ნეტგაზეთი • RU

გონიოს პლაჟთან 4 662 კვ/მ მიწას სამინისტრო 2 მილიონ ლარად აუქციონზე ყიდის

გონიოში, პლაჟის გასწვრივ მდებარე 4662 კვ/მ მიწის ნაკვეთს, აჭარის ფინანსთა და ეკონომიკის სამინისტრო აუქციონზე სასტუმროს აშენების პირობით ყიდის. სამინისტროს 1 კვ/მ მიწა აქ 422,5 ლარად აქვს შეფასებული, შესაბამისად, მთლიანი ნაკვეთის გასაყიდი საწყისი ფასი 1 970 000 ლარია, ბიჯი კი 40 ათასი ლარი.

ქონების მყიდველი, აუქციონის პირობების მიხედვით, ვალდებულია:

  • ხელშეკრულების გაფორმებიდან არაუგვიანეს 6 თვის ვადაში არანაკლებ 200-ნომრიანი სასტუმრო-კომპლექსის [სადაც განთავსდება არანაკლებ 100 ავტომანქანაზე გათვლილი მიწისქვეშა პარკინგი, ღია და დახურული საცურაო აუზი, კვების ობიექტები, მინი აკვა-პარკი] მშენებლობის ნებართვის მიღება;
  • ხელშეკრულების გაფორმებიდან არაუგვიანეს 7 თვის ვადაში მშენებლობის დაწყება და 24 თვის ვადაში დასრულება;
  • ხელშეკრულების გაფორმებიდან არაუგვიანეს 36 თვის ვადაში სასტუმრო კომპლექსის ამოქმედება;
  • სასტუმრო კომპლექსის პროფილის შენარჩუნება არანაკლებ 20 წლის ვადით;
  • სასტუმრო კომპლექსის ამოქმედებიდან 1 ერთი თვის ვადაში მუდმივად, პროფილის შენარჩუნების ვადით არანაკლებ 60  მოქალაქის დასაქმება;
  • არაუგვიანეს 36 თვის ვადაში არანაკლებ 20 მილიონი ლარის ინვესტიციის განხორციელება.

აუქციონი 2018 წლის 4 ივლისს დასრულდება.

საპრივატიზებო საფასურს [„ბე“-ს გარდა, რომელიც გადახდილი უნდა იქნას აუქციონის დასრულებიდან 30 დღის ვადაში] ქონების მყიდველი გადაიხდის შემდეგნაირად:

  • დარჩენილი საპრივატიზებო საფასურის 30%-ს – არაუგვიანეს 2018 წლის 31 დეკმბრამდე;
  • დარჩენილი საპრივატიზებო საფასურის 30%-ს – არაუგვიანეს 2019 წლის 1 ივლისამდე;
  • დარჩენილ საპრივატიზებო საფასურს სრულად – არაუგვიანეს 2019 წლის 1 დეკემბრამდე;

გასაყიდი ნაკვეთი გონიოში / ფოტოები ელექტრონული აუქციონის ვებგვერდიდან

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com