ათივე პირს, რომელიც გუშინ, 5 ივლისს ქურდული სამყაროს წევრობის ბრალდებით დააკავეს, წინასწარი პატიმრობა შეუფარდეს. აღკვეთი ღონისძიების შეფარდების პროცესი თბილისის საქალაქო სასამართლოში გაიმართა.
ერთ-ერთი ბრალდებულის ადვოკატის, მიშა მუზაშვილის თქმით, ბრალდების მხარეს მათთვის არ გადაუცია მტკიცებულებები, რითაც დაკავებულების ბრალეულობა დადასტურდებოდა. საუბარია ფარულ ჩანაწერებზე. „ამის მიუხედავად სასამართლომ გაიზიარა ბრალდების მოთხოვნა და ათივე დაკავებული პატიმრობაში დატოვა“, – აცხადებს ადვოკატი.
შინაგან საქმეთა სამინისტრომ გუშინ, 5 ივლისს ბათუმში, მესტიაში, მარნეულში, დმანისში, რუსთავსა და თბილისში 10 პირი დააკავა, ერთ პირს კი, ბრალი N17 პენიტენციურ დაწესებულებაში წარუდგინეს.
შს სამინისტროს ცნობით, გამოძიებით დადგინდა, რომ ბრალდებულები საკუთარი კრიმინალური გავლენის გამოყენებით, აქტიურად მონაწილეობდნენ ე.წ. ქურდული სამყაროს საქმიანობაში, ასევე, თავიანთი ქმედებებით ავრცელებდნენ ქურდული სამყაროს სპეციალურ წესებს, როგორიცაა სარგებლისა და უპირატესობის მიღება, ძალაუფლებისა და გავლენის მოპოვება-მინიჭება და ქურდული სამყაროს საქმიანობასთან დაკავშირებული სხვადასხვა საკითხის განხილვა-გადაწყვეტა.
ბრალის დადასტურების შემთხვევაში, ბრალდებულებს 7-დან 10 წლამდე ვადით თავისუფლების აღკვეთა ელით.
შემდეგი სასამართლო სხდომა 30 აგვისტოს გაიმართება.
შს სამინისტრო ლავასოღლისთან კავშირში 2018 წლის ოქტომბერშიც დააკავა 10 პირი.
ამავე თემაზე:
შსს: ქურდული სამყაროს წევრობის და მხარდაჭერის ბრალდებით 6 პირია დაკავებული
