაიჯანის მოქალაქეები არიან.
„რუსული დრონი. დრონმა სამჯერ დაგვაგდო, რუსულმა დრონმა“ – ციტირებს ბულგარეთის საზოგადოებრივი მაუწყებელი გადარჩენილ მეზღვაურს.
გემებზე თავდასხმა ბულგარეთის ექსკლუზიურ ეკონომიკურ ზონაში მოხდა.
ბულგარეთის ხელისუფლება მიიჩნევს, რომ თავდასხმა რუსული დრონებით განხორციელდა. ბულგარეთის საგარეო საქმეთა სამინისტრომ რუსეთის ელჩი დაიბარა.
ბოლო კვირის განმავლობაში ეს მეორე შემთხვევაა, როცა ბულგარეთის სპეციალურ ეკონომიკურ ზონაში დრონებით თავდასხმა ხდება სავაჭრო გემებზე. 6 ოქტომბერს დრონები დაესხა თავს ორ სატვირთო გემს, ტოგოს დროშის ქვეშ მცურავ ALFA WATAN-სა და პალაუს დროშის ქვეშ მცურავ ABLE-ს. გემი სახელად ALFA WATAN-ი ჩაიძირა, ეკიპაჟის წევრები დაკარგულად გამოაცხადეს.
____________
ფოტოზე: „Chelsea 3“. ფოტო: ბულგარეთის საზმაუ
![რას [არ] აკეთებს მერია ბათუმში უსახლკაროებისთვის – ინტერვიუ](https://batumelebi.netgazeti.ge/wp-content/uploads/2026/10/covers-batumelebi-3-1.png "რას [არ] აკეთებს მერია ბათუმში უსახლკაროებისთვის – ინტერვიუ")
