უკრაინის საგარეო საქმეთა მინისტრის, დმიტრო კულებას თქმით, 2024 წელს უკრაინის შეიარაღებული ძალები გეგმავენ ცის კონტროლს.
„2024 წელს, რა თქმა უნდა, პრიორიტეტია რუსეთის ციდან ჩამოშორება. საბოლოოდ, ვინც აკონტროლებს ცას, ის განსაზღვრავს, როდის და როგორ დასრულდება ომი“, – განაცხადა კულებამ 17 იანვარს, დავოსში მიმდინარე მსოფლიო ეკონომიკურ ფორუმზე.
მან ხაზგასმით აღნიშნა, რომ უკრაინა ებრძვის „ძალიან ძლიერ მტერს, დიდ მტერს, რომელსაც არ სძინავს“ და გამარჯვებას დრო სჭირდება.
კულებას თქმით, 2022 წელს უკრაინამ მოიპოვა გამარჯვება რუსეთის ფედერაციაზე „ხმელეთზე“, ხოლო 2023 წელს – “ზღვაზე”.
დავოსში კულებამ კიდევ ერთხელ მიუთითა იმაზე, რომ უკრაინას საჰაერო სივრცის დასაცავად სჭირდება მოიერიშე თვითმფრინავები და შორ მანძილზე მოქმედი რაკეტები.
დავოსში იმყოფება უკრაინის პრეზიდენტი, ვოლოდიმირ ზელენსკი. მან განაცხადა, რომ თუ უკრაინისთვის სამხედრო დახმარება შეჩერდება, საფრთხე ემუქრება ევროპის კონტინენტის უსაფრთხოებას, ხოლო სხვა ქვეყნების მხარდაჭერის გარეშე კიევს არ ექნება საარტილერიო და საზენიტო რაკეტები, რაც ნიშნავს, რომ უკრაინის შეიარაღებული ძალები ვერ შეძლებენ რუსეთის თავდასხმების მოგერიებას.
