ზურაბ პატარაძე ახალი მეჩეთის მშენებლობაზე: შეთანხმება ზეპირსიტყვიერად მიღწეულია

ბათუმში ახალი მეჩეთის მშენებლობაზე განმარტება აჭარის მთავრობის თავმჯდომარემ, ზურაბ პატარაძემ გააკეთა. დღეს, 20 თებერვალს, სასამართლო პროცესი ბათუმის მერიის მოთხოვნით გადაიდო. მერიამ მუსლიმ თემთან მოლაპარაკების მზადყოფნა გამოხატა.

„შეთანხმება ზეპირსიტყვიერად ფაქტობრივად მიღწეულია,“ – ამბობს ზურაბ პატარაძე, თუმცა მან ჟურნალისტებთან საუბრის დროს არ დააკონკრეტა, რომელ მხარეებს შორის შედგა შეთანხმება და გასცემს თუ არა მერია მშენებლობის ნებართვას ქალაქში ახალი მეჩეთის მშენებლობაზე.

ზურაბ პატარაძე: „ჩვენ დაგიდასტურებთ, რომ კომუნიკაცია არსებობს ჩვენს სამუფთოსთან და არასამთავრობო ორგანიზაციებთან ერთად. პერმანენტულად ვაწარმოებთ შეხვედრებს და ეს შეხვედრა ფაქტობრივად ბოლოშია გასული. მზად ვართ, კონკრეტული შეთავაზება გავაკეთოთ. ეს შეთავაზება მისაღებია გარკვეულწილად სამუფთოსთვისაც და ერთობლივად ჩვენ ძალიან მალე მივიღებთ გადაწყვეტილებას. შეთანხმება ზეპირისიტყვიერად ფაქტობრივად მიღწეულია, ამას ჩვენ ცალკე შეხვედრას მივუძღვნით“.

„შეთანხმება არსებობს მხოლოდ იმ საკითხზე, რომ ახალი მეჩეთი უნდა აშენდეს,“ – უთხრა „ბათუმელებს“ სრულიად საქართველოს მუსლიმთა სამმართველოს მუფთმა, ბეგლარ ქამაშიძემ. მისი თქმით, შეთანხმების საგანია, აშენდება თუ არა მეჩეთი იმ ადგილას, რომელიც „ბათუმში ახალი მეჩეთის მშენებლობის ფონდმა“ შეიძინა.

„ვმუშაობთ მიწის საკითხზე. ბათუმის მერს მხოლოდ ერთხელ შვხვდით და ეს იყო ზოგადი საუბარი. შეთანხმება უნდა შედგეს მიწის საკითხზე, რომელ ადგილას აშენდეს ახალი მეჩეთი,“ – ამბობს ბეგლარ ქამაშიძე.

ბათუმის მერიის წინააღმდეგ სასამართლოში სარჩელი ააიპ „ბათუმში ახალი მეჩეთის მშენებლობის ფონდმა“ შეიტანა.

ბათუმის მერიამ 2017 წლის 5 მაისს მუსლიმ თემს უარი უთხრა ქალაქში ახალი მეჩეთის მშენებლობის ნებართვის გაცემაზე.

სასამართლოს მუსლიმმა თემმა გასული წლის 10 ივნისს მიმართა.