„31 წლის კაცის გადმოსვენებას ვითხოვთ საფრანგეთიდან, ის 3 თვის წინ მოკლეს“ – აქცია ბათუმში

„ჩვენ მთავრობას არც ფულს ვთხოვთ და არც საჭმელს, დაგვეხმაროს მთავრობა იმაში, რომ ცხედარი ჩამოგვასვენებინოს,“ – ამბობს გენადი შაინიძე, რომელსაც დღეს, 11 მარტს აჭარის მთავრობის ადმინისტრაციის წინ შევხვდით.

საუბარია 2023 წლის 17 დეკემბერს მომხდარ შემთხვევაზე – 31 წლის მარადი სურმანიძე საფრანგეთის ქალაქ ტულუზაში მოკლეს. ფრანგული მედიის ცნობით, გამოძიებას აქვს ვერსია, რომ კაცის მკვლელობას თავის ცოლს ედავებიან.

„არ ვიცით, რა მოხდა და როგორ, ვერაფერი გავიგეთ,“ – გვიყვება ნესტან სურმანიძე, რომელიც მოკლული კაცის რძალია. – „ჩემი მეუღლე ჩავიდა საფრანგეთში, მაგრამ ვერ ნახა ცხედარი, ვერც ბავშვები ნახა, მათზე იქაური სოციალური სამსახური ზრუნავს.

მარადი და მისი ოჯახი ერთ-ერთი შვილის ჯანმრთელობის მდგომარეობის გამო წავიდა საფრანგეთში, ლტოლვილად ჩაბარებას ითხოვდნენ… 5 მცირეწლოვანი შვილი დარჩა,“ – ამბობს ნესტან სურმანიძე.

„ბათუმში ბოლო რამდენიმე წელია ნაქირავებში ცხოვრობდნენ, ისე ხულოდან არიან, ბათუმში ვერ იმუშავა მარადიმ, იმასაც ჯანმრთელობა აწუხებდა და წავიდნენ საფრანგეთში.

ვის არ მივმართეთ, ანზორ ბოლქვაძესაც მივმართეთ, რომელიც ჩვენი დეპუტატია პარლამენტში, მაგრამ არაფერს გვეუბნებიან. ახლა აჭარის მთავრობის ადმინისტრაციაში გვითხრეს, რომ საელჩოს დაუკავშირდებიან და გვაცნობებენ პასუხს“, – გვითხრა გენადი შაინიძემ.