სიახლეები

რა ხდება რუსეთ-უკრაინის ომში – უკრაინის გენშტაბის ბოლო ცნობები

22.03.2024 • 3343
რა ხდება რუსეთ-უკრაინის ომში – უკრაინის გენშტაბის ბოლო ცნობები

უკრაინის შეიარაღებული ძალების გენერალური შტაბის ცნობით, 22 მარტის მონაცემებით, რუსული ძალები აგრძელებენ ზეწოლას ფრონტის მთელ ხაზზე, ყველაზე აქტიურად კი – ნოვოპავლოვსკის, ბახმუტისა და ლიმანის მიმართულებით

გასული 24 საათის განმავლობაში რუსეთმა განახორციელა 36 სარაკეტო და 55 საჰაერო დარტყმა, მოხდა 74 სამხედრო შეტაკება.

გენშტაბის ცნობით, კუპიანსკის მიმართულებით რუსეთის ძალებმა 2 წარუმატებელი თავდასხმა განახორციელეს უკრაინის პოზიციებზე; ლიმანის მიმართულებით უკრაინელმა ჯარისკაცებმა მოიგერიეს მტრის 11 თავდასხმა, ბახმუტის მიმართულებით კი – 15 თავდასხმა.

უკრაინის გენერალური შტაბის ცნობით, ნოვოპავლოვსკის მიმართულებით უკრაინის თავდაცვის ძალები აგრძელებენ მტრის შეკავებას, სადაც ოკუპანტებმა, ავიაციის მხარდაჭერით, 25-ჯერ სცადეს უკრაინის თავდაცვის გარღვევა.

გენშტაბის ცნობით, გასულ 24 საათში ხერსონის მიმართულებით მტერს არ ჩაუტარებია შეტევითი ოპერაციები.

პარალელურად, უკრაინის თავდაცვის ძალებმა საავიაციო დარტყმა განახორციელეს 7 ზონაზე, სადაც თავმოყრილი იყო რუსეთის ძალების პირადი შემადგენლობა, იარაღი, სამხედრო ტექნიკა და 2 საზენიტო-სარაკეტო სისტემა.

22 მარტს, ღამე, რუსეთმა უკრაინაზე მასობრივი სარაკეტო თავდასხმა განახორციელა. გაფრთხილება საჰაერო თავდასხმაზე თითქმის 4 საათს გრძელდებოდა მთელი ქვეყნის მასშტაბით. ოფიციალური კიევის განცხადებით, თავდასხმის მთავარი სამიზნე უკრაინის ენერგოობიექტები იყო.

____________________

ფოტოზე: 22 მარტი, ზაპოროჟიე. ფოტო: EPA-EFE/KATERYNA KLOCHKO

გადაბეჭდვის წესი


ასევე: