Batumelebi | საპენსიო სააგენტოს დირექტორის ხელფასი 15 000-მდე ლარი იქნება [კონკურსი] საპენსიო სააგენტოს დირექტორის ხელფასი 15 000-მდე ლარი იქნება [კონკურსი] – Batumelebi

საპენსიო სააგენტოს დირექტორის ხელფასი 15 000-მდე ლარი იქნება [კონკურსი]

სსიპ „საპენსიო სააგენტომ“ დირექტორის პოზიციაზე ვაკანსია გამოაცხადა. დირექტორის თანამდებობრივი სარგო კი 10 000-დან 15 000-მდე ლარი იქნება. მსურველებს განაცხადის შევსება 2020 წლის 31 იანვარამდე შეეძლებათ.

„საპენსიო სააგენტოს დირექტორის მოვალეობებში შედის საპენსიო სააგენტოს მართვა „დაგროვებითი პენსიის შესახებ“ საქართველოს კანონით განსაზღვრული მიზნების მიღწევის უზრუნველყოფა. დირექტორი არ მონაწილეობს საპენსიო აქტივების საინვესტიციო საქმიანობის განხორციელების პროცესში და ანგარიშვალდებულია საპენსიო სააგენტოს სამეთვალყურეო საბჭოს წინაშე. საპენსიო აქტივების მართვასა და ზედამხედველობაზე პასუხისმგებელია უფროსი საინვესტიციო ოფიცერი და საინვესტიციო საბჭო „დაგროვებითი პენსიის შესახებ“ საქართველოს კანონის შესაბამისად“.

კონკურსში მონაწილეობის მიღების მსურველმა კანდიდატებმა განცხადების შევსების დროს უნდა გააგზავნონ ან ატვირთონ შემდეგი დოკუმენტაცია: უმაღლესი განათლების დამადასტურებელი დოკუმენტ(ებ)ის ასლები; შრომის წიგნაკის ასლი (ასეთის არსებობის შემთხვევაში) ან სამუშაო გამოცდილების დამადასტურებელი სხვა დოკუმენტ(ებ)ის ასლ(ებ)ი; სამოტივაციო წერილი; ინგლისური ენის ცოდნის დონე შემოწმდება გასაუბრების ეტაპზე.

საპენსიო სააგენტოს განაცხადის მიხედვით, არ შეიძლება საპენსიო სააგენტოს დირექტორად დაინიშნოს ნასამართლევი პირი ან პირი, რომელიც ნებისმიერ სახელმწიფოში გამოცხადებული იყო გაკოტრებულად ან ფინანსური ინსტიტუტის მართვისთვის შეუფერებლად; საპენსიო სააგენტოს დირექტორი არ შეიძლება უწევდეს პროფესიულ მომსახურებას საპენსიო სააგენტოს აქტივების მმართველ კომპანიას ან სპეციალიზებულ დეპოზიტარს საპენსიო სააგენტოს დირექტორის თანამდებობის დატოვებიდან თორმეტი (12) თვის განმავლობაში.

კონკურსის შედეგების, ასევე ჩატარების ზუსტი ადგილის, თარიღისა და დროის შესახებ კანდიდატებს ეცნობება დამატებით. კონკურსის შედეგების შესაბამისად, საუკეთესო კანდიდატის შერჩევის და საბოლოო გადაწყვეტილების მიღების ბოლო ვადის შესახებ გადაწყვეტილებას იღებს სსიპ საპენსიო სააგენტოს სამეთვალყურეო საბჭო. კონკურსის შესახებ სააგენტოს განაცხადი იხილეთ ამ ბმულზე.

ეროვნული ბანკის ინფორმაციით, დაგროვებით საპენსიო სქემაში 2020 წლის იანვრის დასაწყისისთვის 700 000-ზე მეტი ადამიანია ჩართული, ფონდის მოცულობა კი, 500 მილიონ ლარს აღემატება.

სააგენტოს პირველი თავმჯდომარე ლევან სურგულაძე იყო, რომელიც ამ თანამდებობაზე კონკურსის შედეგად, 2018 წლის სექტემბერში დაინიშნა. მაშინდელ კონკურსშიც მითითებული იყო, რომ დირექტორის ხელფასი თვეში 10 ათასიდან 15 ათასამდე ლარი იქნებოდა.

2019 წელს შევსებული დეკლარაციის მიხედვით, ლევან სურგულაძეს სააგენტოს დირექტორად ყოფნის დროს [2018 წლის 15 სექტემბრიდან ამავე წლის 31 დეკემბრის ჩათვლით პერიოდში] ხელფასის სახით ჯამში 42 ათასი ლარი აქვს მიღებული [ანუ, თვეში 12 ათასი ლარი].

2019 წლის 9 დეკემბერს ლევან სურგულაძემ განაცხადა, რომ თანამდებობიდან გათავისუფლების მოთხოვნით სამეთვალყურეო საბჭოს მიმართა.

„სააგენტოს ჰყავს ბორდი და კიდევ ბევრი სხვა მმართველი, ასევე ძალზედ პატივსაცემი და მაღალი რეპუტაციის მქონე ადამიანები… ადამიანმა თქვა, რომ მინდა წასვლა და ძალით ხომ არ ვამუშავებდით, თან დაგვპირდა, რომ ილოცებს”, – განაცხადა მაშინ პრემიერ-მინისტრმა გიორგი გახარიამ.

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com