არასამთავრობო ორგანიზაციების ხაზს უსვამენ იმას რომ, 2012 წლის საპარლამენტო არჩევნების შემდეგ ხელისუფლებაში მოსულ მმართველ კოალიციას ამ მიმართულებით არანაირი სისტემური ცვლილება არ განუხორციელებია. „დაპირების მიუხედავად, სამართალდამცავ ორგანოებს კვლავ აქვთ შეუზღუდავი წვდომა კავშირგაბმულობის ოპერატორთა მონაცემებთან და მოქალაქეთა შორის ყველა სახის კომუნიკაციასთან. მობილურ ოპერატორებთან განთავსებულ ე.წ. „შავი ყუთების“ მეშვეობით, სამართალდამცავ უწყებებს შესაძლებლობა აქვთ, ერთდროულად მოუსმინონ, ათიათასობით ადამიანს, დაადგინონ მათი ადგილსამყოფელი, წაიკითხონ სმს-ები და პირადი ელექტრონული მიმოწერა. ყოველივე ეს საფრთხეს უქმნის პირადი ცხოვრების ხელშეუხებლობის კონსტიტუციური გარანტიის დაცვას“, – შეხვედრაზე განაცხადა ანა ბერძენიშვილმა, არასამთავრობო ორგანიზაცია „გამჭვირვალობა საქართველოს“ იურისტმა.
საიას აჭარის ფილიალის თავმჯდომარე, იურისტი გია ქარცივაძე კანონში არსებულ ხარვეზებზე საუბრობს. მისი ინფორმაციით, მოწყობილობა რომელიც აქვს შინაგან საქმეთა სამინისტროს, იძლევა იმის საშუალებას, რომ სასამართლო თანხმობის გარეშე ნებისმიერ ადამიანს მოუსმინონ: „არასამთავრობო სექტორი ახალი კამპანიის მიზანია, ეს წრე დაიხვეწოს, მინიმუმამდე დავიდეს იმის შესაძლებლობა, რომ სასამართლო თანხმობის გარეშე ვერ მოუსმინონ ადამიანებს. საკანონმდებლო წინადადება უკვე მზადდება.“
არასამთავრობო სექტორი 19 მარტიდან ხელმოწერების შეგროვებას იწყებს, რითაც პარლამენტს მიაწვდიან საზოგადოების პოზიციას. კამპანიის მიზანია ფარული მიყურადების და თვალთვალის სფეროში არსებული სტრუქტურის შეცვლა. როგორც გამჭვირვალობა საქართველოს იურისტი ანა ბერძენიშვილი ამბობს, ახალი საკანონმდებლო ინიციატივა მოგვცემს ამის საშუალებას: „კანონის მიღება, რომელიც ახლა ინიცირებულია პარლამენტში, არის გარანტი იმისა, რომ იმ სისტემით რა სისტემითაც დღეს ხდება ფარული მიყურადება და თვალთვალი, შემდეგში აღარ მოხდება. კანონი ითვალისწინებს გარკვეულ დროსა და ლიმიტს, როდის შეიძლება მოსმენა, აგრეთვე ითვალისწინებს იმ დანაშაულს რა დანაშაულის შემდეგაც შეიძლება მოსმენა, აგრეთვე აწესებს ფარული მიყურადების შედეგად მოპოვებული ინფორმაციის განადგურებისა თუ მისი შენახვის წესებს“, – ამბობს ანა ბერძენიშვილი.
კამპანიის ფარგლებში დაგეგმილია შეხვედრების, აქციებისა და კონფერენციების ჩატარება მთელი საქართველოს მასშტაბით.
