პროექტი შუახეველი ახალგაზრდებისთვის

აღნიშნული პროექტის მხარდამჭერია გერმანიის საერთაშორისო თანამშრომლობის საზოგადოება [GIZ] და მას არასამთავრობო ორგანიზაცია „თავისუფალ ჟურნალისტთა სახლი“ ახორციელებს.

პროექტი გულისხმობს ქალებისა და ახალგაზრდების უკეთ გარკვევას თვითმმართველობის კომპეტენციებში, ჩართულობის სხვადასხვა ინსტრუმენტის გამოყენებას მერიასთან თუ დონორ ორგანიზაციებთან თანამშრომლობის დროს. ასევე, პროექტების, პეტიციების შედგენასა და წარდგენას შესაბამის ორგანიზაციებში.

„პროექტის ფარგლებში 20-მა ახალგაზრდამ გაიარა ტრენინგები ადგილობრივი თვითმმართველობის კომპეტენციებზე, პეტიციების შედგენაზე, პროექტების წერაზე. მათ ისწავლეს თუ რა არის სამოქალაქო ბიუჯეტი, როგორ დაგეგმონ საინფორმაციო კამპანია, თუ საჯარო აქცია. ტრენინგების დასრულების შემდეგ კი, თანატოლებში ზუმ პლატფორმის მეშვეობით თავადაც ჩაატარეს ურთიერთსაგანმანთლებლო ტრენინგი. ეს ახალგაზრდები აქტიურად მონაწილეობენ პროექტის ფარგლებში წარდგენილ პეტიციებზე ხელმოწერების შეგროვების პროცესშიც“, – ამბობს ასლან ჭანიძე, „თავისუფალ ჟურნალისტთა სახლის“ ხელმძღვანელი.

თაკო მიქელაძე პროექტის ერთ-ერთი მონაწილეა. ის ამბობს, რომ ამ პროექტმა მისცა შესაძლებლობა, რომ მიეღო ცოდნა და გაეზიარებინა მისი თანატოლებისა და უფროსი თაობისთვის.

„პირველ რიგში, მადლობა მინდა გადავუხადო ამ პროექტის ორგანიზატორებს – შუახევის მერიას, გერმანიის საერთაშორისო ორგანიზაციას, თავისუფალ ჟურნალისტთა სახლს, რომლებმაც მოგვცეს საშუალება, მიგვეღო განსაკუთრებული ცოდნა თვითმმართველობისა და ადგილობრივი ბიუჯეტის, საჯარო აქციების შესახებ. შემიძლია ვთქვა, რომ ამ პროექტმა ჩამომაყალიბა წარმატებულ ადამიანად. ახალგაზრდებს და ასევე, უფროს თაობასაც, მინდა ვურჩიო, რომ აუცილებლად მიიღონ მონაწილეობა მსგავს პროექტებში“.

„პროექტის ფარგლებში მივიღე ბევრი სასარგებლო ინფორმაცია, დეტალურად შევისწავლეთ პროექტის წერა, ასევე განვიხილეთ ბიუჯეტისა და პეტიციის შედგენა სხვადასხვა წესით. პროექტის განხორციელებამ საფუძველი ჩაუყარა  შუახევში მცხოვრები ქალებისა და ახალგაზრდების განვითარებას სხვადასხვა კუთხით“, – ამბობს პროექტის მონაწილე მარიკა ქათამაძე.

მარიკა დარწმუნებულია, რომ მიღებული ცოდნა სამომავლოდ დონორებთან და შუახევის მერიასთან ნაყოფიერ თანამშრომლობაში დაეხმარება: „პროექტის მონაწილეები კი ვიმედოვნებთ, რომ მსგავსი პროექტები კიდევ გაგრძელდება და სიამოვნებით მივიღებთ მასში მონაწილეობას“.

„არ ვიცოდი, პეტიცია როგორ უნდა შემეტანა სხვადასხვა მაღალი თანამდებობის წარმომადგენელთან, რომ შემდეგში ეს ჩემი მოთხოვნა განეხილათ“; „საჯარო აქციასთან დაკავშირებით, ასევე თვითმმართველობასთან, ამ დრომდე არ მქონდა გამყარებული ცოდნა, რომ ეს შემდეგ გამეზიარებინა ჩემი თანატოლებისთვის“; „ბევრი ვისწავლე ამ ყველაფრიდან, ამიტომ ჩემი თხოვნა იქნება, რომ აუცილებლად ჩაერთოთ, მიიღოთ მონაწილეობა, ძალიან ბევრ ცოდნასა და გამოცდილებას მიიღებთ“, – ამბობენ პროექტის სხვა მონაწილეები.

„ამ პროექტმა მომცა იმის საშუალება, რომ მესწავლა – საჯარო გამოსვლა, როგორ უნდა ჩამეტარებინა საჯარო აქცია, ასევე მივიღე ინფორმაცია ადგილობრივი თვითმმართველობის, პეტიციის შესახებ. ამ თვეებში ვისაუბრეთ მნიშვნელოვან საკითხებზე, რომლებიც ძალიან შთამბეჭდავია ჩემთვის და ამ პროექტის ბევრი მონაწილისთვის. კმაყოფილი ვარ ტრენერებით, რადგან ბევრი ინფორმაცია მივიღე თითოეული მათგანისგან“, – ამბობს მილენა მიქელაძე, პროექტის მონაწილე.