Batumelebi

სამედიცინო საქმიანობის სახელმწიფო რეგულირების სააგენტოსთან არსებულმა პროფესიული განვითარების საბჭომ აჭარის ეკონომიკის ყოფილი მინისტრის მოადგილის, თემურ გაბაიძის გარდაცვალების საქმეში „ევექსის“ ექიმების პასუხისმგებლობის საკითხზე გადაწყვეტილება მიიღო.

ოჯახის ცნობით, პროფესიული საბჭოს გადაწყვეტილებით, შპს „ემერჯენსი სერვისის“ ექიმს, ხათუნა გელაშვილს შეუჩერდა სახელმწიფო სერტიფიკატის მოქმედება სამი თვის ვადით და დაევალა კვალიფიკაციის კურსის გავლა. შპს „უნიმედი აჭარას“ რეფერალური საავადმყოფოს ექიმებს: გიორგი კავთელაძესა და მაია მამისაიშვილს გაუუქმდათ სახელმწიფო სერტიფიკატები სპეციალობებში: ანესთეზიოლოგია და რეანიმატოლოგია.

თემურ გაბაიძის დედა, ნაირა დიასამიძე „ბათუმელებთან“ ამბობს, რომ მისი აზრით, უნდა დამდგარიყო არა მხოლოდ ექიმების, არამედ სხვა, ზემდგომი პირების პასუხისმგებლობის საკითხიც:

„საავადმყოფოში მსგავსი რამ ხდება და პასუხს არ აგებს განყოფილების უფროსი, მთავარი ექიმი. გარდა ამისა, ყველაზე მეტად ვისაც უნდა გამოეჩინა ყურადღება, იმას მხოლოდ სამი თვით შეუჩერეს [სერტიფიკატის მოქმედება], ამას არ ვეთანხმები.“

თემურ გაბაიძის გარდაცვალებასთან დაკავშირებით საქმეს შს სამინისტრო სისხლის სამართლის კოდექსის 116-ე მუხლით იძიებს, რაც ნიშნავს სიცოცხლის გაუფრთხილებლობით მოსპობას.

_________________________________

თემურ გაბაიძე გასულ წელს, კუროტ „გოდერძიზე“ დაშავდა და დაშავებიდან რამდენიმე დღის შემდეგ ბათუმის რეფერალურ საავადმყოფოში გარდაიცვალა. მისი სამედიცინო ისტორია საქართველოს სამედიცინო საქმიანობის სააგენტომ გარდაცვლილის ოჯახის მიმართვის საფუძველზე შეისწავლა და 2017 წლის ნოემბერში რამდენიმე დარღვევა დაადგინა.

კერძოდ:

სწორი დიაგნოზი დაისვა დაგვიანებით, ჩატარებული სამკურნალო ღონისძიებები კი არაადეკვატური იყო.

ოპერაციისას, ანესთეზიის დროს, დაშვებული იყო შეცდომა და გამოყენებული იყო მინიმალურ დოზაზე ნაკლები პრეპარატი, ასევე ოპერაცია მიმდინარეობდა არასაკმარისი ანალგეზიის პირობებში. არ ჩატარებულა ინფექციონისტის კონსულტაცია და ანტიკონვულსური (გვერდითი მოვლენები) თერაპია დაინიშნა არაადეკვატური სქემით და ა.შ.

_____________

ამავე თემაზე: 

მინისტრის კომენტარი თემურ გაბაიძის გარდაცვალების საქმეში ექიმების პასუხისმგებლობაზე

თემურ გაბაიძის დაღუპვიდან 14 თვე გავიდა, საბჭოს კი ექიმების პასუხისმგებლობაზე არ უმსჯელია 

ევექსის ექიმების პასუხისმგებლობა თემურ გაბაიძის გარდაცვალების საქმეში – სააგენტოს დასკვნა

ნარკოპოლიტიკის ეროვნული პლატფორმის მიერ მომზადებული კანონპროექტის თანახმად, ქართული ნარკოპოლიტიკა შეიძლება დახასიათდეს, როგორც ერთ-ერთი ყველაზე მკაცრი მსოფლიოში და უპირობოდ ყველაზე მკაცრი ევროპის რეგიონში.

საზოგადოების ნაწილი საკანონმდებლო რეფორმის აუცილებლობაზე საუბრობს, ნაწილი კი მიიჩნევს, რომ ლიბერალური ნარკოპოლიტიკა ნარკოტიკების მომხმარებლების გაზრდას გამოიწვევს.

კვლევამ, რომელიც ეყრდნობოდა ჯანმრთელობის მსოფლიო ორგანიზაციის (World Health Organization) მიერ 17 ქვეყნიდან მიღებულ მონაცემებს, დაადგინა: „მსოფლიოში ნარკოტიკების მოხმარება… არ არის დამოკიდებული ნარკოპოლიტიკაზე, რადგანაც იმ ქვეყნებში, რომლებსაც უმკაცრესი ნარკოპოლიტიკა აქვთ მომხმარებლის მიმართ, არ აღინიშნება მოხმარების უფრო დაბალი დონე, ვიდრე ლიბერალური კანონის მქონე ქვეყნებში“.

ნიშნავს თუ არა მეტი დასჯილი ნაკლებ მომხმარებელს, რა არის ლიბერალური ნარკოპოლიტიკა და რატომ არის აუცილებელი დღეს არსებული კანონმდებლობის შემსუბუქება. „ბათუმელები“ ადამიანის უფლებების სწავლებისა და მონიტორინგის ცენტრის EMC პროექტების კოორდინატორს, გურამ იმნაძეს ესაუბრა.

რას ნიშნავს ლიბერალური ნარკოპოლიტიკა? რა ტიპის ნარკოპოლიტიკა გვაქვს ახლა და რატომ არის საჭირო ცვლილება?

პირველ რიგში, არსებულ მდგომარეობას შევაფასებ. ორ სიტყვაში შეიძლება დავახასიათოთ – ეს არის რეპრესიული და არაეფექტური. რეპრესიულობა გამოიხატება იმაში, რომ განურჩევლად იმისა, ადამიანი მომხმარებელია, თუ შეიძინა და ინახავს გასაღების მიზნით, ხშირ შემთხვევაში ნარკოტიკის მცირე დოზის ფლობისთვის ძალიან მძიმე სამართლებრივი მსხვერპლი ხდებიან. ეს სანქცია შეიძლება იყოს რამდენიმეწლიანი პატიმრობა. ამას ემატება სახელმწიფოსგან მომდინარე სტიგმა ნარკოტიკის მომხმარებლების მიმართ. მეორე მხრივ, სახელმწიფოს უმოქმედობა, პასუხისმგებლობის გაუაზრებლობა რეაბილიტაციის, პრევენციის მიმართულებით, საბოლოო ჯამში, იწვევს ნარკოპოლიტიკის არაეფექტურობას, რადგან ნარკოპოლიტიკა არ დგას მხოლოდ ნარკოტიკის გასაღებაზე.

ჩვენ დღეს სახელმწიფოს ვხედავთ სწორედ იმ მექანიზმებით, რომელიც საჭიროა ნარკოტიკის გამსაღებელთან მიმართებაში, მაშინ, როცა ნარკოტიკის მოხმარებას ძალიან ბევრი მიზეზი შეიძლება ჰქონდეს. ნარკოტიკის მოხმარებას ძალიან ბევრი შედეგი აქვს, რასაც დასჯა ვერ შველის და ვერ ხედავს სისხლის სამართლის სასჯელი და ამ მიმართულებებით არის საჭირო ღონისძიებების გატარება. სხვა შემთხვევაში შეუძლებელია ვისაუბროთ ეფექტურობაზე. ეს რიცხვებითაც ჩანს, როცა ჩვენ წლიდან წლამდე გვეზრდება პრობლემური ნარკოტიკის მომხმარებლის რაოდენობა. და ძალიან ბევრი ადამიანის სოციალური და ჯანდაცვის მდგომარეობა უარესდება ამ პოლიტიკის პირობებში.

რას მოიტანს ლიბერალური ნარკოპოლიტიკა?

ნარკოტიკის მოხმარების დეკრიმინალიზაცია არ არის საბოლოო მიზანი. ეს არის ერთ-ერთი ინსტრუმენტი, ბაზისი, რომელიც ქმნის კარგ გარემოს იმისთვის, რომ სახელმწიფომ გაატაროს ეფექტური ნარკოპოლიტიკა.

ეს რაში გამოიხატება. მას შემდეგ თუკი ჩვენ ნარკომომხმარებლებს მხოლოდ მოხმარების გამო აღარ დავუძახებთ კრიმინალებს და ამის საპირწონედ მათ ექნებათ შეთავაზებული ადეკვატური სამკურნალო/სარეაბილიტაციო პროგრამები, ადამიანები ამ პროგრამებს მიაკითხავენ, მიხედავენ თავიანთ პრობლემებს. ამავდროულად, აუცილებელია პრევენცია, პრევენცია სასკოლო ასაკიდან.

2016 წლის კვლევებით შედარებული იყო სასკოლო ასაკში ნარკოტიკის მოხმარების დონე მოზარდებში ჩვენი და ევროპის საშუალო მაჩვენებელი. ჩვენ აქაც სამწუხარო მაჩვენებელი გვაქვს, როდესაც მძიმე ნარკოტიკული საშუალებები ინჰალატები და ასე შემდეგ არის თითქმის ორჯერ მეტი მოხმარების დონე სასკოლო ასაკში. ეს არის ტრაგიკული და კატასტროფული.

ამაზე, სამწუხაროდ, სახელმწიფო არაფერს არ აკეთებს. ჩვენი მთავარი მიზანი არის, რომ დასჯიდან გადავიდეთ სახელმწიფო ზრუნვასა და დახმარებაზე იმ ადამიანების, ვისაც ეს სჭირდება.

ნარკოპოლიტიკის ლიბერალიზაციის მოწინააღმდეგეები ამბობენ, რომ თუ ნარკოპოლიტიკა იქნება ლიბერალური, გამარტივდება ქვეყანაში ნარკოტიკის შემოტანა.

აქ უნდა გაივლოს მკაფიო ზღვარი, თუ რას შეეხება ლიბერალიზაცია. ეს შეეხება ნარკოტიკის საზღვარზე შემოტანას, მის გაყიდვას, თუ ეს შეეხება ნარკოტიკის პირადი მოხმარების მიზნით მცირე ოდენობით ფლობას. მეორე შემთხვევაში აბსოლუტურად სხვა ვითარებაა იგივე საზღვრის კონტროლის კუთხით და თუნდაც ქვეყანაში ნარკოტიკის ამოღების კუთხით სამართალდამცავებს აბსოლუტურად იგივე მექანიზმები რჩებათ.

რაღაც ეტაპზე, ლიბერალიზაციის შემდეგ, როდესაც საზოგადოებაში ეიფორია შეიძლება იყოს, შეიძლება მოიმატოს კიდეც ან მოხმარების დონემ, ან მოთხოვნამ ნარკოტიკებზე მცირე დროის მონაკვეთში, ხოლო მას შემდეგ, როცა უკვე გარკვეული ეფექტები ექნება მეორე მიმართულებით პრევენციულ, სარეაბილიტაციო პროგრამებს, ამ ვითარებაში მინიმუმ შეეძლება სახელმწიფოს, რომ ისაუბროს ნარკოტიკების მოხმარებით გამოწვეული ზიანის შემცირებაზე და  შორეულ პერსპექტივაში, ასევე ნარკოტიკის მოხმარების რაოდენობის შემცირებაზე.

ლიბერალური ნარკოპოლიტიკა ნიშნავს იმას, რომ მომხმარებლები არ უნდა დაისაჯონ. შესაბამისად, თუ არ უნდა დაისაჯონ ე.ი. უნდა არსებობდეს მიწოდების ლეგალური უფლება. ამ ნაწილში მაინტერესებს, რა როგორ უნდა მოხდეს?

ლიბერალიზაცია აუცილებლად არ გულისხმობს, რომ ნარკოტიკები რაღაც ჭრილში მოექცეს ლეგალურ ფარგლებში. თუმცა, მაგალითად, ჩვენ გვაქვს მეტადონის პროგრამა, ნარკოტიკის მომხმარებლები თავისუფლად იღებენ მეტადონს და ეს პროგრამა ძალიან ბევრი ოჯახის და ადამიანის მშველელი გამოდგა. ეს ადამიანები უკანონო მდგომარეობიდან გადმოვიდნენ ლეგალურ სფეროში, სახელმწიფო ხედავს მათ. სახელმწიფო ხედავს ასევე იმას, თუ რა პრობლემები აქვთ მათ ჯანდაცვის კუთხით, რა გამოწვევები არსებობს და ა.შ. ამიტომ ასეთი პროგრამები თუკი გამრავალფეროვნდება და თუკი უფრო მოქნილი და ხელმისაწვდომი იქნება იმ ადამიანებისათვის, ვისაც აქვს წამალდამოკიდებულება, აქაც უფრო ეფექტიან პოლიტიკაზე შეგვიძლია ვისაუბროთ.

ლიბერალური ნარკოპოლიტიკის მოწინააღმდეგეთა აზრით, პოლიტიკის შემსუბუქება ხელს შეუწყობს ნარკოტიკის გამსაღებლებს ე.წ. ბარიგებს. რეალურად რა მოხდება ამ მიმართულებით?

ლიბერალური ნარკოპოლიტიკა ძალიან ბევრ რამეს შეიძლება ნიშნავდეს და თუკი არასწორი ფორმით გაკეთდება რეფორმა, ეს შედეგი შეიძლება ნამდვილად მივიღოთ. ჩვენ ვსაუბრობთ იმაზე, რომ მიდგომა შეიცვალოს და ნარკოტიკის მოხმარების პრობლემას სხვა მექანიზმები დავუპირისპიროთ, რაც არის უფრო მეტად ეფექტიანი. სინამდვილეში ამაზე რთული მდგომარეობა მე ვერ წარმომიდგენია, როგორ შეიძლება მივიღოთ.

დღეს სახელმწიფო ვერ ხედავს ამ პრობლემის მასშტაბებს. დღეს სახელმწიფომ არ იცის რა ნარკოტიკს მოიხმარს საერთოდ ქვეყნის მოსახლეობა. ამ კონკრეტულ ნარკოტიკებს რა პრობლემები ახლავს, რა ჯანდაცვის თუ სხვა ტიპის რისკები ახლავს თან. ამაზე რთული მდგომარეობა რთული წარმოსადგენია. მაგრამ მხოლოდ და მხოლოდ ის, რომ სისხლის სამართლის პოლიტიკა შემსუბუქდეს, ეს არ არის გამოსავალი.

დეკრიმინალიზაცია რას უნდა შეეხოს და ამაში იგულისხმება  თუ არა კლუბური ნარკოტიკის დეკრიმინალიზაციაც?

დეკრიმინალიზაცია არ არის ის, რომ ნარკოტიკი ხდება აბსოლუტურად ან ზოგადად ნარკოტიკი ხდება ხელმისაწვდომი. ამ ადამიანებს აღარ ვეძახით კრიმინალებს, თორემ ნარკოტიკის მოხმარება კვლავაც არის დასჯადი ადმინისტრაციული წესით. ხოლო ნარკოტიკის ფლობა ნებისმიერ შემთხვევაში ექვემდებარება კონფისკაციას და თუ მცირედზე მეტი ოდენობით არის ის, სისხლის სამართლის დანაშაულია. ყოველ შემთხვევაში, ჩვენ კანონპროექტი რაზეც ვმუშაობდით, ასეთი ხედვა იყო წარმოდგენილი.

ასეთ შემთხვევაში ჩვენი მიდგომაა, რომ, პირველ რიგში, მძიმე ნარკოტიკის მომხმარებლებს სჭირდებათ პოლიტიკის მიდგომების შემსუბუქება, რადგან ყველაზე მძიმე ჯანდაცვითი თუ სოციალური პრობლემები მძიმე ნარკოტიკის მომხმარებლებს აქვთ. ჩვენ დეკრიმინალიზაცია არ წარმოგვიდგენია ისეთ გამოსავლად, რომ გაკეთდეს დეკრიმინალიზაცია, მათ შორის ისეთ ნარკოტიკებზე, რომელიც არის ნაკლებად საზიანო – იქნება ეს კლუბური ნარკოტიკი თუ მარიხუანა. ამან  შეიძლება არასწორი განწყობები გამოიწვიოს საზოგადოებაში, თითქოს დეკრიმინალიზაცია იმიტომ ხდება, რომ რაღაც ნარკოტიკი არ არის საზიანო და ნორმალურია მისი მიღება და არავითარი რისკები არ ახლავს. ეს ასე ნამდვილად არ არის და ნებისმიერი ნარკოტიკი, ცხადია, განსხვავებული ინტენსივობით და მასშტაბებით, იწვევს ეფექტს, ახდენს გავლენას ადამიანის ჯანმრთელობაზე.

ამიტომ ერთიანი მიდგომაა საჭირო და  საჭიროა ზუსტად იმიტომ, რომ მძიმე ნარკოტიკს აქვს ყველაზე მეტი პრობლემები. ამ ადამიანების გამოყვანა ჩრდილიდან… დღეს ისინი იმალებიან და ვერ ხედავს მათ სახელმწიფომ. მათი პრობლემები არის უხილავი და, ბუნებრივია, შეუძლებელია ამ პრობლემების მოსაზრებაზე საუბარი. ამიტომ, პირველ რიგში, უბრალოდ, მე ხაზს ვუსვამ პრობლემის კომპლექსურობას. დეკრიმინალიზაცია უნდა შეეხოს არა კონკრეტულად  რომელიმე მსუბუქ ნარკოტიკს, არამედ ყველა ნარკოტიკის მოხმარებას.

რომელიმე ევროპულ სახელმწიფოში არსებული ნარკოპოლიტიკის მოდელი შეგიძლია მოიყვანოთ მაგალითად?  

იდეალური მოდელი არ არსებობს და ქვეყნებს თავიანთი კონტექსტის გათვალისწინებით აქვთ კონკრეტული მოდელი და კანონმდებლობა შემუშავებული. ჩვენთვის, მაგალითად, საინტერესო იყო პორტუგალიის მოდელი.

მათ აქვთ ეფექტური ინსტრუმენტები პრევენციის თვალსაზრისით. პორტუგალიელებმა შექმნეს ყველა ქალაქში კომისიები, რომლის ერთადერთი მიზანი იყო პრევენცია და ნარკოტიკების მომხმარებლის მხარდაჭერა. თუკი მათ სჭირდებოდათ სამედიცინო დახმარება, ისინი აწვდიდნენ ამ პროგრამებზე ინფორმაციას. თუკი ასეთი საჭიროება არ იყო, უბრალოდ, პრევენციის მიზნით განუმარტავდნენ მოქალაქეებს, რა ზიანი აქვს ნარკოტიკის მოხმარებას და ასე შემდეგ.  ეს იყო ურთიერთნდობასა და მხარდაჭერაზე დამოკიდებული. ასეთი მექანიზმი იქნებოდა ძალიან  კარგი ხიდი სახელმწიფოსა და ნარკოტიკის მომხმარებელს შორის. დღეს ჩვენ ეს არ გვაქვს და ძალიან დიდი უფსკრულია ამ ადამიანებსა და სახელმწიფოს შორის.

პორტუგალიაში, მას შემდეგ, რაც ეს რეფორმა გატარდა, პოლიციური რესურსი გადამისამართდა საზღვრის კონტროლზე. ნარკოტიკის გასაღებაზე და მასთან დაკავშირებულ ორგანიზებულ დანაშაულზე. და თუკი მანამდე პორტუგალიელი სამართალდამცავები იღებდნენ გრამობით უკანონო ნარკოტიკს, რეფორმის შემდეგ მათ დაიწყეს ბევრად მასშტაბური დანაშაულების გახსნა – მათ მეტი რესურსი გაუჩნდათ ამ მიმართულებით საბრძოლველად.

დღეს, მკაცრი ნარკოპოლიტიკის პირობებში, ნარკოტიკი საქართველოში მაინც შემოდის და არც მომხმარებელთა რიცხვი არ შემცირებულა. მიზეზი რა არის ამის?

კვლევებით ნამდვილად დასტურდება, რომ პრობლემური მომხმარებლების რაოდენობა გაზრდილია ქვეყანაში და ამის მიზეზი არის ის, რომ როგორი იდეალური სადამსჯელო ღონისძიებებიც არ უნდა გქონდეს, იმის ილუზია ვერ გვექნება, რომ ნარკოტიკს  მთლიანად გააქრობს სახელმწიფო. პირიქით, ასეთ ვითარებაში ნარკოტიკების შემომტანები ყოველთვის მოიფიქრებენ რაღაც ახალ გზას. თუკი უფრო ეფექტიანი არ იქნება სახელმწიფოს თანამშრომლობა ნარკოტიკების მომხმარებელთან, რომელმაც სინამდვილეში ყველაზე მეტი იცის იმ გამოწვევების და პრობლემების თაობაზე, რაც ამ კუთხით არსებობს, ასეთ შემთხვევაში პრობლემა უფრო გაღრმავდება და დამძიმდება. სწორედ ეს ხდება დღეს საქართველოში.

პრევენციის მექანიზმი – რა უნდა გააკეთოს სახელმწიფომ, რას უნდა აკეთებდეს და არ აკეთებს?

სკოლაში უნდა შევიდეს ინფორმაცია და ეს უნდა გააკეთონ კვალიფიციურმა მასწავლებლებმა – რა რისკები აქვს და რა შედეგები მოჰყვება ნარკოტიკის მოხმარებას. ასევე სამკურნალო მექანიზმები არის გასაძლიერებელი და თუკი არსებობს მეტადონის პროგრამა, შეიძლება როგორც გეოგრაფიული, ისე შინაარსობრივი გაფართოება ამ პროგრამების. ასევე რეაბილიტაციის კუთხით, ფაქტობრივად, არაფერი ხდება და მას შემდეგ, რაც ნარკოტიკების მომხმარებელი დატოვებს სასჯელაღსრულების დაწესებულებას, არაფერი სარეაბილიტაციო პროგრამა არ არსებობს.

 

 

შპს „ჰავანას“უკვე არსებული ბიზნესის გასაფართოებლად საიჯარო ხელშეკრულების გაგრძელებასა და მის მფლობელობაში არსებული ტერიტორიის 15000 კვადრატული მეტრით გაზრდაზე უარი უთხრეს. ის 2-მილიონიანი ინვესტიციის განხორციელებას გეგმავდა ქობულეთში. უარის მიზეზად ნაკვეთის მიმართ მაღალი კონკურენცია და მოსახლეობის ინტერესი დაასახელეს: „ზღვაზე გასავლელი ჩაიკეტება“. კომპანიის მეპატრონე კი ხელისუფლებასთან დაახლოებული პირების დაინტერესებაზე საუბრობს და ამბობს, რომ კონკურენციას ხელოვნურად ქმნიან.

რესტორანი „ჰავანა“ ტურისტულ სეზონზე ქობულეთში ერთ-ერთი ხალხმრავალი ადგილია. აქ ტურისტული ინფრასტრუქტურა შპს „ჰავანას“ ყოფილმა მეპატრონემ – დავით შავიშვილმა ხუთი წლის წინ მოიწყო და სახელმწიფოსთან აღებული ყველა საიჯარო ვალდებულება შეასრულა. ამის მიუხედავად, მას, როგორც ორი ყოფილი მაღალჩინოსანი ამბობს ქობულეთიდან, „პრობლემები ჰქონდა, არ ამუშავეს“. ამ პირებს ღიად საუბარი არ სურთ.

დოკუმენტების მიხედვით კი დავით შავიშვილს კომპანია თავისი საიჯარო ვალდებულებით, ხელშეკრულების ვადის ამოწურვამდე ერთი წლით ადრე, 2017 წლის ივნისში, პაატა რეხვიაშვილისთვის მიუყიდია.

იმის გათვალისწინებით, რომ საიჯარო ხელშეკრულების ვადა წელს იწურება, 2018 წლის 19 თებერვალს პაატა რეხვიაშვილმა ორმილიონიანი საინვესტიციო წინადადებით ქობულეთის მერს, მირიან ქათამაძეს მიმართა. მან მირიან ქათამაძეს შუამდგომლობა სთხოვა აჭარის მთავრობის თავმჯდომარესთან – საიჯარო ვადის გაგრძელებასა და მიმდებარედ 1500 კვადრატული მეტრი მიწის ნაკვეთის, ასევე ამ ნაკვეთის გასწვრივ პლაჟის 20-წლიანი იჯარით გადაცემაზე.

კომპანიის მფლობელი პირობას დებდა, რომ ტერიტრიაზე მოაწყობდა მსუბუქ კონსტრუქციას, სადაც განათავსებდა: „კლუბს, კაფეს, რესტორანს, საბილიარდოს, ღია აუზს, სატრენაჟოროსა და ბავშვთა გასართობ კუთხეს“. კომპანია ასევე ჰპირდებოდა მთავრობას, რომ ტურისტული კომპლექსი არა მხოლოდ სეზონურად, არამედ მთელი წლის განმავლობაში მოემსახურებოდა მომხმარებელს. პირობების ჩამონათვალში იყო ასევე არანაკლებ 30 ადგილობრივის დასაქმება.

ქობულეთის მერიამ ამ მიწის ნაკვეთის იჯარის წესით გასხვისების შესათანხმებლად  საკრებულოს 5 აპრილს მიმართა. მერის მიმართვის მიხედვით, მერიას მიზანშეწონილად მიაჩნდა მოთხოვნილი ნაკვეთის არა პირდაპირი წესით, არამედ ელექტრონული აუქციონით გასხვისება, ორწლიანი იჯარით. ქობულეთის მერის ინფორმაციით, ნაკვეთის საწყისი საიჯარო ფასის გამოსავლენად მერიამ აუდიტიც კი მიიწვია, რომელმაც ერთი კვადრატული მეტრი 110 ლარად შეაფასა. შესაბამისად, მერიამ მოთხოვნილი 1500 კვადრატული მეტრის საწყის ფასად 40 500 ლარი განსაზღვრა.

მერი საკრებულოსგან ითხოვდა ასევე ტერიტორიის გასწვრივ პლაჟის სახით რეგისტრირებული ნაკვეთის წლიური საიჯარო საფასურის დადგეგნას: „რათა შემდგომში გამოცხადდეს პირობიანი აუქციონი, მიწის ნაკვეთზე მსუბუქი კონსტრუქციის ასაწყობად. კაფე ბარის განთავსების მიზნით“.

მირიან ქათამაძეს საკრებულომ უარი უთხრა – სხდომაზე საკრებულოს თავმჯდომარემ დავით მჭედლიშვილმა განაცხადა, რომ მოთხოვნილი ტერიტორიის ათვისება ზღვაზე გასასვლელს ჩაკეტავს და „გასათვალისწინებელია მოსახლეობის ინტერესები“.

სხდომაზე ამ ნაკვეთთან მიმართებაში სხვა ინტერესებსა და კონკურენტული გარემოს შექმნაზეც იყო საუბარი.

„ჰავანას“ დირექტორი პაატა რეხვიაშვილი კი ამტკიცებს, რომ სინამდვილეში ამ ადგილზე  არსებობს „არა მოსახლეობის ინტერესები“, არამედ საკრებულოს ერთ-ერთი წევრის პირადი ინტერესი. პაატა რეხვიაშვილის თქმით, საკრებულოს ამ წევრს შპს „ჰავანასგან“ წლების განმავლობაში  ჰქონია სარგებელი, ვიდრე თითონ არ იყიდა ეს კომპანია. „ახლა მას სურს, რომ ამ ადგილიდან ჩვენ გაგვიშვას“, – ამბობს ბიზნესმენი.

საკრებულოს წევრი, რომელიც ამ საკითხის განხილვისას საკრებულოს სხდომაზე განსაკუთრებით აქტიურობდა, იყო არჩილ დუმბაძე. სხდომაზე ერთადერთი – „ჰავანასთვის“ ნაკვეთის გადაცემა იყო ის საკითხი, რაზეც მან პოზიცია ხმამაღლა დააფიქსირა. „ეს თემა იქცა ყბადაღებულ თემად და მე ამ საკითხს ბოლომდე და ვაჟკაცურად მოვყვები“ – თქვა საკრებულოს სხდომაზე „ქართული ოცნების“ წევრმა.

შპს „ჰავანას“ ხელშეკრულების ვადა წელს, 18 ივლისს ეწურება. ხელშეკრულების ვერ გაგრძელების შემთხევაში კომპანიას მისცემენ ათდღიან ვადას, ტერიტორიიდან საკუთარი კონსტრუქცია რომ დაშალოს და გაიტანოს.

თუ პაატა რეხვიაშვილს უარს ეტყვიან ხელშეკრულების გაგრძელებაზე, მერია აუქციონს გამოაცხადებს. იმ შემთხვევაშიც კი, თუ ტერიტორიას 2 მილიონზე მეტად გაასხვისებენ, ახალ მესაკუთრეს მოუწევს ყველაფრის ხელახლა დაწყება – ახალი კონსტრუქციის გამართვა. ეს კი საკურორტო სეზონს ემთხვევა.

რეალურად არსებობენ თუ არა კონკურენტები, თუ ისინი მართლაც ხელოვნურად გააჩინეს, როგორც ამას „ჰავანას“ მესაკუთრე ამტკიცებს? – „ბათუმელების“ ინფორმაციით, ამ დროისთვის „ჰავანას“ საკუთრებაში არსებული მიწის ნაკვეთის იჯარით აღება ორ პირს სურს. საკრებულოსთვის გაგზავნილ მიმართვაში ერთ-ერთ მათგანს ქობულეთის მერი მირიან ქათამაძეც ახსენებს. ეს არის ქობულეთში, სოფელ ხუცუბანში რეგისტრირებული ედვარდ გოგმაჩაძე, რომლის საინვესტიციო წინადადებაც მერმა საკრებულოს  ასევე გადაუგზავნა დანართის სახით.

თავის მხრივ ედვარდ გოგმაჩაძე წერს, რომ რესტორან „ჰავანას“ ტერიტორიაზე ინვესტიციის განხორციელება რუსეთის მოქალაქე მურმან ჯაფარიძეს აინტერესებს, თვითონ კი მისი მინდობილი პირია.

ედვარდ გოგმაჩაძე ქობულეთის მერს მურმან ჯაფარიძის სახელით ერთი მილიონი დოლარის ღირებულების ინვესტიციის განხორციელებას ჰპირდება. ჯაფარიძე გეგმავს „ჰავანას“ ტერიტორიაზე რესტორნის, სატრენაჟორო დარბაზს, საბილიარდოს, საპლაჟო ინფრასქტრუქტურის  მოწყობას. ის 70 მოქალაქის დასაქმების პირობასაც დებს.

„ბათუმელებს“ უთხრეს კიდევ ერთი დაინტერესებული მხარის – კახა გოგიტიძის შესახებ. ის ქობულეთის მერის, მირიან ქათამაძის თანაშემწის, ნინო ჩხეტიას მეუღლეა.

ნინო ჩხეტია შეგვპირდა, რომ გასაუბრების შემდეგ მოგვაწვდიდა ქმრის ტელეფონის ნომერს, თუმცა საბოლოოდ სატელეფონო ზარებს არც თვითონ უპასუხა. შესაბამისად, „ბათუმელებმა“ კახა გოგიტიძესთან დაკავშირება ვერ მოახერხა.

თავად ედვარდ გოგმაჩაძემ კი გვითხრა, რომ კახა გოგიტიძეს იცნობს, თუმცა მოგვიანებით თავისივე ნათქვამი უარყო.

რაც შეეხება საკრებულოს წევრს – არჩილ დუმბაძე კატეგორიულად უარყოფს რაიმე სახის ინტერესს „ჰავანას“ ტერიტორიის მიმართ. მან „ბათუმელებს“ უთხრა, რომ „დაინტერესებულია ნაკვეთი კანონის შესაბამისად, კონკურენტულ გარემოში გაიცეს იჯარის წესით“. საკრებულოს წევრს ასევე ვკითხეთ იმის შესახებ, იცნობს თუ არა „ჰავანას“ კონკურენტებს. „ქობულეთი პატარაა და ყველა ყველას იცნობს“, – თქვა არჩილ დუმბაძემ.

საკრებულოს სხდომა, სადაც სანაპიროს ტერიტორიის აუქციონზე გატანაზე ქობულეთის მერს, მირიან ქათამაძეს უარი უთხრეს, 10 მაისს გაიმართა. 11 მაისს კი შპს „ჰავანას“ მესაკუთრემ რეესტრს ცვლილების თხოვნით მიმართა – დოკუმენტების მიხედვით, პაატა რეხვიაშვილი აპირებს კომპანიის ასივე პროცენტი ხათუნა მოწყობილს დაუთმოს.

საგულისხმოა ისიც, რომ დოკუმენტებში ფიგურირებს კომპანიის თავდაპირველი დამფუძნებელი დავით შავიშვილიც. მეტიც განცხადება ცვლილებასთან დაკავშირებით რეესტრში დავით შავიშვილს აქვს წარდგენილი.

„ჰავანას“ წარმომადგენლები კვლავ აცხადებენ, რომ მზად არიან შემცირებული ტერიტორიის იჯარის წესით მიღებაზეც დასთანხმდნენ მთავრობას. მათ სურთ უკვე დაწყებული ბიზნესი გადაარჩინონ და ამისთვის 2 მილიონი ლარის დახარჯვას აპირებენ. მათ ამ შეთავაზებას არც ქობულეთის მერია გამოხმაურებია და არც აჭარის მთავრობა.

 

აჭარის ფინანსთა და ეკონომიკის მინისტრმა, რამაზ ბოლქვაძემ, შპს „სტადიონის“ დირექტორის,  სულხან ხალვაშის განცხადება გადადგომაზე დააკმაყოფილა და  შპს „სტადიონის“ დირექტორად კურორტ გოდერძის უკვე ყოფილი ხელმძღვანელი ზურაბ ჭურკვეიძე დანიშნა. შესაბამისი დოკუმენტები ცვლილებასთან დაკავშირებით ფინანსთა და ეკონომიკის სამინისტრომ საჯარო რეესტრში  დღეს, 14 მაისს, წარადგინა.

ზურაბ ჭურკვეიძე კურორტ „გოდერძის“ [ Goderdzi Resorts ] დირექტორის თანამდებობაზე დანიშვნამდე აჭარის ფინანსთა და ეკონომიკის სამინისტროში ქონების მართვის დეპარტამენტს ხელმძღვანელობდა.

შპს „სტადიონის“ დირექტორის ხელფასი 3750 ლარია.

შპს „სტადიონი“ აჭარის მთავრობამ ბათუმის საფეხბურთო სტადიონის მშენებლობის მიზნით შექმნა და მოგვიანებით ამ ორგანიზაციას გადააბარა ბათუმში რესპუბლიკური საავადმყოფოს მშენებლობის ზედამხედველობაც.

ასევე, საჯარო რეესტრის მონაცემებით კურორტ „გოდერძის“ [ Goderdzi Resorts ] დირექტორი მალხაზ მახარაძე იქნება. ამ თანამდებობაზე დანიშვნამდე ის კურორტ „გოდერძის“ შესყიდვების სამსახურის სპეციალისტის თანამდებობაზე მუშაობდა.  კურორტის დირექტორის ხელფასი 3000 ლარია.

ბათუმის მე-14 საჯარო სკოლიდან ორი მეშვიდეკლასელი გოგონა საავადმყოფოში გადაიყვანეს. „ბათუმელები“ სკოლის დირექტორს, ნატო გოგუაძეს ესაუბრა.

დირექტორის ინფორმაციით, დაახლოებით 14:00 საათზე ერთ-ერთი გოგონა სკოლაში შეუძლოდ გახდა. „სკოლის ექთანმა ბავშვს წნევა გაუზომა, წნევა მომატებული იყო, შემდეგ კი გამოვიძახეთ სასწრაფო დახმარება,“ – გვითხრა დირექტორმა.

ნატო გოგუაძის თქმით, მეორე მოსწავლე შეუძლოდ ემოციურ ნიადაგზე გახდა.

როგორც დირექტორი ამბობს, საავადმყოფოში  მას უთხრეს, რომ ერთი გოგონა მოწამლულია. „ამ დროისთვის ბავშვს გადასხმები უკეთდება“.

„ბათუმელების“ კითხვაზე, თუ რას შეიძლება მოეწამლა ბავშვი, დირექტორი ამბობს, რომ ამაზე ინფორმაცია არ აქვს. მისი თქმით, სკოლაში ბუფეტი არ ფუნქციონირებს და მოსწავლეებს საკვები გარედან შეაქვთ.

ბერა ივანიშვილის ახალ სიმღერას Legalize [ლეგალიზება], რომელიც მომღერალმა გუშინ გამოაქვეყნა, იუთუბზე 281 083 ნახვა და 7100 მოწონება აქვს. ფეისბუქზე, ბერას ოფიციალურ გვერდზე გაზიარებულ კლიპს 2700 ზე მეტი დადებითი შეფასება აქვს.

„ვისაც უყვარს და არ ასაღებს..“, „რაც მოდის მიწიდან, ვერ ჩამდებს მიწაში, რამდენი შხამი დევს ამ სინთეტიკაში…” – სიმღერას, რომლის მთავარი მესიჯიც მარიხუანას ლეგალიზების მოთხოვნაა, საზოგადოებაში არაერთგვაროვანი შეფასება მოჰყვა:

 

 

ამავე თემაზე:

ბერა ივანიშვილი მარიხუანას ლეგალიზებას ითხოვს

See more

 

 

ბათუმში მცხოვრები მერაბ ბლადაძე ამბობს, რომ მას საკუთარი საცხოვრებელი ბინის ეზოში, ფარნავაზ მეფისა და მელიქიშვილის ქუჩების გადაკვეთაში, 14 მაისს, დაახლოებით 00:30 წუთზე, თავს დაესხა სამი უცნობი პირი და ფიზიკური და სიტყვიერი შეურაცხყოფა მიაყენეს. მერაბ ბლადაძეს სამედიცინო დახმარება საავადმყოფოში აღმოუჩინეს, სადაც თვითონ მივიდა. მიყენებული აქვს ჭრილობები თავის არეში. შემთხვევის ადგილზე იმყოფებოდა საპატრულო პოლიციაც.

„ღამის პირველის ნახევარზე კარზე დარეკეს ზარი, რომ ჩემი დახმარება სჭირდებოდათ და მთხოვეს ჩავსულიყავი ეზოში. ასეთი რამ ხშირად ხდება ჩემი საქმიანობიდან გამომდინარე და ჩვეულებრივად ჩავედი ეზოში, თუმცა სადარბაზოსთან ეგრევე დამარტყეს სახეში რკინის ჯოხი, მეორეს ხის ჯოხი ეკავა. სულ სამი იყვნენ… მინდა ვთქვა, რომ თავს დაზარალებულად არ ვთვლი, მეც კარგად ვიჩხუბე. დაზარალებული და ნაცემი თავად არიან. ალბათ ერთი წუთი გაგრძელდა და შემდეგ მეზობლებმა ატეხეს ხმაური და გაიქცნენ. სახეზე ვერ ვიცანი, ჩამოფარებული ჰქონდათ. როგორც ვიცი, საქმე აღძრულია, სხვა დეტალები არ ვიცი“, – ამბობს მერაბ ბლადაძე. მისივე თქმით, მას სასამართლო-სამედიცინო ექსპერტიზა უკვე ჩაუტარდა.

შინაგან საქმეთა სამინისტროს პრესსამსახურის ინფორმაციით, ფაქტზე გამოძიება დაწყებულია სს კოდექსის 126-ე მუხლით, რაც ძალადობას გულისხმობს. „დანიშნულია სასამართლო-სამედიცინო ექსპერტიზა და სავარაუდო დამნაშავე დადგენილია“, – გვითხრეს სამინისტროში, თუმცა არ დაგვიკონკრეტეს რამდენ სავარაუდო დამნაშავეზეა საუბარი.

მერაბ ბლადაძე ტელეკომპანია „ობიექტივის“ ბათუმის სტუდიის წამყვანი და „21 საუკუნე – საქართველოს მომავლის“ თავმჯდომარეა. ის თვითმმართველობის ბოლო არჩევნებზე „პატრიოტთა ალიანსის“ მაჟორიტარი დეპუტატობის კანდიდატი იყო ქობულეთში.

მერაბ ბლადაძე მასზე თავდასხმას მის საქმიანობას უკავშირებს.

გარემოს ეროვნული სააგენტოს აჭარის რეგიონალური ჰიდრომეტეოროლოგიური ობსერვატორიის ინფორმაციით, უახლოეს დღეებში აჭარასა და ქალაქ ბათუმში მოსალოდნელია ცვალებადი მოღრუბლულობა, ზოგან – დროგამოშვებით ხანმოკლე, ძლიერი წვიმა.

იქროლებს ცვალებადი მიმართულების ქარი 10-15 მეტრი წამში.

ამინდის ტემპერატურა სანაპირო რაიონებში იქნება:

• დღისით: 20 – 25 გრადუსი
• ღამით: 10 – 15 გრადუსი

მთაში მოსალოდნელია:

• დღისით: 10 – 15 გრადუსი
• ღამით: 3  – 8 გრადუსი

ზღვის წყლის ტემპერატურა აჭარის სანაპიროზე უკვე 16,5 გრადუსია.

16-17 მაისს აჭარაში მოსალოდნელია ძირითადად უნალექო ამინდი. ამინდის გრძელვადიანი პროგნოზის თანახმად, ბათუმში ტემპერატურა კვირის ბოლოს მოიმატებს და 29 გრადუსს მიაღწევს.

______________

მარიამ ქველიაშვილის ფოტო 

საბაჟო გამშვებ პუნქტ „სარფში“, ფინანსთა სამინისტროს შემოსავლების სამსახურის მებაჟე ოფიცრებმა, ეჭვის საფუძველზე, საქართველოს მოქალაქე, ნ.ს-ს ფიზიკური დათვალიერებისას არადეკლარირებული ოქროს ნაკეთობები აღმოაჩინეს.

შემოსავლების სამსახურის ინფორმაციით, ოქროს ნაკეთობების საერთო წონამ 94,09 გრამი შეადგინა, საქონლის საბაჟო ღირებულებამ კი – 5 689 ლარი. ოქროს ნაკეთობები 13 მაისს ამოიღეს.

საქართველოს საგადასახადო კოდექსის 289-ე მუხლის მე-10 ნაწილის შესაბამისად, კანონდამრღვევ მოქალაქეს, სანქციის სახით,  ფულადი ჯარიმა შეეფარდა, 5 689 ლარის ოდენობით.

2018 წლის პირველი აპრილიდან საქართველოს სახელმწიფო უსაფრთხოების სამსახურის [სუს]მოსამსახურეს, სამსახურის უფროსის გადაწყვეტილებით, შეუძლია ხელფასთან ერთად სპეციალური დანამატი – მაქსიმუმ 10 ათასი ლარის ოდენობით მიიღოს.

შესაბამისი დადგენილება საქართველოს მთავრობამ მიმდინარე წლის 10 მაისს მიიღო, თუმცა დადგენილებაში აღნიშნულია, რომ ის ამავე წლის პირველი აპრილიდან ამოქმედდა.

რა შემთხვევაში შეუძლია სუს-ის მოსამსახურეს მიიღოს სპეციალური დანამატი?

მთავრობის დადგენილებაში აღნიშნულია:

„სამსახურის მოსამსახურეს თავისი საქმიანობის დროს  განსაკუთრებული უნარების გამოვლენის შემთხვევაში ან/და მის მიერ განხორციელებული/ჩატარებული ოპერატიულ-სამძებრო ღონისძიების ან/და საგამოძიებო მოქმედების შედეგად განსაკუთრებული სირთულის ან/და მასშტაბის დანაშაულის გამოვლენის, გამოძიების ან/და აღკვეთის ან ზემოაღნიშნულის განხორციელებისას საკუთარი კომპეტენციის ფარგლებში დახმარების აღმოჩენის შემთხვევაში, სამსახურის უფროსის გადაწყვეტილებით, შესაძლებელია მიეცეს ხელფასზე სპეციალური დანამატი არაუმეტეს 10 000 ლარისა“.

აღნიშნული სპეციალური დანამატის შესახებ ახალი მუხლი „საქართველოს სახელმწიფო უსაფრთხოების სამსახურში ხელფასისა [თანამდებობრივი და წოდებრივი სარგოების] და ხელფასზე [ფულად სარგოზე] დანამატის ოდენობების განსაზღვრის წესს“ დაემატა.

 

თორნიკე აბესაძე 

თავისუფლება უცებ, ერთ დღეში არ ქრება, მას ნელ-ნელა, წლების განმავლობაში, აჭრიან ნაწილებს, მანამ სანამ ერთ დღეს არ მიიხედ-მოიხედავ და დაფიქრდები წარსულზე, გაიხსენებ, თუ როგორი თავისუფალი იყავი და ეს თავისუფლების მოგონება ისეთ შორეულ რეალობად მოგეჩვენება, შენთვის დასვამ კითხვას: “ნუთუ ასე შეიძლებოდა?”

ზუსტად ასეთი კითხვა დასვა რუსმა ტურისტმა “შავ პარასკევს” განვითარებული მოვლენების შემდეგ. აი ფრაზა: “Stepan Polivanov: У меня с русской выученной беспомощностью главная эмоция: “А что так можно было?”. გაოცებული იყო წინააღმდეგობის შემყურე. მოსკოვის კლუბების რეიდები ჩვეული მოვლენაა და მხოლოდ სოციალურ ქსელებში თუ გააპროტესტებს ერთი-ორი. ზუსტად ამიტომ მეამაყება ყოველი ადამიანი რომელიც ახლა დედაქალაქის მთავარ ქუჩაზე ცეკვავს თავისუფლებისთვის, მათ შორის ჩემი მეგობრები.

ზუსტად ამიტომ, შიშს იწვევს ჩემში ადამიანების კომენტარები, რომლებიც ამართლებენ ხელისუფლების საქციელს, კლუბში სპეცნაზის შესვლას, მაშინ, როცა სახალხო დამცველის განცხადებით, ნარკორეალიზატორები უკვე დაკავებულნი იყვნენ. არ მინდა ერთ დღეს ჩემი თავისუფლებისთვის ბრძოლა ისე წარმოუდგენლად მეჩვენებოდეს, როგორც რუს სტეფანს.

ახალგაზრდების უმრავლესობა, რომლებიც რუსთაველზე დგანან, თანხმდებიან, რომ ნარკორეალიზატორები უნდა დაისაჯონ, უმრავლესობა ამ ახალგაზრდებისა ერთადერთი ჯგუფია, რომელიც აპროტესტებს ოკუპაციას, შრომით პირობებს, უმცირესობების ჩაგვრას, სხვადასხვა სოციალურ ან ეკონომიკურ მდგომარეობას.

“ბასიანი” ერთ-ერთი სივრცეა, რომელიც აძლევს პლატფორმას სხვასხვა მარგინალიზებულ ჯგუფს და ეს რეიდი ზუსტად ამ თავისუფალ სივრცეზე იყო თავდასხმა.

უმცირესობების დაცვა ზუსტად იმიტომ არის მნიშვნელოვანი, რომ რაღაც ნიშნით ყოველი ჩვენთაგანი უმცირესობის წარმომადგენელია. იქნება ეს რელიგიური ნიშნით, პოლიტიკური შეხედულებებით, სექსუალური ორიენტაციით და ა.შ. ადამიანი სრულიად თავისუფალი ვერ იქნება, მაგრამ თავისუფლების და ბედნიერების იოტისოდენა გემო რომ შევიგრძნოთ, როგორც მინიმუმ ჩვენს ირგვლივ სოციუმიც თავისუფალი და ბედნიერი უნდა იყოს და ეს სოციუმი უმცირესობებისგან შედგება.

ლიბერალებს ერთი ძალიან მნიშვნელოვანი პრობლემა გვაქვს, ძალიან მოვიმწყვდიეთ საკუთარი თავი სოციალურ ვაკუუმში, დავდივართ ერთი და იგივე ადგილებში, კლუბებსა თუ კაფეებში, ვხვდებით და ვხედავთ ჩვენივე აზრის მქონე ადამიანებს, მაგრამ პრობლემა იმაშია, რომ ეს არ ნიშნავს იმას, რომ ჩვენ უმრავლესობაში ვართ.

სოციალურ ქსელებშიც ვშლით ან ვბლოკავთ ადამიანებს, რომლებიც ჩვენ აზრს არ იზიარებენ და შემდეგ გვიკვირს, თუ რამდენი ადამიანია რომელიც “აპრავებდა” ხელისუფლებას და გაფართოებული თვალებით, ბედნიერი უყურებდა, თუ როგორ აკავებდნენ აქციის მონაწილეებს. (ასეთი ადამიანებისთვის ერთი კომენტარი მაქვს: თუ შენ სხვა ადამიანზე ძალადობა, ნებისმიერი სახით, ცოტაოდენ ბედნიერებას მაინც განიჭებს, ესე იგი შენში რაღაც “ვერ არის”).

ყოველი სტატუსის შემდეგ: “თუ ეს მოგწონს და ეთანხმები, წაიშალე თავი ჩემი მეგობრებიდან” ჩვენ უფრო და უფრო ვცილდებით რეალობას და ილუზიურ უმრავლესობაში ვრჩებით. ეს პრობლემაა და ამ პრობლემის მოგვარებას ძალისხმევა უნდა. მეც, უმეტესწილად ვარიდებ თავს “facebook კომენტარების ომს”, თუმცა ნელ-ნელა ვრწმუნდები, რომ ეს არასწორი პოზიციაა.

თქვენ, ვინც ბრაზობთ ცეკვით გამოხატულ პროტესტზე, მისაღებად გეჩვენებათ პარასკევის მოვლენები, არ მოგწონთ ადამიანების ცეკვის მანერა, ბრაზობთ სოციალურ ქსელში თქვენს მიმართ აგრესიულ დამოკიდებულებას აქციის მონაწილეების ან მათი მხარდამჭერების მხრიდან, რადგან გიკვირთ – რა უნდათ? რას დაეძებენ? ნუთუ სხვა ხერხი ვერ მოძებნეს?, თქვენ, რომლებსაც ახალგაზრდა ბიჭზე სახელმწიფოს მიერ განხორციელებული ძალადობა სასაცილოდ მიგაჩნიათ, რადგან ის ფემინური მანერების იყო, ფიქრობთ, რომ სახელმწიფოს მიერ გამოყენებული ძალა იყო ლეგიტიმური, მინდა გითხრათ, რომ თუ ეს ბიჭები და გოგონები წააგებენ, შემდეგ თქვენი ჯერიც დადგება, თქვენც გაგაოცებთ და გაგაბრაზებთ რაღაც ქმედება სახელმწიფოს მხრიდან, მაგრამ თქვენთვის “მოცეკვავე” აღარავინ იქნება. რაც არ უნდა მიუღებელი იყოს თქვენთვის ამ დღეებში გამართული აქციები, გახსოვდეთ, მათ ამის უფლება აქვთ, მათ გაბრაზების ლეგიტიმაცია აქვთ.

რაც არ უნდა მიუღებელი იყოს თქვენთვის “კლუბების ელიტა” გაიაზრეთ, რომ ისინი დღეს სახელმწიფოს მიერ ჩადენილ ძალადობის წინააღმდეგ დგანან და ეს თქვენთვისაც არის მნიშვნელოვანი.

ახლა თავისუფლებაზე შტურმის მეორე ეტაპი დაიწყება, ეტაპი, როდესაც ერთად შეკრებილ “მოცეკვავე” ძალის ნებისმიერი მეთოდით დაშლას შეეცდებიან. ერთ-ერთი ასეთი მეთოდია ამ ძალაში უმცირესობების წინააღმდეგ მაკომპრომეტირებელი კამპანიის აგორება. უკვე შემხვდა ნიუსფიდში, მაგალითად, მთვრალი ტრანსგენდერი ქალის აგრესიულობა პოლიციის მიმართ, აქციის მონაწილის მიერ დიდგორის და ბასიანის ერთმანეთში არევა, ფემინური ბიჭის გინება, ბასიანის ერთ-ერთი დახურული, კოსტუმირებული ივენთის ფოტოების გაზიარება, ამბავი თითქოს გეი აღლუმის ჩატარებას აპირებენ აქციის ორგანიზატორები. ამიტომაც “თავისუფლებისთვის მოცეკვავეთა” მთავარი გასააზრებელი იქნება ის, რომ თქვენ იბრძვით თავისუფლებისთვის და ამ ბრძოლაში ნებისმიერი მოკავშირე დაგჭირდებათ, თუნდაც ეს მოკავშირეები თქვენთვის რაღაც ნიშნით მიუღებელი იყოს.

ბევრ “ნიუსს” თუ ვიდეოს ნახავთ ამ დღეებში, ბევრი დაგიპირისპირდებათ და “ბარიგობას” დაგდებენ ბრალად, თქვენთვის მიუღებელ ბევრ პოსტს დაწერს ხალხი და სახელმწიფო ინფორმაციულ ომს გამოგიცხადებთ, გააზიარებენ “ფაქტებს”,  მათ შორის ზოგი სიმართლე იქნება, ზოგი კიდე ფარსი, მაგრამ ვიმედოვნებ ამ უნიჭო კამპანიას არ წამოეგებით.  გახსოვდეთ თავისუფლების გემო, 12 მაისის საღამოს გასინჯული, ნებისმიერ ნარკოტიკზე ძლიერი და წარმატებები ჩვენი საერთო, ბედნიერი მომავლისთვის ომში!

_______

ვებგვერდზე გამოქვეყნებული მოსაზრებები შესაძლოა არ ასახავდეს batumelebi.ge-ს პოზიციას.

ბათუმის რესპუბლიკური საავადმყოფო იქნება საუნივერსიტეტო კლინიკა და მისი გასხვისება ან მართვის უფლებით კერძო კომპანიაზე გადაცემა არ იგეგმება – აცხადებს აჭარის მთავრობა. საავადმყოფოს, რომლის 100% წილი აჭარის ავტონომიური რესპუბლიკის საკუთრებაშია, მართვის უფლებით ამ ეტაპზე აჭარის ჯანდაცვის სამინისტროზეა გადაცემული. საავადმყოფოს ახალი შენობის აღჭურვისთვის საჭირო სამედიცინო აპარატურის ჩამონათვალისა და შესაბამისი ფასების დადგენა თავად რესპუბლიკურ საავადმყოფოს დაევალა.

რა სამუშაოები მიმდინარეობს ამ ეტაპზე და როდის გაიხსნება ახალი კლინიკა? – ბლიცინტერვიუ საავადმყოფოს დირექტორთან, მალხაზ ხალვაშთან.

ბატონო მალხაზ, რა კუთხითაა ჩართული თქვენი საავადმყოფო ახალი კლინიკის მშენებლობაში?  

სამედიცინო დაწესებულებას თავისი ნიუანსები აქვს, იქ არის აირების, ჟანგბადის და სხვა სისტემები, ამიტომ ამ ეტაპზე გავდივართ საინჟინრო-ტექნოლოგიურ მხარეს. პარალელურად, აღჭურვილობა, რაც იყო ჩადებული პროექტში, მიმდინარეობს იმის გადახედვა-განახლება. ასევე ვმუშაობთ საავადმყოფოს პროექტით თავიდანვე არსებული სტრუქტურის ადაპტირებაზე.

კომუნიკაციების მოწესრიგება მშენებელ კომპანიას ევალება?

დიახ. ასე იყო თავიდანვე ჩადებული, თუმცა სჭირდება გარკვეული დაზუსტებები, იმიტომ, რომ რთული სამედიცინო-საინჟინრო სისტემებია. ჩვენ დაგვავალეს და ვმუშაობთ ამ კუთხით ინტენსიურად.

კლინიკის სამედიცინო აპარატურით აღჭურვას დაახლოებით რა თანხა დასჭირდება?

იმისთვის, რომ  აპარატურისთვის საჭირო ფასი, საბოლოო ბიუჯეტი დაიდოს, საჭიროა ბაზრის კვლევების ჩატარება. დაწყებული გვაქვს ეს პროცესიც, თუმცა ამას რამდენიმე თვე დასჭირდება.

დაახლოებით რა პერიოდი?

დღეს ნებისმიერ ჩვენგანს შეუძლია შევიდეს ინტერნეტში, მოძებნოს კატალოგები და ფასები დადოს, თუმცა ჩვენ შევეცდებით, რომ მაქსიმალურად ობიექტურ ფასებზე გავიდეთ, რომელიც შემდეგ იქნება უკვე სატენდერო ფასები. ანუ, შევქმნათ არა მიახლოებითი და სუბიექტური ფასების ჩამონათვალი, არამედ კანონმდებლობის შესაბამისი და ეს ფასები მივიღოთ ბაზრის კვლევის შედეგად.

ახალი შენობის სამედიცინო აღჭურვილობისთვის საჭირო სავარაუდო თანხა თუ არის გათვალისწინებული წელს რომელიმე [საავადმყოფოს, სამინისტროს, აჭარის] ბიუჯეტში ?

თანხა რომ გამოიყოს, სჭირდება იმ ფასების დადება, რაც ზემოთ აღვნიშნე. თანხის გამოყოფა და ბიუჯეტის საკითხები კი ჩემს კომპეტენციას სცდება, ეს მთავრობის პრეროგატივაა.

თქვენი ინფორმაციით, საბოლოოდ შეჯერდნენ მთავრობაში, რომ ახალი კლინიკა საუნივერსიტეტო იქნება, თუ კიდევ განიხილება ეს საკითხი?

ვფიქრობ, ცოტა არასწორადაა აღქმული ეს საუნივერსიტეტო კლინიკის არსი. საუბარია კლინიკის ისეთი მუშა სტრუქტურის შექმნაზე, რომელშიც გარკვეული როლი აქვს აკადემიურ კომპონენტს. საუნივერსიტეტო კლინიკა არავითარ შემთხვევაში არ ნიშნავს იმას, რომ ის უნივერსიტეტს ეკუთვნის. რესპუბლიკური საავადმყოფო დღესაც საუნივერსიტეტო კლინიკაა, ჩვენ დღესაც სტუდენტები გვყავს, ტარდება ლექციები. საუბარია მუშაობის სპეციფიკაზე და არა კლინიკის კუთვნილებაზე. ჩვენ და უნივერსიტეტი ვთანამშრომლობთ რამდენიმე წელია და ეს თანამშრომლობა გაგრძელდება, უბრალოდ, ახალ კორპუსში ჩვენ დაგეგმილი გვაქვს, რომ ყველა დეპარტამენტში იყოს სასწავლო ოთახები. ამასთან, შევეცდებით შევიძინოთ ისეთი აპარატურა, რომელიც მოგვცემს საშუალებას, გარდა სამედიცინო ფუნქციისა, შეასრულოს სწავლების ფუნქციაც.

დაახლოებით როდისთვის გადავა ახალ კორპუსში რესპუბლიკური საავადმყოფო?

შესაძლებელია ახალი კლინიკა გაიხსნას ძალიან ადრე, შესაძლებელია დროში გაიწელოს, მაგრამ კიდევ ერთხელ მინდა ხაზი გავუსვა, რომ ეს ყველაფერი დამოკიდებულია მიმდინარე პროცესებზე. მედიცინას აქვს ძალიან ბევრი ნიუანსი და ერთმნიშვნელოვანი პასუხები არ გვაქვს. მე რომ სასტუმროს შენობაზე ან საცხოვრებელ სახლზე ვსაუბრობდე, ადვილი იქნება ამ შეკითხვაზე პასუხის გაცემა, მაგრამ საავადმყოფოსთან დაკავშირებით პასუხის გაცემა ამ ეტაპისთვის გამიჭირდება. ვფიქრობ, რომ ამას დასჭირდება თვეები. მაგრამ რამდენიმე თვე, იმიტომ, რომ უკვე გადავედით ფინალური კომპონენტების სტადიაზე, რაც კლინიკის გახსნას უკავშირდება.

გამოდის, მიმდინარე წელს არ გაიხსნება?

ძალიან დიდი იმედი მაქვს, რომ მიმდინარე წელს შევძლებთ გახსნას.

როდის დასრულდება უშუალოდ ახალი კორპუსის მშენებლობა?

გეგმა-გრაფიკის მიხედვით, კორპუსის მშენებლობის კომპონენტი უნდა დასრულდეს მიმდინარე წლის სექტემბერში. გარდა ამისა, არის ტერიტორიის მოპირკეთების კომპონენტი, შპს „სტადიონს“ შესყიდული აქვს ეზოში პარკის მოწყობის პროექტიც, ანუ რაღაც ნაწილი პროექტის დასრულდება ადრე, ნაწილი კი გაგრძელდება, იმიტომ, რომ ის კორპუსი, სადაც ახლა ვართ, უნდა დაინგრეს, როცა გადავალთ ახალში და აქ ავტოპარკინგი უნდა მოეწყოს. ჯერჯერობით მუშაობა გრძელდება.

აჭარის მთავრობა აცხადებს, რომ ახალი კლინიკა სოციალური პროექტია…

სოციალური პროექტი ნიშნავს, რომ არის სახელმწიფო საავადმყოფო, რომელიც სახელმწიფო ბიუჯეტით არის შექმნილი და რომელიც იქნება არამომგებიანი საწარმო. ანუ, არ იქნება მოგების კომპონენტი – არ იქნება მოგებაზე ორიენტირებული და იმუშავებს სახელმწიფო ტარიფებით.

კონკურენციას არ გაუწევს კერძო კლინიკებს?

არანაირ კონკურენციას არ გაუწევს არავის… სოციალურ პროექტზე როცა ვლაპარაკობთ, ჩვენ გვაქვს უზარმაზარი რაოდენობა შემთხვევებისა, როცა ადამიანებს დახმარება სჭირდებათ, მაგრამ დაფინანსების კომპონენტი არის რთული. ბევრი მოწყვლადი მოსახლეობა გვყავს სამწუხაროდ და ამ ადამიანებს სჭირდებათ სრულყოფილი სამედიცინო დახმარება და ვეხმარებით ჩვენ. არის კატასტროფის კომპონენტები, სხვადასხვა ტიპის შემთხვევები, როცა საჭიროა საავადმყოფოს ჩართულობა და არ არის იმის შესაძლებლობა, რომ ფინანსური კომპონენტისკენ მოიხედო. ამ თვალსაზრისით ჩვენ ყველანაირად მოვემსახურებით მოსახლეობას საჭიროებისამებრ. ესაა კლინიკის სოციალური კომპონენტი.

---

ახალ საავადმყოფოს კომპანია „საბა კონსტრაქშენი“ აშენებს, რომელთანაც ხელშეკრულება 22 მილიონ 172 ათას 764 ლარზე, 2016 წლის იანვარში გაფორმდა. ამ ხელშეკრულებით, ახალი საავადმყოფოს მშენებლობა 2018 წლის 18 მაისამდე უნდა დასრულებულიყო. მშენებლობაზე ტენდერი აჭარის ფინანსთა და ეკონომიკის სამინისტროს შპს „სტადიონმა“ გამოაცხადა. მშენებლობას სწორედ შპს „სტადიონი“ ზედამხედველობს. თავდაპირველ ხელშეკრულებაში ცვლილება, მშენებლობის მიმდინარეობისას, უკვე ოთხჯერ შევიდა.

ამავე თემაზე:

იყიდება თუ არა ბათუმის რესპუბლიკური საავადმყოფო

See more

დღეს, 12 მაისს, ბათუმში, „ევროპის მოედანზე“, ახალგაზრდებმა საპროტესტო აქცია გამართეს. ისინი გუშინ თბილისში, ღამის კლუბებში სპეცრაზმელების შეჭრას და ახალგაზრდებზე ძალადობის ფაქტს აპროტესტებდნენ. აქცია ნახევარი საათის განმავლობაში მშვიდ ვითარებაში მიმდინარეობდა.

„დღევანდელ აქციაზე ჩვენ გვინდოდა იმის თქმა, რომ პოლიციის ქმედება არ უნდა გადაიზარდოს ძალადობაში, დაკავებაში. დღეს, 11:00 საათზე, ჩვენ შევიკრიბებით კლუბ „ბაქანში“, რომ ყველას ვაჩვენოთ, ეს არის ძალადობის საწინააღმდეგო აქცია და არა ნარკოტიკების პროპაგანდა. ცეკვით, ერთად ყოფნით ვაჩვენოთ ყველას, რომ კლუბური ცხოვრება არ არის ნარკოტიკების პროპაგანდა“ – ამბობს ზურა აბზიანიძე, ბათუმში გამართული აქციის ერთ-ერთი მონაწილე.

დღეს, 12 მაისს, ბათუმში, ახალგაზრდების ჯგუფი თბილისში, კლუბ „ბასიანსა“ და „გალერიში“ სპეცრაზმელების შეჭრასა და მოქალაქეებზე ძალადობას აპროტესტებდა.

ბათუმში აქციის სამი მონაწილე პოლიციამ დააკავა, თუმცა მოგვიანებით სამივე  გაათავისუფლეს.

მემედ აბაშიძის ქუჩაზე მსვლელობის დროს, პოლიციამ საპროტესტო აქციის სამი მონაწილე დააკავა. ესენი არიან მარიამ ბეჟანიშვილი, კობა სურმანიძე და გიორგი ბოლქვაძე. აქციის მონაწილეები პოლიციის მისამართით სკანდირებენ – „მოძალადეები“.

„სისტემა უნდა დაინგრეს“, „სიჩუმე დანაშაულია“, – გაიძახიან საპროტესტო აქციის მონაწილეები. ასევე ისმის შეძახილები: „ძირს მოძალადე პოლიცია“.

„ბათუმელების“ პირდაპირ ჩართვაში ჩანს როგორ აკავებენ აქციის მონაწილეებს:

საპროტესტო აქცია „ევროპის მოედანზე“ რამდენიმე წუთის წინ დაიწყო, ახალგაზრდების ნაწილი გუშინ თბილისში, კლუბ „ბასიანში“ სპეცრაზმის შეჭრას და ახალგაზრდებზე ძალადობის ფაქტს აპროტესტებდა.

აქციაზე მობილიზებული იყო საპატრულო პოლიცია.  დაკავებულთა ზუსტ რაოდენობას შსს-ში ადგენენ. აქციის მონაწილეები აჭარის პოლიციის დეპარტამენტის ადმინისტრაციული შენობისკენ მიდიან.

ამავე თემაზე:

ბათუმში ახალგაზრდები ხელისუფლების ნარკოპოლიტიკას აპროტესტებენ

See more