თუ აჭარაში ცხოვრობ, ხარ 16 წელზე ზევით ქალი, ან შშმ პირი და ქმნი დეკორატიულ-გამოყენებით ნივთებს, სუვენირებს, ქარგავ ან სხვა ტიპის ხელსაქმით ხარ დაკავებული, შეგიძლია პროექტში ჩაერთო, განვითრდე, საქმე ბიზნესად აქციო და შემოსავლის წყაროზეც იზრუნო.
მშვიდობის, დემოკრატიისა და განვითარების კავკასიურმა ინსტიტუტმა CIPDD-მ, გერმანული ფონდის „პური მსოფლიოსთვის“ მხარდაჭერით, დაიწყო ახალი პროექტის განხორციელება აჭარაში მცხოვრები ქალებისა და შშმ პირების გასაძლიერებლად.
პროექტში ჩართვა შეუძლიათ 16 წელზე მეტი ასაკის ქალებს და შშმ პირებს აჭარიდან.
პროექტის მიზანია 16 წლიდან ქალებისა და შშმ პირების ხელშეწყობა მათი უნარების წარმოსაჩენად, ეკონომიკურ საქმიანობაში ჩასართავად, ბიზნესკავშირების დასამყარებლად.
პროექტი დაეხმარება ქალებსა და შშმ პირებს, რომლებიც ხელნაკეთ, სახელოვნებო თუ საყოფაცხოვრებო, დეკორატიულ ნივთებს ქმნიან ან სუვენირებს ამზადებენ.
პროექტი იმუშავებს ორი მიმართულებით:
- ბენეფიციარებისთვის, რომლებიც უკვე ამზადებენ ხელნაკეთ ნივთებს, შეიქმნება სპეციალური პლატფორმა ინტერნეტში და მომზადდება მარკეტინგული გეგმა მათი ნამუშევრების პოპულარიზაციის და სტაბილური გაყიდვებისთვის.
- ახალბედა, დამწყები და გამოუცდელი ბენეფიციარებისთვის პროცესში ჩასართავად სხვადასხვა აქტივობაა დაგეგმილი: მასტერკლასები, ტრენინგები და ხელნაკეთი ნივთების დასამზადებლად საჭირო მასალების შეძენა.
თუ რა თემაზე ჩატარდება კონკრეტულად სემინარები, განისაზღვრება ბენეფიციარებთან კომუნიკაციის, კონსულტაციების შემდეგ, რადგან ბენეფიციართა სხვადასხვა ჯგუფს მოსალოდნელია, რომ სხვადასხვა საჭიროება და ინტერესი ექნება.
ორი წლის განმავლობაში მოეწყობა ბენეფიციართა ნამუშევრების გამოფენა-გაყიდვები.
რატომ არის მნიშვნელოვანი აჭარაში მცხოვრები ქალებისა და შშმ პირების საქმიანობის წახალისება და ეკონომიკურ საქმიანობაში ჩასართავად მათთვის ხელშეწყობა? – ამ კითხვას პროექტის რეგიონული კოორდინატორი ასლან ჭანიძე პასუხობს:
„ამ ეტაპზე პროექტის ფარგლებში ვეცნობით ბენეფიციარებს და მათ ბაზებს ვადგენთ. ამ საქმიანობისას აღმოჩნდა, რომ ქალებისა და შშმ პირების დიდ ნაწილს უკვე აქვთ თავიანთი ნამუშევრები, თუმცა გაყიდვა დიდი პრობლემაა. ხანდახან გამოფენებზე გააქვთ ნამუშევრები, მაგრამ გამოფენები მხოლოდ დღესასწაულებზე იმართება და გაყიდვების ამ ფორმას მათთვის სტაბილური შემოსავალი არ მოაქვს.
ერთეულები ახერხებენ ნამუშევრების სტაბილურად გაყიდვას, ხანდახან სოციალური ქსელებითაც. ვერც საზღვარგარეთ ხერხდება ხელნაკეთი ნივთების გატანა.
პროგრამა ახალბედებსაც მისცემს შესაძლებლობას, რაღაც ახალი შეისწავლონ. მათ შევთავაზებთ მასტერკლასებს და სწავლებას, მერე კი შექმნილ ნივთებს გავუწევთ პოპულარიზაციას, ბენეფიციარებს გაუჩნდებათ შემოსავლის სტაბილური წყარო.
