აჭარის უმაღლეს საბჭოში, სამმა ფრაქციამ – „თანასწორობა“, „მაჟორიტარები“ და „ნაციონალური მოძრაობა“ აჭარის მთავრობის იმჩიპმენტის პროცედურა დაიწყო.
ამის თაობაზე განცხადება დღეს, 23 მაისს აჭარის უმაღლეს საბჭოში, „ნაციონალური მოძრაობის“ წევრმა პეტრე ზამბახიძემ გააკეთა.
„მთავრობისათვის უნდობლობის გამოცხადების პროცედურა დაიწყო დღეს, ბოლო წლების განმავლობაში მთავრობის უმოქმედობისა და უუნარობისათვის, მხოლოდ საკუთარ ინტერსებზე მორგებული საკადრო პოლიტიკისა და კორუფციული გარიგებებისათვის, ასევე უმნიშვნელოვანესი ინვესტიციების განუხორციელობლობისათვის, შეჩერებული პროექტებისთვის, საკადრო პოლიტიკის გამო. ასევე, უმაღლესი საბჭოს მიმართ არასწორი და არაგონივრული ნაბიჯების გადადგმისათვის და საარჩევნო კომისიის თავმჯდომარისა და წევრის პარტიულ-ნათესაური ნიშნით წარმოდგენისათვის“- აცხადებს პეტრე ზამბახიძე.
პეტრე ზამბახიძის განცხადებით კულმინაცია იყო მთავრობის თავმჯდომარისგან წამოყენებული კანდიდატურა უსკოს თავმჯდომარისა და წევრის შესარჩევად, სადაც ნათესავი და პარტიის ყოფილი წევრი ან პარტიული აქტივისტი (კვაჭაძე, ქარცივაძე, ჯაში) წარმოადგინა.
„გარდა ამისა, შეჩერებულია სტადიონი და თანხები მათ ანგარიშზე დევს, გაზიფიკაციის პროცესი ზემო აჭარაში დაწყებულიც კი არ არის, იპოთეკით დაზარალებულები რომ კვლავ აწყობენ აქციებს და ის რაც ხელისუფლებამ დაპირდა მათ, შეუსრულებელია, ეკომიგრანტების საკითხი უნდა მოგვარებულიყო და დაპირება არ შეუსრულეს და ბევრი ისეთი საკითხი, რომელიც მოსახლეობას შეეხება.
დოკუმენტი დღეს გავუგზავნეთ უმაღლესი საბჭოს ბიუროს, სადაც ჩამოწერილია ყველა მიზეზი რის გამოც გამოვუცხადეთ უნდობლობა“-აცხადებს ის.
პეტრე ზამბახიძის თქმით, მთავრობის იმპიჩმენტის საკითხი 16 ივნისის სხდომაზე განიხილება და კენჭისყრა ფარული იქნება.
