Batumelebi | ჰოსპიტლის დირექტორი სამართალდამცავ ორგანოებს მიმართავს ჰოსპიტლის დირექტორი სამართალდამცავ ორგანოებს მიმართავს – Batumelebi
RU | GE  

ჰოსპიტლის დირექტორი სამართალდამცავ ორგანოებს მიმართავს

ბათუმის საერთაშორისო საუნივერსიტეტო ჰოსპიტლის დირექტორი, ისმეთ დინდარი სამართალდამცავ ორგანოებს დახმარებისთვის მიმართავს. ის ყოფილ დირექტორებს სიტუაციის ხელოვნურად დაძაბვაში ადანაშაულებს.

„სასამართლოსგან უფლებაშეჩერებული დირექტორები არ ემორჩილებიან სასამართლოს ძალაში შესულ კანონიერ განჩინებას, რითაც აკრძალული აქვთ კომპანიის მიმდინარე საქმიანობაში, მათ შორის, შრომით საქმიანობაში ჩარევის უფლება. როგორც თავად დასაქმებულებიდან გამოდის ინფორმაცია, ი. თოქმანი და მ.ასლანჯა ფარულ შეხვედრას მართავენ რამდენიმე წამყვან ექიმთან და ცდილობენ სამედიცინო დაწესებულებაში სიტუაციის ხელოვნურად დაძაბვას. პროკლამაციების მეშვეობით ხდება მოწოდება, რომ დასაქმებულები არ დაემორჩილონ მოქმედ დირექტორს,“ – აღნიშნავს ისმეთ დინდარი.

საერთაშორისო ჰოსპიტლის დამფუძნებლებს შორის დაპირისპირება გასულ წელს დაიწყო. სასამართლო დავა ამ დრომდე გრძელდება. წელს, 3 მარტს, ჰოსპიტლის რამდენიმე ექიმმა ხელშეკრულებით გათვალისწინებული პირობების გაუარესება გააპროტესტა. 6 მარტს ჰოსპიტლის დირექტორმა ხელისუფლებას მიმართა და აჭარის ჯანდაცვის მინისტრს მოუწოდა, არ ჩარეულიყო საავადმყოფოს შიგნით მიმდინარე პროცესებში. 10 მარტს ჰოსპიტლიდან რამდენიმე ექიმი დაითხოვეს.

სამედიცინო პერსონალიდან რამდენთან შეაჩერა ხელშეკრულება სამედიცინო ჰოსპიტალმა? – კითხვაზე დღეს, 13 მარტს, ვერ გვიპასუხა ჰოსპიტლის იურისტმა, ლევან სიამაშვილმა. მისი თქმით, ამ დრომდე გრძელდება მოლაპარაკების პროცესი და ზუსტი ციფრის დასახელება არ შეუძლია.

 

 

ნეტგაზეთის მასალების სხვა გამოცემებში გადაბეჭდვის წესი
ავტორი