მიწა ხელსაყრელი პირობებით – მთავრობა ნაკვეთს გონიოს სანაპიროზე ყიდის


გონიოში, ზღვის პირას არსებულ არასასოფლო-სამეურნეო მიწის ნაკვეთს აჭარის ფინანსთა და ეკონომიკის სამინისტრო ელექტრონული აუქციონით და პირობით ჰყიდის. საწყისი ღირებულების მიხედვით, რაც სამინისტრომ განსაზღვრა, 1 კვადრატული მეტრი ქალაქის საკურორტო ზოლში, ზღვასთან ახლოს, 388 ლარად და პირობით იყიდება.

წლის დასაწყისში აჭარის ფინანსთა და ეკონომიკის სამინისტრომ ეს მიწის ნაკვეთი გონიოში, პლაჟის სიახლოვეს, 422 ლარად შეაფასა. მიწა მაშინაც ინვესტიციის განხორციელების პირობით იყიდებოდა.  

412 კვადრატული მეტრი არასასოფლო-სამეურნეო მიწის ნაკვეთის საწყისი ფასი 160 000 ლარია, ხოლო ბიჯი – 4000 ლარი.

აუქციონის პირობების მიხედვით, მყიდველმა ხელშეკრულების გაფორმებიდან არაუმეტეს  ექვსი თვის ვადაში საკუთრებაში გადაცემულ მიწის ნაკვეთზე სასტუმროს მშენებლობისათვის საჭირო ნებართვის აღება, ხელშეკრულების გაფორმებიდან შვიდი თვის ვადაში კი სამშენებლო სამუშაოების დაწყება უნდა შეძლოს.

ხელშეკრულების დადებიდან არაუგვიანეს 24 თვისა, მყიდველი მშენებლობის დასრულებისა და არანაკლებ 20-ნომრიანი სასტუმროს ამოქმედების ვალდებულებას იღებს. სასტუმროს ამოქმედებიდან 1 თვეში ქონების შემძენმა საქართველოს არანაკლებ ათი მოქალაქე უნდა დაასაქმოს, დასაქმებულთა რაოდენობისა და სასტუმროს პროფილი კი არანაკლებ ხუთი წლის ვადით უნდა შეინარჩუნოს.

საერთო ჯამში, ამ პროექტისთვის არაუგვიანეს 24  თვისა, მყიდველმა არანაკლებ 500 000 ლარის ინვესტიცია უნდა განახორციელოს.

აუქციონი 25 დეკემბერს, 17:00 საათზე დასრულდება.

 

გონიოს პლაჟთან 4 662 კვ/მ მიწას სამინისტრო 2 მილიონ ლარად აუქციონზე ყიდის

ნეტგაზეთის მასალების სხვა გამოცემებში გადაბეჭდვის წესი
ავტორი