მერობის შემთხვევაში აპირებს თუ არა „ქართული ოცნების“ ბათუმის მერობის კანდიდატი ქალაქში ახალი მეჩეთის მშენებლობაზე ნებართვის გაცემას, გიორგი ერმაკოვისგან გასხვავებით?  – ლაშა კომახიძემ „ბათუმელების“ შეკითხვას ასე უპასუხა:

„მხოლოდ იმას გეტყვით, რომ მთავრობასთან ერთად ამ საკითხზე აქტიური კონსულტაცია მიმდინარეობს და მე ღრმად ვარ დარწმუნებული, რომ საბოლოო გადაწყვეტილება იქნება ის, რაც ჩვენს მუსლიმ მრევლს ახარებს და მათთვის იქნება მისაღები, პირველ რიგში. ჩემი პირადი დამოკიდებულება ჩემი ქცევებით არაერთხელ დამიფიქსირებია. ეს იყო არა მხოლოდ ბათუმში, არამედ მაღალმთიან აჭარაში მათთან ერთად მონაწილეობა მიმიღია სხვადასხვა თემის განხილვებში. იგივე ღორჯომის და ხულოს სხვა თემებში არა ვარ უცხო პიროვნება მათთვის. ჩემი დამოკიდებულება მუსლიმმა მრევლმა იცის. ამ ეტაპზე მხოლოდ იმის თქმა შემიძლია, რომ გარკვეულ საკითხებზე საბოლოო კონსულტაციების შემდეგ მივიღებთ გადაწყვეტილებას“, – გვითხრა ლაშა კომახიძემ.

ბათუმის არჩეულ მერს დამოუკიდებლად შეუძლია ნებართვის გაცემა მეჩეთის მშენებლობაზე. შესაბამისად, ქართული ოცნების“ მერობის კანდიდატს „ბათუმელებმა“ სთხოვა საკითხის დაზუსტება იმ კუთხით, თუ პერსონალურად თავად რას აპირებს, რაზედაც მერობის კანდიდატმა გვიპასუხა:

„მერი მარტო ასეთ გადაწყვეტილებას არ ღებულობს. გადაწყვეტილება მიიღება საკრებულოსთან და ასე შემდეგ კონსულტაციების შემდეგ. ზოგადად, რელიგიის თავისუფლებით უნდა ისარგებლოს ყველამ. მივესალმები ყველა რელიგიას და მუსლიმ მრევლს აჭარაში განსაკუთრებული პატივისცემით და ქედის მოხრით.“

ლაშა კომახიძესთან ვრცელ ინტერვიუს „ბათუმელები“ მოგვიანებით შემოგთავაზებთ.

ამავე თემაზე:

გიორგი ერმაკოვის ბრძანების დეტალები, რითაც ბათუმში მეჩეთის მშენებლობა დაიბლოკა