როცა მაღაზიას ჩაუვლით, ვიტრინაზე რომელიმე მარკის სიგარეტის კოლოფი ვეღარ უნდა დაინახოთ. კანონში „თამბაქოს კონტროლის შესახებ“ უკვე ამოქმედდა ცვლილება, რომლის მიხედვითაც „აკრძალულია თამბაქოს ნაწარმის, თამბაქოს აქსესუარის ან/და თამბაქოს მოხმარებისთვის განკუთვნილი მოწყობილობის რეალიზაცია ან/და განლაგება: ვიტრინაზე, ვიტრაჟზე, დახლზე, თაროზე ან სხვაგვარად, ისე, რომ იგი ხილვადი იყოს შესაბამისი ობიექტის გარედან…“
მაღაზიის ვიტრინაზე თამბაქოს დადება 2 ათასი ლარით ჯარიმდება. მაღაზიები ამ კუთხით ფინანსთა სამინისტროს შესაბამისმა სამსახურებმა უნდა გააკონტროლონ. განმეორების შემთხვევაში, მაღაზიის მესაკუთრეები ჯარიმის გაორმაგებულ ოდენობას გადაიხდიან.
„ობიექტზე გარედან, ვიტრინაზე აღარ უნდა ჩანდეს სიგარეტი… მაღაზიის ინტერიერში, შიგნით მდებარე დახლებზე შესაძლებელია ჩანდეს თამბაქო. ამ კუთხითაც არის განსაზღვრული კანონში აკრძალვა, მაგრამ იგი 2021 წლიდან ამოქმედდება,“ – განმარტავს „იურიდიული მრჩევლის“ იურისტი, გიორგი ხიმშიაშვილი.
ორი ათასი ლარით დაჯარიმდება თამბაქოს ინტერნეტით ან ფოსტით რეალიზებაც. გიორგი ხიმშიაშვილის თქმით, მოქალაქეს ინტერნეტით თამბაქოს ნაწარმის გამოწერის უფლება ისევ ექნება, ინტერნეტის ან ფოსტის გამოყენებით თამბაქოს გაყიდვა გახდა დასჯადი.
ჯარიმა ამოქმედდა თამბაქოს საცალო და ავტომატიზებული აპარატებიდან გაყიდვაზეც. სიგარეტის საცალო გაყიდვა 150 ლარით დაჯარიმდება, ავტომატიზებული აპარატებიდან კი – 200 ლარით.
