Batumelebi | NDI-ის კვლევის შედეგები: 65% მხარს უჭერს საქართველოს ევროკავშირში ინტეგრაციას NDI-ის კვლევის შედეგები: 65% მხარს უჭერს საქართველოს ევროკავშირში ინტეგრაციას – Batumelebi
RU | GE  

NDI-ის კვლევის შედეგები: 65% მხარს უჭერს საქართველოს ევროკავშირში ინტეგრაციას

 

ეროვნულ-დემოკრატიულმა ინსტიტუტმა (NDI) დღეს სასტუმრო „შერატონში“ საზოგადოებრივი აზრის კვლევის ბათუმის შედეგები გაასაჯაროვა. კვლევა NDI საქართველოს დირექტორმა ლუის ნავრომ წარმოადგინა. ბათუში გამოკითხულთა 65% მხარს უჭერს საქართველოს ევროკავშირში ინტეგრაციას.

 

მისი შეფასებით წინა კვლვასთან მნიშვნელოვანი ცვლილება არ დაფიქსირებულა.

 

ლუის ნავარო: „როგორც ეროვნულ მასშტაბით, ისე ბათუმის მონაცემებითაც პრიორიტეტები წინა კვლევასთან შედარებით არ შეცვლილა. რაც შეიცვალა არის საგარეო ურთიერთობებთან მიმართებაში მონაცემები. ამ კვლევის თანახმად საქართველოში უფრო მეტი ადამიანი რუსეთს აღიქვამს რეალურ საფრთხედ. მაშინ როდესაც ბათუმში უფრო ნაკლებად აღიქვამენ, და ამბობენ, რომ ეს საფრთხე უფრო მეტად გაზვიადებულია. ასევე ბათუმის მოსახლეობას უფრო მეტად მოსწონს საქართველოს ამჟამინდელი ურთიერთობა რუსეთთან, ვიდრე მთელ ქვეყნაში. ამასთან ერთად, ბათუმის მოსახლეობა უფრო მეტად ოპტიმისტურად არის განწყობილი ეკონომიკური საკითხებისა და ქვეყნის განვითარების კურსის მიმართ“.

 

ბათუმელების 55%-ის აზრით, ყველაზე მნიშვნელოვანი ეროვნული საკითხი კვლევის მიხედვით სამუშაო ადგილებია. მეორე ადგილზე მოდის პენსიები (25%), მას მოსდევს ტერიტორიული მთლიანობა (24%), სიღარიბე (20%), ხელფასები (20%), რუსეთთან ურთიერთობა (17%), ხელმისაწვდომი სამედიცინო მომსახურება(14%), განათლება (12%), ფასების ზრდა/ინფლაცია(11%), ადამიანის უფლებები (10%), ნატოში გაწევრიანება (10%), სამართლიანი არჩევნები (8%), სიტყვის თავისუფლება (5%), სასამართლო სისტემა (4%), ევროკავშირში გაწევრიანება (3%), საკუთრების უფლება (3%), კრიმინალი (2%), უმცირესობათა უფლებები (2%) და ციხეები და პატიმრები, რომელსაც გამოკითხულთა 0% მიიჩნევს ეროვნულ მნიშვნელობის საკითხად.

 

ბათუმელების 54% ადგილობრივი მნიშვნელობის საკითხად პირველ ადგილზე კომუნალური მომსახურების ღირებულებას ასახელებს.

 

ბათუში გამოკითხულთა 65% მხარს უჭერს საქართველოს ევროკავშირში ინტეგრაციას, ევრაზიულ კავშირში გაწევრიანებას კი 16%. ბათუმელების 50% საქართველოსთვის რუსეთს რეალურ საფრთხედ მიიჩნევს, ეს მაჩვენებელი NDI-ის 2013 წლის ნოემბრის კვლევასთან შედარებით (36%) გაზრდილია.

 

აღნიშნული კვლევა ჩატარებულია 28 მარტიდან 18 აპრილის ჩათვლით. საქართველოს მასშტაბით 3 942 ადამიანი გამოიკითხა, აქედან დაახლოებით 400 ადამიანი კი – ბათუმში.

კვლევის ცდომილების ზღვარი 2%-ია, რაც კვლევის ცდომილების ბუნებრივი მაჩვენებელია.

 

NDI პოლიტიკურ რეიტინგებს  ხუთშაბათს გაასაჯაროებს და წარმოადგენს თვითმართველობის არჩევნებთან დაკავშირებულ საკითხებს.

ნეტგაზეთის მასალების სხვა გამოცემებში გადაბეჭდვის წესი
ნინო ხიმშიაშვილი