22 დეკემბერს, გვიან ღამით, ქედაში, სოფელ ცხმორისში, ისტორიული მეჩეთი დაიწვა.
დამწვარი მეჩეთის ფოტოები სამუფთოს ინტერნეტტელევიზიამ გაავრცელა.
მათივე ცნობით, დასავლეთ საქართველოს მუფთი ადამ შანთაძე დღეს, 23 დეკემბერს, სოფელ ცხმორისში იმყოფებოდა და მოსახლეობას დაჰპირდა, რომ მეჩეთს უახლოეს პერიოდში აღადგენენ.
ცხმორისის მინარეთიან მეჩეთს აჭარის უძრავი ძეგლის სტატუსი ჰქონდა. მისი პირველი სართული თლილი ქვით იყო ნაშენი, მეორე სართული კი – ხით.
ისტორიული წყაროების მიხედვით, ცხმორისის მეჩეთი 1892-1893 წლებში უნდა იყოს აშენებული. საბჭოთა პერიოდში სალოცავი დაკეტილი და უფუნქციო იყო.
ცხმორისის მეჩეთს კულტურული მემკვიდრეობის ძეგლის სტატუსი 2006 წელს მიენიჭა.
ასე გამოიყურებოდა ცხმორისის მეჩეთი ხანძრამდე ფოტო: აჭარის კულტურული მემკვიდრეობის დაცვის სააგენტო
2025 წელს ზემო აჭარაში უკვე მეორე ისტორიული მეჩეთი დაიწვა. მიმდინარე წლის მარტში მეჩეთი დაიწვა ხულოში, სოფელ საციხურში.
ხულოში დაიწვა მეჩეთი, რომელიც კულტურული მემკვიდრეობის ძეგლი იყო
