აჭარის განათლების სამინისტრომ 4 საჯარო სკოლის მშენებლობის/რეაბილიტაციის საპროექტო-სახარჯთაღრიცხვო დოკუმენტაციების შესყიდვაზე ტენდერი გამოაცხადა. ეს სკოლებია ბათუმის N16, N22, ასევე საჩინოსა და ოჩხამურის საჯარო სკოლები. ტენდერი 58 ათასი ლარითაა გამოცხადებული, საიდანაც 20 ათასი ლარი მე-16 საშუალო სკოლას უნდა მოხმარდეს.
სატენდერო დოკუმენტების მიხედვით, მე-16 სკოლის ტერიტორიაზე ამ ეტაპზე ჩატარდება დეტალური გეოლოგიური კვლევა, ასევე ჩატარდება განაშენიანების კვლევა და შეადგენენ ტექნიკურ დავალებას, რომელიც უნდა ითვალისწინებდეს ახალი შენობის მშენებლობას (სავარაუდოდ 3 ან 4 სართულზე).
ამ დოკუმენტების საფუძველზე კი [რომელიც ხელშეკრულების დადებიდან 1 თვის ვადაში უნდა იყოს მზად], ახალი შენობისთვის საჭირო ძირითად საპროექტო დოკუმენტაციას სამინისტრო ცალკე შეისყიდის.
„შენიშვნა: გეოლოგიური კვლევის და ტექნიკური დავალების შედგენისას გათვალისწინებული უნდა იქნას ის გარემოება, რომ არსებულ შენობას გააჩნია ბზარები, შესაბამისად საჭიროა საფუძვლიანი და სიღრმისეული გამოკვლევა მსგავსი ფაქტების სრულად თავიდან აცილების მიზნით“ – აღნიშნულია ტენდერის პირობაში.
სამინისტროს ინფორმაციით, ამ ტენდერის ფარგლებში მომზადდება ბათუმის N22 სკოლის და დაბა ოჩხამურის სკოლის სრული რეაბილიტაციის პროექტები; ასევე, საჩინოს სკოლის სრული რეაბილიტაციის და ახალი სპორტული დარბაზის მშენებლობის პროექტი.
5 აპრილიდან ბათუმის მე-16 საჯარო სკოლა დისტანციურ სწავლებაზე გადავიდა. შენობის კედლებზე ბზარები გაჩნდა, რომელიც ბოლო პერიოდში გაღრმავდა.
აჭარის მთავრობის ინფორმაციით, მე-16 სკოლის ადგილზე აშენდება, „1000 მოსწავლეზე გათვლილი სკოლა“:
