Batumelebi

ბინოკლების მოტყუებული მომხმარებლები „პიერ ბათუმის“ ხიდზე

ბინოკლები „პიერ ბათუმის“ ხიდზე არ მუშაობს. მომხმარებლებს ამის შესახებ ინფორაციას კომპანია არ აწვდის. ბინოკლებზე მხოლოდ ისაა აღნიშნული, რომ ერთი ლარი უნდა ჩააგდო, თუ ბინოკლით სარგებლობა გსურთ. დაინტერესებული ტურისტები ბინოკლებში ხურდებს ყრიან, თუმცა არაფერი ჩანს.

„ოთხი ბინოკლიდან ერთი მუშაობს, დანარჩენი – არა“ – გვითხრეს „პიერ ბათუმის“ ადმინისტრაციაში. აქ განმრტავენ, რომ ბინოკლები იმ კომპანიამ უნდა აღადგინოს, ვინც დაამონტაჟა. „ჩვენ არაერთხელ მივმართეთ თხოვნით, რომ ჩამოსულიყვნენ და გაკეთებიათ, მაგრამ დღემდე ველოდებით. ჩვენზე არაა დამოკიდებული, თორემ სიამოვნებით აღვადგენდით. ბინოკლებთან გაკრულია ლენტი და აღნიშნულია, რომ არ მუშაობს“ – გვითხრა „პიერ ბათუმის“ დაცვის სამსახურის უფროსმა, რამაზ ცეცხლაძემ.

სად არის ლენტი, სადაც აღნიშნულია, რომ ბინოკლი არ მუშაობს? – „ბათუმელებს“ კითხვაზე რამაზ ცეცხლაძემ ასე უპასუხა: „ალბათ, ბავშვებმა ჩამოხიეს, ამჟამად არ ვარ ადგილზე, რომ შევამოწმო“.

შეხვედრა ბათუმის უნივერსიტეტში რუსული დროშით და წაშლილი ფოტოები ოფიციალური ფეისბუქ გვერდიდან

ამ ფოტოს ბათუმის სახელმწიფო უნივერსიტეტის ფეისბუქ გვერდზე ვეღარ ნახავთ. უნივერსიტეტში გამართული მემორანდუმის გაფორმების ამსახველი ფოტოები მას შემდეგ წაიშალა, როცა „ბათუმელები“ უნივერსიტეტის რექტორის მოვალეობის შემსრულებელს, მერაბ ხალვაშს დაუკავშირდა და კითხა, რატომ იყო გამოფენილი რუსეთის დროშა უნივერისტეტში გამართულ შეხვედრაზე და რატომ დასჭირდა ბათუმის უნივერსიტეტს სტაჟირებისთვის მემორანდუმის გაფორმება რუსეთის სახელმწიფო უნივერსიტეტთან.

„არ მაქვს ამ მემორანდუმის შესახებ ინფორმაცია. ახლა მოვედი უნივერსიტეტში, მოგვიანებით შემეხმიანეთ“, – გვიპასუხა მერაბ ხალვაშმა ტელეფონზე. მოგვიანებით მან ჩვენს სატელეფონო ზარს აღარ უპასუხა, თუმცა მის ნაცვლად პრორექტორი, პროფესორი ინგა შამილიშვილი დაგვიკავშირდა. მისი თქმით, მემორანდუმი, რომელსაც ხელი უკვე მოაწერა, არ ითვალისწინებს არც სტაჟირებას რუსეთში და არც სტუდენტთა მობილობას: „წლებია ვთანამშრომლობთ ნორვეგიის ტელემარკის უნივერსიტეტთან, იქ ეწყობა საზაფხულო სკოლები, სადაც ჩვენი სტუდენტები გადიან პრაქტიკასა და სტაჟირებას. ამ უნიევრსიტეტის წარმომადგენელია თემურ აბესაძე, რომლის ინიციატივითაც იწყება ეს თანამშრომლობა რუსეთის უნივერსიტეტთან. მემორანდუმის გაფორმება სამომავლო ერთობრლივი პროექტებისთვის იყო ჩვენი ტურიზმის ფაკულტეტის ინიციატივაც, მაგრამ ეს არ ნიშნავს და მემორანდუმშიც არსად წერია, რომ ბათუმელი სტუდენტები სტაჟირებას რუსეთში გაივლიან, რაზეც რატომღაც გაკეთდა აქცენტი“.

უნივერსიტეტის პრორექტორმა ვერ გვიპასუხა, რას ნიშნავს ტურიზმის ფაკულტეტის დეკანის, როსტომ ბერიძის მიერ „ბათუმელებისთვის“ მიცემული კომენტარი, სადაც ის ამბობს, რომ ბათუმელი სტუდენტები გაივლიან სტაჟირებას რუსეთში, ადგილობრივ ტურისტულ სააგენტოებში იმუშავებენ, მათი რუსული ენის ცოდნა გაღრმავდება და ამით რეგიონში ტურისტების რაოდენობაც გაიზრდება.

პრორექტორის კომენტარი საპირისპიროა არა მხოლოდ საკუთარი ფაკულტეტის დეკანის ნათქვამთან. მემორანდუმის გაფორმების შემდეგ რუსეთის ტურიზმისა და სერვისების სახელმწიფო უნივერსიტეტის დეკანმა, ელენა სახარჩუკმა „აჭარის ტელევიზიისთვის“ მიცემულ ინტერვიუში თქვა: „ჩვენ ამ პროცესს დავიწყებთ გაცვლითი პროგრამებით, ბათუმელი სტუდენტები ჩამოვლენ სემესტრულ კურსებზე ჩვენთან, ჩვენი სტუდენტები კი ეწვევიან ბათუმს, როგორც სტაჟირებისთვის, ასევე სადიპლომო ნამუშევრებისთვის. ეს კიდევ ერთხელ შეუწყობს ხელს ორი ერის დაახლოებას“.

უნივერსიტეტის ადმინისტრაციამ “ურთიერთგაგების მემორანდუმის” ელექტრონული ვერსია მოგვაწოდა, სადაც აღნიშნულია, რომ დოკუმენტი ორ უნივერსიტეტს შორის სამომავლო თანამშრომლობის საფუძველია, ხოლო კონკრეტულ პროექტებსა და პროგრამებს შეიმუშავებს ორივე მხარე.

პრორექტორ ინგა შამილიშვილთან სატელეფონო საუბრის დროს, ვერ მივიღეთ პასუხი, რატომ გამორიცხავს ბათუმელი სტუდენტების სტაჟირებას რუსეთში, მხოლოდ იმიტომ, რომ ეს მემორანდუმში არ წერია. ვინ დააფინანსებს რუსეთისა და ბათუმის სახელმწიფო უნივერსიტეტების ერთობლივ პროექტებს? – ეს კითხვაც უპასუხოდ დარჩა.

მემორანდუმის ამსახველი ფოტოები ბათუმის სახელმწიფო უნივერსიტეტმა თავდაპირველად ოფიციალურ ფეისბუქ გვერდზე გამოაქვეყნა. ამ ფოტოებზე ჩანს რუსეთის დროშა საქართველოს დროშის გვერდით. ფოტოების წაშლის შემდეგ, უნივერსიტეტმა ოფიციალურ ინტერნეტ გვერდზე განათავსა მემორანდუმის გაფორმების ფოტოები – უკვე რუსეთის დროშის გარეშე.

ინგა შამილიშვილი, უნივერსიტეტის პრორექტორი: „ეს არის ჩვეულებრივი დიპლომატიური ეტიკეტი, კულტურის გამოვლენა და გარკვეული პატივისცემის გამოხატულება დელეგაციის მიმართ. მათ აჭარის ტურიზმის დეპარტამენტთანაც ჰქონდათ შეხვედრა და ძალიან დიდი გეგმები დასახეს შემდგომი ტურისტული ურთიერთობებისთვის“.

ბსუ-ს ტურიზმის ფაკულტეტის დეკანმა, როსტომ ბერიძემ „ბათუმელების“ სატელეფონო ზარებს, ჩვენი პრორექტორთან გასაუბრების შემდეგ, აღარ უპასუხა.

ორი ერის დაახლოება — უნივერსიტეტმა შეხვედრის ამსახველი ფოტოები, სადაც რუსეთის დროშა ჩანდა, ფეისბუქგვერდიდან წაშალა

universiteti 4 — რუსეთის ტურიზმის სახელმწიფო უნივერსიტეტის დეკანი ელენა სახარჩუკი და ბსუ-ს პრორექტორი, ინგა შამილიშვილი

მემორანდუმი:

გერმანია-საქართველოს ურთიერთობა და სავიზო ლიბერალიზაციის პროცესი

საქართველოსა და გერმანიას შორის დიპლომატიურ ურთიერთობებსა და ვიზალიბერალიზაციის პროცესში გერმანიის მხრიდან გამოჩენილ სიფრთხილის მიზეზებზე „ბათუმელები“ გერმანიაში მცხოვრებ ლიტერატურათმცოდნეს, ზაალ ანდრონიკაშვილს ესაუბრა.

ქართულ საზოგადოებაში რჩება ეჭვი, რომ გერმანია, ოფიციალურად გაცხადებული მხარდაჭერის მიუხედავად, საქართველოსთვის ვიზა-ლიბერალიზაციის პროცესს ძალიან დიდი სიფრთხილით ეკიდება. ამას მოწმობს, გერმანიის შინაგან საქმეთა მინისტრის განცხადება, რომელმაც ევროპარლამენტში აღნიშნა, რომ საჭიროა გადახედონ ვიზალიბერალიზაციის „სწრაფი შეჩერების მექანიზმს“. თქვენი აზრით, რას უკავშირდება ეს სიფრთხილე?

სავიზო რეჟიმის ლიბერალიზაცია პირდაპირ არ უკავშირდება საქართველოს არც შიდა და არც საგარეო პოლიტიკას. საქართველოს მთავრობას, რა თქმა უნდა, შეუძლია გადადგას გარკვეული ნაბიჯები და თავისი მაქსიმუმი გააკეთოს (რასაც ჩემი აზრით, აკეთებს კიდევაც) იმისათვის, რომ სავიზო ლიბერალიზაციის პროცესი სწრაფად დასრულდეს, მაგრამ მისი შესაძლებლობები მაინც შეზღუდულია, რადგან ეს ერთი მხრივ, გერმანიის შიდა პოლიტიკის და მეორე მხრივ – ევროპული პოლიტიკის საკითხი გახლავთ.

სავიზო ლიბერალიზაციის შესახებ გადაწყვეტილება, პრინციპში, უკვე მიღებულია, საქართველოს შესრულებული აქვს ყველა წინაპირობა. მაგრამ ზოგიერთი მთავრობა, მათ შორის გერმანიის მთავრობა, ამ პროცესს უკავშირებს არსებულ გამოცდილებას. მაგალითად, კანცლერმა მერკელმა პრემიერ-მინისტრ კვირიკაშვილთან ერთად გამართულ პრესკონფერენციაზე ახსენა სერბეთის მაგალითი. როდესაც ევროკავშირსა და სერბეთს შორის სავიზო რეზიმი გაუქმდა, მკვეთრად გაიზარდა პოლიტიკური თავშესაფრის მთხოვნელთა რაოდენობა სერბეთიდან. იგივესი ეშინიათ არა იმდენად საქართველოსთან შემთხვევაში, არამედ საქართველოსთან ერთად სავიზო ლიბერალიზაციის პროცესში ჩართული სხვა ქვეყნების, უკრაინისა და თურქეთის შემთხვევაში. როგორც მოგეხსენებათ, ამ ქვეყნების მოსახლეობა საქართველოს მოსახლეობას ბევრად აღემატება და ჩემი აზრით, სწორედ ეს ქვეყნები გახლავთ მთავარი მიზეზი იმისა, რომ საქართველოსაც უჭიანურდება სავიზო ლიბერალიზაციის პროცესის დასრულება.

სწორედ იმისათვის, რომ დაიძლიოს ეს წინააღმდეგობა, გერმანიის მთავრობამ, მათ შორის გერმანიის შინაგან საქმეთა მინისტრმა დაიწყო ლაპარაკი სავიზო ლიბერალიზაციის შეჩერების მექანიზმზე. ეს ნიშნავს, რომ თუკი ქართველები, თურქები და უკრაინელები ევროპაში უვიზოდ წასვლას შეძლებენ და ამ პროცესს მოჰყვება პოლიტიკურ თავშეფრის მთხოვნელთა მკვეთრი ზრდა, გერმანიაში ან ევროპის სხვა ქვეყნებში, მაშინ ამოქმედდება უვიზო მიმოსვლის შეჩერების მექანიზმი იქამდე, სანამ მდგომარეობა არ გამოსწორდება. ამით, გერმანიას და ევროპის სხვა ქვეყნებს, პირველ რიგში, უნდათ თავი დაიზღვიონ ისედაც ძალიან რთული ვითარების გამწვავებისაგან, რომელიც შექმნა სირიაში ომის შედეგად ლტოლვილების უზარმაზარმა ნაკადმა.

ჩემი აზრით, საქართველოში მცდარად უკავშირებენ ამ პროცესებს საქართველოს შიდა პოლიტიკას და ამბობენ, რომ ჩვენ მიერ გადადგმული ნაბიჯები შეიძლება აფერხებდეს ან არ აფერხებდეს სავიზო ლიბერალიზაციას. მიუხედავად ამისა, არსებობს სავიზო ლიბერალიზაციის შიდაპოლიტიკური მხარეები. რა თქმა უნდა, საქართველოს მთავრობას, გარდა იმისა, რომ აქვს სურვილი საქართველოს მოქალაქეებმა სწრაფად შეძლონ უვიზოდ ჩასვლა ევროპაში, აქვს იმის სურვილიც, რომ ეს გადაწყვეტილება არჩევნებამდე იქნეს მიღებული, რადგან წინასაარჩევნოდ ეს დიდ წარმატებად ჩაითვლება.

გერმანულმა პრესამ სავიზო ლიბერალიზაციის პროცესის შეფერხება დაუკავშირა გერმანიაში ქართული კრიმინალური დაჯგუფებების საქმიანობას. მართლაც, საქართველოდან ჩამოსული ბევრი კრიმინალია გერმანიაში, ძირითადად ესენი არიან მაღაზიისა და ბინის ქურდები. ეს არის ხალხი, რომელიც ჩამოდის თითქოს პოლიტიკური თავშესაფრის მისაღებად. პოლიტიკურ თავშესაფარს ისინი, რა თქმა უნდა, ვერ იღებენ, რადგან ქართველებისთვის პოლიტიკურ თავშესაფარზე უარის კვოტა გერმანიაში არის პრაქტიკულად ასპროცენტიანი, მაგრამ ეს არის ცხრათვიანი განხილვის პროცესი და ეს ხალხი თავისუფლად მოძრაობს და ჩადის დანაშაულს. ჩვენ ამ ხალხს უნდა „ვუმადლოდეთ“ იმას, რომ საბაბად მაინც შეიძლება იქნას გამოყენებული ქართული კრიმინალი სავიზო ლიბერალიზაციის პროცესზე ლაპარაკისას.

მსგავსი შინაარსის რამდენიმე სტატია ერთდროულად გამოქვეყნდა სხვადასხვა გერმანულ გამოცემაში. იბეჭდება თუ არა ასეთი სტატიები ახლაც?

კი, იბეჭდება. „ფრანკფურტერ ალგემაინე ცაიტუნგში”, ერთ-ერთ ყველაზე მნიშვნელოვან გერმანულ გაზეთში გუშინაც იყო ლაპარაკი იმაზე, რომ საქართველოსთვის სავიზო ლიბერალიზაცია მიზანშეწონილი არ არის სწორედ კრიმინალური ბანდების მოქმედების გამო. ასეთი სტატიები წელიწადზე მეტია პერიოდულად ქვეყნდება, ხანდახან შეიძლება ამ სტატიების თავმოყრას რაღაც კამპანიის ფორმაც ჰქონდეს. რატომ ხდება ეს, ცოტა ძნელი გასარკვევია. პრინციპში, რომ შევხედოთ დანაშაულის მაკროსტატისტიკას, რომელიც აქვს გერმანიის შესაბამის ორგანოებს, დავინახავთ, რომ ქართველები კრიმინალის თვალსაზრისით პირველ ადგილზე არ არიან. ეს ჩვენთვის სანუგეშო სულაც არაა, იმიტომ რომ ქართველი კრიმინალები გერმანიაში მაინც ჩადიან დანაშაულს, მაგრამ რატომ ხდება მაინცდამაინც ქართველებზე ყურადღების ასეთი გამახვილება, ეს არის საინტერესო და ამაში ბევრი დამკვირვებელი, შეიძლება არც თუ უსაფუძვლოდ, ხედავს რუსეთის ხელს.

დიდად გასაკვირი ეს არ არის, რადგან რუსეთი ძალიან აქტიურად არის ჩართული გერმანული პრესის მანიპულირებაში და მას აქვს შესაბამისი რესურსი, უნარი და ცოდნა. კრიმინალის საკითხი სავიზო ლიბერალიზაციის საკითხში გადამწყვეტი არ არის, მაგრამ ძალიან უსიამოვნოა და საქართველოს დადებით იმიჯს ჩრდილს აყენებს, ზოგადად დადებითი ტენდენციის ფონზე. მომავალი წელი იქნება ქართულ-გერმანული მეგობრობის წელი, 2018 წელს კი ფრანკფურტის წიგნის ბაზრობაზე საქართველო იქნება მასპინძელი ქვეყანა. ამ შემთხვევაში საქართველოს, როგორც სახელმწიფოს მოვალეობაა შეუწყოს ხელი გერმანიის მთავრობას გერმანიის ტერიტორიაზე ქართული წარმოშობის კრიმინალთან ბრძოლაში. ეს არის ის მაქსიმუმი, რისი გაკეთებაც შეუძლია ამ შემთხვევაში საქართველოს.

თქვენი აზრით, ქართულ-გერმანული მეგობრობის წლად გამოცხადებული 2017 წელი, როგორ უნდა გამოიყენოს საქართველოს მთავრობამ გერმანიასთან ურთიერთობის გასაღრმავებლად? ეს არის ფორმალური ჟესტი, რომელიც გარკვეულ ღონისძიებათა ერთობლიობას მოიცავს, თუ შესაძლებელია ამან რაღაც შეცვალოს უკეთესობისკენ? ზოგიერთი ქართველი პოლიტოლოგი საუბრობს იმაზე, რომ დიპლომატიური ურთიერთობების კიდევ უფრო გაღრმავებაა საჭირო საქართველოსა და გერმანიას შორის.

დიპლომატიური ურთიერთობები საქართველოსა და გერმანიას შორის ამ წუთას არის ალბათ ერთ-ერთ ყველაზე უფრო მაღალ დონეზე ამ ურთიერთობების ისტორიაში, იგივე ვიზიტების დინამიკით თუ ვიმსჯელებთ. წელს საქართველოს პარლამენტის თავმჯდომარე იყო ჩამოსული, პრემიერ-მინისტრი, ახლა პრეზიდენტი ჩამოდის. გერმანიის საგარეო საქმეთა მინისტრი ჩამოდის საქართველოში ივლისის დასაწყისში და დიდი ხანია ლაპარაკია იმაზე, რომ კანცლერიც უნდა ჩამოვიდეს, მაგრამ ეს ვიზიტი რამდენჯერმე გადაიდო. ამ თვალსაზრისით ჩვენ პრობლემები გერმანიასთან არ გვაქვს. 2017 წელი არის ქართულ-გერმანული მეგობრობის წელიწადი, რომელიც აღნიშნავს გერმანელი მოსახლეების საქართველოში ჩამოსვლის 200 წლისთავს და გერმანია-საქართველოს შორის დიპლომატიური ურთიერთობების აღდგენის 25 წლისთავს. 2017-2018 წელი ძალიან მნიშვნელოვანია იმისათვის, რომ საქართველო გაიცნოს რაც შეიძლება მეტმა გერმანელმა, რომ საქართველოს მიმართ დამოკიდებულება შეიცვალოს და საქართველოს არ ჰქონდეს, მაგალითად, მხოლოდ პოსტ-საბჭოთა რესპუბლიკის სახელი და გერმანიის მოქალაქეს საქართველოს შესახებ არ ესმოდეს მხოლოდ მაშინ, როცა აქ კონფლიქტი და ცუდი რამ ხდება, არამედ საქართველოს შესახებ გაიგოს, რომ ეს არის წარმატებული ქვეყანა, რომელსაც აქვს ძალიან დინამიკური, კარგი თანამედროვე კულტურა, არა მხოლოდ შუა საუკუნეების – არამედ თანამედროვე, ცოცხალი კულტურა და ის მზად არის თავისი, თუნდაც კულტურული წვლილი შემოიტანოს ევროპაში.

რა თქმა უნდა, ყოველთვის კარგია, რომ კეთდებოდეს უფრო მეტი, მაგრამ ამ შემთხვევაში ჩვენ გაგვიჭირდება იმის თქმა, რომ ცოტა კეთდება. არის გარკვეული ბარიერები, რომელსაც დიპლომატია ვერ გადაახტება, ერთ-ერთი ასეთი ბარიერი არის გერმანიის პოზიცია საქართველოს ნატოში გაწევრიანებასთან დაკავშირებით. ამაზე მუშაობა უნდა გრძელდებოდეს ყოველ წუთას, იმისგან დამოუკიდებლად, თუ რა კონკრეტული შედეგი შეიძლება მივიღოთ ჩვენ დღეს, ხვალ ან ზეგ. ეს არის ჩვენი გრძელვადიანი, სტრატეგიული მიზანი და ამ მიზანზე უნდა ვმუშაობდეთ იმ წუთამდე, ვიდრე გაიხსნება შესაძლებლობების ფანჯარა. იმისათვის, რომ ეს ფანჯარა გაიხსნას და ჩვენ მისი გამოყენება შევძლოთ, წინასწარ უნდა კეთდებოდეს ძალიან ბევრი რამ. უზარმაზარი შრომა სჭირდება ამას და მე არ მრჩება შთაბეჭდილება, რომ ამ სფეროში ჩვენ ვპასიურობთ.

რამდენდაც ცნობილია, გერმანიაში არ არის პოპულარული ანტირუსული განწყობები და შესაძლოა ეს საქართველოსთან ურთიერთობის გაღრმავებას ამუხრუჭებდეს. თქვენი აზრით, ეს მოსაზრება სწორია?

ეს ბევრად კომპლექსური საკითხია. გერმანიის საგარეო პოლიტიკას დიდი ხანი საფუძვლად ედო და დღესაც უდევს ე.წ. „აღმოსავლეთის პოლიტიკა“, რომელიც თავის დროზე კანცლერი ვილი ბრანტის მიერ არის შექმნილი და გულისხმობს მაშინდელ საბჭოთა კავშირთან დაახლოებას, მათ შორის ეკონომიკური ურთიერთობების გზით. ამ ხაზის გამგრძელებელი იყო სოციალ-დემოკრატიული პარტია და კონკრეტულად კანცლერი შროდერი, რომელიც ახლა გახლავთ „გაზპრომის“ შვილობილი ფირმის სამეთვალყურეო საბჭოს წევრია. შროდერის ე.წ. დოქტრინის მთავარი პრობლემა მდგომარეობს იმაში, რომ ის პირდაპირ ანაცვლებს ბრანტისეულ საბჭოთა კავშირს დღევადელი რუსეთით. ახლა იგივე სოციალ-დემოკრატიული პარტიის შიგნით და სხვა პარტიებშიც (განსაკუთრებით ქრიტიან-დემოკრატიული და მწვანეთა პარტიის შიგნით) მომწიფდა აზრი, რომ აღმოსავლეთის პოლიტიკა არის რადიკალურად გადასახედი და ამ პოლიტიკის ცენტრში აღარ უნდა მოვაქციოთ რუსეთი და გაცილებით მეტი ყურადღება მივაქციოთს საქართველოს, უკრაინას, დამოლდოვას. ეს აზრი გაჩნდა წელიწადზე მეტია და ნელ-ნელა იკრეფს ძალას, მიუხედავად იმისა, რომ ძველი, შროდერის დოქტრინა, მაინც ძლიერია.

ზოგადად, ჩვენ შეგვიძლია ვთქვათ, რომ გერმანიის მოქალაქე მხარს უჭერს მშვიდობას და არ უჭერს მხარს სიტუაციის გამწვავებას, ამიტომ ეს დამოკიდებულებაც განსაზღვრავს გერმანიის მთავრობის დამოკიდებულებას, იგივე საქართველოსთან დაკავშირებით, უკრაინის კონფლიქტთან დაკავშირებით. ყირიმის ანექსიამ შეცვალა დამოკიდებულება აღმოსავლეთის პოლიტიკის მიმართ და შეცვალა 2008 წლის რუსეთ-საქართველოს ომის აღქმაც. თუ ადრე გერმანიამ, არა მარტო პოლიტიკურმა ისტებლიშმენტმა, არამედ მოქალაქეებმაც გადაწყვიტეს, რომ დამნაშავე იყო საქართველო. ყირიმის ანექსიამ რუსეთი გამოაჩინა აგრესიულ, ნეოიმპერიალისტური მისწრაფების სახელმწიფოდ. ამან თავისთავად გააჩინა ახალი პოლიტიკური მიდგომების შემუშავების აუცილებლობა. ვფიქრობ, ქართული დიპლომატიის და არა მხოლოდ მაღალი რანგის დიპლომატიის, ამოცანა უნდა იყოს აი, ამ პოლიტიკურ წრეებთან ძალიან აქტიური მუშაობა იმისთვის, რომ ეს პოზიცია, რომელიც ამბობს, რომ ახალი აღმოსავლეთის პოლიტიკა უნდა იყოს კონცენტრირებული საქართველოზე, რუსეთზე, მოლდოვაზე და არა მარტო რუსეთზე, განმტკიცდეს გერმანიაში, ეს ჩვენთვის ერთმნიშვნელოვნად სასიკეთო იქნება.

არის ამ აზრის პოპულარობის გაზრდის ნიშნები?

ეს აზრი რომ გაჩნდა, უკვე კარგია და ძალას იკრებს. ხალხი, რომელიც ამ პოზიციას იცავს, მეტია და თუნდაც პრესაში პუბლიკაციებს რომ გადახედოთ, ეს საკმაოდ გავლენიანი ხალხია, ესენი არიან არა პოლიტიკური მარგინალები, არამედ გავლენიანი პოლიტიკოსები და მეცნიერები და რაც სასიხარულოა, ეს გახლავთ შედარებით ახალგაზრდა თაობა, რომელიც 5-10 წელიწადში შეცვლის ახლანდელ პოლიტიკურ მოღვაწეებს. ასე რომ, ამ მხრივ ოპტიმიზმის საფუძველი გვაქვს, მაგრამ, რა თქმა უნდა, მარტო ოპტიმიზმით ფონს ვერ გავალთ, ამაში უნდა ჩავერთოთ და მაქსიმალურად დავუჭიროთ მათ მხარი.

ფოტო „ილიაუნის“ ფეისბუქგვერდიდან

რას ასწავლის იუსტიციის სასწავლო ცენტრი სოფლად მცხოვრებ მოსახლეობას

როგორ უნდა დავიცვათ საკუთრების უფლება? რა არის დისკრიმინაცია? როგორ დავწეროთ პროექტი? – ამ და სხვა საკითხებზე საქართველოს 33 სოფელში დაინტერესებულ პირებს საქართველოს იუსტიციის სასწავლო ცენტრი 1 ივლისიდან 30 სექტემბრამდე უფასო ტრენინგებს ჩაუტარებს.

ტრენინგები სოფლად მცხოვრები იმ პირებისტვისაა განკუთვნილი, რომელთაც სურთ მეტი იცოდნენ საკუთარ უფლებებსა და მოვალეობებზე. სამართლებრივი და პიროვნული განვითარების ტრენინგები სოფლების საზოგადოებრივ ცენტრებში ჩატარდება. აჭარაში ტრენინგები მუხაესტატეში, ხიდისთავსა და დაბა ჩაქვში გაიმართება, აქ არსებულ საზოგადოებრივ ცენტრებში.

„პროექტის მიზანია ადგილობრივ მოსახლეობას ყოველგვარი დანახარჯების გარეშე შევუქმნათ თვითრეალიზებისათვის საჭირო გარემო და სამოქალაქო გაძლიერებას შევუწყოთ ხელი“ – ამბობს თინათინ ცინარიძე, პროექტის მენეჯერი.

მისივე თქმით, თემები შერჩეულია სოფლად მცხოვრები მოსახლეობის ინტერესების და საჭიროებების გათვალისწინებით და ორიენტირებულია პრაქტიკული უნარების გამომუშავებაზე, რათა სოფლის მკვიდრებმა უკეთ ისარგებლონ საკუთარი უფლებებით და სახელმწიფო სერვისებით, აქტიურად მიიღონ მონაწილეობა სახელმწიფოებრივ და საზოგადოებრივ პროცესებში.

ტრენინგების პირველი ეტაპი პირველ ივლისს იწყება, თუმცა მსურველებს ტრენინგებზე რეგისტრაცია პროექტის მიმდინარეობის დროსაც შეეძლებათ. პროექტში მონაწილეობა შეუძლია 18-65 წლის ასაკის ნებისმიერ დაინტერესებულ პირს, რომელსაც აქვს სურვილი მიიღოს ინფორმაცია საკუთარი სამოქალაქო უფლებებისა და ვალდებულებების შესახებ. ტრენინგის ხანგრძლივობა სამი საათია.

ტრენინგების თემებია: სამართალი და ადამიანის უფლებები, კონსტიტუციურ ორგანოთა სისტემა და ადგილობრივი თვითმმართველობა, საკუთრების უფლება, სამეწარმეო და საგადასახადო სამართლის საბაზისო ცნებები, რა არის ევროკავშირი, რა არის დისკრიმინაცია, ეფექტიანი კომუნიკაცია, კონფლიქტის მართვა, დროის მართვა, პროექტის მართვა და პროექტის წერა.

თინათინ ცინარიძის თქმით, იურიდიული მიმართულების ტრენერები იუსტიციის სასწავლო ცენტრის კვალიფიციური დარგის სპეციალისტები არიან, ხოლო სოციალური მიმართულებით ტრენერების შერჩევა მოხდა ღია კონკურსის წესით კვალიფიკაციის შესაბამისად. ასევე, სოციალური მიმართულებით ტრენინგებში ჩართული იქნებიან იუსტიციის სასწავლო ცენტრის სოციალური მიმართულების ტრენერები.

სწავლებაში მონაწილეობის მსურველებმა საჭიროა გაიარონ რეგისტრაცია სოფლებში არსებულ საზოგადოებრივ ცენტრებში ან ვებგვერდზე tcj.gov.ge. ტრენინგების ბოლოს გაიცემა შესაბამისი სერტიფიკატები.

ფოტო: იუსტიციის სასწავლო ცენტრის პრესსამსახური

სტიქია შუახევსა და ქედაში – კომისია ზარალს ითვლის

შუახევისა და ქედის მუნიციპალიტეტებში განვითარებულ სტიქიის შედეგებს დღეს დილიდან აჭარის მთავრობის თავმჯდომარე არჩილ ხაბაძე გაეცნო. მთავრობის პრესსამსახურის ინფორმაციით, მთავრობის თავმჯდომარესთან ერთად ადგილზე იმყოფებოდნენ აჭარის ჯანმრთელობისა და სოციალური დაცვის მინისტრი ნუგზარ სურმანიძე და გარემოსა და ბუნებრივი რერსურსების მართვის დეპარტამენტის ხელმძღვანელი ვახტანგ წულაძე.

მთავრობის ინფორმაციით: „28 ივნისს, საღამოს საათებში (18 საათიდან 21 საათამდე) შუახევის მუნიციპალიტეტის მთელ ტერიტორიაზე მოვიდა ძლიერი წვიმა, რის შედეგადაც მეწყერი ჩამოწვა ღომას მთის ხეობაში. შედეგად გამოიწვია წყალმოვარდნები და მდინარის კაპალოტის გასწვრივ რამდენიმე ადგილას მცირე ზომის მეწყრული მოვლენების განვითარება. სტიქია განსაკუთრებით ძლიერი იყო უჩამბის ადმინისტრაციულ ერთეულში, რიგ ადგილებში განვითარდა ღვარცოფები, დაიტბორა სასოფლო-სამეურნეო ნაკვეთები. მოვარდნილმა მდინარემ უჩამბის ადმინისტრაციულ ერთეულში წაიღო ქვაფთის ხიდი და ცენტრალურ გზას მოწყვიტა ოთხი სოფელი: წაბლანა, სამოლეთი, მოფრინეთი, ლაკლაკეთი. წყალმა წაიღო აგრეთვე სოფელ კვირიაულში გომიკრის, ოხორთისა და წისქვილიღელის რკინის ხიდები. სოფელ კვირიაულში დაიტბორა უჩამბისწყლის სანაპიროზე მდებარე 10 ოჯახის საკარმიდამო. მეწყერი ჩამოწვა რამდენიმე მოსახლის ეზოებშიც. სტიქიამ სერიოზულად დააზიანა ადგილობრივი მნიშვნელობის გზები, გადარეცხა სავალი ნაწილი, ჩასილა წყალგამტარი არხები. განვითარდა ქვათაცვენა და გზებზე გრუნტის ჩამოშლა.

ძლიერი წვიმისა და სეტყვის შედეგად უჩამბის, ჭვანის, ბარათაულის, დღვანის ადმინისტრაციულ ერთეულებში დაზარალდა მოსახლეობა. ამ დროისათვის უკვე აღდგენილია მიმოსვლა ყველა სოფელთან. დაიწყო სტიქიის შედეგად მიყენებული ზარალის დათვლისა და სალიკვიდაციო ღონისძიებები.

„ქედაში სიტუაცია სტაბილურია, თუმცა ზარალი დიდია. ადგილზე უკვე მუშაობენ გეოლოგები და სხვა შესაბამისი სამსახურები. დაწყებულია სტიქიის შედეგად მიყენებული ზარალის დათვლა. საბოლოო მონაცემები რამდენიმე დღეში გვექნება და მივიღებთ შესაბამის გადაწყვეტილებას ანაზღაურებისა და კომოპენსაციის შესახებ. “ _ განაცხადა არჩილ ხაბაძემ.

ქედაში გუშინ განვითარებული სტიქიის შედეგად ადიდებულმა მდინარე აკავრეთამ სოფელ ოქტომბერში რესტორან ,,დავითის” ინფრასტრუქტურა წაიღო და ზიანი მიაყენა საკალმახე მეურნეობას. მთლიანად დანგრეულია დამაკავშირებელი ხიდი. სამაშველო ჯგუფების მიერ ოპერატიულად იქნა უსაფრთხო ადგილას გამოყვანილი მიმდებარე ტერიტორიაზე დარჩენილი ადამიანები. მდინარემ წაიღო შევაბურისა და ჭალათის მთასთან დამაკავშირებელი 4 ხიდი, ბურჯი გამოაცალა ქედა-მერისის დამაკავშირებელ ხიდსაც. სამაშველო ჯგუფი გვიან ღამემდე მუშაობდა მერისში. სოფელ გუნდაურში მდინარემ წყლის წისქვილი წაიღო. დაზიანებულია მერისი-გუნდაურის საავტომობილო გზა . მოძრაობა მხოლოდ მსუბუქი ავტომობილებითაა შესაძლებელი. დაზიანებულია ასევე ელექტროგადამცემი ბოძები სოფელ სიხალიძეებში და წაღებულია სავარგულები მდინარე აკავრეთას მიმდებარედ . სოფელ ნამონასტრევში წაღებულია 1 საცალფეხო და 1 საავტომობილო ხიდი. დაბა ქედაში დაზიანდა ორცვის სასმელი წყლის წყალსადენი. ორივე მდინარის წყლის დონის დაწევის შემდეგ, საფრთხეს აღარ წარმოადგენს ევაკუირებული ოჯახებისთვის. ისინი დილით საკუთარ სახლებს დაუბრუნდნენ. მუდმივმოქმედმა კომისიამ ზარალის დათვლა უკვე დაიწყო. ადგილზე უკვე მუშაობენ გეოლოგები“.

სტიქია აჭარაში / ფოტო: აჭარის მთავრობის პრესსამსახური

ამავე თემაზე:

ქედისა და შუახევის გამგებელები – მუნიციპალიტეტებში ვითარება სტაბილურია

ქედასა და შუახევში 700-მდე ოჯახი გარესამყაროსაა მოწყვეტილი

წაღებული ხიდები და ევაკუირებული ოჯახები – სტიქია მაღალმთიან აჭარაში

ავტოსაგზაო შემთხვევა – 12 წლის ბიჭის ჯანმრთელობის მდგომარეობა დამაკმაყოფილებელია

12 წლის ბიჭი, რომელსაც 28 ივნისს, ხელვაჩაურის გზაზე, „ოცნების ქალაქთან“ ახლოს „მერსედესის“ მარკის მიკროავტობუსი დაეჯახა, დედათა და ბავშვთა ჯანმრთელობის ცენტრშია [ე.წ. ბავშვთა საავადმყოფო] მოთავსებული. იგი მკურნალობის კურსს ქირურგიულ დეპარტამენტში გადის.

დედათა და ბავშვთა ჯანმრთელობის ცენტრის პრესსამსახურის ინფორმაციით, ბავშვის მდგომარეობა საშუალოდ მძიმეა და მის სიცოცხლეს საფრთხე არ ემუქრება.

ბათუმელი სტუდენტები სტაჟირებას რუსეთში გაივლიან

რუსეთის ტურიზმისა და სერვისების სახელმწიფო უნივერსიტეტთან მემორანდუმი ბათუმის შოთა რუსთაველის სახელმწიფო უნივერსიტეტმა გააფორმა. მემორანდუმის ფარგლებში, ტურიზმის ფაკულტეტის სტუდენტები რუსული უნივერსიტეტის გარდა, ადგილობრივ ტურისტულ სააგენტოებშიც გაივლიან სტაჟირებას.

ბათუმის უნივერსიტეტში მოლოდინი აქვთ, რომ ქართველი სტუდენტები ამ თანამშრომლობით რუსული ენის ცოდნის დონეს გაიუმჯობესებენ, შეისწავლიან ბაზარს და რუსი ტურისტების რაოდენობა აჭარაში გაიზრდება.

„შეუძლებელია რუსი ტურისტების ნაკადის გაზრდა განათლების გარეშე. ეს არის სახელმწიფო, წამყვანი უნივერსიტეტი რუსეთში,“ – ამბობს ბსუ-ს პროფესორი, ტურიზმის ფაკულტეტის დეკანი, როსტომ ბერიძე.

როსტომ ბერიძის თქმით, ტურიზმის მიმართულებით, ბათუმის სახელმწიფო უნივერსიტეტს მემორანდუმი ათამდე ევროპულ უნივერსიტეტთან აქვს გაფორმებული.

ფოლკლორის ეროვნული ფესტივალის გამარჯვებული ანსამბლები აჭარიდან

შუახევის კულტურის ცენტრის უხუცესთა ქორეოგრაფიული ანსამბლი „ფესვები“ საქართველოს ფოლკლორის ეროვნულ ფესტივალის გამარჯვებული „ქორეოგრაფიული ანსამბლის” ნომინაციაში გახდა. ფოლკლორის ეროვნულმა ცენტრმა პირველ ადგილზე გასულ ამ ანსამბლს საჩუქრად 5000 ლარი გადასცა.

„ფესვების“ გარდა საპრიზო ადგილი შუახევის კულტურის ცენტრთან არსებულმა შემსრულებლებმა „ინდივიდუალური შემსრულებლისა“ და „ავთენტური ჯგუფის“ ნომინაციაშიც მოიპოვეს.

ინდივიდუალური შემსრულებლის ნომინაციაში მეორე ადგილზე შუახეველი ბესიკ ტარიელაძე გავიდა, ხოლო ავთენტური ჯგუფის ნომინაციაში მესამე ადგილი ანსამბლმა „ჭვანამ“ მოიპოვა. ბესიკ ტარიელაძეს საჩუქრად 1000, ხოლო „ჭვანას“ – 2000 ლარი გადასცეს.

შუახევის ანსამბლების გარდა აჭარიდან ფოლკლორის ეროვნულ ფესტივალში საპრიზო ადგილის მფლობელი ქედის კულტურის ცენტრთან არსებული ვაჟთა ვოკალური ანსამბლი „ელესა“ „ხალხური სიმღერის ანსამბლის“ ნომინაციაში გავიდა და მესამე ადგილის მფლობელი გახდა. საპრიზო ადგილზე გასულ ქედის ანსამბლს ფულადი პრიზი 1500 ლარი გადაეცა.

13578769_1046709628758076_1177006585_n — „ელესას“ აჯილდოებს ანზორ ერქომაიშვილი / ფოტო: სულხან სალაძე

„ელესასთან“ ერთად ქედის კულტურის ცენტრის რეჟისორს ლია მახარაძეს ეთნოგრაფიული სპექტაკლის „აჭარული ქორწილის“ ინსცენირებისთვის, ფოლკლორის ეროვნულმა ცენტრმა სიგელი და საჩუქრად 500 ლარი გადასცა.

ფოლკლორის ეროვნულ ფესტივალში ლაურეატის მფლობელი ქედელი მეჭიბონე ბიჭიკო დიასამიძე, მერისის ანსამბლი „მოყვარე“ და ცხმორისის უხუცესთა ქორეოგრაფიული ანსამბლი „ფესვები“ გახდა.

ხულოს უხუცესთა ანსამბლი „ბერმუხა“ ნომინაციაში „ქორეოგრაფია“ მეორე ადგილის მფლობელი გახდა. საქართველოს ფოლკლორის ეროვნული ფესტივალი 27 ივნისს დაიწყო და დღეს დასრულდება.

ჟიურისა და მაყურებლის წინაშე რუსთაველის თეატრში ფესტივალის ბოლო დღეს ანსამბლები „ქალთა და ახალგაზრდულ ანსამბლების“ ნომინაციით წარსდგებიან. „საქართველოს ფოლკლორის ეროვნული ფესტივალი 2015-2016“ საქართველოს კულტურისა და ძეგლთა დაცვის სამინისტროს მხარდაჭერითა და საქართველოს ფოლკლორის სახელმწიფო ცენტრის ორგანიზებით ტარდება.

ქობულეთის გამგეობა ორ მეორად ავტომობილს შეიძენს

ორ ავტომობილს ქობულეთის გამგეობა გამარტივებული ელექტრონული ტენდერით შეიძენს. გამგეობა მაღალი გამავლობის მეორად ავტომობილებში სავარაუდოდ 25 ათასს ლარს გადაიხდის.

ავტომანქანებს გამგეობა ზედამხედველობის და სამხედრო აღრიცხვის განყოფილებებისთვის ყიდულობს.

გამგეობის პრესსამსახურის განმარტებით, ამ განყოფილებებს წლებია ემსახურებათ თითო ავტომანქანა, თუმცა ისინი ამორტიზებულია და შეკეთებას აღარ ექვემდებარება.

სატენდერო მოთხოვნების მიხედვით, ავტომანქანა მინიმუმ 2003 წელს უნდა იყოს გამოშვებული. შეთავაზებების ბოლო ვადა 6 ივლისია.

ქედისა და შუახევის გამგებელები – მუნიციპალიტეტებში ვითარება სტაბილურია

ქედის გამგებელი დავით დუმბაძე აცხადებს, რომ ამ დროისთვის ვითარება ქედაში სტაბილურია, მდინარე აკავრეთაში წყლის დონემ ღამით დაიკლო და არანაირ საფრთხეს არ წარმოადგენს. რაც შეეხება სოფლებს შორის დამაკავშირებელ დაზიანებულ და წაღებულ ხიდებს, გამგებელის თქმით აღდგენითი სამუშაოები უახლოეს პერიოდში დაიწყება.

„სტიქიის შედეგად მიყენებული ზარალი დიდია. აკავრეთას ხეობაში მთლიანობაში ხუთი ხიდია წაღებული, მათ შორის ერთი საცალფეხო, მისასვლელი გზა არ არის მერისის ოთხ მთასთან, რაც შეეხება უშუალოდ სოფლებს, აქ გადაადგილების პრობლემა არ არის, წაღებულია და დაზიანებულია მხოლოდ სოფლებს შორის დამაკავშირებელი ხიდები. დღესვე დავიწყებთ მერისის მთასთან დამაკავშირებელი გზის აღდგენას. დაზიანდა არსენაულის ხიდზე გამავალი ლითონის წყლის მილი, რომლითაც სასმელი წყალი სოფელ ორცვასა და დაბას მიეწოდება, თუმცა დაბაში წყლის მიწოდებაში პრობლემა არ გვაქვს, ღრათიდან ვღებულობთ ალტერნატიულ წყალს. რაც შეეხება ელექტროენერგიის მიწოდებას, ამ დროისთვის ქედაში ყველა სოფელს მიეწოდება შუქი“ – ამბობს ქედის გამგებელი დავით დუმბაძე.

„გაწმენდითი სამუშაოები დავიწყეთ, სოფლებში ხუთი ერთეული ტექნიკა მუშაობს, გაწმენდით სამუშაოებში „შუახევიჰესიც“ გვეხმარება. ადგილზეა სამაშველო სამსახური და ველოდებით გეოლოგების ჯგუფს, რომელიც სტიქიის ზონაში არსებულ მდგომარეობას შეისწავლის. უჩამბის თემის გარდა ნათესები და სავარგულები დაზიანდა ჭვანის თემის რიგ სოფლებში, ზარალს დავითვლით, მაქსიმალურად ვეცდებით თითეულ ოჯახს ზარალის შესაბამისი დახმარება გავუწიოთ“ – ამბობს შუახევის გამგებელი ტარიელ ებრალიძე.

გამგებლის თქმით, უჩამბის ოთხი სოფლის გარდა გადაადგილების პრობლემა სხვა სოფლებში არ არის, „რაც შეეხება ამ თემის სოფლებს – წაბლანა, ცინარეთი, ლაკლაკეთი და მოფრინეთი, არის შემოვლითი გზა, ვეცდებით სასოფლო გზა დღესვე აღვადგინოთ“.

გუშინ ღამით მოსულმა უხვმა ნალექმა ქედაში მდინარე აკავრეთას ადიდება გამოიწვია, რამაც მთლიანად გაანადგურა აჭარაში ერთ-ერთი დიდი საკალმახე მეურნეობა „აკავრეთა“, დაზიანდა იქვე არსებული რესტორანი „დავითი“, მისასვლელი ხიდი და გზა.

გაზის მიწოდება აჭარაში დღის ბოლომდე სრულად აღდგება

„სოკარ ჯორჯია გაზის“ ინფორმაციით, ქობულეთში, ბათუმსა და ხელვაჩაურში აბონენტებისთვის ბუნებრივი აირის მიწოდება დღეს, 29 ივნისს, დღის ბოლომდე სრულად აღდგება.

„ბათუმელებს“ რამდენიმე მოქალაქემ აცნობა, რომ გვერდით კორპუსებში ჩაირთო გაზი, მათ კორპუსში კი არა და აინტერესებთ მიზეზი. „სოკარ ჯორჯია გაზში“ განაცხადეს, რომ ტექნიკური ჯგუფები მუშაობს, დღის ბოლომდე ყველას აღუდგება გაზის მიწოდება და აბონენტებს საჭიროების შემთხვევაში შეუძლიათ კომპანიას დაუკავშირდნენ ცხელ ხაზზე: 16 114

ბათუმის, ქობულეთისა და ხელვაჩაურის აბონენტებს, გაზის მიწოდება 24 ივნისს შეუწყდათ.

ქედასა და შუახევში 700-მდე ოჯახი გარესამყაროსაა მოწყვეტილი

აჭარის სამაშველო სამსახურის ინფორმაციით, ამ დროისთვის სტიქიის შედეგად გარესამყაროსაა მოწყვეტილი შუახევის მუნიციპალიტეტის ხუთი და ქედის მუნიციპალიტეტის ერთი სოფელი [ოქტომბერი]. ექვსივე სოფელში დაახლოებით 700-მდე კომლი ცხოვრობს. სოფლებთან მისასვლელი ხიდები ადიდებულმა მდინარეებმა წაიღეს. სოფლებს არ მიეწოდება ელექტროენერგია.

შს სამინისტროს სახანძრო-სამაშველოს აჭარის მთავარი სამმართველოს უფროსის მოადგილის მამუკა თურმანიძის განცხადებით, ექვსივე სოფელთან აქვთ სატელეფონო კავშირი, არცერთ სოფელში არ იმყოფება მძიმე ავადმყოფი, სოფლებში აქვთ საკმარისი საკვებიც და საწვავიც: „16 ოჯახია ევაკუირებული, ასევე უსაფრთხო ადგილზე გვყავს გადაყვანილი პირუტყვიც. დაკარგულად ითვლებოდა ორი ადამიანი [ერთი ქედაში და ერთი შუახევში] თუმცა ორთავე ნაპოვნია და მათ ჯამრთელობას საფრთხე არ ემუქრება. რთული ვითარებაა შუახევში, გუდნისღელის ხეობაში, სადაც ახლა ვიმყოფებით… მაშველებმა სატვირთო ავტომანქანაც ამოიტანეს მდინარიდან… მიუხედავად იმისა რომ 4-5 ხიდია დანგრეული, არის ცინარეთიდან შემოვლითი გზა, რომლითაც ვსარგებლობთ, თუმცა ახლა საკმაოდ ბნელა და გზის ზოგიერთ მონაკვეთზე მეწყერის გამო რთული სიტუაციაა. რაც შეეხება წვიმას, ფაქტობრივად გადაიღო შუახევში და იმედი გვაქვს ნალექი არ მოიმატებს“.

მამუკა თურმანიძის თქმით, სახანძრო-სამაშველო ბრიგადები მობილიზებულია, როგორც ქედასა და შუახევში ასევე ბათუმშიც.

დღეს, 28 ივნისს, საღამოს 8 საათის შემდეგ მოსულმა უხმა ნალექმა სერიოზული პრობლემები შუახევისა და ქედის მუნიციპალიტეტებში შექმნა. სასოფლო-სამეურნეო სავარგულების გარდა განადგურებულია ორი საკალმახე მეურნეობა. სტიქიას მსხვერპლი არ მოჰყოლია. ელექტროენერგია ამ დროისთვის მიეწოდება დაბებს – ქედასა და შუახევს.

წაღებული ხიდები და ევაკუირებული ოჯახები – სტიქია მაღალმთიან აჭარაში

28 ივნისს, საღამოს, ძლიერმა წვიმამ აჭარის მაღალმთიანეთს ზიანი მიაყენა.

შუახევის მუნიციპალიტეტში სოფლები: წაბლანა, ცინარეთი, მოფრინეთი და სამოლეთი მოწყვეტილნი არიან ცენტრს, რადგან ადიდებულმა მდინარემ წაიღო კვირიაულისა და წაბლანას ხიდები. შუახევის გამგეობის ინფორმაციით სტიქიამ გაანადგურა მდინარის პირას არსებული სავარგულები.

შუახევის გამგებლის, ტარიელ ებრალიძის თქმით, უჩამბის ხეობაში მდინარემ 3 ხიდი წაიღო: “10 ოჯახი გადავიყვანეთ, წვიმამ ახლა ცოტა გადაიღო, გარდა ამისა, უჩამბასა და დაბაში, ორთამელას უბანში მეწყერი განვითარდა. ადგილზე მობილიზებულია სამაშველო სამსახურები და იქ მცხოვრები ოჯახი გადავიყვანეთ უსაფრთხო ადგილზე” – განუცხადა გამგებელმა “ბათუმელებს”.

ქედის მუნიციპალიტეტის გამგეობის პრესსამსახურის, სოფო ხაბაზის თქმით, ადიდებულმა მდინარე აკავრეთამ ქედაში სოფელ მერისსა და ოქტომბერთან დამაკავშირებელი ხიდები და საკალმახე მეურნეობის ნაწილი წაიღო. მდინარეების, აჭარისწყლისა და აკავრეთაც შესართავთან ორი ოჯახია ევაკუირებული.

“საფრთხე ემუქრება დაბა ქედაში მდინარე აჭარისწყალისა და აკავრეთას შესართავის მიმდებარე ტერიტორიას. ევაკუირებულია ოჯახები და მიმდინარეობს პრევენციული ღონისძიებების გატარება. სამაშველო ჯგუფი ამ დრომდე აგრძელებს მუშაობას ადგილობრივის დასახმარებლად მერისის ადმინისტრაციულ ერთეულში. ქედის მუნიციპალიტეტის გამგეობაში მობილიზებულია მუდმივმოქმედი საგანგებო შტაბი, რომელსაც გამგებელი დავით დუმბაძე ხელმძღვანელობს” – აღნიშნულია განცხადებაში, რომელსაც ქედის მუნიციპალიტეტის გამგეობა ავრცელებს.

ხულოს გამგებლის, ბესიკ ბაუჩაძის თქმით, ხულოს მუნიციპალიტეტში,მდინარეები ადიდდა და ზოგიერთი სოფელი დაისეტყვა, თუმცა, გამგებლის თქმით, ძლიერ წვიმას ხულოსთვის მნიშვნელოვანი ზარალი არ მიუყენებია და მდგომარეობა ამ დროისათვის სტაბილურია.

12 წლის ბავშვს ხელვაჩაურის გზაზე მიკროავტობუსი დაეჯახა

ხელვაჩაურის გზაზე, „ოცნების ქალაქთან“ ახლოს „მერსედესის“ მარკის მიკროავტობუსი 12 წლის ბიჭს დაეჯახა.

„ბათუმელების“ ინფორმაციით, სასწრაფო სამედიცინო დახმარების ბრიგადის მისვლამდე ბავშვი თავად მძღოლმა გადაიყვანა საავადმყოფოში. შს სამინისტროს პრესსამსახურის ცნობით, საავადმყოფოში გადაყვანისას „კონტაქტური იყო.“

„ბათუმელების“ ინფორმაციით, ბავშვი ყოფილი 53-ე ბატალიონის ტერიტორიაზე, ე.წ. „ოცნების ქალაქში“ ცხოვრობს.

შს სამინისტროს ცნობით, გამოძიება სისხლის სამართლის კოდექსის 276-ე მუხლის პირველი ნაწილით მიმდინარეობს – ტრანსპორტის მოძრაობის უსაფრთხოების ან ექსპლუატაციის წესის დარღვევა… რამაც გამოიწვია ჯანმრთელობის ნაკლებად მძიმე დაზიანება, ისჯება ჯარიმით ან თავისუფლების შეზღუდვით ვადით სამ წლამდე ანდა თავისუფლების აღკვეთით იმავე ვადით, თანამდებობის დაკავების ან საქმიანობის უფლების ჩამორთმევით ვადით სამ წლამდე ან უამისოდ.

ფოტო: როინ გუნდაძე

აქციაზე დაკავებული გონიოელების სასამართლო პროცესი გრძელდება

ბათუმის საქალაქო სასამართლოში 22 ივნისს დაკავებული გონიოელების – გურამ მიქელაძისა და ენვერ ირემაძის საქმე განახლდა. საიას იურისტის თქმით, დღეს პროცესზე მოწმეები დაკითხეს, მათ შორის სახალხო დამცველის წარმომედგენელი ბათუმში ციალა ქათამიძე. საქმის განხილვა 30 ივნისს გაგრძელდება.

აჭარის მთავრობის ადმინისტრაციულ შენობასთან საპროტესტო აქცია პოლიციამ ძალის გამოყენებით დაშალა, ხოლო სამი პირი [გურამ მიქელაძე, ენვერ ირემაძე, იასონ პაქსაძე] ადმინისტრაციული კოდექსისის 173-ე მუხლით დააკავა, რაც პოლიციისადმი დაუმორჩილებლობას ნიშნავს.

ადმინისტრაციულ სამართალდარღვევათა კოდექსის ეს მუხლი ითვალისწინებს ჯარიმას 400 ლარის ოდენობით ან გამასწორებელ სამუშაოებს ერთიდან ექვს თვემდე ვადით, ხელფასიდან ოცი პროცენტის დაქვითვით, ხოლო თუ საქმის გარემოებათა და დამრღვევი პიროვნების გათვალისწინებით, ამ ზომების გამოყენება არასაკმარისად იქნება მიჩნეული – ადმინისტრაციულ პატიმრობას 90 დღემდე ვადით.

იასონ პაქსაძე ბათუმის საქალაქო სასამართლომ [22 ივნისს] ყოველგვარი სანქციის გარეშე გაათავისუფლა. გურამ მიქელაძე და ენვერ ირემაძე კი, პოლიციამ ხელწერილის საფუძველზე გაუშვა. დღეს სწორედ მათ საქმეს განიხილავდა მოსამართლე ლევან მიქაბერიძე.

ამავე თემაზე: 22 ივნისს დაკავებული გონიოელების საქმის განხილვა სასამართლოში გადაიდო
საკრებულოს გადაწყვეტილება გონიოს მიწებზე

ბათუმი დღეს [ფოტო]

13523916_1313261925370446_1193574054_o — ბათუმი, 28.06.2016 / თორნიკე თავაძის ფოტოები

დემოკრატიის სკოლა ბათუმში ახალ ჯგუფს მიიღებს

NIMD-ის დემოკრატიის სკოლა ბათუმში ახალი ჯგუფის წევრების შესარჩევად მიღებას აცხადებს.

ინტენსიური საგანმანათლებლო პროგრამა, რომელსაც მსმენელები გაივლიან, განკუთვნილია ადგილობრივი თვიმმართველობის, არასამთავრობო სექტორის, მედიის, პოლიტიკური პარტიების, აკადემიური წრეების წარმომადგენლების, წარმატებული სტუდენტებისა და თანამედროვე დემოკრატიის საკითხებით დაინტერესებული მოქალაქეებისთვის.

დემოკრატიის სკოლის მსმენელებს ტრენინგები ბათუმში ჩაუტარდებათ კვირაში 2 ჯერ, ოქტომბრიდან თებერვლის ჩათვლით, თბილისიდან მოწვეული სპეციალისტების მიერ.

NIMD-ის ვებგვერდის ცნობით, სატრენინგო პროგრამა ოთხ ძირითად მოდულს ფარავს:

უნარები: დემოკრატიის ძირითადი პრინციპები, კომუნიკაცია, პროფესიული წერა, საჯარო დებატები, ინტერნეტი.

დემოკრატიული საზოგადოება: მოქალაქეობა, სამოქალაქო საზოგადოება, ერი ნაციონალიზმი და უმცირესობები, რელიგია და დემოკრატია, მედია, გენდერი.

დემოკრატიული მმართველობა: კონსტიტუციონალიზმი და სახელმწიფო მოდელები, კანონის უზენაესობა და ადამიანის უფლებები, პოლიტიკური იდეოლოგიები, პოლიტიკური პარტიები, საარჩევნო სისტემები, ადგილობრივი თვითმმართველობა, დემოკრატიზაციის საერთაშორისო კონტექსტი.

მონაწილეობა და ლიდერობა: დემოკრატიული მონაწილეობის მექანიზმები, ლიდერობა, ამომრჩევლის უფლებები და პასუხისმგებლობები, ადვოკატირება, სამოქალაქო პროტესტი, ბიუჯეტირება, პროექტების მომზადება და მართვა, მონიტორინგი.

NIMD-ის სკოლის ბათუმის კოორდინატორის, თამარ მამეიშვილის განმარტებით, აჭარის მასშტაბით შეირჩევა 20-22 მონაწილე, რომელთა ასაკი 18 წელს აღემატება.

საბუთების მიღება NIMD-ის სკოლაში 28 ივლისს დასრულდება. თამარ მამეიშვილის თქმით, კონკურსის შედეგები, სავარაუდოდ, სექტემბრის პირველ ნახევარში იქნება ცნობილი.

ბათუმში სწავლება ჩატარდება ახმედ მელაშვილის N20–ში.

პროექტს ნიდერლანდების ინსტიტუტი ახორციელებს, რომელიც ჰოლანდიის პოლიტიკური პარტიების მიერ შექმნილი ორგანიზაციაა და მიზნად ისახავს დემოკრატიული სისტემის განვითარების მხარდაჭერას ახალი დემოკრატიის ქვეყნებში. NIMD-ის ხელშეწყობით შექმნილია პროგრამის კურსდამთავრებულთა ქსელი, ყოფილი სტუდენტები ფინანსდებიან მცირე გრანტით.

NIMD-ის პოლიტიკური განათლების ცენტრები საქართველოს ოთხ ქალაქში ფუნქციონირებს: ბათუმში, ქუთაისში, გორსა და თელავში.

სწავლა უფასოა. სწავლების დასრულების შემდეგ გაიცემა შესაბამისი სერტიფიკატი.

ფოტო ბათუმის დემოკრატიის სკოლის ფეისბუქგვერდიდან.

ვაკანსია

არასამთავრობო უფლებადამცველი ორგანიზაცია „ლეონიდ ჩერნოვეცკი – ქართული მომავალი“ აწარმოებს მსურველების მიღებას, მოქალაქეების ინტერესების დამცველი საკანონმდებლო ინიციატივების მხარდასაჭერი ხელმოწერების შესაგროვებლად.

მოთხოვნები: კეთილსინდისიერება, ენერგიულობა, კომუნიკაბელურობა, პასუხისმგებლობის მაღალი გრძნობა.

ანაზღაურება გამომუშავებით: 25-50 თეთრი თითო ხელმოწერა.

რეზიუმე გამოგზავნეთ ელექტრონულ ფოსტაზე:

listgeorgianfuture@gmail.com

პაატა ჯალაღონიას სავარაუდოდ უსკოს თავმჯდომარედ აირჩევენ

უმაღლესი საბჭოს „ქართული ოცნების“ სამი ფრაქციის გარდა აჭარის უმაღლესი საარჩევნო კომისიის თავმჯდომარედ პაატა ჯალაღონიას არჩევას ფრაქცია „თავისუფალი დემოკრატებიც“ დაუჭერს მხარს. ამ ფრაქციის თითოეული წევრი სატელეფონო საუბარში ადასტურებს, რომ გადაწყვეტილება უკვე მიღებული აქვს და უსკოს თავმჯდომარედ პაატა ჯალაღონიას კანდიდატურას მხარს უჭერს. პაატა ჯალაღონიას სასარგებლოდ ხმის მიცემას გეგმავს „რესპუბლიკელი“ გიორგი მასალკინიც.

ეს იმას ნიშნავს, რომ თუ „ქართული ოცნების“ რომელიმე წევრი ფარული კენჭისყრისას ჯალაღონიას წინააღმდეგ არ მისცემს ხმას, პაატა ჯალაღონია უსკოს თავმჯდომარის პოსტზე ასარჩევად საჭიროზე მეტ ხმას მიიღებს.

გადაწყვეტილება ჯერ არ მიუღიათ, თუმცა ამბობენ, რომ, სავარაუდოდ, უარყოფითი პოზიცია ექნება „ ნაციონალური მოძრაობიდან“ ექვს და ფრაქცია „თანასწორობიდან“ ორ წევრს. ამავე ფრაქციის მესამე წევრი მედეა ვასაძე კენჭისყრაში მონაწილეობაზე უარს ამბობს.

პროფესიით იურისტი პაატა ჯალაღონია აჭარის მთავრობის აპარატში უმაღლეს საბჭოსთან ურთიერთობის დეპარტამენტს 2014 წლიდან ხელმძღვანელობს, მანამდე ის მთავრობის აპარატის იურიდიულ დეპარტამენტს ხელმძღვანელობდა.
სამთავრობო სტრუქტურაში დასაქმებადე პაატა ჯალაღონია არასამთავრობო სექტორში მუშაობდა:

2010 -2012 წლებში ის საქართველოს ახალგაზრდა იურისტთა ასოციაციის აჭარის ფილიალის თავმჯდომარე, 2009-2010 წლებში კი „თავისუფალ ჟურნალისტთა სახლის“ პროგრამების კოორდინატორი იყო. 2007 -2009 წლებში პაატა ჯალაღონია აფხაზეთის მთავრობის წარმომადგენლობის რწმუნებული იყო ბათუმში. მანამდე სხვადასხვა დროს ის ხელმძღვანელობდა ადამიანის უფლებათა დაცვის რეგიონალურ ცენტრს, იყო საიას იურისტი და ეწეოდა პედაგოგიურ საქიმიანობასაც.

ზურაბ პატარაძე არჩილ ხაბაძის ნაცვლად?

აჭარის მთავრობის თავმჯდომარეს არჩილ ხაბაძეს ზურაბ პატარაძე ჩაანაცვლებს. ის ამ დრომდე საქართველოს საგანგებო და სრულუფლებიანი ელჩია ყაზახეთის რესპუბლიკაში. ინფორმაცია „ბათუმელებს“ რამდენიმე სამთავრობო წყარომ დაუდასტურა.

„ბათუმელების“ ინფორმაციით, მასთან შეხვედრა უკვე ჰქონდათ აჭარის უმაღლესი საბჭოს ფრაქცია „ქართულ ოცნების“ წევრებს. ეს ინფორმაცია ფრაქციის თავმჯდომარემ ალექსანდრე ჩიტივილმა დაადასტურა: „ჩვენ მას შევხვდით ბათუმში, რადგან გვაინტერესებდა ყაზახური ინვესტიციები. ეს იყო მეგობრული შეხვედრა და მეტი არაფერი. აჭარას ჰყავს მოქმედი თავმჯდომარე და მე არ მაქვს ინფრომაცია, რომ ის მინიმუმ, არჩევნებამდე რაიმეს ელოდება“.

მთავრობის თავმჯდომარის პრესსამსახურში არ ადასტურებენ ინფორმაციას არჩილ ხაბაძის შესაძლო წასვლის შესახებ.

ხაბაძის იმპიჩმენტის უკვე დაანონსსებული პროცედურის დაწყებას უმაღლესი საბჭოს ოპოზიცია ითხოვს. უმაღლესი საბჭოს ერთ-ერთი დეპუტატის ინფორმაციით, ხაბაძე იმპიჩმენტის პროცედურით არა, მაგრამ ამ პროცედურის შემდეგ საკუთარი განცხადებით წავა.

ზურაბ პატარაძე ბათუმელია. მას აქვს სახლი ქობულეთში. ორი ბინა თბილისში, მათ შორის ერთი 2013 წელს შევსებული ქონებრივი დეკლარაციის მიხედვით იპოთეკითაა დატვირთული.

არჩილ ხაბაძის შესაძლო გათავისუფლების შესახებ ინფორმაცია მას შემდეგ კიდევ უფრო გააქტიურდა, რაც ნაციონალურმა მოძრაობამ ოფიციალურად დაადასტურა, რომ აჭარის მთავრობის ყოფილი ხელმძღვანელი, ლევან ვარშალომიძე საქართველოში ბრუნდება და არჩევნებში მიიღებს მონაწილეობას. 2013 წელს ზურაბ პატარაძე იყო საქართველოს ელჩი თურქეთის რესპუბლიკაში.

ხულო-გოდერძის გზის რეაბილიტაცია ქუვეითის ფონდის სესხით

დაბა ხულოდან გოდერძის უღელტეხილამდე არსებული გზა უნდა გაფართოვდეს, რის გამოც რამდენიმე ოჯახი შესაძლოა აასახლონ. დეტალური პროექტი ჯერ არ არსებობს. შესაბამისად, არ არსებობს განსახლების გეგმაც. ხულო-გოდერძის მონაკვეთის გზის რეაბილიტაციის სამუშაოები არაბთა ეკონომიკური განვითარების ქუვეითის ფონდის მიერ შემოთავაზებული სესხით დაფინანსდება.

ხულოდან გოდერძის უღელტეხილამდე [აჭარის ავტონომიური რესპუბლიკის ადმინისტრაციულ საზღვრამდე] არსებული შიდასახელმწიფოებრივი მნიშვნელობის გზის მონაკვეთი [დაახლოებით 29 კმ] ხულო-ზარზმის გზის რეაბილიტაციის პროექტის ფარგლებში გაკეთდება.

„გზის აღნიშნული მონაკვეთის პროექტირებაზე უნდა გამოცხადდეს ტენდერი, რისი მოსამზადებელი სამუშაოებიც ამჟამად მიმდინარეობს. ამ ეტაპზე სხვა დეტალების შესახებ ვერ ვისაუბრებთ. როცა პროექტი გაკეთდება და გაირკვევა დაფინანსების საკითხიც, სამუშაოებზე, შემდეგ, ცალკე ტენდერი გამოცხადდება,“ – უთხრეს „ბათუმელებს“ საქართველოს საავტომობილო გზების დეპარტამენტში.

ზუსტ ვადას, როდის გამოცხადდება ტენდერი პროექტირებაზე, ვერ ასახელებენ. „რაც შეიძლება მალე“ – გვითხრეს დეპარტამენტში.
„ბათუმელების“ ინფორმაციით, დაბა ხულოდან გოდერძის მიმართულებით, სოფლების გზისპირას მცხოვრებ ოჯახებს აუცილებლად მოუწევთ ასახლება ან მიწის ნაკვეთების ნაწილის დათმობა. მოსახლეობა ამის შესახებ ინფორმირებული არ არის და არც განსახლების გეგმაზე მომუშავე ჯგუფი ჩასულა ჯერ ხულოში.

ხულო-ზარზმის გზის რეაბილიტაციის პროექტის [ლოტი 1: ხულო-გოდერძის მონაკვეთი] დასაფინანსებლად, სესხის მისაღებად, არაბთა ეკონომიკური განვითარების ქუვეითის ფონდთან მოლაპარაკებებს საავტომობილო გზების დეპარტამენტის წარმომადგენლებთან ერთად ორი სამინისტრო – ფინანსთა და ასევე რეგიონული განვითარებისა და ინფრასტრუქტურის სამინისტროები – მართავს. შესაბამისად, სესხის მოცულობა და პირობები, ხელშეკრულების გაფორმების დროს დაზუსტდება.

გზა ხულოს მუნიციპალიტეტში. თედო ჯორბენაძის ფოტო

ხულოს მუნიციპალიტეტში მსოფლიო ბანკის დაფინანსებით, ზამლეთი-ხიხაძირის გზის სხალთა-კვატიის მონაკვეთის რეაბილიტაციაც იგეგმება. საერთაშორისო ტენდერი, რომელიც საქართველოს საავტომობილო გზების დეპარტამენტმა წელს, 16 თებერვალს გამოაცხადა, 15 მარტს დასრულდა. ტენდერში სამი კომპანია მონაწილეობდა, გამარჯვებულად კი 28 მარტს კომპანია „ბლექ სი გრუპი“ დასახელდა. თუმცა შესყიდვების გვერდზე ხელშეკრულების ტექსტი ატვირთული დღემდე არ არის და არც სამუშაოებია დაწყებული.

„გიდასტურებთ, რომ ვართ ტენდერში გამარჯვებული და ჩვენი მხრიდან შესაბამის ხელშეკრულებაზეც ხელი მოწერილია,“ – მხოლოდ ეს გვიპასუხეს „ბლექ სი გრუპში“ კითხვაზე – თუ რატომ გაჭიანურდა ხელშეკრულების გაფორმება და როდის დაიწყებოდა სამუშაოები. კომპანიამ გზის აღნიშნული მონაკვეთის რეაბილიტაცია დეპარტამენტს 4 799 999 ლარად შესთავაზა.

„ხელშეკრულება გაფორმებულია კომპანიასთან. მას კიდევ სხვა ობიექტები აქვს აღებული, ამ დღეებში მოახდენს შესაბამისი ტექნიკის მობილიზებას ადგილზე და მალე ინტენსიურად დაიწყებს სხალთა-კვატიას მონაკვეთის სარეაბილიტაციო სამუშაოებს,“ – გვიპასუხეს გზების დეპარტამენტში.

დეპარტამენტში „ბათუმელებს“ გასულ წელს ისიც განუცხადეს, რომ მათი დაკვეთით ხულო-ადიგენის გზის მონაკვეთზე გერმანულ-ქართულმა საპროექტო ორგანიზაციამ შეადგინა რეაბილიტაცია-რეკონსტრუქციის სამუშაო-ტექნიური დოკუმენტაცია. პარალელურად, დაფინანსების მიზნით, მოლაპარაკებები მიმდინარეობდა აზიის განვითარების ბანკთან. პროექტი მრავალმილიონიანია. სხვა დეტალები დეპარტამენტში არც მაშინ და არც ახლა არ დააკონკრეტეს.

რაც შეეხება ბათუმი-ახალციხის შიდასახელმწიფოებრივი გზის აჭარის მონაკვეთს [ხულო, შუახევი, ქედა, ხელვაჩაურის მუნიციპალიტეტების ტერიტორიაზე], მაგისტრალი მნიშვნელოვნად ზიანდება მძიმეტონიანი ავტომანქანების გადაადგილების შედეგად, რომლებიც ჰესების მშენებლობას ემსახურებიან. გზაზე პასუხისმგებელი საქართველოს საავტომობილო გზების დეპარტამენტია. დეპარტამენტის ტერიტორიული ორგანოს, აჭარის საავტომობილო გზების დირექციის დირექტორის, ზურაბ სიხარულიძის განცხადებით, ვიდრე ჰესების მშენებლობა არ დასრულდება, ამ მაგისტრალის კაპიტალური შეკეთება არ იგეგმება:

„შესაძლოა მომავალი წლის ბიუჯეტში ჩაიდოს თანხა ამ მიზნით, მანამდე კი, ეტაპობრივად, საკუთარი ხარჯებით და ტექნიკით ვახდენთ დაზიანებული ადგილების დროებით შეკეთებას. ამჟამად, ორმული შეკეთება მიმდინარეობს ხულოს ტერიტორიაზე. რამდენიმე დღეში კი დაბა შუახევში გზის არა ორმულ, არამედ უშუალოდ რეაბილიტაციას დავიწყებთ. შეკეთდება დამცავი კედლებიც“.

სასამართლო დავა საავტორო უფლებებზე

„საინტერესო შემთხვევაა, არ გვინდა მორიგება. უმჯობესია საკითხი სასამართლომ განიხილოს“, – მიმართა მოსამართლეს ადვოკატმა ნოდარ ბოლქვაძემ. ის გონიოში მდებარე რესტორან „აიდერის“ ინტერესებს იცავს. „საავტორო უფლებათა დაცვის ასოციაცია“ თურქული რესტორნისთვის ლიცენზიის პირობის დარღვევისთვის 3140 ლარის, ასევე პირგასამტეხლოს – 295 ლარის დაკისრებას ითხოვს. მოსარჩელეს მოპასუხემ, ანუ რესტორნის მფლობელმა, სარჩელითვე უპასუხა. საქმეს ბათუმის საქალაქო სასამართლოში მოსამართლე გოჩა ფუტკარაძე განიხილავს.

„გონიოს ცენტრში მდებარე რესტორნის ხელმძღვანელთან გასული წლის ივნისში გავაფორმე ხელშეკრულება. იქ იყვნენ მუსიკოსებიც, მაგრამ ჩემი მისვლის დროს ფონოგრამა იყო ჩართული, კონკრეტულად რუსული მუსიკა. მათ რეპერტუარში იყო ის მუსიკა, რომელიც არის ჩვენს ბაზაში [„ბაზაში“ იგულისხმება მუსიკალური ნაწარმოები, რომლის ავტორთან ან მის წარმომადგენელთან, როგორც თვითონ აცხადებს, აქვს შეთანხმება ასოციაციას. ავტ.] შევთანხმდით, რომ ყოველთვიურად რესტორანი ჩვენს ანგარიშზე ჯამში 407 ლარს გადაიხდიდა, მაგრამ მან ეს პირობა დაარღვია“, – უთხრა სასამართლოს მოწმის სახით დაბარებულმა მინურ პაქსაძემ. ის საავტორო უფლებათა დაცვის ასოციაციის რეგიონული წარმომადგენელია აჭარაში.

რესტორნის მფლობელმა სარჩელის ავტორს, ასოციაციას სასამართლოში საპასუხო სიტყვის ნაცვლად შეგებებული სარჩელი დაახვედრა. მოპასუხე დადებულ ხელშეკრულებას კანონმდებლობის საწინააღმდეგოდ მიიჩნევს და მის ბათილად ცნობას მოითხოვს. „ჩემი მარწმუნებელი მოატყუეს“, – ამბობს ნოდარ ბოლქვაძე: „ის თურქულენოვანია და ისე მოაწერა ხელი ხელშეკრულებას, არც კი იცოდა პირობები. მაჩვენეთ, გყავდათ თუ არა მიყვანილი თარჯიმანი, როცა სალიცენზიო პირობებზე ხელშეკრულება გაფორმდა. მაჩვენეთ ასევე მტკიცებულება, რითაც დასტურდება, რომ რესტორანში ქართულ ან ინგლისურ ენაზე სრულდებოდა სიმღერა“.

„თუკი სალიცენზიო შეთანხმების შეწყვეტა გსურთ, ამას სასამართლო არ სჭირდება. უბრალოდ, ასეთ შემთხვევაში, თქვენ საერთოდ არ გექნებათ მუსიკალური ნაწარმოების გაჟღერების უფლება რესტორანში“, – მიმართა ადვოკატს ასოციაციის წარმომადგენელმა, სოფო ნემსაძემ. ის ასევე დაუსაბუთებლად მიიჩნევს მოსაზრებას იმის შესახებ, რომ რესტორნის თურქი ეროვნების მფლობელმა ქართული ენა არ იცის: „თუ მან ქართული არ იცის, თქვენ, მის წარმომადგენელს, ამავე ენაზე როგორ გაგიფორმათ მინდობილობა? საქმეში დევს ეს მინდობილობა.“

რესტორნის ადვოკატის მტკიცებით, რესტორანში მხოლოდ თურქული სიმღერები სრულდება, რაც ასოციაციის ბაზაში არ არის და მათ გაჟღერებას კანონმდებლობით გათვალისწინებული ლიცენზია არ სჭირდება. ასოციაციის იურისტის, სოფო ნემსაძის თქმით კი, რესტორანში დღემდე ჟღერს ქართული და უცხოენოვანი მუსიკაც, როგორც ცოცხალი შესრულებით, ასევე ფონოგრამით.

მოსამართლის მოწოდების მიუხედავად, მორიგება ამ ეტაპზე ვერ შედგა: რესტორანი მხოლოდ 1000 ლარის გადახდაზეა თანახმა, ასოციაცია კი მარტო პირგასამტეხლოზე ამბობს უარს. სასამართლოს შემდეგ სხდომაზე მოსამართლე გოჩა ფუტკარაძე რესტორნის ადმინისტრაციის თანამშრომელს მოუსმენს, რომელიც ხელშეკრულების გაფორმების პროცესში იყო ჩართული. მან უნდა თქვას, გასაგები იყო თუ არა სალიცენზიო ხელშეკრულების პირობები მისი დირექტორისთვის.

აჭარის მთავრობის უნდობლობის საკითხს უმაღლესი საბჭოს ბიურო განიხილავს

„აჭარის ავტონომიური რესპუბლიკის მთავრობისათვის უნდობლობის გამოცხადების შესახებ“ საკითხი პირველია დღის წესრიგში, რომლითაც დღეს, 28 ივნისს, აჭარის უმაღლესი საბჭოს ბიურომ უნდა იმუშაოს.

ბიურომ ასევე უნდა განიხილოს საკითხები – აჭარის უმაღლესი საარჩევნო კომისიის თავმჯდომარის ვაკანტურ თანამდებობაზე აჭარის მთავრობის თავმჯდომარის მიერ წარდგენილი პარმენ ჯალაღონიას კანდიდატურისა და უმაღლესი საარჩევნო კომისიის წევრის ვაკანტურ თანამდებობაზე წარდგენილი სოფიო კახაძისა და მზიური შავაძის კანდიდატურების შესახებ.

სამთავე საკითხზე მომხსენებელი ალექსანდრე ჩიტიშვილია – საკონსტიტუციო, იურიდიულ და საპროცედურო საკითხთა კომისიის თავმჯდომარის მოადგილე.

ბიურო, სხვა საკითხებსაც განიხილავს. სხდომა დღეს, 12 საათისთვისაა ჩანიშნული.

აჭარის უმაღლეს საბჭოში, სამმა ფრაქციამ – „თანასწორობა“, „მაჟორიტარები“ და „ნაციონალური მოძრაობა“ აჭარის მთავრობის იმჩიპმენტის პროცედურა გასულ თვეში დაიწყო. რის შესახებაც განცხადება აჭარის უმაღლეს საბჭოში, „ნაციონალური მოძრაობის“ წევრმა პეტრე ზამბახიძემ გააკეთა. დეპუტატის განცხადებით მთავრობის იმპიჩმენტის საკითხი 16 ივნისის სხდომაზე უნდა გასულიყო, თუმცა საკითხის საგაზაფხულო სესიაზე გატანა ვერ მოხერხდა.

კონკურსი სტუდენტების სწავლის დასაფინანსებლად

აჭარის ავტონომიური რესპუბლიკის განათლების, კულტურისა და სპორტის სამინისტროს ინფორმაციით, განათლების ხელმისაწვდომობის გაზრდის მიზნით სამინისტრო 2016 წელს საბაკალავრო და სამაგისტრო საგანმანათლებლო პროგრამებზე ჩარიცხული სტუდენტების დაფინანსებისთვის აცხადებს კონკურსს.

კონკურსში მონაწილეობის მიღება შეუძლიათ სტუდენტებს, რომლებიც:

2013, 2014 და 2015 წელს ჩაირიცხნენ უმაღლეს საგანმანათლებლო დაწესებულებებში აკრედიტებულ საბაკალავრო და სამაგისტრო პროგრამებზე;
ბოლო ექვსი წლის განმავლობაში სწავლობდნენ და ატესტატი მიიღეს აჭარის ავტონომიურ რესპუბლიკაში;
ბოლო სემესტრის საშუალო აკადემიური მოსწრება ტოლია, ან მეტი 71 % -სა.

დაფინანსება გაიცემა შემდეგი კატეგორიის სტუდენტებზე:

სტუდენტები მაღალმთიანი აჭარიდან: ქედა, შუახევი, ხულო;
დედით ან მამით ობოლი, უდედმამო;

მრავალშვილიანი ოჯახის წევრი: ოთხი და მეტი შვილი.

სოციალურად დაუცველი: 100 000 ქულა და ნაკლები.

კონკურსში მონაწილეობის მსურველებმა განცხადებები და ქვეპროგრამით გათვალისწინებული დოკუმენტები უნდა წარადგინონ სამინისტროში 2016 წლის 1 აგვისტოდან 2016 წლის 19 აგვისტოს ჩათვლით. შემდეგ მისამართზე: ქალაქი ბათუმი, ლადო გუდიაშვილის ქუჩა N4; ტელ – 24 53 78. ბმულის საშუალებით იხილეთ განცხადებისა და წარმოსადგენი დოკუმენტების ჩამონათვალი, ასევე იხილეთ ქვეპროგრამის აღწერილობა.

დაბრუნებულ მიგრანტთა რეინტეგრაცია – სერვისები პროგრამის ფარგლებში

„წამების მსხვერპლთა ფსიქო-სოციალური და სამედიცინო რეაბილიტაციის ცენტრი-ბათუმი“ ახორციელებს საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროს პროგრამას – დაბრუნებულ მიგრანტთა რეინტეგრაცია.

პროექტის ფარგლებში განხორციელდება:

სოციალური პროექტების დაფინანსება

სამუშაოს მაძიებელთა პროფესიული მომზადება-გადამზადება

კვალიფიკაციის ამაღლების პროგრამაში ბენეფიციართა ჩართვა

სამედიცინო მომსახურებისა და მედიკამენტების დაფინანსება.

მისამართი: ბათუმი, ყაზბეგის 5/7, ბინა 5
მობილური: 577 45 40 18

მკურნალობა ოპერაციის გარეშე

ნუგზარ თაბუნიძე და მისი შთამომავლობა მჭიდროდ უკავშირდება ხალხურ მედიცინას, რომელსაც ათასობით ადამიანი ემადლიერება. ნუგზარ თაბუნიძე და მისი ვაჟი, ნიკა თაბუნიძე პროფესიით ექიმები არიან და საგვარეულო რეცეპტით მკურნალობენ ისეთ დაავადებებს, როგორიცაა: რადიკულიტი, დისკოზი, პროლაფსი, პროტრუზიო, დისკოპათია, ართროზი, იშიაზი, მარილების დაგროვება, ნერვის ანთება და სხვა. თუ ეს დაავადებები გაწუხებთ, ნიკა თაბუნიძის მალამო გესაჭიროებათ.

თაბუნიძეების ოჯახში ორი მკურნალია. უფროსი, ექიმი ნუგზარ თაბუნიძე 50 წელზე მეტია თბილისში ცხოვრობს, მისი ვაჟი, ნიკა თაბუნიძე კი უკვე ბათუმშიც შეგიძლიათ ნახოთ, მეზღვაურთა სამედიცინო ცენტრში, ტაბიძის #2-ში. მან უკვე დაიმსახურა პაციენტების პატივისცემა და სიყვარული.

ნიკა თაბუნიძის კაბინეტთან ნახავთ ხელჯოხიანებს და წელში მოხრილ, წლობით ტკივილით გაწამებულ, დაღლილ ადამიანებს, რომლებიც წლობით მკურნალობდნენ უშედეგოდ საქართველოში თუ საზღვარგარეთ, მაგრამ უკან ისევ იმ პრობლემით, საშინელი ტკივილით და იმედგაცრუებულები ბრუნდებოდნენ. ნიკა თაბუნიძე უბრუნებს მათ ჯანმრთელობასა და იმედს. მის კაბინეტთან ასევე ნახავთ იმ ადამიანებს, რომლებიც ნიკა თაბუნიძის მკურნალობის შემდეგ ეწვიენ ექიმს მადლობის სათქმელად.

ნიკა თაბუნიძე ოპერაციის გარეშე მკურნალობს: ოსტეოქონდროზს, ართრიტს, ნერვის ანთებას, პროტრეზიას, ხერხემლის თიაქარს, პროლაფს, რადიკულიტს, სახსრებისა და ხერხემლის დაავადებებს.

აი, რას ამბობს ერთ-ერთი კლინიკის მთავარი ექიმი თ. ნაცვლიშვილი, რომელიც ნუგზარ თაბუნიძის ყოფილი პაციენტია: „ნუგზარ თაბუნიძე, `ოქროს ხელია~, რომელიც შველის უამრავ გაჭირვებულ, დაავადებულ ადამიანს. ის მოკლე ხანში აღწევს შედეგებს, რომლის შედარება არ შეიძლება იმ მეთოდებთან, რომლებიც გამოიყენება სამედიცინო პრაქტიკაში, ესაა: მედიკამენტოზური, ფიზიო-ბალნეო, მექანო-თერაპია, სამკურნალო ფიზკულტურა თუ სხვა მეთოდები. მე პირადად სისტემატურად ვიტარებდი მკურნალობას ყველა ამ მეთოდით, მაგრამ სასურველ შედეგს მაიც ვერ მივაღწიე. ნუგზარ თაბუნიძესთან მკურნალობის მხოლოდ ერთი კურსის ჩატარების შემდეგ ვიგრძენი მნიშვნელოვანი გაუმჯობესება, მომეხსნა ტკივილები წელისა და ფეხის არეში, გამითავისუფლდა მოძრაობა მუხლის სახსარში, სადაც მქონდა გონართროზი. დიდ მადლობას ვუხდი ნუგზარს ამ კეთილშობილურ საქმეში. მე დავრწმუნდი და ჩემი თვალით ვნახე, როგორ ამარცხებს ის პროთრეზიას, დისკოპათიას, პროლაფს, ნერვის ანთებას, სინდრომებს და სხვა.“

თაბუნიძე მესხური გვარია, რომლის წარმომადგენლები თავიანთი საგვარეულო მეთოდით, საუკუნეებია მკურნალობენ ადამიანებს. სულხან-საბა ორბელიანის განმარტებით, `თაბუნი~ არაბული წარმოშობის სიტყვაა. „თაბუნი ნახეთ აქიმი“, – ამბობს საბა და განმარტავს, რომ „აქიმი“ იგივე „ექიმია“. ასე რომ „თაბუნობა“ ყოფილა ექიმის პროფესია, რომელიც გვარითა და მემკვიდრეობით გადადიოდა საუკუნეების მანძილზე. თაბუნიძეების გვარის ისტორიას უკავშირდება გადმოცემა და ისტორიული ცნობები იმის შესახებ, რომ თაბუნიძეები ბაგრატიონთა სამეფო გვარის მკურნალები იყვნენ.

