ზღვის სეზონი ქობულეთში ნაგვის გადავსებული ურნებით [ფოტო]

ქალაქ ქობულეთში ტურისტების სიმრავლე თვალშისაცემია, თუმცა, არანაკლებ თვალშისაცემია ნაგვით გადავსებული სანაგვე ურნები ქალაქის ცენტრალურ გზაზე – აღმაშენებლის ქუჩაზე.

ამ, რამდენიმეკილომეტრიან გზაზე, მაგალითად, 5 აგვისტოს, დილის 12 საათისთვის, თითქმის ყველა ურნა სავსე იყო ნაგვით. რამდენიმე მათგანი ფოტოზე სწორედ ამ დღეს დავაფიქსირეთ.

ქობულეთის დასუფთავებაზე პასუხისმგებელი მუნიციპალური ორგანიზაცია „ქობულეთის სანდასუფთავებაა“, რომელიც ადგილობრივი ბიუჯეტიდან წელს 1,8 მილიონი ლარითაა დაფინანსებული.

სამსახურის ხელმძღვანელი, სულიკო ბლადაძე „ბათუმელებთან“ სატელეფონო საუბარში ამბობს, რომ ქალაქიდან ნაგვის გატანა ჩვეულებრივი რეჟიმში მიმდინარეობს და სპეცტექნიკაც საკმარისია.

„ურნა იმისთვისაა, რომ შეივსოს. შემდეგ ჩამოვუვლით და ვცლით. ქობულეთს დღეს სამი მანქანა ემსახურება [თამარ მეფის, რუსთაველისა და აღმაშენებლის ქუჩები], ერთი მანქანა კი სოფლებში გადის ყოველდღიურად. ურნებს ვცლით დილის 7 საათზე, შემდეგ 12 საათზე, 17-დან 18 საათამდე და შემდეგ ღამის 12 საათიდან ღამის 4-5 საათამდე მუშაობს მანქანები. რაიმე შეფერხება თუ არის, მიზეზი ისაა, რომ აღმაშენებლის ქუჩა გადატვირთულია ავტომანქანებით და ურნების გაცლაში ხელი გვეშლება. ამ კუთხით საგანგაშო მდგომარეობაა თამარ მეფის ქუჩაზე, იქ ზოგჯერ საპატრულო პოლიციაც კი გვეხმარება… ტურისტებმაც იმატა ამ 2-3 დღეში. ახლა, მაგალითად, ჩავიარეთ ქუჩაზე, გავცალეთ ურნები, ჩამოვიარეთ და თითქმის სავსე იყო. თუმცა ისეთი მდგომარეობა, რომ ქუჩაში ეყაროს ნაგავი და ანტისანიტარია იყოს, არსად არ არის ქალაქში“, – ამბობს სულიკო ბლადაძე.

მისივე თქმით, არის კიდევ ერთი ფაქტორი – ნაგავი ქობულეთიდან გააქვთ ქალაქ ფოთის ნაგავსაყარზე, რაც ასევე გარკვეულ დროსთანაა დაკავშირებული. უშუალოდ ქობულეთის ნაგავსაყარი დახურულია.

ქობულეთის მოსახლეობა დღემდე სანდასუფთავების გადასახადს არ იხდის. „ქობულეთის სანდასუფთავების“ ხელმძღვანელის თქმით, მოსახლეობამ შესაძლოა გადასახადი მომავალი წლის იანვრიდან გადაიხადოს.

ამ საკითხს, მუნიციპალიტეტის საკრებულო გადაწყვეტს: „დღეს გადასახადს გამგეობასთან გაფორმებული ხელშეკრულების საფუძველზე მხოლოდ კომერციული ორგანიზაციები იხდიან“.