კაცმა ცოლს სახლის დაულაგებლობისთვის სცემა. ოჯახში ძალადობის ამ შემთხვევის შემდეგ ლევანს [სახელები შეცვლილია] ყოფილმა ცოლმაც უჩივლა. ეს საქმე ბათუმის საქალაქო სასამართლოში მოსამართლე გიორგი გრატიაშვილმა განიხილა.
განაჩენის მიხედვით, ლევანმა ცოლს სახლის დაულაგებლობისთვის არასრულწლოვანი შვილის თანდასწრებით სცემა.
„…არასრულწლოვანი შვილის – საბას თანდასწრებით მიაყენა ფიზიკური შეურაცხყოფა, კერძოდ კი, სახის არეში დაარტყა ხელი ორჯერ, ერთხელ დაარტყა ხელი მარცხენა წინამხრის არეში. თ.-მ დარტყმების შედეგად განიცადა ფიზიკური ტკივილი,“ – წერია განაჩენში.
ძალადობაზე პასუხის მოთხოვნა ლევანისთვის ყოფილმა ცოლმაც გადაწყვიტა. მარი გამოძიებლებს მოუყვა, რომ ურთიერთობა მას შემდეგ დაეძაბათ, რაც ლევანი ალკოჰოლზე დამოკიდებული გახდა. მარის თქმით, ის წელიწადი და 4 თვე იყო ფსიქოლოგიური ძალადობის მსხვერპლი. მანამდე ისინი 9 წელი იყვნენ ერთად.
„ჩემი 6 წლის შვილიც უყურებდა ამას, როცა 25 ივნისის საღამოსაც მაგინა და დანით მოკვლითაც დამემუქრა… მაგინებდა დედის მისამართით, მიწოდებდა სალანძღავ სიტყვებს, მიხსენიებდა აუგად, უმიზეზოდ მიყვირდა, აგრესიას გამოხატავდა… კამათის დროს დანითაც დამემუქრა, მოგკლავო, მე მართლა შევშინდი,“ – უთხრა გამომძიებელს მარიმ და დაამატა, რომ ამ დღის შემდეგ გაშორდა ლევანს.
მოსამართლეს არ მოუსმენია მარის, თამთას ან სხვა მოწმეების და თავად ბრალდებულის ჩვენებები, რადგან ლევანმა თავი დამნაშავედ მიიჩნია. მან უდავოდ მიიჩნია ყველა ის მტკიცებულება, რაც პროკურატურამ ამ საქმეზე შეაგროვა.
მნიშვნელოვანია, რომ პროკურატურას თამთაზე ძალადობის შემთხვევაში არ გამოუკვეთია გენდერული მოტივით ჩადენილი დანაშაული. სპეციალისტების და, მათ შორის, მაგალითად, „პარტნიორობა ადამიანის უფლებებისთვის“ იურისტის, ანა თავხელიძის შეფასებით, ხშირად არასათანადოდ ხდება, ან ვერ ხერხდება გენდერული ნიშნით შეუწყნარებლობის დადგენა, ანუ როცა ქალზე იმიტომ ძალადობენ, რომ ის ქალია.
მოსამართლე გიორგი გრატიაშვილმა ლევანს 1 წლით და 2 თვით თავისუფლების აღკვეთა მიუსაჯა, საიდანაც ლევანი 7 თვეს ციხეში მოიხდის, დარჩენილი 7 თვე კი, ჩაეთვლება პირობით 2 წლის გამოსაცდელი ვადით.
ამ თემაზე:
