ნგრევა გრძელდება – ამჯერად ისტორიული სახლი ფარნავაზ მეფის #52-ში

ბათუმში, ფარნავაზ მეფის 52-ში, ისტორიულ სახლს ანგრევენ. მე-19 საუკუნეში აშენებული სახლისთვის ბათუმის ძველ უბანში კულტურული მემკვიდრეობის დაცვის სააგენტოს ძეგლის სტატუსი არ მიუნიჭებია.

ისტორიული სახლის დემონტაჟს კომპანია „ტვიქს ჰაუსი“ ახორციელებს. კომპანიის დამფუძნებელმა, მინდია დავითაძემ, „ბათუმელებს“ უთხრა, რომ იგივე კომპანია ამ ადგილას შვიდსართულიან საცხოვრებელ კორპუსს ააშენებს.

„დემონტაჟისა და ახალი მშენებლობის ნებართვაც მერიამ გასული წლის 3 ნოემბერს მოგვცა. სახლს ძეგლის სტატუსი არ აქვს,“ – ამბობს მინდია დავითაძე.

აჭარის კულტურული მემკვიდრეობის დაცვის სააგენტოს ხელმძღვანელი, ლაშა ასლანიშვილი ადასტურებს, რომ ისტორიულ სახლს ძეგლის სტატუსი არ ჰქონდა. რატომ არ მიანიჭა სააგენტომ ისტორიულ სახლს ძეგლის სტატუსი? – ლაშა ასლანიშვილმა გვითხრა, რომ არკვევს, იყო თუ არა გაცემული რეკომენდაცია ამ სახლისთვის სტატუსის მინიჭების თაობაზე.

 

ნეტგაზეთის მასალების სხვა გამოცემებში გადაბეჭდვის წესი
ავტორი