Batumelebi | დააჯარიმეს დეპუტატები ხალხმრავალი წვეულებების გამო? – რას ამბობს შრომის ინსპექცია დააჯარიმეს დეპუტატები ხალხმრავალი წვეულებების გამო? – რას ამბობს შრომის ინსპექცია – Batumelebi
RU | GE  

დააჯარიმეს დეპუტატები ხალხმრავალი წვეულებების გამო? – რას ამბობს შრომის ინსპექცია

შეისწავლეთ თუ არა საჯარო მოხელეების მიერ გამართული წვეულებები, რომელიც პანდემიის გამო დაწესებული აკრძალვების დროს გაიმართა? გამოვლინდა თუ არა დარღვევები და დააჯარიმეთ თუ არა რომელიმე დამრღვევი? – ეს ინფორმაცია შრომის ინსპექციისგან „ბათუმელებმა“ წერილობით გამოითხოვა. 

შრომის ინსპექციის სამსახურს „ბათუმელებმა“ 11 მარტს მიმართა ოფიციალური წერილით. თითქმის ერთთვიანი ლოდინის შემდეგ უწყებამ არც ერთ კითხვას არ გასცა კონკრეტული პასუხი.

შესაბამისად, ისევ ბუნდოვანია, დააჯარიმა თუ არა ინსპექციამ, მაგალითად, პარლამენტარი ანზორ ბოლქვაძე კომენდანტის საათებში გამართული წვეულების გამო.

აქ ნახეთ, რა თქვა ანზორ ბოლქვაძემ წვეულების ვიდეოს გავრცელების შემდეგ

შრომის ინსპექციას ვკითხეთ კიდევ ერთი პარლამენტარის, ანტონ ობოლაშვილის მიერ ორგანიზებული ხალხმრავალი წვეულების შესახებ. ამ წვეულებას უმაღლესი თანამდებობის პირები ესწრებოდნენ. შრომის ინსპექცია ამ შემთხვევაზეც დუმს და ჩვენთვის გამოგზავნილ წერილში მხოლოდ კანონის იმ ნაწილზე აპელირებს, სადაც მათი უწყების ფუნქციაა განსაზღვრული.

„ბათუმელებმა“ შრომის ინსპექციას ასევე ჰკითხა, დაავადებათა კონტროლის ეროვნული ცენტრის საზოგადოებასთან ურთიერთობის სამსახურის ხელმძღვანელის, ნინო მამუკაშვილის შვილის ქორწილზეც. ცოტა ხნის წინ თავად ნინოს მიერ გავრცელებულ ფოტოებზე ჩანდა, რომ წვეულება ამ შემთხვევაშიც ხალხმრავალი იყო.

შრომის ინსპექციამ არც ამ კონკრეტულ ფაქტთან დაკავშირებით მოგვწერა, დააჯარიმეს თუ არა ვინმე შემთხვევის შემდეგ.

„შრომის ინსპექცია მთელი ქვეყნის მასშტაბით, სხვა სახელმწიფო უწყებებთან ერთად, კანონით დადგენილი წესების მიხედვით, ახორციელებს რეაგირებას როგორც აკრძალული, ასევე ნებადართული ეკონომიკური საქმიანობების რეკომენდაციებთან შესაბამისობის დასადგენად, რომლის საფუძველზეც გამოვლენილ დარღვევასთან დაკავშირებით იღებს შესაბამის გადაწყვეტილებას, ადმინისტრაციული სახდელის დაკისრების სახით“, – ეს არის ამონარიდი წერილიდან, რომელიც შრომის ინსპექციისგან ერთთვიანი ლოდინის შემდეგ მივიღეთ.

შრომის ინსპექცია თავის ფეისბუკის გვერდზე სავარაუდოდ, მხოლოდ იმ შემთხვევების შესახებ ანთავსებს ინფორმაციას, სადაც მაღალი თანამდებობის პირები არ მონაწილეობენ. მაგალითად, ბოლო ინფორმაცია დაჯარიმებების შესახებ შრომის ინსპექციას 4 აპრილს აქვს გამოქვეყნებული: სოციალური ღონისძიებისა და არანებადართული ეკონომიკური საქმიანობისთვის შრომის ინსპექციამ 7 სუბიექტი დააჯარიმა: 4 ფიზიკური პირი – 2 000 ლარით, ხოლო სამი იურიდიული პირები  – 10 000 ლარით.

„მათგან ერთ იურიდიულ პირს განმეორებითი სამართალდარღვევა დაუფიქსირდა, რაც სისხლის სამართლის პასუხისმგებლობას ითვალისწინებს“, – წერს ინსპექცია.

___

მთავარი ფოტო: ირაკლი კობახიძე და სხვა დეპუტატები ანტონ ობოლაშვილის მიერ გამართულ წვეულებაზე.

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com