„ბათუმის ბულვარში“ დასაქმებულთა რაოდენობა 37-ით გაიზარდა

„ბათუმის ბულვარის“ ახალი დებულება დღეს, 27 იანვარს, აჭარის მთავრობამ დაამტკიცა. „სტრუქტურის შეცვლით ბათუმის ბულვარი უფრო ეფექტურად განახორციელებს თავის ფუნქციას,“ – აღნიშნა ზურაბ პატარაძემ, აჭარის მთავრობის თავმჯდომარემ.

შეცვლილი დებულების მიხედვით, ბათუმის ბულვარის ადმინისტრაციის 7 სამსახურს კიდევ ერთი სტრუქტურული ერთეული – ადმინისტრაციული სამსახური დაემატება. მთავრობის სხდომაზე ეკონომიკის მინისტრმა, რამაზ ბოლქვაძემ ხაზი გაუსვა იმას, რომ სამსახურის დამატება პირიქით, შტატების შემცირებას გამოიწვევს და ხარჯები დაიზოგება.

შტატების რაოდენობა სსიპ „ბათუმის ბულვარში“ 94-დან 66-მდე შემცირდა, თუმცა ადმინისტრაციას 65 შტატგარეშე თანამშრომელი ეყოლება. ამის შესახებ „ბათუმელებს“ ეთერ მაჭუტაძე ესაუბრა, „ბათუმის ბულვარის“ დირექტორი.

„მებაღეების რაოდენობა აქამდე იყო მხოლოდ 28 და ეს იყო შტატით გათვალისწინებული… მე ასეთი მუშაობა არ მიყვარს. ამხელა ტერიტორიას 28 მებაღე ვერ მოუვლის. მებაღე ამჯერად მეყოლება 65 და ისინი იქნებიან შტატგარეშე თანამშრომლები, ისინი გამომუშავებით მიიღებენ ხელფასს. ამისთვის მე ბიუჯეტიდან დამატებით არაფერი მომითხოვია“, – აცხადებს ეთერ მაჭუტაძე.

ბულვარის ადმინისტრაციის ახალი დირექტორის თქმით, მოახერხებს ახალი მებაღეებისთვის ანაზღაურების მიცემას. პირველი კვარტლის შემდეგ მონაცემების შეჯერების შემდეგ კი, ეთერ მაჭუტაძე არ გამორიცხავს ცვლილებებს, მათ შორის დაფინანსების კუთხით.

რით არის დასაბუთებული ახალი სამსახურის დამატება? – ამ კითხვაზე „ბათუმელებს“ ზურაბ პატარაძემ სხდომის დასრულების შემდეგ ასე უპასუხა:

„მცირდება ადმინისტრაციული ხარჯები, თქვენ იქნებით მომსწრე ამის, რომ უახლოეს პერიოდში მთავრობის აპარატშიც დაგეგმილია ცვლილებები და იქნება ოპტიმიზაცია, იქნება უფრო მოქნილი სისტემა. უშუალოდ ბულვარის ადმინისტრაციას რაც შეეხება, ბულვარი არის ჩვენი პრიორიტეტი. იქ იქნება ეფექტური მართვა. ადმინისტრაციას ყავს ახალი დირექტორი და მალე ახალი პროექტებიც დაანონსდება“.

მთავრობის თავმჯდომარემ  ბულვარის ადმინისტრაციას ახალ უფროსად ეთერ მაჭუტაძე მიმდინარე წლის 10 იანვარს  წარუდგინა. ბათუმის ბულვარის მართვასა და ინფრასტრუქტურის მოვლა-შენახვისთვის კი აჭარის ფინანსთა და ეკონომიკის სამინისტრომ 2017 წლისთვის 7 მილიონ 590 ათას 200 ლარი გამოყო.