ბათუმის მერიას ქალაქის ცენტრალურ პარკში „ნატვრის ხის“ განთავსება მესამე წელია გადაწყვეტილი აქვს, თუმცა, ამ დრომდე მონუმენტის ესკიზიც ვერ შეარჩია. მერიამ მონუმენტის განთავსებისთვის საჭირო თანხაც, 70 ათასი ლარიდან 40 ათას ლარამდე შეამცირა.
„ნატვრის ხის“ საუკეთესო ესკიზის“ გამოვლენაზე კი, მერიის საქალაქო ინფრასტრუქტურისა და კეთილმოწყობის სამმართველომ მორიგი კონკურსი გამოაცხადა. საკონკურსო თანხა ამჯერად 3 500 ლარია. კონკურსის პირობა, ესკიზის საფუძველზე, საპროექტო-სახარჯთაღრიცხვო დოკუმენტაციის შედგენასაც გულისხმობს. პარკში მონუმენტის განთავსებისთვის მერია მაქსიმუმ 40 ათას ლარს დახარჯავს.
თავდაპირველი კონკურსის მიხედვით, „ნატვრის ხე“ ნურიგელის ტბასთან, დელფინარიუმის უკან უნდა განთავსებულიყო, თუმცა, ამჯერად ადგილს, კონკურსში გამარჯვებული შეარჩევს და შემდეგ სამმართველო განიხილავს.
„ნატვრის ხე“ შესაძლებელია განთავსდეს ცენტრალურ პარკში, ნურის ტბის მიმდებარე ტერიტორიაზე პროექტის მომწოდებლის შეხედულებისამებრ მიჩნეულ ლოკაციაზე, რომელიც შემდგომ განიხილება პროექტის შემსყიდველის მიერ. ესკიზში წარმოდგენილი „ნატვრის ხის“ მოცულობა ჰარმონიაში უნდა იყოს განთავსების ადგილის ირგვლივ არსებულ სივრცესთან; ანგარიში უნდა გაეწიოს, ირგვლივ არსებულ სივრცესა და ინფრასტრუქტურას“, – აღნიშნულია კონკურსის ტექნიკურ დავალებაში.
„ნატვრის ხე“ ბათუმის მერიის 2019 წლის კონკურსის – „შენი იდეა ბათუმს“ ერთ-ერთი გამარჯვებული პროექტია. იდეის ავტორი თამთა ჯინჭარაძეა.
ესკიზზე გამოცხადებული კონკურსის მიხედვით:
- „განხორციელებული იდეა უნდა იყოს სანახაობრივი, ღამით განათებული, გამორჩეული ორიგინალობით და ჰარმონიულად შერწყმული ფერადოვნებით (შესაძლებელია ეს ფერადოვნება განპირობებული იყოს სხვადასხვა დამატებითი მასალებით ან მასალით).
- მთლიანი კომპოზიცია უნდა წარმოადგენდეს, როგორც ზღაპრულ, ასევე რეალურ სამყაროს. ასევე უნდა წარმოადგენდეს საინტერესო სანახაობას დღის და ღამის საათებშიც. მისაღები და შთამბეჭდავი იყოს ყველა ასაკობრივი ჯგუფისთვის.
- წარმოდგენილი იდეა შინაარსობრივად უნდა ასოცირდებოდეს „ნატვრის ხის“ ტრადიციულ თემატიკასთან“.
კონკურსში წინადადებების მიღება 2022 წლის 17 სექტემბერს დაიწყება და 22 სექტემბერს დასრულდება. პირობის მიხედვით, ესკიზი, გამარჯვებულთან ხელშეკრულების გაფორმებიდან 15 დღეში უნდა იყოს მზად.
—
მონუმენტის ესკიზის გამოსავლენად კონკურსი მერიის სამმართველომ პირველად 2019 წელს გამოაცხადა, თუმცა, კონკურსი წინადადებების მიღების დასრულებიდან ორი დღის შემდეგ შეწყვიტა. შეწყვეტის მიზეზად მაშინ „საკონკურსო დოკუმენტაციის სრულყოფა“ დასახელდა.
ხელახალი კონკურსი გამოცხადდა 2020 წელში. ეს კონკურსი არ შედგა – მასში მონაწილეობა არავინ მიიღო.
იდეის ავტორს პროექტის განსახორციელებლად 40 ათასი ლარი აქვს დასახელებული, სამმართველოს მიერ გამოცხადებულ პირველი კონკურსში აღნიშნული იყო, რომ „ნატვრის ხის“ ბიუჯეტი არ უნდა აღემატებოდეს 70 000 ლარს. მომდევნო კონკურსში მერიამ ეს თანხა 50 ათას ლარამდე შეამცირა. ამჯერად კი, „ნატვრის ხის“ ხარჯები იდეის ავტორისას დაუახლოვა და მაქსიმუმ 40 ათასი ლარითაა განსაზღვრული.
ამავე თემაზე „ბათუმელების“ არქივიდან:
რატომ შეწყდა კონკურსი „ნატვრის ხის“ საუკეთესო ესკიზის გამოსავლენად