მარკეტინგული გეგმაც, რომელიც პროექტის ფარგლებში მომზადდება, უზრუნველყოფს სტაბილურ გაყიდვებს გამოფენებისგან განსხვავებით.
ჩვენი მიზანია, ასევე, რომ სხვადასხვა ობიექტზე, სასუვენირო მაღაზიებში ტურისტებს მეტწილად ვთავაზობდეთ სხვადასხვა ფასის, შინაარსისა და ფორმის ხელნაკეთ ნივთებს“ – ამბობს ასლან ჭანიძე.
30 წლის მადონა ფალავანდიშვილი ხელნაკეთ ნივთებს ქმნის, ჯვარედინი წესით ქარგავს პორტრეტებს, პეიზაჟებსა და ნატურმორტებს. იმისთვის, რომ მისი ხელსაქმე ფართო საზოგადოებას გააცნოს და სტაბილური შემოსავლის წყაროდ აქციოს, მადონამ გადაწყვიტა პროექტში ჩაერთოს, მასტერკლასებით მეტი ისწავლოს, ნაშრომები სპეციალურ პლატფორმაზე განათავსოს და ამ ყველაფრით მომხმარებლებთან მუდმივი კონტაქტის გზები იპოვოს.
მადონა 30 წლისაა და მაღალმთიან აჭარაში ცხოვრობს. მიუხედავად იმისა, რომ ორი სამსახური აქვს, ფიქრობს, რომ ქალებმა საკუთარი უნარები ბოლომდე უნდა გამოიყენონ. დამატებითი შემოსავალი განსაკუთრებით მნიშვნელოვანია ქალებისა თუ შშმ პირებისთვის.
პროექტი „აჭარაში მცხოვრები ქალების და შშმ პირების გაძლიერება“ 2025 წლის ივლისამდე გაგრძელდება, თუმცა საქმიანობა არ შეწყდება, რადგან შემუშავებულმა მარკეტინგულმა გეგმამ, ინტერნეტპლატფორმამ და სწავლებებმა სისტემა უნდა შექმნას, რაც პროექტის დასრულების შემდეგ უზრუნველყოფს უწყვეტ ჯაჭვს: ხელსაქმით, ხელნაკეთი ნივთებით დაინტერესებული ბენეფიციარების შეკრებას, მათი ნამუშევრების პლატფორმაზე განთავსებას და გაყიდვას.
სისტემის მართვაში ბენეფიციარები და პირები იქნებიან ჩართული, ვინც დაინტერესებული იქნება პლატფორმამ ფუნქციონირება განაგრძოს და განვითარდეს.
აჭარული ნაქარგები სამარკო ნიშანია, დახედვისთანავე ხვდები, რომ ასე მხოლოდ აჭარაში ქარგავენ. პროექტის მიზანია სწორედ ეს განსხვავებულობა აჩვენოს საქართველოს ფარგლებს გარეთაც და ამ ნიშნით გაუწიოს პოპულარიზაცია ხელსაქმეს, რაც საბოლოოდ აისახება არამხოლოდ ბენეფიციარების, არამედ მათი ოჯახების ეკონომიკურ მდგომარეობაზეც.
ეს არის საცდელი პროექტი აჭარის მასშტაბით, რაც შესაძლოა სამომავლოდ არასამთავრობო ორგანიზაციად, ახალ სისტემად, აიპიდ გადაიქცეს, რის შემდეგაც როგორც დამოუკიდებელ სტრუქტურას, შეეძლება შევიდეს სხვა რეგიონებშიც გარდა აჭარისა და გააერთიანოს ყველა, ვინც საქართველოში ხელნაკეთ ნივთებს ქმნის, ხელსაქმითაა დაკავებული.
16 წელზე მეტი ასაკის ქალებსა და შშმ პირებს აჭარიდან პროექტში მონაწილეობის მისაღებად ან დამატებითი ინფორმაციისთვის შეუძლიათ დაუკავშირდნენ პროექტის გუნდს ტელეფონის ნომრებზე: 593 30 87 55; 593 30 71 55.
ფოტოზე: მზევინარ ირემაძეს ნამუშევრები
_____________________________
პროექტი – „აჭარაში მცხოვრები ქალების და შშმ პირების გაძლიერება“ – ხორციელდება „მშვიდობის, დემოკრატიის და განვითარების კავკასიური ინსტიტუტის“ მიერ [CIPDD] გერმანული ფონდის „პური მსოფლიოსთვის“ ფინანსური მხარდაჭერით.
