12992805_1009745559073157_1261662330_n-e1460809482840

გადაიხდით, მაგრამ ვერ გააჩერებთ

ბათუმში პარკირების წესების დარღვევისთვის დღეში ხან 500-ზე მეტი მძღოლი ჯარიმდება. მაგალითად, 11 ოქტომბერს, ბათუმში 700-მდე მძღოლი დააჯარიმეს. მათ შორის, 547 მძღოლი პარკირების საფასურის გადახდის გარეშე დგომისთვის, 18 – ტროტუარზე დგომისთვის და ა.შ. პრეტენზიები მღოლებსაც აქვთ, ისინი ამბობენ, რომ პარკირების საფასურის გადახდის მიუხედავად ავტომანქანას ვერ აჩერებენ, რადგან ავტოპარკინგისთვის განკუთვნილი ადგილი საკმარისი არ არის. მერიის „სატრანსპორტო ინფრასტრუქტურის სააგენტოში“ კი აცხადებენ, რომ პარკირების საფასურის გადახდა არ ნიშნავს იმას, რომ მძღოლს ავტომანქანის გასაჩერებელი ადგილი სამსახურთან ახლოს შეხვდება.

ბათუმის `სატრანსპორტო ინფრასტრუქტურის სააგენტოს~ ხელმძღვანელის, გიორგი ჩხეიძის განცხადებით, ქალაქში პარკირების წესების დარღვევის მაჩვენებლის ზრდა გამოწვეულია გაუმართავი ინფრასტრუქტურით, რადგან ქუჩები გადათხრილია და ავტომანქანების ნაკადი ასფალტირებულ ქუჩებს აწყდება.

თუკი მერია ვერ უზრუნველყოფს შესაბამის ინფრასტრუქტურას ქალაქში, მაშინ როგორ უნდა მოხდეს პარკირების წესების დაცვა? გიორგი ჩხეიძე ამბობს, რომ ეს საკითხი სატრანსპორტო პოლიტიკის სფეროს ეხება და ამაზე პასუხი არა სააგენტომ, არამედ მერიამ უნდა გასცეს.

„ჩვენთან პარკინგის სისტემა არ არის კლასიფიცირებული. ქალაქის ტერიტორიაზე არის რეგულირებადი ზონები გამოყოფილი და შესაბამისად, საგზაო ნიშნითაც არის გამოყოფილი პარკირების ადგილი, თუმცა ეს იმას არ ნიშნავს, რომ ყველა მძღოლს შეხვდება ადგილი ავტომანქანის გასაჩერებლად. როცა მძღოლი იხდის პარკირებისთვის ერთწლიან საფასურს, ეს იმას ნიშნავს, რომ მას შეუძლია დააყენოს თავისი ავტომანქანა პარკირებისთვის განსაზღვრულ ადგილზე შეუზღუდავად, თუმცა ჩემი პარკირების უფლება ზღუდავს მეორე ადამიანის პარკირების უფლებას,“ – ამბობს გიორგი ჩხეიძე.

ირღვევა თუ არა იმ აბონენტების უფლება, რომლებიც იხდიან პარკირების საფასურს, მაგრამ ვერ ახერხებენ ავტომანქანების დაყენებას პარკინგზე? გიორგი ჩხეიძე: „მახდევინებ ფულს იმაში რაც არ არის, ასე არ დგას საკითხი. მოქალაქეების პრობლემა არის ის, რომ ყველას ოფისის კარებთან უნდა ავტომანქანის გაჩერება, მაშინ როცა შეიძლება მანქანა მოშორებითაც დააყენო. დიდ ქალაქებში ავტომანქანებს სამსახურიდან ორი კილომეტრის მოშორებითაც აჩერებენ“.

სატრანსპორტო ინფრასტრუქტურის სააგენტოს ხელმძღვანელის თქმით, ნიშანი – „აკრძალულია ავტომანქანის გაჩერება, გარდა სამსახურებრივი მანქანებისა“, არ გამოიყენება კერძო ოფისების წინ იმის მიუხედავად, იხდიან თუ არა ამ ოფისის თანამშრომლები პარკირების გადასახადს. „ამ ნიშნის დაყენების უფლება აქვთ მხოლოდ საჯარო უწყებებს, საგანგებო დანიშნულების სამსახურებს. კერძო კომპანიებზე ასეთი ნიშნები არ გაიცემა.

თუ კერძო კომპანიას პარკირებისთვის ადგილის გამოყოფა სურს, ასეთი ადგილები გაიცემა მერიის მიერ, მხოლოდ იჯარით და გაცემულია კიდეც რამდენიმე სასტუმროზე. სხვა შემთხვევაში, კერძო ოფისების წინ გამორიცხულია ამ ნიშნების განთავსება,“ – ამბობს გიორგი ჩხეიძე.

ბათუმის მერიის საფინანსო-ეკონომიკური სამსახურის საქალაქო ტრანსპორტის განყოფილების ხელმძღვანელი ემზარ ქავჟარაძე პარკირების საკითხის მოუგვარებლობას „გლობალურ პრობლემას“ უკავშირებს. „ეს გლობალურია პრობლემაა და მერიის ერთი სამსახურით ვერ მოგვარდება. მერიის სხვა სამსახურებსაც ეხება ეს საკითხი. მაგალითად, მშენებლობის ნებართვა არ უნდა გაიცეს იმ შემთხვევაში, თუკი სახლს არ აქვს პარკირების ადგილი“.

„ბათუმელების“ კითხვაზე, ნიშნავს თუ არა ეს იმას, რომ მერიას არ აქვს ჩამოყალიბებული პოლიტიკა პარკირებასთან და ზოგადად მშენებლობის ნორმებთან დაკავშირებით? – ემზარ ქავჟარაძე პირდაპირ არ პასუხობს: „ჩვენზე რაც არის დამოკიდებული, იმაზე ვმუშაობთ.“

ემზარ ქავჟარაძის თქმით, სანამ ქალაქში ინფრასტრუქტურული სამუშაოები მიმდინარეობს, პარკირების პრობლემა იარსებებს.

პარკირების საფასური ბათუმის საკრებულოს დადგენილებით განისაზღვრება. მსუბუქი მანქანებისთვის 30-დღიანი პარკირების ფასი ბათუმში 10 ლარია. ნახევარი წლის საფასური _ 25 ლარს, ერთი წლის პარკირების საფასური კი – 40 ლარს შეადგენს. იმ მძღოლებისთვის კი, რომლებიც ბათუმში მხოლოდ ერთი დღით ან ერთი კვირით აპირებენ დარჩენას, სპეციალური ტარიფი მოქმედებს. რაც შეეხება ჯარიმას, ფასი ადგილზე დაჯარიმების შემთხვევაში 10 ლარია, მანქანის ავტოფარეხში გადატანის შემთხვევაში კი მძღოლმა მის დასაბრუნებლად „ბათუმის ავტოპარკინგის“ ადმინისტრაციას პირადობის დამადასტურებელ დოკუმენტთან და მანქანის მფლობელობის დოკუმენტებთან ერთად 35-ლარიანი გადახდის ქვითარი უნდა წარუდგინოს.

2016 წლის იანვრიდან დღემდე ბათუმში 80 ათასამდე მძღოლი დაჯარიმდა არასწორი პარკირებისთვის. ბიუჯეტში კი საურავებისა და ჯარიმის სახით 300 ათასზე მეტი ლარი შევიდა.

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com