ამერიკის შეერთებულმა შტატებმა გააუქმა უკრაინის ეროვნული გვარდიის მე-12 სპეცდანიშნულების ბრიგადისთვის, „აზოვისთვის“ ამერიკული იარაღის მიწოდების აკრძალვა.
აშშ-ს სახელმწიფო დეპარტამენტმა განაცხადა, რომ ვერ იპოვა მტკიცებულება, რომელიც „აზოვს“ ადამიანის უფლებების დარღვევასთან აკავშირებს.
„ვაშინგტონ პოსტი“ წერს, რომ „აზოვისთვის“ ამერიკული იარაღის მიწოდება აშშ-მ დაახლოებით 10 წლის წინ აკრძალა, ამერიკელი ოფიციალური პირების გადაწყვეტილებით, რომლებიც მიიჩნევდნენ, რომ „აზოვის პოლკის“ ზოგიერთი დამფუძნებელი რასისტულ, ქსენოფობიურ და ულტრანაციონალისტურ შეხედულებებს გამოხატავდა.
ამიერიდან „აზოვს“ ისეთივე წვდომა ექნება აშშ-ს დახმარებაზე, როგორც უკრაინის არმიის ნებისმიერ დანაყოფს.
„აზოვი“, რომელსაც მოგვიანებით „აზოვის პოლკი“ უწოდეს, 2014 წელს დაარსდა. „აზოვს“ ხშირად მოიხსენიებენ, როგორც ლეგენდარულ პოლკს, რომლის ჯარისკაცებიც განსაკუთრებული სიმამაცით გამოირჩევიან.
2022 წელს „აზოვის პოლკი“, უკრაინის გენშტაბის ბრძანებამდე დანებების შესახებ, იბრძოდა ქალაქ მარიუპოლში, მესაზღვრეებთან, პოლიციასთან, 36-ე საზღვაო ქვეითთა ბრიგადასთან და მარიუპოლის ტერიტორიულ თავდაცვასთან ერთად.
