„ნათია კაპანაძე აჭარის ტელევიზიის წინააღმდეგ“ – საქმე სტრასბურგის სასამართლოში კომუნიკაციის ეტაპზე გადავიდა. ევროსასამართლომ საქართველოს ხელისუფლებას უკვე მოსთხოვა პოზიციის და დამატებითი ინფორმაციის მიწოდება საქმისთვის აუცილებელი დასკვნებისთვის.
„ეს ნიშნავს, რომ საქმე ოფიციალურად გადადის მეორე ეტაპზე, სადაც სასამართლო იწყებს მხარეებს შორის პირდაპირ მიმოწერას,“ – განმარტავს იურისტი ნათია კაპანაძე, რომელიც აჭარის ტელევიზიის დირექტორი იყო და 2019 წელს იმპიჩმენტი მოუწყვეს, მან ევროსასამართლოს მიმართა. – „მთავრობისთვის კომუნიკაცია ნიშნავს, რომ სასამართლო აყენებს კითხვებს ან იღებს პასუხებს იმ კონკრეტულ საკითხებზე, რომლებიც იმპიჩმენტის მოწყობის საქმეს ეხება. ეს ეტაპი ხშირად გულისხმობს სახელმწიფოსგან ოფიციალურ პოზიციას და განმარტებებს კონკრეტული უფლებრივი დარღვევების შესახებ.
მთავრობის კომუნიკაციის შემდეგ სასამართლო მხარეთა პოზიციების შესწავლას დაასრულებს და მიღებს გადაწყვეტილებას, ჰქონდა თუ არა ადგილი ადამიანის უფლებების დარღვევას უკანონო იმპიჩმენტის ჩატარებით.
მე, როგორც სსიპ საზოგადოებრივი მაუწყებლის აჭარის ტელევიზიის და რადიოს ყოფილი დირექტორი, ვითხოვ უსამართლობის დადასტურებას – კონვენციის მეათე მუხლის დარღვევის გამო. ჩემი კომპენსაციის ნომინალური თანხა 41 ევროა, მმართველი პარტიის საარჩევნო ნომრის მიხედვით, რადგან ზუსტად „ქართული ოცნების“ პოლიტიკური დევნის და დაშინების სამიზნე აღმოვჩნდი. მჯერა, მიუკერძოებელი და დამოუკიდებელი საზოგადოებრივი არხების პირობებში, მოძალადე მთავრობა ვერ გვეყოლება.
ადამიანის უფლებათა ევროპულ სასამართლოში საკუთარ თავს წარმოვადგენ. ვცდილობ, ამ ფორმითაც გავაგრძელო ბრძოლა უკეთესი სახელმწიფოს ასაშენებლად,“ – ამბობს ნათია კაპანაძე.
——
საზოგადოებრივი მაუწყებლის აჭარის ტელევიზიის და რადიოს დირექტორს, ნათია კაპანაძეს იმპიჩმენტი 2019 წელს მოუწყვეს. საქართველოს საერთო სასამართლოებმა საქართველოში ნათია კაპანაძის სარჩელი არ დააკმაყოფილეს. ნათია კაპანაძის იმპიჩმენტის პროცედურის წამოწყებას წინ უსწრებდა არაერთი საერთაშორისო ორგანიზაციის, უცხო ქვეყნის საელჩოს, ეუთოს სპეცწარმომადგენლების შეშფოთება სარედაქციო პოლიტიკაში გარე ძალების ჩარევაზე, მაგრამ ამას მაშინდელი მრჩევლებისთვის არ შეუშლია ხელი დირექტორის იმპიჩმენტის პროცედურა ბოლომდე მიეყვანათ.
ნათია კაპანაძის იმპიჩმენტის შემდეგ ტელევიზიიდან რამდენიმე ჟურნალისტი გაათავისუფლეს, ნაწილი კი, სარედაქციო პოლიტიკას ჩამოაშორეს და სხვა სამსახურში გადაიყვანეს. 4-წლიანი სასამართლო დავის შემდეგ აჭარის ტელევიზიიდან უკანონო გათავისუფლება სასამართლომ დაადასტურა, მაგალითად, თეონა ბაკურიძის შემთხვევაში. ის აჭარის ტელევიზიის მთავარი საინფორმაციო გამოშვების წამყვანად მუშაობდა და ხელისუფლების კრიტიკის გამო სამსახურიდან გაუშვეს.
ამ თემაზე:
