15 მაისს აშშ-ის კონგრესმენებმა გამოაქვეყნეს მიმართვა, რომლის თანახმადაც „ბოლოდროინდელი ცნობები უდავოდ მიუთითებს, რომ ირანული ნავთობით უკანონო ვაჭრობის სამიზნე ისევ გახდა ბათუმის პორტი“. ამ განცხადების შემდეგ ზოგიერთი ქართულ გამოცემა წერდა, რომ ირანიდან ნავთობს უკანონოდ ეზიდება ქვეყნის ყოფილი პროკურორი ოთარ ფარცხალაძე და მას აფრიკის ქვეყნებში ყიდის.
ბათუმის ნავთობტერმინალი ბრალდებებს ოფიციალური წერილით გამოეხმაურა:
“შპს „ბათუმის ნავთობტერმინალი“ ახორციელებს ნავთობპროდუქტების გადატვირთვას. ამასთან უნდა აღინიშნოს, რომ ინფორმაცია ბათუმის ნავთობტერმინალის მიერ რაიმე სავაჭრო ოპერაციებისა ან ირანული წარმოშობის ტვირთების გადატვირთვის ოპერაციების განხორციელების შესახებ არ შეესაბამება სინამდვილეს.
გარდა ამისა, როგორც ცალკეულ მასმედიაში იყო აღნიშნული, ბათუმის ნავთობტერმინალს ბატონ ოთარ ფარცხალაძესთან არანაირი ურთიერთობა არ გააჩნია.
დამატებით გაცნობებთ, რომ ჯანდაცვის მსოფლიო ორგანიზაციის მიერ ახალი კორონავირუსის COVID19-ის პანდემიად გამოცხადების გამო, თანამშრომლების სიცოცხლისა და ჯანმრთელობის დაცვის უზრუნველყოფის მიზნით, ბათუმის ნავთობტერმინალის თანამშრომლები გადაყვანილნი არიან დისტანციურ მუშაობაზე საქართველოში საგანგებო მდგომარეობის რეჟიმის მოქმედების პერიოდში.
ამავდროულად, ბათუმის ნავთობტერმინალის ადმინისტრაცია აცხადებს, რომ ყოველთვის მზადაა მასმედიასთან ღია თანამშრომლობისთვის და მიღებული კითხვების სავალდებულო რეაგირებისთვის,” – ნათქვამია „ბათუმის ნავთობტერმინალის“ მიერ გავრცელებულ განცხადებაში.
გარდა ბათუმის პორტისა, ამერიკელი სენატორების წერილში რამდენიმე საკითხი იყო წამოჭრილი – ნავთობისა და გაზის მომპოვებელი კომპანია „ფრონტერას“ თემა, რომელსაც სენატორების წერილის თანახმად, საქართველოს ხელისუფლება ქვეყნიდან გაძევებას უპირებს. კონტი ჯგუფის თემა, რომელიც, სენატორების თქმით, უკვე გააძევეს ანაკლიის პორტის მშენებელი კონსორციუმიდან და ბათუმის პორტში „ირანული ნავთობით უკანონოდ ვაჭრობის“ თემა.
ამავე თემაზე:
ნავთობტერმინალის განმარტება ბათუმის პორტში „ირანული ნავთობით უკანონო ვაჭრობაზე“
