მთავარი,მთიანი აჭარა,სიახლეები

ქედის საკრებულოში სამი კომისიის თავმჯდომარედ ყოფილი თავმჯდომარეები აირჩიეს

21.11.2017 • 1640
ქედის საკრებულოში სამი კომისიის თავმჯდომარედ ყოფილი თავმჯდომარეები აირჩიეს

ქედის ახალარჩეულ საკრებულოში ხუთი კომისიიდან სამს [სამანდატო, საპროცედურო საკითხთა და ეთიკის, სივრცით-ტერიტორიული დაგეგმარებისა და ინფრასტრუქტურისა და საფინანსო საბიუჯეტო საკითხთა] წინა მოწვევის საკრებულოს ყოფილი თავმჯდომარეები უხელმძღვანელებენ.

ქედის საკრებულოში სამანდატო, საპროცედურო საკითხთა და ეთიკის კომისიის თავმჯდომარე, ფარული კენჭისყრით ამირან დევაძე მეორედ გახდა, გოჩა გორგილაძე კი ისევ სივრცით – ტერიტორიული დაგეგმარებისა და ინფრასტრუქტურის კომისიის ხელმძღვანელი იქნება, ხოლო რეზო თურმანიძე წინა მოწვევის საკრებულოს მსგავსად, საფინანსო საბიუჯეტო საკითხთა კომისიას უხელმძღვანელებს.

საკრებულოს პირველ სხდომაზე აირჩიეს სოციალური და ქონების მართვის და ბუნებრივი რესურსების საკითხთა კომისიების თავმჯდომარეები:  სოციალური კომისიის თავმჯდომარედ დანდალოს თემის მაჟორიტარი – ოთარ ხარაძე, ხოლო  ქონების მართვის და ბუნებრივი რესურსების საკითხთა კომისიის თავმჯდომარედ – სილოვან ბერიძე.

ქედის ახალარჩეულ საკრებულოში, საკრებულოს თავმჯდომარის, თავმჯდომარის მოადგილისა და კომისიის თავმჯდომარის ასარჩევად გამართულ ფარულ კენჭისყრაში საკრებულოს 24 წევრიდან მონაწილეობა 18-მა დეპუტატმა მიიღო, ყველა მათგანმა კი საკრებულოს თანამდებობის პირები ერთხმად, 18 ხმით აირჩია.

ქედის საკრებულოს ახალარჩეული თავმჯდომარე, შუქრი თურმანიძე აცხადებს, რომ 2017 წლის მოწვევის საკრებულო ოპოზიციონერი წევრების რჩევებსა და რეკომენდაციებს გაითვალისწინებს.

„ყველა ოპოზიციონერი დეპუტატის მიერ წარმოდგენილ საკითხს, ეს იქნება ინიცირება თუ მხოლოდ განცხადება, გავითვალისწინებთ, მაგრამ საკითხი მოსახლეობის კეთილდღეობაზე უნდა იყოს გათვლილი და არ პიარზე, პოპულისტური.

რაც შეეხება თანამდებობის პირების არჩევას, კითხვითი ნიშანი ვიღაცას შეიძლება გაუჩნდეს, რადგან კენჭისყრაში მონაწილე 18 დეპუტატიდან ყველამ ერთხმად მისცა ხმა, მაგრამ მე კითხვითი ნიშანი არ გამიჩნდებოდა“.

გადაბეჭდვის წესი


ასევე: