თურქმა სამართალდამცავებმა ქვეყნის სამხრეთ-აღმოსავლეთით, ერაყის საზღვართან, სასაზღვრო-გამშვებ პუნქტზე, რეკორდული რაოდენობის, 850 კილოგრამი ჰეროინი ამოიღეს.
თურქული გამოცემის, dailysabah-ის ინფორმაციით, ეს არის ყველაზე დიდი რაოდენობის ჰეროინი, რაც ერთი სპეცოპერაციით თურქეთის სახელმწიფოს სასაზღვრო პუნქტებზე ამოუღიათ.
სამინისტროს მიერ 28 მარტს გავრცელებულ განცხადებაში ვკითხულობთ, რომ სასაზღვრო უსაფრთხოების სამსახურმა საბაჟოს ინსპექტირებისას „სარისკო“ სატვირთო მანქანა აღმოაჩინა. ჩხრეკის შედეგად სამართალდამცავებმა 850 კილოგრამი ჰეროინი აღმოაჩინეს, რომლის სავარაუდო ღირებულება 1,3 მილიარდ ლირას (40,1 მილიონი აშშ დოლარი) შეადგენს.
თურქული მედია ასევე ავრცელებს ინფორმაციას სამინისტროს ბოლოდროინდელ სპეცოპერაციებთან დაკავშირებით, რომლის მიხედვითაც სტამბოლში, იზმირში, ვანსა და ართვინში სამართალდამცავებმა 140 მილიონი ლირის ღირებულების ნარკოტიკი და კონტრაბანდული საქონელი ამოიღეს. აქედან 85 კილოგრამი ნარკოტიკული საშუალება სტამბოლის პენდიკის პორტიდან და 36 კგ (კანაფი და კოკაინი) – სტამბულის აეროპორტიდან.
__________________
ავტორი: ანა ბაჟუნაიშვილი
