აჭარის მთავრობა 2019 წელს 15 მილიონი ლარის ქონების გასხვისებას გეგმავს

აჭარის მთავრობა მომავალ წელს 15 მილიონი ლარის ქონების გასხვისებას გეგმავს. ქონების ძირითადი ნაწილი მიწის ნაკვეთებია, რომლებსაც ფინანსთა და ეკონომიკის სამინისტრო, პირობიანი აუქციონის წესით და მასზე ინვესტიციის განხორციელების პირობით ან უპირობოდ ასხვისებს.

უკვე არსებული პრაქტიკით, მთავრობ​ა მიწის ნაკვეთებს ზღვასთან ახლოს ან ზღვის ხედით, ბათუმში, მახინჯაურში, მწვანე კონცხზე, გონიოში, სარფში [ძირითადად საკურორტო  ზონაში] ტურისტული ინფრასტრუქტურის შექმნის მიზნით ასხვისებს.

საპრივატიზებო პირობა გასხვისებულ ტერიტორიაზე ასევე ხშირად ითვალისწინებს ასნომრიანი სასტუმროს, კაზინოს ან სხვა სახის ტურისტული ინფრასტრუქტურის მშენებლობას, მშენებლობის ნებართვას კი ბათუმის მერია გასცემს.

დაგეგმილი სამშენებლო პროექტის მასშტაბი ხშირად საზოგადოების განსჯისა და წინააღმდეგობის მიზეზი ხდება, რადგან ისინი, ვინც მწვანე სივრცეების სამშენებლოდ ათვისებას ეწინააღმდეგებიან, მიიჩნევენ, რომ ინვესტორების ინტერესების გათვალისწინებამ – ააშენოს ზღვის ხედით და რაც შეიძლება მასშტაბური იყოს მისი შენობა, ქალაქის იერსახე უარესობისკენ შეცვალა. გაუარესდა იმ ადამიანების საცხოვრებელი გარემოც, რომლებსაც ინვესტიციის განხორციელების პირობით ორსართულიანი სახლების წინ ცათამბჯენები აუშენეს.

პრობლემაზე, როცა აჭარის მთავრობა გარკვეული მასშტაბის მშენებლობის პირობით ისე ასხვისებს ტერიტორიას, რომ ამაზე მერიამ არაფერი იცის, გასულ კვირას მერიის ქალაქმშენებლობისა და ურბანული პოლიტიკის სამსახურის უფროსმა მირიან მეტრეველმაც გააკეთა აქცენტი, სამოქალაქო საბჭოსთან შეხვედრაზე.

ამ შეხვედრაზე განიხილეს ერთ-ერთი მსგავსი პრობლემა, როცა მთავრობამ მწვანე კონცხზე სარეკრეაციო ზონაში ნაკვეთი მშენებლობის პირობით გაასხვისა, ინვესტორი ამ ადგილზე 50-სართულიანი მრავალფუნქციური ობიექტის მშენებლობას ითხოვდა. თუმცა, მან შენობის სიმაღლე, მერიის თხოვნით, 28-სართულამდე შეამცირა.

ამ მშენებლობისთვის საკრებულომ კონკრეტულ ტერიტორიაზე ზონას სტატუსი შეუცვალა და სარეკრეაციო ზონის ნაცვლად საზოგადოებრივ-საქმიანი ზონის სტატუსი მიანიჭა, რაც ბათუმში აქციით გააპროტესტეს.

2018 წლის ბიუჯეტის სამი კვარტალის შესრულების ანგარიშის მიხედვით, ქონების გასხვისების ნაწილში მთავრობამ გეგმა გადაჭარბებით შეასრულა. რესპუბლიკური ბიუჯეტის 2018 წლის სამი კვარტალის არაფინანსური აქტივების კლების [გაყიდვა] გეგმა 21 მილიონ  250 500 ლარით განსაზღვრეს, ხოლო ფაქტობრივი შესრულება 24 340,9 ათასი ლარია. წინა წლის ანალოგიურ მაჩვენებელთან [16 მილიონ 236 900 ლარი] შედარებით ფაქტობრივი შესრულება 8 მილიონ  104 000 ლარით, ანუ 49,9 პროცენტითაა გაზრდილი.

გაითვალისწინებს თუ არა მთავრობა მომავალში ქონების გასხვისების პირობების განსაზღვრისას ქალაქმშენებლობის წესებსა და რეგულაციებს, ეს მომავალში გამოჩნდება.

 

ნეტგაზეთის მასალების სხვა გამოცემებში გადაბეჭდვის წესი


ავტორი