ბათუმის 2012-2015 წლების ეკონომიკური განვითარების სტრატეგიაზე დისკუსია დღეს ბათუმის დემოკრატიული ჩართულობის ცენტრში უნდა გამართულიყო. დისკუსია არ შედგა. მას შემდეგ რაც „საქართველოს ეროვნულ თვითმმართველობათა ასოციაციის( NALAG) “ წარმომადგენელმა 10 წუთიანი პრეზენტაცია ჩაიკითხა, რუსთავის საკრებულოს თავმჯდომარეს კახა გურგენიძეს, რომელიც შეხვედრას როგორც ასოციაციის წარმომადგენელი ესწრებოდა, ერთადერთი კითხვა დაუსვეს – ვის მიერ იყო შემუშავებული სტრატეგია. კახა გურგენიძეს ამ კითხვაზე პასუხი პირდაპირ არ გაუცია. ამის შემდგომ ბათუმის მერიის ეკონომიკური სამსახურის უფროსის მოადგილემ ტიტე აროშიძემ იგი პლაგიატში დაადანაშაულა.
„სამი წელი მზადდებოდა ეს სტარატეგია. ორი წელი მხოლოდ სტარტეგიულ ინფორმაციის მოპოვებას დასჭირდა. თუმცა გარკვეული ინფორმაციები კიდევ ვერ მოვიპოვეთ ამიტომ საჭირო გახდა სხვა ორგანიზაციის დახმარება და ექსპერტების ჩართვა. დღეს განსახილველად გამოიტანეს დოკუმენტი, რომელიც მხოლოდ ჩვენს კაბინეტში დმაუშავდა, რომელიც არ გასულა არსად, არც საკრებულოში არ დამტკიცებულა, არანაირი განხილვის სტადიაშიც კი არ გადასულა. მე შემიძლია ეს დოკუმენტი გადმოგცეთ და ნახავთ რომ ის კორექტული შეცდომებიც კი გადატანილია. იმიტომ რომ რეალურად ეს დოკუმენტი წაკითხულიც კი არ აქვთ იმ პიროვნებებს, ვინც დღეს გამოიტანა განსახილველად. ამიტომ პირდაპირ ვამბობ, ეს არის დანაშაული,“ – განაცხადა ტიტე აროშიძემ.
„ჩვენ უნდა ავღნიშნოთ, რომ დღეს ვიხილავთ ბათუმის სტარტეგიული განვითარების გეგმას. ასოციაცია ჩვენი სახით ჩართულია პარტნიორად და არა მხარედ, ყველაზე მთავარი ეს გახლავთ, იმიტომ რომ ჩვენს მიმართ კითხვები ისმოდა, როგორც მხარის მიმართ. ეს დოკუმენტი არის ბათუმის დოკუმენტი და ეს არ არის რომელიმე ექსპერტის საკუთრება. თუმცა აქვე უნდა ვთქვა ღიად, რომ ასოციაციის მხრიდან ექსპერტების ჩართულობის ნაკლებობა დაფიქსირდა,“ – განაცხადა ბრალდების პასუხად კახა გურგენიძემ.
კითხვაზე იყო თუ არა პროექტი ბათუმის ეკონომიკური სამსახურის მიერ შემუშავებული პროექტის ასლი, კახა გურგენიძემ უპასუხა:
„დღევანდელი შეხვედრა ცვლილებების შეტანას ემსახურებოდა, ეს არის მთავარი. როგორც ჩანს გაუგებრობა გამოიწვია და სამწუხაროდ კომუნიკაციის ბრალია. ის ადამიანები, ეკონომიკური სამსახურიდან… უმჯობესი იქნებოდა მათ გაეკეთებინათ ეს პრეზენტაცია, ვინაიდან მათი ნამუშევარია ეს“.
შეხვედრაზე საჯარო და არასამთავრობო სექტორის წარმომადგენლები იმყოფებოდნენ, თუმცა მას შემდეგ რაც დისკუსიის ნაცვლად პროექტის ავტორზე დაიწყო დავა, მათ შეხვედრა დატოვეს. მუნიციპალური განვითარების პროექტი პროგრამის „დემოკრატიული მმართველობა საქართველოში G3”-ის ფარგლებში ხორციელდება და მიზნად ისახავს საქართველოს ათი თვითმმართველობის/მუნიციპალიტეტის სოციალურ-ეკონომიკური განვითარების სტრატეგიის შემუშავებას.