„ნიკა თაბუნიძის მკურნალობის ეფექტურობის ყველაზე აშკარა ნიშანი ისაა, რომ არ დარჩენილა ძველი თუ ახალი თაობის, მთავრობის, პარლამენტის, სასულიერო ფენის წარმომადგენელი, რომ არ ემკურნალათ ნიკა თაბუნიძესთან. მკურნალობენ: მოხუცები, ახალგაზრდები, ქალები, ბავშვები, მამაკაცები, მწერლები, კომპოზიტორები, სპორტსმენები – მსოფლიო და ოლიმპიური ჩემპიონები. მკურნალობენ ისეთი ადამიანებიც, რომლებმაც მოიარეს მოწინავე განვითარებული ქვეყნები და რომ ვერ ეშველათ, მოდიან აქ,“ – ამბობს კიდევ ერთი მადლიერი პაციენტი, უკვე დღეს, თანამედროვე საქართველოში.

ნუგზარ თაბუნიძეს მიწვევა აქვს მრავალ განვითარებულ ქვეყანაში, მაგრამ საქართველოდან არ მიდის. ამბობს, რომ მისი ყოფნა ქვეყანაში ხალხს სჭირდება.

ექიმ ნიკა თაბუნიძეს შეგიძლიათ მიმართოთ შემდეგ მისამართზე:
ბათუმი, ტაბიძის ქუჩა #2.
ჩასაწერად დარეკეთ წინასწარ მობილურზე: 568 03 11 03

ექიმ ნუგზარ თაბუნიძეს შეგიძლიათ მიმართოთ შემდეგ მისამართზე:
თბილისი, ვაკე, წყნეთის ქუჩა, მესამე კორპუსი. მობილური: 599 22 11 66

ბათუმის საკრებულოში მოქალაქეთა მიერ ინიცირებული პეტიციების განხილვა

„დემოკრატიის ინსტიტუტის“ პროექტის – „პეტიცია-ხალხის ხმა თვითმმართველობაში“ ფარგლებში ბათუმის საკრებულოში მოქალაქეთა მიერ ინიცირებული 7 პეტიციის განხილვა დაიწყო. აღნიშნულთან დაკავშირებით ბათუმის დემოკრატიული ჩართულობის ცენტრში დისკუსია გაიმართა.

„დემოკრატიის ინსტიტუტის“ ინფორმაციით, შეხვედრის მონაწილე ბათუმის საკრებულოს წევრებმა მზადყოფნა გამოთქვეს ითანამშრომლონ გარკვეული საკითხების გადაწყვეტის თაობაზე, საკრებულოს კომპეტენციის ფარგლებში. არასამთავრობო ორგანიზაციები კი მზად არიან ერთობლივი თანამშრომლობით ხელი შეუწყონ სამოქალაქო აქტივობის გაძლიერებას.

ბათუმის საკრებულოში ინიცირებული პეტიციებია:

გარე ვაჭრობის ფორმით ქ. ბათუმის ტერიტორიაზე აიკრძალოს პიროტექნიკის რეალიზაცია. ბოლო წლებში გახშირდა პიროტექნიკით გამოწვეული ადამიანთა ჯანმრთელობის დაზიანების შემთხვევები.

გონიოს დასახლებაში, სვიმონ კანანელის ქუჩაზე მდებარე 30-ე საჯარო სკოლის მიმდებარე ტერიტორიიდან გონიო-აფსაროსის მუზეუმ-ნაკრძალის არსებულ მონაკვეთზე მოეწყოს ქვეითთა ბილიკი, ან ტროტუარი. ადგილობრივ მოსახლეობას და ტურისტული მიზნით მყოფ მოქალაქეებს ხშირად უხდებათ ავტოსატრანსპორტო საშუალებისათვის განკუთვნილ გზაზე ფეხით გადაადგილება, რაც ერთის მხრივ, ხელს უშლის ავტოსატრანსპორტო საშუალების მოძრაობას და მეორეს მხრივ, საფრთხეს უქმნის ადამიანთა სიცოცხლეს და ჯანმრთელობას, განსაკუთრებით სკოლის მოსწავლეებს.

ურეხის უსახლკაროთა თავშესაფრის შენობის ბაზაზე მოეწყოს ხანდაზმულთა თავშესაფარი. გაიზარდა უსახლკარო ხანდაზმულთა რაოდენობა. მოქმედ თავშესაფარში კი არ არის თავისუფალი ადგილები.

ადლიის დასახლების მთავარი შესასვლელისა და აეროპორტის გზატკეცილის კვეთაში მოეწყოს ქვეითთა ფეხით გადასასვლელი, ან შუქნიშანი. ინტენსიური საავტომობილო მოძრაობის გამო მნიშვნელოვნად გაზრდილია ავტოსაგზაო შემთხვევების რაოდენობა.

ქუჩებსა და საკვანძო ადგილებზე მოეწყოს ავტომანქანის მოძრაობის სისწრაფის განმსაზღვრელი რადარები და სიჩქარის შემზღუდავი ბარიერები. ახალ ქუჩებზე არ არის სიჩქარის შემზღუდავი ბარიერები და რადარები, რის გამოც ხშირია ავტოავარიების შემთხვევები

ლეხ და მარია კაჩინსკების ქუჩის დასასრულიდან აეროპორტის გზატკეცილამდე (აეროპორტის ასაფრენი ზოლის პარალელურად მდებარე) არსებული გზის მონაკვეთს მიენიჭოს ქუჩის სტატუსი და დაერქვას სახელი. გამომდინარე იქედან, რომ ეს ადგილი გამორჩეულია ოფიციალური დელეგაციების სტუმრობით და ამავდროულად არის ლეხ და მარია კაჩინსკების ქუჩის გაგრძელება, სასურველია დაერქვას „ევროპის ქუჩა“.

ქალაქში ცენტრალური ქუჩების გზაჯვარედინებზე მოეწყოს სასმელი წყლის შადრევნები.

ვაკანსიები ბათუმის საქალაქო სასამართლოში

ოთხ ვაკანსიაზე კონკურსს ბათუმის საქალაქო სასამართლო აცხადებს. სასამართლოში შექმნილი საკონკურსო-საატესტაციო კომისია გასაუბრების ფორმით შეარჩევს სასამართლოს თავმჯდომარის პირად მდივანს [თანამდებობრივი სარგო 605 ლარი], 2 სპეციალიტს კანცელარიის და მოქალაქეთა მისაღების განყოფილებისთვის [თანამდებობრივი სარგო 570 ლარი] და კურიერს [თანამდებობრივი სარგო 485 ლარი]

გასაუბრების ეტაპზე გადავლენ ისინი, ვისაც კომისია აპლიკაციების საფუძველზე შეარჩევს. სამივე საკონკურსო პოზიციაზე უცხო ენის ცოდნა და სამუშაო გამოცდილება მხოლოდ სასურველია, იურიდიული განათლება მხოლოდ თავმჯდომარის მდივნისთვის არის აუცილებელი, კურიერი კი შესაძლოა პირი საშუალო განათლებითაც გახდეს 21 წლის ასაკიდან.

საკონსკურსო-საატესტაციო კომისიას ბათუმის საქალაქო სასამართლოში თავმჯდომარე დავით მამისეიშვილი ხელმძღვანელობს, მოადგილე – მოსამართლე ვიოლეტა ფორჩხიძეა. კომისიის წევრები არიან მოსამართლეები: ჯუმბერ ბეჟანიძე, გოჩა ფუტკარაძე, ლაშა თავართქილაძე. კომისიამ ასევე მოიწვია სპეციალისტი, ბსუ-ს პროფესორი ადამ მახარაძე და დამოუკიდებელი სპეციალისტი, ადვოკატი, თეონა ჭუმბურიძე.

განაცხადების მიღების ბოლო ვადა 4 ივლისია. კონკურსის შესახებ დეტალური ინფორმაციის მიღება შესაძლებელია საჯარო სამსახურის ბიუროს ოფიციალური ინტერნეტ გვერდიდან.

პოლიციელზე თავდასხმაში ბრალდებულები გაამართლეს

მოსამართლე თამარ ბეჟანიშვილმა უდანაშაულოდ სცნო პოლიციელზე თავდასხმაში ბრალდებული ორი პირი. წინასწარ პატიმრობაში მყოფი ბრალდებულები შიმშილობდნენ. მათ ქობულეთში, წყალსაცავის სახელმწიფო დაცვის პოლიციის თანამშრომლის დანით დაჭრაში ედებოდათ ბრალი.

გამოძიების საქმის მასალების მიხედვით, დაპირისპირება წყალსაცავის მიმდებარედ არსებულ კაკლის ბაღში მოხდა, სადაც ბრალდებულები კაკლის მოპარვას ცდილობდნენ. პოლიციელმა თემურ მოწყობილმა სასამართლოსთვის მიცემულ ჩვენებაში თქვა, რომ მას გულ-მკერდის არეში, მარცხენა მხარეს დანით ჭრილობა მიაყენეს.

ადვოკატი რამინ პაპიძე ამ საქმეში ყურადღებას ამახვილებდა იმაზე, რომ პოლიციელებმა ურთიერთგამომრიცხავი ჩვენებები მისცეს სასამართლოს: „გამოძიება ამბობს, რომ ამოცნობა ჩავატარეო, მაგრამ დაზარალებულად ცნობილმა თემურ მოწყობილმა თქვა, რომ ამოცნობა ხუცუბნის პოლიციის შენობაში შედგა, გამომძიებელმა მამუკა ღვინიანიძემ კი გამორიცხა ხუცუბანი და თქვა, რომ ამოცნობა ქობულეთის პოლიციის შენობაში შედგა.“

ადვოკატები ასევე ეჭვობენ, რომ სისხლის ლაქებით დასვრილი მაისური, რომელიც საქმის მასალებში დევს, პოლიციელს არ ეკუთვნის: „გაუგებარია, როგორ აღმოჩნდა სისხლის ლაქა ჭრილობის ზემოთ. ჩემი დაცვის ქვეშ მყოფი ამბობს, რომ დაცვის პოლიციელი მათთან სამოქალაქო ფორმაში მივიდა და ეჩხუბა, თქვენ არ გეკუთვნით კაკალიო. ბრალდებულებმა ექსპერტიზის ჩატარებაც მოითხოვეს, რაც დაადასტურებდა, რომ პირიქით, ამ პოლიციელმა სცემა ბრალდებულები. ექსპერტიზის ჩატარებაზე პროკურატურამ საერთოდ რეაგირება არ მოახდინა, როცა ბრალდებულმა ს.ჩ.-მ თქვა, რომ მას არ აქვს ექსპერიტიზის ჩატარების ხარჯი და იქნებ ეს გამოძიებას დაეფინანსებია“ – ამბობდა „ბათუმელებთან“ ადვოკატი მერი ცინარიძე.

ადვოკატები დადებითად მიიჩნევენ სასმართლოს გადაწყვეტილებას, რადგან ბოლო პერიოდში გააქტიურდა პოლიციელებისთვის წინააღმდეგობის გაწევისა და თავდასხმის ბრალდებით გამოძიების დაწყება. ერთ-ერთ ასეთ საქმეში, ასევე მოსამართლე თამარ ბეჟანიშვილმა ტყუილში გამოიჭირა პოლიციის მაღალჩინოსნები პოლიციისვე გადაღბეული ვიდეოკადრებით. ეს სამართალდამცველები პოლიციის სისტემაში დღემდე განაგრძობენ მუშაობას.

ახალი ნაგავსაყრელი – ერთლარიანი სხვაობა ტენდერში

„ქობულეთის მუნიციპალიტეტის, სოფელ ცეცხლაურში ახალი ნაგავსაყრელი პოლიგონის სამშენებლო სამუშაოების პროექტის მართვისა და ტექნიკური ზედამხედველობის მომსახურების შესყიდვაზე“ გამოცხადებულ გამარტივებულ ტენდერში წინადადებების მიღება დასრულებულია.

ტენდერში, რომელიც კომპანია „ჰიგიენა 2009“-მ გამოაცხადა, ორი კომპანია მონაწილეობდა: „გზამშენპროექტი“, რომლის საბოლოო შეთავაზებაა 300 ათასი ლარი და შპს ფორმა 2-ის ფილიალი საქართველოში, რომლის შეთავაზება 1 ლარით ნაკლებია კონკურენტზე, ანუ 299 999 ლარი. გამარჯვებულს სატენდერო კომისია გამოავლენს.

ტენდერის გამოცხადებისას მომსახურების შესყიდვის სავარაუდო ღირებულება 400 ათასი ლარი იყო.

აჭარის ფინანსთა და ეკონომიკის სამინისტროს ინფორმაციით, აჭარის მყარი ნარჩენების მართვის პროექტი EBRD-ის და SIDA-ს მხარდაჭერით ხორციელდება: „საერთო ინვესტიციაა – 7 მილიონი ევრო. პროექტი ითვალისწინებს: ახალი სანიტარული ნაგავსაყრელი პოლიგონისა და მისასვლელი გზის მშენებლობას 2016 წლის ბოლოსათვის, რაშიც დაიხარჯება საგრანტო 4 მლნ. ევრო და ბათუმისა და ქობულეთის (ორი) არასტანდარტული მოქმედი ნაგავსაყრელების ეტაპობრივ დახურვას 2017-2018წლებში, რასაც მოხმარდება 3 მლნ. ევრო“.

„საარსებო გარემოს აღდგენისა და განსახლების ჩარჩო დოკუმენტის“ მიხედვით, კომპენსაციისთვის გათვალისწინებული მთლიანი ბიუჯეტი 2,5 მილიონი ლარია [დაახლოებით 1 მილიონი ევრო]. ეს მოიცავს 20% გაუთვალისწინებელ ხარჯებს [დაახლოებით 413 ათას ლარს], რომელიც განკუთვნილია ისეთი ხარჯებისთვის, როგორიცაა, ვთქვათ, იმ თანამშრომლების შემოსავალი, რომლებიც იმუშავებენ განსახლების გეგმის შესრულებაზე.

აღნიშნული თანხიდან 1,56 მილიონი ლარი გათვალისწინებულია როგორც ფულადი კომპენსაცია ადგილმდებარეობის მონაცვლეობისთვის [მიწის დაკარგვა მიწის მესაკუთრეებისთვის/რეგისტრებული მოსარგებლეებისთვის/მიტაცებული მიწებისთვის – 80-მდე ნაკვეთი, ჯამში 20 ჰექტარი]; მიწის გადაცემისა და რეგისტრაციის ასანაზღაურებლად საჭირო დახმარებისთვის – 5 ათასი ლარი, ხოლო ფულადი კომპენსაცია სახლის და სხვა ნაგებობების ღირებულების შესაბამისად – 210 ათასი ლარი. პროექტით, სულ ცეცხლაურში მიწის შესყიდვისათვის 2 068 500 ლარი იქნება საჭირო.

საკრებულოს გადაწყვეტილება გონიოს მიწებზე

ბათუმის საკრებულოს მიწის საკუთრების აღიარების მუდმივმოქმედმა კომისიამ ბათილად გამოაცხადა ხელვაჩაურის საკუთრების კომისიის ის ოქმი, რომლის მიხედვითაც, გონიოში 271 ოჯახს მიწის საკუთრების უფლება 2010 წელს ჩამოართვეს.

