„არ მსურს დავესწრო სასამართლო პროცესს,“ – წაიკითხა მოსამართლემ მკვლელობაში ბრალდებულის ციხიდან გამოგზავნილი წერილი. „ბრალდებულს აქვს უფლება არ დაესწროს სასამართლო სხდომას, მაგრამ პროცესზე მოსვლა ვერც ადვოკატმა მოახერხა,“ – აღნიშნა მოსამართლე გიორგი გრატიაშვილმა.
ადვოკატი დავით ჩავლეიშვილი პროცესს თბილისის საქალაქო სასამართლოში ყოფნის გამო ვერ დაესწრო. სასამართლომ დღეს მხოლოდ აღკვეთი ღონისძიების შეცვლის საკითხზე იმსჯელა.
განზრახ მკვლელობას პროკურატურა 37 წლის ჯუმბერ ა.-ს ედავება. შემთხვევა ჩაქვში, სოფელ ჩაისუბანში, გასული წლის 28 ნოემბერს მოხდა, საპრეზიდენტო არჩევნების მეორე ტურის დღეს.
გამოძიების ვერსიით, ბრალდებულმა თანასოფლელ მამია ცეცხლაძეს ავტომანქანით მოძრაობის დროს, სანადირო თოფიდან ესროლა.
მამია ცეცხლაძე არჩევანის გასაკეთებლად სოფლის ცენტრში მივიდა, შემდეგ კი საკუთარი ავტომანქანით სახლში მარტო ბრუნდებოდა. გზაში შემხვედრი, მოძრავი ავტომანქანიდან მას მოულოდნელად ესროლეს.
„ეს არ უკავშირდება არჩევნებს… პირადი ამბავი იყო,“ – ირწმუნებიან გარდაცვლილის ახლობლები, რომლებიც დღეს სასამართლო პროცესზე დასასწრებად მოვიდნენ.
ბრალდებულის ახლობლებმა კი გვითხრეს, რომ ეს ამბავი გამოუძიებელი საქმის შედეგია – „2005 წელს, ცხონებულმა სიმთვრალეში შეკამათების დროს, ფეხში დაჭრა ჯუმბერი და ფეხი მოსაჭრელი დარჩა“.
„ეს წინა საქმე ვერ იქნა გამოძიებული,“ – ამბობს პროკურორი რამაზ შავაძეც. მისი განმარტებით, თავის დროზე ბრალდებულმა ახლა უკვე გარდაცვლილის წინააღმდეგ ჩვენება არ მისცა და გამოძიება კონკრეტულ შედეგზე ვერ გავიდა.
2005 წლის შემთხვევის შემდეგ ბრალდებული ცოლთან ერთად საფრანგეთში ცხოვრობდა და საქართველოში ბოლო საპრეზიდენტო არჩევნებამდე რამდენიმე დღით ადრე დაბრუნდა.
პროკურორი სასამართლო პროცესზე წინააღმდეგი წავიდა ბრალდებულისთვის შეფარდებული აღკვეთი ღონისძიება შეეცვალათ.
„მკვლელობის შემდეგ ის მალევე მიიმალა და თურქეთიდან მოხდა შემდეგ მისი დეპორტაცია… ისევ არსებობს მიმალვის და მოწმეებზე ზემოქმედების საფრთხე, რომლებიც მისი ნათესავები არიან,“ – თქვა პროკურორმა რამაზ შავაძემ.
პროკურორმა ხაზი გაუსვა იმასაც, რომ ბრალდებული საფრანგეთში „კანონთან კონფლიქტში იყო“.
მოსამართლემ ბრალდებული ჯუმბერ ა. წინასწარ პატიმრობაში დატოვა. წინასასამართლო სხდომა კი გადაიდო.
ბრალდებულმა წინასწარ გამოძიებაში მიცემული ჩვენების დროს მკვლელობის ჩადენა აღიარა. მკვლელობის მოტივად პროკურატურაც პირად შურისძიებას მიიჩნევს და ამ ეტაპზე პოლიტიკურ მიზეზს გამორიცხავს.
