დღეს, 19 აპრილს, ბათუმში უსახლკაროებმა მორიგი აქცია გამართეს, რაც ერთი პირის დაკავებით დასრულდა. აქციის მონაწილეები მთავრობის თავმჯდომარესთან ითხოვდნენ შეხვედრას. მას შემდეგ, რაც მათ ამ შეხვედრაზე უარი უთხრეს, აქციის მონაწილეებმა რუსთაველის ქუჩის გადაკეტვა სცადეს.
მოქალაქეებს ქუჩის გადაკეტვის საშუალება პოლიციამ არ მისცა, რა დროსაც ერთი ადამიანი დააკავეს – დაკავებულია უსახლკარო შშმ პირი.
პოლიციის მეექვსე განყოფილებაში შესვლა სცადა დაკავებულის დედამ, მაგული ფუტკარაძემ – ის ცდილობდა შვილისთვის აუცილებელი მედიკამენტები მიეწოდებინა. მას ამის შესაძლებლობა არ მისცეს, სწორედ ამიტომ ქალს ექიმების დახმარება დასჭირდა.
დაახლოებით ერთი თვის წინ უსახლკაროებს, აქციაზე შეხვდა მთავრობის წარმომადგენელი და მათ დაჰპირდა, რომ თითოეული მათგანის საკითხს შეისწავლიდა მთავრობა. დღეს აქციის მონაწილეებმა თქვეს, რომ მთავრობიდან არც ერთ მათგანს არავინ შეჰხმიანებია.
ბათუმელი უსახლკაროებმა დღეს დააანონსეს, რომ 22 მაისიდან უწყვეტ აქციებს იწყებენ აჭარის მთავრობის ადმინისტრაციის შენობასთან.
ბათუმელი უსახლკაროები უკვე ორი წელია, ყოველ ხუთშაბათს მართავენ აქციებს ბათუმის მერიასა და აჭარის მთავრობასთან. ამ მოქალაქეების პრობლემის იდენტიფიცირებაზე არც ერთ მათგანს საჯარო არ უმსჯელია.
