ფილმის ჩვენებამდე, „საერთაშორისო გამჭვირვალობა საქართველოს“ ბათუმის ოფისის კოორდინატორმა მალხაზ ჭკადუამ ისაუბრა როგორც ფილმის, ასევე პროექტის მნიშვნელობაზე:
„რატომ გადავწყვიტეთ სწორედ ამ ფილმის ჩვენება? ალბათ ბევრ თქვენგანს სმენია კამპანიის შესახებ რომელსაც ერქვა – „ეს შენ გეხება“. კამპანია 2012 წელს დაიწყო რამდენიმე არასამთავრობო ორგანიზაციამ, იმის გამო რომ მხარი დაეჭირათ ინიციატიცისთვის რადგან არხები რომლებიც ვერ მაუწყებლობდნენ ქვეყნის მასშტაბით, ჩართულიყვნენ საკაბელო არხებში, რომ მოსახლეობას ჰქონოდა წვდომა მრავალფეროვან ინფორმაციაზე.
არჩევნების შემდეგ კი კამპანია ეხებოდა თვალთვალისა და მიყურადების პრაქტიკას, რაც საქართველოში სამწუხაროდ წლების განმავლობაში იყო და გრძელდება დღესაც, მიუხედავად იმისა რომ მთელი რიგი საკანონმდებლო ცვლილებები განხორციელდა.
დღეს, მეტ-ნაკლებად თითქოს უფრო დაცული ვართ მოსმენებისგან და თვალთვალისგან, მაგრამ ეს მაინც შორს დგას იმ პრაქტიკისგან, რაც არსებობს განვითარებულ ქვეყნებში“- ამბობს, მალხაზ ჭკადუა.
ფილმში „სხვისი ცხოვრება“ საუბარია იმაზე, თუ როგორ ხდება საზოგადოების ფორმირება ისეთ გარემოში როცა თითოეული ადამიანი ხდება თვალთვალის ობიექტი. „რას ვაკეთებთ ასეთ დროს ჩვენ ადამიანები, სად არის ჩვენი სამოქალაქო ღირსება, ადამიანური ეთიკა და სხვა გარემოება, რომელიც ასე მნიშვნელოვანია ხოლმე ჩვენს ყოველდღიურობაში“.
ფილმი გერმანელი რეჟისორისთვის სადებიუტო ნამუშევარი იყო. ის 16 წლის იყო, როდესაც ბერლინის კედელი დაინგრა და ეს იყო ერთ-ერთი გარდამტეხი ეპოქალური მნიშვნელობის მოვლენა მე-20 საუკუნის მეორე ნახევრის, როცა რკინის ფარდა ჩამოიშალა.
„მართალია გერმანია დღემდე იხდის დანარჩენი მსოფლიოს წინაშე ფაშისტური რეჟიმისთვის ხარკს, თუმცა არანაკლები დამნაშავე იყო საბჭოთა რეჟიმი, რომელიც დღემდე არ გასამართლებულა. თუ ფაშისტები საკონცენტრაციო ბანაკებში წვავდნენ ადამიანებს, საბჭოთა გულაგებში ასევე მილიონობით ადამიანი დაიღუპა და დღემდე ამ პროცესისთვის მსოფლიოს არ დაურქმევია თავისი სახელი“- ამბობს, მალხაზ ჭკადუა.
ფილმის ჩვენებას და დისკუსიას, ბათუმის რუსთაველის სახელობის სახელმწიფო უნივერსიტეტის, საზღვაო აკადემიის და ხელოვნების უნივერსიტეტის სტუდენტები ესწრებოდნენ.
ფილმის ჩვენებას სტუდენტები ესწრებოდნენ
