Batumelebi | რას სთავაზობს მთავრობა კვადროციკლების მესაკუთრეებს, რომლებიც ბულვარში ვეღარ იმუშავებენ რას სთავაზობს მთავრობა კვადროციკლების მესაკუთრეებს, რომლებიც ბულვარში ვეღარ იმუშავებენ – Batumelebi
RU | GE  

რას სთავაზობს მთავრობა კვადროციკლების მესაკუთრეებს, რომლებიც ბულვარში ვეღარ იმუშავებენ

„სამინისტრო მზადაა წარმოდგენილი წინადადება ან პროექტი განიხილოს,“ – გვითხრეს აჭარის ფინანსთა და ეკონომიკის სამინისტროში, სადაც ვიკითხეთ, რას უპირებს მთავრობა ათეულობით ადამიანს, რომლებიც მაისიდან ბათუმის ბულვარში ვეღარ იმუშავებენ.

აჭარის ფინანსთა და ეკონომიკის სამინისტრო ამ ეტაპზე არაფერს სთავაზობს ელექტრომობილების გამქირავებლებს, არც პროექტია წარდგენილი.

„ბულვართან დაკავშირებით ბათუმის საკრებულომ უკვე მიიღო გადაწყვეტილება და ისინი ვერ გააგრძელებენ იქ საქმიანობას. აჭარის ფინანსთა და ეკონომიკის სამინისტრო მზად არის, თავისი უფლებამოსილების ფარგლებში განიხილოს კონკრეტული წინადადება ან პროექტი,“ – აღნიშნავენ აჭარის ფინანსთა და ეკონომიკის სამინისტროს პრესცენტრში.

ბათუმის საკრებულოს გადაწყვეტილებით, პირველი მაისიდან ბათუმის ბულვარში კვადროციკლებით, მოტოციკლებითა და ელექტრომობილებით სეირნობა აიკრძალება.

ეს გადაწყვეტილება საკრებულომ 2019 წლის 5 მარტს მიიღო. კვადროციკლის გამქირავებლებმა მაშინ „ბათუმელებს“ უთხრეს, რომ ისინი საპროტესტო აქციისთვის ემზადებიან, რადგან ბულვარში 1000-მდე ელექტრომობილი მუშაობს ზაფხულის სეზონზე, მათ შესაძენად ბანკიდან სესხი აიღეს და საკრებულოს ამ გადაწყვეტილებით უმუშევარი რჩებიან.

 

ნეტგაზეთის მასალების სხვა გამოცემებში გადაბეჭდვის წესი
ავტორი