„მოვუწოდებ „ქართული ოცნების“ კანდიდატს, მოხსნას თავისი კანდიდატურა, არ მიიღოს მონაწილეობა ამ სიბინძურეში,“ – მიმართა საქართველოს პარლამენტის დღევანდელ სხდომაზე პარლამენტის წევრმა „ერთიანი ნაციონალური მოძრაობიდან“, დავით ხაჯიშვილმა, რამაზ ჯინჭარაძეს.
რამაზ ჯინჭარაძე ბათუმში 2 აპრილის შუალედურ არჩევნებში „ქართული ოცნების“ კანდიდატია.
შუალედურ არჩევნებზე ბათუმში მე-4 მაჟორიტარულ ოლქში აირჩევენ ბათუმის საკრებულოს წევრს. ამ ოლქიდან 2021 წლის არჩევნებზე ნუგზარ ფუტკარაძემ გაიმარჯვა, რომელიც გასული წლის ნოემბერში გარდაიცვალა. ენმ-მ გასული წლის 24 ნოემბერს აუდიოფაილი გაავრცელა, რომლის მიხედვითაც საკრებულოს წევრს დამოუკიდებელ წევრობას სთხოვდნენ 100 ათასი დოლარის სანაცვლოდ. ამ დრომდე გამოძიებას ამ საქმეზე შედეგი არ დაუდია.
„ძალიან გინდათ დავიწყებას მიეცეს ჩვენი თანამოქალაქის, პატრიოტის, ბატონი ნუგზარ ფუტკარაძის მკვლელობის საქმე,“ – მიმართა პარლამენტის წევრებს დავით ხაჯიშვილმა, – „ის ინტენსიური შანტაჟის და ძალადობის მსხვერპლი იყო და ბოლოს ვეღარ გაუძლო. ამ დრომდე გამოძიების შესახებ არაფერი ვიცით. მოვითხოვ, დროულად გამოიძიოს ნუგზარ ფუტკარაძის მკვლელობა. პირობას ვაძლევთ ქართველს ხალხს, რომ დამნაშავეები მკაცრად დაისჯებიან.
2 აპრილს შუალედური არჩევნებია ბათუმში, კრიტიკულად მნიშვნელოვანი არჩევნებია არამარტო ჩვენთვის, არამედ ბათუმელებისთვის, მთელი ბათუმისთვის ეს იქნება ღირსების არჩევნები,“ – აღნიშნა დავით ხაჯიშვილმა.
