ბსუ ბათუმში ახალ სასწავლო კორპუსს 2,9 მილიონ ლარად ააშენებს

ბათუმის შოთა რუსთაველის სახელმწიფო უნივერსიტეტი [ბსუ] ბათუმში, ლეონიძის ქუჩა N15-ში ახალ სასწავლო კორპუსს ააშენებს. სამშენებლო სამუშაოებს, რისთვისაც 2 მილიონ 957 ათასი ლარია გამოყოფილი, ბსუ ელექტრონული ტენდერით შეისყიდის. ტენდერი უკვე გამოცხადებულია. მშენებლობა 2018 წლის 21 დეკემბრამდე უნდა დასრულდეს. საპროექტო ტერიტორია კი 65 982 კვ/მ-ია.

არსებული პროექტის მიხედვით, ახალი სასწავლო კორპუსი სამსართულიანი იქნება; შენობის ძირითადი სტრუქტურული სისტემა წარმოადგენს რკინა-ბეტონის კარკასულ შენობას; მასში 27 აუდიტორია, კაბინეტები და საკონფერენციო დარბაზი განთავსდება. შენობა ადაპტირებული იქნება შშმ პირებზე, რომელშიც გათვალისწინებულია პანდუსი, სველი წერტილები, ლიფტი.

ტენდერში წინადადებების მიღება 17 იანვარს დაიწყება და 22 იანვარს დასრულდება.

ბსუ-ს ახალი კორპუსის ესკიზი / ბათუმი, ლეონიძის 15 / ფოტო პროექტიდან

ახალი სასწავლო კორპუსის ეზოს ღობის ესკიზი / ფოტო პროექტიდან

ბსუ ბათუმში, ლეონიძის 15-ში, სტუდენტთა საერთო საცხოვრებელსაც აშენებს, რისთვისაც ხელშკრულება შპს ვექტორთან 2 359 000 ლარზეა გაფორმებული; ბსუ-ს ინფორმაციით, ამ დროისთვის არ არის გადაწყვეტილი კონკრეტულად რომელი ფაკულტეტები განთავსდება ახალ კორპუსში. ლეონიძის 15-ში საუნივერსიტეტო კომპლექსი იქნება.

ქობულეთში კი, კაიკაციშვილის ქუჩის №1-ის მიმდებარედ, ბსუ-ს კვლევითი ინსტიტუტის შენობა აშენდება.

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com