უკრაინის შეიარაღებული ძალების გენერალური შტაბის 12 ივლისის მონაცემებით, რუსეთი აგრძელებს აქტიურ შეტევით ოპერაციებს უკრაინაში და ცდილობს გაარღვიოს უკრაინის ჯარების თავდაცვა ფრონტის მთელ ხაზზე.
უკრაინის გენშტაბის ცნობით, ბოლო 24 საათის განმავლობაში ფრონტზე 120 სამხედრო შეტაკება მოხდა.
რუსეთის შეიარაღებულმა ძალებმა განახორციელეს საჰაერო დარტყმები ათობით მიმართულებით და აგრძელებენ აქტიურ საბრძოლო მოქმედებებს ხარკოვის მიმართულებით, კერძოდ, ავიაციის მხარდაჭერით 6-ჯერ შეიჭრნენ ვოლჩანსკისა და გლუბოკოიეს რაიონებში.
გენშტაბის ინფორმაციით, კუპიანსკის მიმართულებით დღის განმავლობაში 7 სამხედრო შეტაკება მოხდა; ლიმანის მიმართულებით უკრაინულმა ჯარებმა აღკვეთეს 11 რუსული თავდასხმის ოპერაცია მაკევკასა და ნევსკის რაიონებში და მოიგერიეს 8 თავდასხმა ლუგანსკის ოლქის ბელოგორივკას რაიონებში, დონეცკის რეგიონში – ვერხნეკამენსკის, რაზდოლოვკასა და ვიემკაში.
კრამატორსკის მიმართულებით უკრაინელებმა შეაჩერეს რუსეთის ძალების 5 მცდელობა, გაერღვიათ უკრაინული ძალების თავდაცვა დონეცკის ოლქის კლეშჩეევკას, ჩასოვ იარის და ივანოვსკის რაიონებში.
პოკროვსკის მიმართულებით უკრაინელმა დამცველებმა მოიგერიეს რუსეთის 41 თავდასხმა. უკრაინის გენშტაბის ცნობით, მტერმა კონცენტრირება მოახდინა ნოვოალექსანდროვკას მახლობლად, სადაც 14 შეტაკება მოხდა.
უკრაინის საჰაერო თავდაცვის ძალების ცნობით, 11 ივლისის საღამოს და 12 ივლისის ღამეს საჰაერო თავდაცვის ძალებმა ჩამოაგდეს 5 რუსული რაკეტა და 11 დრონი. თავდასხმის მთავარი მიმართულება სტაროკონსტანტინოვი იყო.
