შპს სტადიონის ახალ უფროსად ჯაბა სურმანიძე დანიშნეს, მისი ხელფასიც 6250 ლარი იქნება


შპს „სტადიონს“ ისევ ახალი, რიგით მეშვიდე ხელმძღვანელი ჰყავს. ყოფილმა დირექტორმა ლევან ლომთაძემ, რომელსაც აჭარის მთავრობის თავმჯდომარეზე მაღალი ხელფასი დაუნიშნეს, ორგანიზაციაში მხოლოდ ორი თვე დაჰყო. თანამდებობის დატოვების შესახებ ინფორმაცია მან „ბათუმელებს“ დაუდასტურა, თუმცა არ ისაუბრა მიზეზებზე.

ახალი დირექტორი ჯაბა სურმანიძეა. აქამდე ის ფინანსთა სამინისტროს საგამოძიებო სამსახურში მუშაობდა. ბოლო რამდენიმე თვის განმავლობაში კი აჭარის მთავრობის თავმჯდომარის მრჩეველი იყო.

აჭარის ფინანსთა და ეკონომიკის მინისტრის ჯაბა ფუტკარაძის ბრძანებაში, რომლითაც მან ლევან ლომთაძე თანამდებობიდან გაათავისუფლა და მის ნაცვლად ჯაბა სურმანიძე დანიშნა, ნათქვამია, რომ ლომთაძე პირადი განცხადების საფუძველზე გაათავისუფლეს.

ამავე ბრძანების მიხედვით, ჯაბა სურმანიძეს შეუნარჩუნდება ხელფასი 6250 ლარის ოდენობით. ამ თანამდებობაზე ხელფასი ლევან ლომთაძის დანიშვნის შემდეგ გააორმაგეს.

შპს „სტადიონი“ აჭარაში ერთ-ერთი ყველაზე მაღალბიუჯეტიანი ორგანიზაციაა,  რეგიონის 2018 წლის რესპუბლიკური ბიუჯეტიდან ის 72 მილიონ 300 ათასი ლარით იყო დაფინანსებული, ხოლო 2019 წელს აჭარის ბიუჯეტიდან ამ კომპანიისთვის 65 მილიონი ლარია გამოყოფილი.

შპს „სტადიონი“ ბათუმში იმ მრავალმილიონიანი პროექტების განხორციელებაზეა პასუხისმგებელი, რომლებიც აჭარის ბიუჯეტიდან ფინანსდება [ბათუმის საფეხბურთო სტადიონი, რესპუბლიკური საავადმყოფო, სპორტსკოლა ლეონიძის ქუჩაზე, ყინულის სასახლე, ამას დაემატება ძალოსნობის ბაზა ჩაქვში].

 

„სტადიონის“ დირექტორს მთავრობის თავმჯდომარეზე მეტი ხელფასი – 6250 ლარი დაუნიშნეს

ნეტგაზეთის მასალების სხვა გამოცემებში გადაბეჭდვის წესი
ავტორი
ეთერ თურაძე არის გაზეთ "ბათუმელების" მთავარი რედაქტორი 2001 წლიდან