19532555_1484214111599644_231696946_o

აჭარაში 3750 ჰექტარი უფასოდ შეიწამლება – რეკომენდაციები ფაროსანას გასანადგურებლად

აჭარის სოფლის მეურნეობის სამინისტრო სურსათის ეროვნულ სააგენტოსთან ერთად აჭარაში ფაროსანას წინააღმდეგ შეწამვლას იწყებს. სახელმწიფო უფასოდ შეწამლავს 3750 ჰექტარს, სამუშაოები ქობულეთიდან დაიწყება. აჭარის სოფლის მეურნეობის სამინისტროს პრესსამსახურის ცნობით, შესაწამლი სამუშაოებისთვის აჭარის მთავრობის სარეზერვო ფონდიდან 300 ათასი ლარია გამოყოფილი.

შეწამვლის დროს ეფექტურობისა და უსაფრთხოების ზომებთან დაკავშირებით აჭარის სოფლის მეურნეობის სამინისტრო რეკომენდაციებს ავრცელებს:

წამლობითი ღონისძიების დროს პესტიციდის ნისლისაგან ფილტვების, თვალბისა და სხეულის კანის დასაცავად გამოყენებული უნდა იქნას თვალების დამცავი სათვალე,  რესპირატორი და ანტიქიმიური კომბინიზონი;

გაფრთხილებული უნდა იქნენ მეფუტკრეები, რათა დახურონ სკები ან გადაიტანონ ისინი შეწამლვის ადგილიდან;

მოერიდეთ შეწამლვას სასოფლო-სამეურნეო კულტურების ყვავილობის დროს;

 წამლობითი ღონისძიებები არ უნდა განხორციელდეს ძლიერი სიცხის ზემოქმედების ქვეშ;

პრეპარატი უნდა შევასხუროთ მაშინ, როცა წვიმა 24 საათის განმავლობაში არ არის ნავარაუდევი;

არ უნდა შევწამლოთ მაშინ, როცა ქარი სახლისკენ ან ცხოველთა სადგომებისკენ უბერავს;

მოაშორეთ ოჯახის წევრები შესაწამლ ადგილს. არ მისცეთ უფლება ოჯახის წევრებს, ბავშვებს  და ა.შ. შევიდნენ შეწამლულ ტერიტორიაზე  აკრძალული ინტერვალის განმავლობაში, რომლის ხანგრძლივობა 12 საათია.

აზიური ფაროსანა მავნებელი მწერია, რომელსაც შეუძლია დიდი ზარალი მიაყენოს სოფლის მეურნეობას. ერთ მდედრს შეუძლია დადოს 250 კვერცხი, საიდანაც ნახევარი ანუ 125 ცალიდან იჩეკება მდედრი, შედეგად მეორე თაობაში 125 მდედრს უკვე შეუძლია დადოს 30 000-ზე მეტი კვერცხი და პოპულაციის კატასტროფული მატება გამოიწვიოს.

გამოსაზამთრებლად თავშეფარებული მავნებლები შეაგროვეთ და გაანადგურეთ. ვინაიდან ერთი ფაროსანას განადგურება ნიშნავს 250-მდე ფაროსანას განადგურებას;

სასურველია  ბაღებში ფოსფორიანი და კალიუმიანი სასუქების შეტანა, რომელიც უქმნის მავნებლებს არახელსაყრელ გარემოს ნიადაგში გამოზამთრება/განვითარებისათვის;

წამლობა აუცილებლად უნდა ჩატარდეს ბაღებში მაშინ, როცა მავნებელი ნიმფის (მატლის) ფაზაშია. საჭიროების შემთხვევაში წამლობა შესაძლებელია განმეორდეს 30 დღის შემდეგ. სპეციალისტების რეკომენდაციის მიხედვით, ყველაზე ეფექტურია პირეტროიდული ჯგუფიდან ბიფენტრინის შემცველი პრეპარატები – „ტალსტარი“ და „ინსაკარი“. შესაძლებელია გამოყენებული იქნას ასევე ლამბდა-ციჰალოტრინის შემცველები – „კარატე“, „კარატე ზეონი“ და „ენდიგო“. ქლორპირიფოსის შემცველები – „დურსბანი“ და „პრიბან 4“ და ა.შ. ქიმიური პრეპარატების გამოსაყენებელი დოზების დადგენისას უნდა იხელმძღვანელოთ სპეციალისტების რეკომენდაციებითა და ეტიკეტზე მითითებული ინსტრუქციის შესაბამისად. პრეპრატების  შესხურება უნდა მოხდეს  ივნის-ივლისის თვეებში.

ფაროსანას შესაწამლი ხელსაწყო. ფოტო: აჭარის სოფლის მეურნეობის სამინსიტრო

ფაროსანას შესაწამლი ხელსაწყო. ფოტო: აჭარის სოფლის მეურნეობის სამინისტრო

ამავე თემაზე: 

მავნებელი მწერი – აზიური ფაროსანას გარემოში გავრცელების მონიტორინგი დაიწყო

აზიური ფაროსანა ნებისმიერ სასოფლო-სამეურნეო კულტურას ანადგურებს – მწერთან ბრძოლა დატესტვის რეჟიმში

სეს: აზიური ფაროსანას წინააღმდეგ პროგრამა პირველ წელს სატესტო იქნება

 

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ტელ: [0422] 27 45 12 ელფოსტა: kvachadze.n@gmail.com