18-19 აპრილს ბათუმში საქართველოს დამსახურებული მწვრთნელის, გურამ ჭანტურიას 80 წლის იუბილესადმი მიძღვნილი ვეტერანთა ტურნირი გაიმართება სწრაფ ჭადრაკში.
ტურნირი, რომელშიც 60 წლის და მეტი ასაკის ვეტერანი მამაკაცები და ქალები მიიღებენ მონაწილეობას, საჭადრაკო კლუბ „ნონაში“ ჩატარდება. ტურნირი შვეიცარული სისტემით, 7 ტურად გაიმართება. მონაწილეთა სრული სია კი ცნობილი იქნება 18 აპრილს.
გურამ ჭანტურია
17 აპრილს საქართველოს დამსახურებულ მწვრთნელს, საერთაშორისო არბიტრს, გურამ ჭანტურიას 80 წელი შეუსრულდა. საჭადრაკო კლუბ „ნონას“ ინფორმაციით, თარიღის აღსანიშნავად მთელი რიგი ღონისძიებები დაიგეგმა. დღეს კლუბში ბავშვების ნახატების გამოფენა გაიმართა საჭადრაკო თემაზე, ასევე ჩატარდა მინიტურნირი.
კლუბის ინფორმაციითვე, გურამ ჭანტურია დღესაც აქტიურადაა ჩართული საჭადრაკო ცხოვრებაში, მუშაობს პედაგოგად სკოლაში, ბაღში და საჭადრაკო კლუბ „ნონაში“.
ფოტო: „საჭადრაკო კლუბი ნონა“
ფოტო: „საჭადრაკო კლუბი ნონა“