„კომისიამ მიიჩნია, რომ საკუთრების ჩამორთმევა მოხდა არა კანონმდებლობით გამყარებული საფუძვლებით, არამედ ხელოვნურად გამოგონილი მიზეზებით” – აღნიშნა დღევანდელ ბრიფინგზე საკრებულოს თავმჯდომარე, ირაკლი ჭეიშვილმა.

„გილოცავთ ყველას, ჩვენი მოთხოვნა შესრულებულია“ – უთხრა შეხვედრიდან გამოსულმა გონიოელმა ენვერ ირემაძემ აქციის მონაწილეებს. მიწის საკუთრების დაბრუნების მოთხოვნით აქცია ბათუმის საკრებულოსთან 14 ივნისიდან დღემდე გრძელდებოდა.

კანონმდებლობის მიხედვით, თითოეულმა გონიოელმა ინდივიდიალურად უნდა მიმართოს საკუთრების აღიარების კომისიას: „მოთხოვნის დაკმაყოფილების შესაბამისად, მათ აღუდგებათ საკუთრება“ – აცხადებს ირაკლი ჭეიშვილი. ის არ აკონკრეტებს, რამდენია ასეთი ოჯახი, ვისი მიწის საკუთრების აღიარებისთვის საკმარისი პირობა არსებობს.

„ეს დადებითი გადაწყვეტილებაა და იგი მოქალაქეებს გაუადვილებს სასურველი გადაწყვეტილების მიღების პროცესს. კომისიას სამთვიანი ვადა ექნება იმისთვის, რომ ხელახლა შეისწავლოს თითოეული შემთხვევა. თუკი კომისია რომელიმე მოქალაქეს საკუთრებაზე უარს ეტყვის, მას ექნება საფუძველი, მიმართოს სასამართლოს“ – ამბობს „ბათუმელებთან“ ნინო სიორიძე, „საერთაშორისო გამჭვირვალობა საქართველოს“ იურისტი.

დღევანდელ ბრიფინგზე განმარტებები გააკეთა ლევან კინწურაშვილმაც, ბათუმის საკრებულოს მიწის საკურების აღიარების მუდმივმოქმედი კომისიის თავმჯდომარემ: „თავდაპირველად რეესტრი დაადგენს ზედდებას, რადგან ეს მიწები ამჟამად სახელმწიფო საკუთრებაა. ზედდების კომისიის შემდეგ განაგრძობს მუშაობას ჩვენი კომისია“.

„რატომ გაუჭირდა კომისიას გადაწყვეტილების მიღება დღემდე და გაირა თუ არა კონსულტაციები კომისიამ მთავრობის ეკონომიკურ საბჭოსთან?“ – „ბათუმელების“ ამ შეკითხვაზე ლევან კინწურაშვილმა უპასუხა, რომ კომისიას ბევრი რამ ჰქონდა დასაზუსტებელი და კონსულტაციებიც გაიარა, მათ შორის, ეკონომიკური განვითარების საბჭოსთან. კინწურაშვილის მტკიცებით, კომისიის კონსულტაციები მხოლოდ იმ ნაწილს შეეხებოდა, რომ ამ მიწებთან ახლოს მდებარეობს ეროვნული მნიშვნელობის კულტურული მემკვდირეობის ძეგლი – გონიო-აფსაროსის ციხე.

გონიოს ციხეს კანონმდებლობა იცავს, რომლის მიხედვითაც, ძეგლიდან 500 მეტრის რადიუსში აკრძალულია ყოველგვარი სამშენებლო სამუშაოები.

გონიოში მოქალაქეებისათვის მიწის ნაკვეთებზე საკუთრების აღიარების კომისიის მუშაობასა და შესაბამის სამართლებრივ პროცესებთან დაკავშირებით ბათუმის მერიასა და საკრებულოს რამდენიმე დღის წინ საზოგადოება „ბათომმაც“ მიმართა.

ბათუმი, აბაშიძის №48 – გალაკტიონი, სტალინი და ეროვნული საბჭო ერთ მისამართზე

ბათუმში, აბაშიძის №48-ში სახლი ფასადით გამოდის ქუჩაზე, შიდა ეზოში კი რამდენიმე შენობა მდებარეობს. სახლს კულტურული მემკვიდრეობის სტატუსი არ აქვს, თუმცა შენობა ბათუმის ერთ-ერთ უძველეს ქუჩაზე, რომელსაც მე-20 საუკუნის დასაწყისში მარიას გამზირს უწოდებდნენ, ისტორიულია.

საზოგადოება „ბათომის” დამფუძნებელი, რეჟისორი შოთა გუჯაბიძე ამბობს, რომ ამ სახლს საქართველოს ისტორიაში უმნიშვნელოვანესი სახელები უკავშირდება: საქართველოს ეროვნული საბჭოს, სტალინისა და გალაკტიონ ტაბიძის.

აბაშიძის №48-ში ამჟამად რამდენიმე ოჯახი ცხოვრობს. აქვე მდებარეობს გაზეთ „ბათუმელების“ რედაქციის ოფისი და სტუდია „იალონი”, სადაც საზოგადოება „ბათომის“ დამფუძნებელი შოთა გუჯაბიძე მუშაობს.

შოთა ამბობს, რომ აბაშიძის №48-ის შესახებ ჩანიშვნას ჯერ გალაკტიონ ტაბიძის ჩანაწერებში წააწყდა შემთხვევით, ძიების პროცესში კი უკვე სხვა ამბებიც გამოჩნდა, რომელიც, ასევე, ამ სახლს უკავშირდება.

„ლიტერატურის მუზეუმმა გააკეთა ვებგვერდი გალაკტიონზე, სადაც ყველა ინფორმაციაა გამოქვეყნებული, მისი ჩანაწერები, წიგნაკები…

ამ ვებგვერდის დათვალიერებისას შემთხვევით ვიპოვე გალაკტიონის ჩანაწერი: „ბათუმი, სტალინის №48, თამარი“.

ბუნებრივია, გამიჩნდა ინტერესი, რას უკავშირდებოდა ეს ჩანაწერი და დავიწყე თამარის ძებნა იმ ადამიანებთან, რომლებიც აქ ცხოვრობდნენ. გალაკტიონს ჩანაწერი გაკეთებული აქვს 1957 წელს, აღმოჩნდა, რომ ამ მისამართზე მაშინ ცხოვრობდა 27 ოჯახი და მათ შორს იყო მხოლოდ ერთი თამარი, მაშინდელი „დომკომი“.

მქონდა იმედი, რომ ეს ჩანაწერი: თამარი, ბათუმი, ზღვა, გალაკტიონი… რაღაც რომანტიკულ ისტორიასთან იქნებოდა დაკავშირებული, მაგრამ როგორც აღმოჩნდა, არც მთლად ასე იყო საქმე“, – ამბობს შოთა. იგი ვარაუდობს, რომ გალაკტიონს აბაშიძის №48-ში სახლმმართველი თამარი შესაძლოა საბინაო საკითხის მოსაწესრიგებლად დასჭირვებოდა, თუმცა ეს მხოლოდ ვარაუდია.

„გალაკტიონს, რომელიც ამ დროს უკვე პოეტი აკადემიკოსი იყო, შეიძლება „ინტურისტშიც“ ეცხოვრა, ამიტომაც ეს ჩანაწერი მაინც ბუნდოვანია, მაგრამ აქ ჩნდება კიდევ ერთი ადამიანი, გაბრიელ ივანეს ჩანგიშვილი, უბნის მეამბოხე და სკანდალისტი. იმავე გვერდზე აქვს ჩანიშნული გალაკტიონს მისი სახელი და გვარიც.

ამ ამბავში იმასაც აქვს მნიშვნელობა, რომ აბაშიძის №48 საჯარო ბიბლიოთეკის წინ მდებარეობს, სადაც გალაკტიონს მოუწყობდნენ შეხვედრებს“, – ამბობს შოთა.

ბათუმში, აბაშიძის №48-ში გალაკტიონის კვალის ძიებისას შოთამ ამ სახლში იმ ადამიანის კვალიც იპოვა, რომლის სახელსაც ატარებდა მაშინ მემედ აბაშიძის გამზირი.

№48-ში მდებარე სახლი იოსებ სტალინზეც ინახავს მოგონებას. 1901 წელს ქარხნის მუშა იოსებ ჯუღაშვილი სწორედ ამ შენობაში მართავდა არალეგალურ შეხვედრებს.

„თამარის ძებნისას გავიგე ეს ამბავიც. თამარის შვილმა მიამბო დედამისის მონათხრობი იმის შესახებ, თუ როგორ დააკაკუნეს ერთ დღეს მათ კარზე. კართან ხანდაზმული ადამიანი იდგა, რომელსაც შემოსვლა და ოთახის დათვალიერება უთხოვია. მიზეზი რომ ჰკითხეს, ამ ადამიანს უთქვამს, რომ 1901 წელს სწორედ ამ ოთახში ესწრებოდა არალეგალურ შეხვედრებს, რომელსაც სტალინი მართავდა.

ბათუმში, ზოგადად, ბევრი მითქმა-მოთქმა არსებობს, რომ აი, იქ იმალებოდა სტალინი, იმან გაქცია… ტყუილისა და სიმართლის გარჩევა ჭირს ხოლმე, თუმცა ამ შემთხვევაში გვაქვს ადამიანის მონათხრობი, რომელსაც არ გვაქვს უფლება, რომ არ ვენდოთ“, – ამბობს შოთა.

კიდევ ერთი სახელი, რომელიც აბაშიძის №48-თანაა კავშირში, საქართველოში ისეთ მნიშვნელოვან ორგანიზაციას უკავშირდება, როგორიცაა საქართველოს ეროვნული საბჭო, რომელმაც 1918 წლის 26 მაისს საქართველოს დამოუკიდებლობა გამოაცხადა.

„ეს ამბავი იმით დაიწყო, რომ ხელში ჩამივარდა დოკუმენტი, რომელსაც აწერია: ბათომი, ეროვნული საბჭო.

ირაკლი ხვადაგიანის დახმარებით, რომელიც არის საბჭოთა წარსულის კვლევის ლაბორატორიის წევრი და მკვლევარი, ვიპოვეთ მისამართი, სადაც მდებარეობდა ბათუმში ეროვნული საბჭო და ეს იყო სწორედ აბაშიძის, მაშინ მარიას გამზირის №48. ეს ამბავიც ამდიდრებს ამ სახლის ისტორიას“, – ამბობს შოთა.

შოთა ფიქრობს, რომ შესაძლოა აბაშიძის №48-ის ამბავი ამით არც დასრულდეს.

„ძებნა ისეთი პროცესია, რომ ყოველთვის სადღაც მიჰყავხარ, სხვა რაღაცებს აღმოგაჩენინებს. მე მხიბლავს ეს პროცესი. გადაწყვეტილი მაქვს, აბრა გავაკეთო და სახლზე გავაკრა გალაკტიონის ხელით დაწერილი ეს მისამართი: „ბათუმი, სტალინის №48. თამარი.“

შსს: ამოღებულია უკანონო ცეცხლსასროლი იარაღი

შსს-ს ინფორმაციით, სასაზღვრო პოლიციის საგამოძიებო-ოპერატიული მთავარი სამმართველოს თანამშრომლებმა, ცეცხლსასროლი იარაღის და საბრძოლო მასალის მართლსაწინააღმდეგო შეძენა-შენახვა-ტარების ბრალდებით, 1976 წელს დაბადებული მამუკა ქ. ბათუმში დააკავეს.

„სამართალდამცველებმა, მამუკა ქ.-ს კუთვნილი ავტომანქანის ჩხრეკისას, ქარხნული წესით დამზადებული, უცხოური წარმოების, “NORINCO MODEL 213” -ის მოდელის პისტოლეტი და 2 საბრძოლო ვაზნა ამოიღეს“ – აღნიშნულია შს სამინისტროს განცხადებაში.

გამოძიება ცეცხლსასროლი იარაღის და საბრძოლო მასალის მართლსაწინააღმდეგო შეძენა-შენახვა-ტარების ფაქტზე მიმდინარეობს [საქართველოს სსკ-ის 236-ე მუხლის მე-2 და მე-3 ნაწილებით].

აჭარაში გაზის მიწოდება 27-29 ივნისს აღდგება

„სოკარ ჯორჯია გაზი“ თავის აბონენტებს აფრთხილებს, რომ ხვალ, 27 ივნისიდან დაიწყება ბუნებრივი აირის მიწოდება, რის გამოც მოსახლეობამ უნდა გამოიჩინოს სიფრთხილე და ყურადღება მიაქციოს გაზის დანადგარებს.

„სოკარ ჯორჯია გაზის“ ცხელ ხაზზე, „ბათუმელების“ შეკითხვას, რომელი საათიდან დაიწყება გაზის მიწოდება, პასუხობენ, რომ მსგავსი ტიპის ინფორმაციას არ ფლობენ: „ხვალიდან დაიწყება, რომელ საათზე ვერ გეტყვით. რაც შეეხება, გაზის მიწოდების სრულად აღდგენას 29 ივნისს დასრულდება“.

ყვავილები ბათუმის ბოტანიკური ბაღიდან – თორნიკე თავაძის ფოტორეპორტაჟი

მამაკაცის მდგომარეობა, რომელსაც მოპედი დაეჯახა, სტაბილურად მძიმეა

25 ივნისს, საღამოს 12 საათზე, გორგილაძის ქუჩაზე ფეხით მოსიარულე მამაკაცს მოპედი დაეჯახა. ბათუმის სასწრაფო სამედიცინო დახმარების სამსახურის ინფორმაციით, 55 წლამდე ასაკის მამაკაცი საკმაოდ მძიმე დაზიანებით ბათუმის რეფერალურ საავადმყოფოში გადაიყვანეს.

როგორც „ბათუმელებს“ რეფერალური საავადმყოფოს პრესსამსახურში უთხრეს, მამაკაცს ამ დროისათვის სხვადასხვა სახის ოპერაცია უტარდება. მისი მდგომარეობა სტაბილურად მძიმეა.

შსს-ს ინფორმაციით, გამოძიება მიმდინარეობს სისხლის სამართლის კოდექსის 124-ე მუხლით, რაც გულისხმობს ჯანმრთელობის ნაკლებად მძიმე ან მძიმე დაზიანებას გაუფრთხილებლობით. შსს-ს პრესსამსახურის ინფორმაციით, მოპედის მძღოლიც გადაყვანილია ბათუმის რეფერალურ საავადმყოფოში.

ბათუმის რეფერალურ საავადმყოფოდან ამ დროისათვის მოპედის მძღოლის ჯანმრთელობის მდგომარეობის შესახებ ინფორმაციას ვერ გვაწვდიან. „ექიმები საოპერაციოში არიან, მთელი დღის განმავლობაში მიმდინარეობს ოპერაციები და ამ დროისთვის სხვა პაციენტზე ინფორმაციას ვერ ვარკვევთ“, – უთხრეს „ბათუმელებს“ რეფერალური საავადმყოფოს პრესსამსახურში.