საკუთარი პარტიის პრეზენტაციაზე, დღეს 29 მაისს, გიორგი გახარიამ ზოგადად ისაუბრა იმ რეფორმებზე, რომელიც მისი აზრით, სასწრაფოდ უნდა დაიწყოს იმისთვის რომ ქვეყანა განვითარდეს. მისი თქმით, სახელმწიფო მმართველობისა და ბიუროკრატიის რეფორმის გარეშე, სამართლიანი სახელმწიფოს მშენებლობა შეუძლებელია.
„ამ ქვეყანაში ერთხელ და სამუდამოდ უნდა დასრულდეს პოლიტიკური ნიშნით საჯარო მოხელეების დევნა, დაყოფა ან წახალისება. დემოკრატიულ სახელმწიფოში, განსაკუთრებით კი საპარლამენტო დემოკრატიაში შეუძლებელია ვისაუბროთ განვითარებაზე პოლიტიკურად ნეიტრალური საჯარო სექტორის გარეშე“-განაცხადა მან.
რეფორმებზე საუბრისას გახარიამ ახსენა კორუფცია და ნეპოტიზმი, რომელთან ბრძოლაც ქვეყნის ყოველდღიური საფიქრალი უნდა იყოს. „ამიტომ, ქვეყანაში უნდა შეიქმნას, დამოუკიდებელი საგამოძიებო მექანიზმი, რომელიც ყოველდღიურად დააზღვევს ქვეყანას კორუფციული და ნეპოტისტური რისკებისგან“-ამბობს ის.
მართლმსაჯულების სისტემაზე საუბრისას მან თქვა, რომ მართლმსაჯულების რეფორმაში არ გულისხმობს მხოლოდ სასამართლო სისტემას. „ეს სისტემა საჭიროებს სერიოზულ გადახედვას მისი საგამოძიებო სისტემების რეფორმით და გადახედვით. აქ ყველას უნდა გვესმოდეს რომ ერთიანი, ეფექტიანი, სამართლიანი მართლმსაჯულების სისტემა არის ერთადერთი შესაძლებლობა ქვეყანაში გავაჩინოთ სამართლიანობის, დაცულობის და სიმშვიდის შეგრძნება“.
განათლების სისტემაზე გახარიამ ასევე ისაუბრა მოკლედ და ზოგადად. აქცენტი გააკეთა საშუალო განათლებაზე. „ჩვენი განათლების სისტემა ჩვენი სახელმწიფოს შესაძლებლობებზე უნდა იყოს მორგებული. და თუ ასე მიდის საქმე, პირველ რიგში ის ფოკუსირებული უნდა იყოს საშუალო განათლებაზე, სადაც ბავშვების საბაზისო თვისებები ყალიბდება, მათი კულტურული მსოფლმხედველობა ყალიბდება. საშუალო განათლება არის ჩვენი გამოწვევა“-ამბობს გახარია.
სოციალურ სისტემასთან დაკავშირებით გიორგი გახარიამ ასევე ზოგადად ისაუბრა და თქვა რომ სახელმწიფომ უნდა გააძლიეროს ის მოქალაქეები, ვისაც დახმარება ესაჭიროება. მათ შორის სოციალურად დაუცველი მოქალაქეები, შშმ პირები, „ყველა ის ადამიანი, ვინც სახელმწიფოსგან საჭიროებს დახმარებას. სახელმწიფომ თანაბარი პირობები უნდა შეუქმნას მოქალაქეებს განვითარებისთვის“-ამბობს გახარია.
მისი თქმით, ეს არის ის ძირითადი მიმართულებები რაც სასწრაფოდ საჭიროებს რეფორმას.
