ყოფილი სამხედროს თვითმკვლელობა და დაპატიმრების ახალი სერია თურქეთში

თურქული მედიის ცნობით, 17 აპრილს, თურქეთში, ქალაქ იზმირში, თავი მოიკლა ყოფილმა სამხედრო პირმა, ფატიჰ უგურმა. იგი ყოფილი ლეინტენანტია, რომელიც სამსახურიდან დაახლოებით ორი თვის წინ დაითხოვეს, მას შემდეგ, რაც თურქეთში ტერორისტულ ორგანიზაციად მიჩნეულ „ფეტოსთან“ დაკავშირებული გამოძიების გამო დააკავეს.

ყოფილი სამხედრო, 17 აპრილს, გვიან საღამოს მივიდა შენობასთან, სადაც ადრე მუშაობდა, მცველს სამსახურეობრივი იარაღი წაართვა და ტყვია დაიხალა. იგი ადგილზევე გარდაიცვალა.

ამ ფაქტის პარალელურად, თურქეთში, „ფეტოსთან“ დაკავშირებული დაკავებების სერია გრძელდება. თურქული მედია ოფიციალურ ანკარაზე დაყრდნობით იუწყება, რომ პროკურატურის ვერსიით, საჰაერო ძალების სამხედრო პირებს  კავშირი ჰქონდათ ე.წ. „იმამების დაჯგუფებასთან“, რომელიც თავის მხრივ „ფეტოსთან“ არის კავშირში.

გამოძიების შედეგად დააკავეს ათეულობით სამხედრო პირი, მათგან 16 პოლკოვნიკი და 9 ვიცე-პოლკოვნიკი. დაკავებულთა სასამართლო პროცესები ანკარაში და თურქეთის სხვა ექვს ქალაქში გაიმართება.

Тurkeypurge.com-ის ცნობით, სამხედრო გადატრიალების მცდელობის ბრალდებით თურქეთში 64 998 ადამიანია დაკავებული, მათი უმრავლესობა სამხედრო პირია. დაკავებულებს შორის არიან ჟურნალისტები, მასწავლებლები, აკადემიკოსები, მოსამართლეები და ა.შ.

____________________

2016 წლის ივლისში თურქეთში სამხედრო ძალებს გადატრიალების მცდელობა ჰქონდათ. პრეზიდენტმა ერდოღანმა განაცხადა, რომ ამ ძალების უკან მუსლიმი იმამი ფეთულა გიულენი და მისი ორგანიზაცია „ფეტო“ დგას.

გადატრიალების მცდელობის შემდეგ თურქეთში მასობრივი დაპატიმრებები დაიწყო „ფეტოსთან“ კავშირისა და ტერორიზმში მონაწილეობის ბრალდებით.

ადამიანების უფლებების დამცველმა ორგანიზაციებმა თურქეთი არაერთხელ გააკრიტიკეს დაპატიმრებების პროცესში ადამიანის უფლებების მასობრივი დარღვევების გამო.

___________________

მთავარი ფოტო: EPA/STR 

ნეტგაზეთის მასალების სხვა გამოცემებში გადაბეჭდვის წესი


გულნარ სალიმოვა