Batumelebi | რას პასუხობს რიჟვაძე ეტლით მოსარგებლეს, რომელმაც ეტლი და საპენსიო ბარათი დაუტოვა რას პასუხობს რიჟვაძე ეტლით მოსარგებლეს, რომელმაც ეტლი და საპენსიო ბარათი დაუტოვა – Batumelebi
RU | GE  

რას პასუხობს რიჟვაძე ეტლით მოსარგებლეს, რომელმაც ეტლი და საპენსიო ბარათი დაუტოვა

რატომ არ შეხვდა თორნიკე რიჟვაძე ან მთავრობის აპარატის წარმომადგენელი ეტლით მოსარგებლე ჯემალ ჭელიძეს სამი დღის განმავლობაში? – ვკითხეთ აჭარის მთავრობის თავმჯდომარეს დღეს, 28 მაისს, მთავრობის სხდომის შემდეგ.

საუბარია ეტლით მოსარგებლე მოქალაქეზე, რომელსაც სოციალურ პრობლემაზე სასაუბროდ აჭარის მთავრობაში არავინ შეხვდა და მან 26 მაისს, პროტესტის ნიშნად ეტლი აჭარის მთავრობის სახლის წინ დატოვა. ჯემალ ჭელიძემ თორნიკე რიჟვაძეს საპენსიო ბარათიც დაუტოვა.

ეტლით მოსარგებლე ჯემალ ჭელიძე ძმები ჭელიძეების მამაა, რომლებიც რიონის ხეობის დაცვის საპროტესტო აქციაში მონაწილეობის შემდეგ ძმებ წულუკიძეებთან და ელდარ ანთაძესთან ერთად დააკავეს. ჯემალ ჭელიძის თქმით, შვილების დაკავების შემდეგ მისი სოციალური მდგომარეობა კიდევ უფრო დამძიმდა.

„თქვენ იცით, თუ ეს რა კონკრეტულ თემას უკავშირდება. გასაგებია ჩემთვის ეტლით მოსარგებლის პოზიცია, აბსოლუტური პატივისცემა მას.

მერწმუნეთ, შესაბამისი თანამშრომლები მათთან არიან ახლო კომუნიკაციაზე,“ – გვიპასუხა თორნიკე რიჟვაძემ, თუმცა მან ვერ დაგვიკონკრეტა, რომელი სამსახური დაუკავშირდა ჯემალ ჭელიძეს, რა გაირკვა, ან რატომ არ შეხვდა მას არავინ სამი დღე, თუკი თორნიკე რიჟვაძეს მოქალაქესთან შესახვედრად არ ეცალა.

„ყველა შესაბამისი უწყება დაუკავშირდა,“ – ზოგადი პასუხით შემოიფარგლა თორნიკე რიჟვაძე. მან არ მიიჩნია საჭიროდ განემარტა, რა პასუხი გასცა, რით დაეხმარება ან რატომ ვერ დაეხმარება აჭარის მთავრობა ეტლით მოსარგებლე მოქალაქეს.

„წინასწარ დასკვნები არ არის კარგი საქმე, მოგაწოდებთ დეტალურ ინფორმაციას,“ – გვითხრა თორნიკე რიჟვაძემ მას შემდეგ, როცა მას ვუთხარით, რომ ეტლით მოსარგებლემ ეტლი დაუტოვა პროტესტის ნიშნად.

აჭარის მთავრობის თავმჯდომარემ ხაზი გაუსვა იმასაც, რომ ჯემალ ჭელიძის პროტესტი უკავშირდება მისი ორი შვილის დაპატიმრებას.

„რაც შეეხება კონკრეტულ თემას, კონკრეტულ სამართლებრივ საკითხში, მათ შორის, მართლმსაჯულების განხორციელების ნაწილში, აჭარის მთავრობა  არა და ვერ ჩაერევა,“ – აღნიშნა თორნიკე რიჟვაძემ.

სად არის ეტლი, რომელიც ჯემალ ჭელიძემ დატოვა? – ესეც ვკითხეთ აჭარის მთავრობის თავმჯდომარეს.

„ალბათ გადაეცემოდა შესაბამის მოქალაქეს, ან იქნება შესაბამის უსაფრთხო ადგილას განთავსებული,“ – გვიპასუხა თორნიკე რიჟვაძემ.

ხულოში მცხოვრები ჯემალ ჭელიძე ამბობს, რომ მას არავინ დაკავშირებია აჭარის მთავრობიდან.

„არავინ დამკავშირებია არც ეტლის დატოვებამდე და არც მას შემდეგ… თუ დამიკავშირდა ვინმე, იქნებ დაასახელონ, ვინ იყო… მე ეტლის გარეშე ვაგრძელებ ცხოვრებას, სკამზე ვზივარ და ესაა,“ – გვითხრა ჯემალ ჭელიძემ.

ნეტგაზეთის მასალების სხვა გამოცემებში გადაბეჭდვის წესი
ავტორი