1 კვადრატი 64 ლარად – სახელმწიფო ქობულეთში 2.5 ჰექტარ მიწას უპირობო აუქციონზე ყიდის  

ქობულეთში, ზღვის სანაპიროდან 400 მეტრში მდებარე 25 547 კვ/მ ფართობის მიწის ნაკვეთს სახელმწიფო აუქციონზე უპირობოდ ყიდის. საწყისი გასაყიდი ფასი 1 630 000 ლარია [ანუ, 1 კვ/მ-ის ფასი დაახლოებით 64 ლარი], ხოლო ვაჭრობის ბიჯი – 2 ათასი ლარი.

ქონების აღწერილობაში ნაკვეთის შესაძლო, სამომავლო განვითარების პროფილად მითითებულია – „სასტუმრო/დეველოპერული“.

გასაყიდი ნაკვეთი ქალაქ ქობულეთში, რუსთაველისა და გოგებაშვილის ქუჩებს შორის მდებარეობს.

მიწის ნაკვეთი [ყვითელი ფერით] ქობულეთში, რომელსაც სახელმწიფო აუქციონზე ყიდის

სახელმწიფო ქონების ეროვნული სააგენტოს მიერ გამოცხადებული ელექტრონული აუქციონი 2020 წლის 19 თებერვალს დაიწყება და 5 მარტს დასრულდება.

შენიშვნაში მითითებულია, რომ „30 კალენდარულ დღეში საპრივატიზებო თანხის გადაუხდელობის შემთხვევაში უქმდება აუქციონის შედეგები. მკაცრად რეკომენდებულია საპრივატიზებო საფასურის გადახდა 25 დღის განმავლობაში.“

შენიშვნაში ასევე აღნიშნულია, რომ:

  • საპრივატიზებო მიწის ნაკვეთზე განთავსებულია მაღალი ძაბვის ელექტროგადამცემი ბოძი და 10 კვ.ძაბვის საჰაერო ელექტროგადამცემი ხაზი;
  • ნაკვეთს იყენებენ პირები მართლზომიერი ფლობის დამადასტურებელი დოკუმენტის გარეშე;
  • ქონებაზე ვრცელდება მდინარე ,,აჭყვას” 10-მეტრიანი წყალდაცვითი ზოლი;
  • მიწის ნაკვეთზე გადის „საქართველოს მელიორაციის“ საკუთრებაში არსებული აჭყვის დამშრობი სისტემის არხი; ასევე კვეთს დაურეგისტრირებელი წყლის მილი;
  • საპრივატიზებო ობიექტზე გადის საშუალო წნევის დ200 მმ გაზსადენი მილი.

 

მთავარი ფოტო: გასაყიდი ნაკვეთი ქობულეთში / ფოტო აუქციონიდან
ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com